Ngani Syambone Syaŵalembile Mateyu

27 Pakwachele, ŵakulolela ŵakutaga mbopesi wosope soni achakulungwa ŵa ŵandu ŵasongangene ni kulangana yakuti amwulaje Yesu. 2 Kaneko jemanjaji ŵamtaŵile, ni ŵapite najo kukumpeleka kwa Pilato, jwakulamulila.

3 Sambano Yudasi, juŵampeleche jula, pakuyiwona kuti Yesu alamulidwe kuti amwulaje, ŵalitendele chanasa mnope ni ŵapite kukuwusya mbiya 30 sya silifa sila kwa ŵakulolela ŵakutaga mbopesi soni achakulungwa, 4 ni jwalakwe ŵasalile kuti, “Nalemwisye pakupeleka myasi ja mundu jwangalemwa.” Jemanjajo ŵamjanjile kuti, “Yenu yeleyo! M’we ngayikutukwaya!” 5 Pelepo jwalakwe jwaponyisye mbiya sya silifasyo ku nyumba ja Mlungu ni kutyoka. Kaneko jwapite kukulitaŵilila. 6 Nambo ŵakulolela ŵakutaga mbopesi ŵajigele mbiya sya silifasyo ni kuŵecheta kuti, “Nganiyiŵa yakuŵajilwa kusiŵika m’malo gakusunjila mbiya m’nyumba ja Mlungu, ligongo sili mbiya sya myasi.” 7 Jemanjaji paŵakambilene, ŵakamulene yakuti mbiyasyo asumile mgunda* kuti uŵe malembe ga achalendo. 8 Myoyo, mgundawo ukusamanyika ni lina lyakuti Mgunda wa Myasi mpaka lelo. 9 Pelepo yaŵalochesye Yelemiya yatendekwe, yakuti, “Ŵajigele mbiya 30 sya silifa, mtengo wakusumila mundu wele Ayisalayeli ŵane ŵawutamilikasisye. 10 Mbiyasyo ŵasumile mgunda mwakamulana ni yaŵandamwile Yehofa.”

11 Sambano Yesu ŵajimi pameso pa jwakulamulila, ni jwakulamulilajo ŵamwusisye jwalakwe kuti, “Ana mmweji mli Mwenye jwa Ayuda?” Yesu ŵajanjile kuti, “Wawojo asyene ni ŵakuŵecheta yeleyi.” 12 Nambo ŵakulolela ŵakutaga mbopesi ni achakulungwa paŵamjimbaga magambo, jwalakwe nganajanga chilichose. 13 Kaneko Pilato ŵatite, “Ana ngamkupikana magambo gosope gakumjimba ŵanduga?” 14 Nambo jwalakwe nganajanga chilichose, mwamti jwakulamulilajo jwasimonjile mnope.

15 Sambano pa chisangalalo chilichose cha Pasika, jwakulamulilajo jwagopolelaga ŵandu mkayidi jwakumsaka jemanjajo. 16 Pandaŵi jeleji chigaŵenga chine chakogoya lina lyakwe Balaba chaliji m’nyumba ja ukayidi. 17 Myoyo Pilato ŵawusisye ŵandu ŵaŵasongene pelepo kuti, “Ana mkusaka namgopolele ŵani, Balaba kapena Yesu jwakumkolanga kuti Klistuju?” 18 Pilato jwamanyililaga kuti jemanjajo ampeleche Yesu ligongo lya jelasi.* 19 Konjechesya pelepa, jwalakwe ali atemi pamalo gakwimbila magambo, ŵamkwakwe ŵamtumichisye utenga wakuti, “Magambo ga mundu jwakulungamajo gakakwaya, ligongo lelo ndagasiche mnope ni sagamisi syakwamba mundu jweleju.” 20 Nambo ŵakulolela ŵakutaga mbopesi ŵalimbikasisye ŵandu kuŵenda yakuti amgopole Balaba, nambo kuti Yesu amwulaje. 21 Jwakulamulilajo paŵapikene yeleyi, ŵawusisye jemanjajo kuti, “Pa ŵandu ŵaŵiliŵa, ana akusaka kuti nagopolele ŵani?” Jemanjajo ŵajanjile kuti, “Atugopolele Balaba.” 22 Pilato ŵawusisyesoni kuti, “Nambi Yesu jwakumkolanga kuti Klistuju, ndende najo chichi?” Wosopewo ŵajanjile kuti, “Akamwulaje jwelejo!” 23 Jwalakwe jwatite, “Ligongo chichi? Ana jwalakweju alemwisye chichi?” Nambo jemanjajo ŵapitilisye kugumila kuti, “Akamwulaje jwelejo!”

24 Pilato paŵayiweni kuti yakusaka yakwe yikulepeleka, soni kuti ŵanduwo atandite yachiwawa, jwalakwe ŵajigele mesi ni kunaŵa mmyala mwakwe, kaneko ŵaŵechete kuti, “Une nganingola magambo pa myasi ja mundu jweleju. Magambo gali ni jemanja.” 25 Pelepo ŵandu wosopewo ŵajanjile kuti, “Myasi ja mundu jweleju jiŵe pa m’weji soni pa ŵanache ŵetu.” 26 Myoyo jwalakwe ŵagopolele Balaba, nambo ŵalamwile kuti Yesu amkwapule soni ŵampeleche kuti akamkomele pachitela.

27 Pelepo asilikali ŵa jwakulamulilajo ŵamjigalile Yesu m’nyumba ja jwakulamulilajo kaneko ŵagaŵilasile magulu gosope ga asilikali ni gamsyungulile jwalakwejo. 28 Jemanjaji ŵamwusile Yesu yakuwala yakwe yakusa ni kum’wecha nguwo jekulungwa jechejewu. 29 Asilikaliwo ŵaluchilesoni chisoti chaumwenye chamiŵa ni kum’wecha mumtwe soni ŵampele ndodo mmyala mwakwe. Jemanjaji ŵamtindiŵalilaga ni kumŵechetelaga maloŵe gachipongwe kuti, “Apochele ulemu, wawo Mwenye jwa Ayuda!” 30 Ŵamsunile mata soni ŵamsumwile ndodo jila ni kutanda kumputa najo mumtwe. 31 Paŵamalisisye kumtendela yachipongweyi, ŵamwusile mkanjo ula ni kum’wecha yakuwala yakwe yakusa, kaneko ŵapite najo kuti akamkomele pachitela.

32 Paŵaliji mkukopoka mumsindamo, ŵasimene ni mundu jwine jwa ku Kulene lina lyakwe Simoni. Mundu jweleju ŵamkanganichisye kuti anyakule chitela chakulagasichila* cha Yesu. 33 Sambano paŵayiche pamalo gakolanjikwa kuti Gologota, kugopolela kuti, Malo ga Chikalakasa, 34 jemanjaji ŵampele finyo jwewanganye ni yindu yakuŵaŵa, nambo paŵapasisye, ŵakanile kumwa. 35 Paŵamkomele jwalakwejo pachitela, jemanjajo ŵagaŵene yakuwala yakwe yakusa mwakutenda kalotalota,* 36 soni ŵatemi papopo ni kumlolelaga. 37 Nambosoni penani pakwe ŵaŵisile chikwangwani chakulondesya magambo gaŵamjimbaga kuti, “Aju ali Yesu Mwenye jwa Ayuda.”

38 Kaneko ŵachiswamba ŵaŵili ŵakomelesoni payitela chiŵandika ni jwalakwejo, jwine kumlyo jwine kumchiji. 39 Ŵandu ŵaŵapitaga pelepo, ŵapukunyaga mitwe jawo kwineku ali mkuŵecheta mwamwano 40 kuti, “Ngati mwatiga mpaka mgwisye nyumba ja Mlungu ni kujitaŵasoni m’masiku gatatu? Mlikulupusyetu! Naga mli mwanache jwa Mlungu, mtuluchetu pachitela chakulagasichilacho!”* 41 Nombenawo ŵakulolela ŵakutaga mbopesi pampepe ni alembi soni achakulungwa ŵatandite kumnyosya kuti, 42 “Ŵakombwele kwakulupusya ŵandu ŵane, nambo akulepela kulikulupusya msyene! Ngati ateje kuti ali Mwenye jwa Ayisalayeli, atuluchetu pachitela chakulagasichilacho kuti m’we tumkulupilile. 43 Ngati akusati akusamkulupilila Mlungu, sambano Mlungujotu amkulupusye naga akumsaka, pakuŵa jwalakweju jwaŵechetaga kuti, ‘Une ndili Mwanache jwa Mlungu.’” 44 Atamose ŵachiswamba ŵaŵaliji payitela chiŵandika jwalakwejo nombenawo ŵamnyosyaga.

45 Kutandila cha mma 12 kolo­ko* musi, chipi chatesile m’chi­lambocho mpaka cha mma 3 koloko* kwigulo. 46 Cha mma 3 ­kolokomo, Yesu ŵagumisile kuti, “Eli, Eli, lamasabakitani?” kugopolela kuti, “Mlungu jwangu, ­Mlungu jwangu, ­ligongo chichi andesile une?” 47 Ŵandu ŵaŵaliji pelepo paŵapikene yeleyi, ŵatandite kuŵecheta kuti, “Munduju akumŵilanga Eliya.” 48 Ndaŵi jijojo jumo mwa ŵanduwo jwawutwiche kuja kujigala siponji ni kujiloŵeka mu finyo jwewanganye ni yindu yakuŵaŵa, kaneko ŵajiŵisile ku ndodo ni kumpa kuti amwe. 49 Nambo ŵandu ŵanewo ŵatite, “Amleche tulole naga Eliyajo chayiche ni kumkulupusya.” 50 Pelepo Yesu jwagumisilesoni kaneko jwamalichiche.

51 Ndaŵi jijojo nguwo* ja m’nyumba ja Mlungu japapwiche pasikati, kutyochela penani mpaka pasi, chilambo chatenganyiche, soni maganga gakasiche. 52 Malembe gawugwiche, soni mitembo jejinji ja ŵandu ŵa Mlungu japonyedwe kusa 53 mwamti ŵandu ŵajinji ŵajiweni. (Yesu paŵajimwiche, ŵandu ŵaŵapitile kumalembeko ŵajinjile mumsinda weswela). 54 Nambo jwamkulungwa jwa asilikali nambosoni ŵandu ŵane ŵaŵaliji nawo pakumlolela Yesu paŵachiweni chisichinyacho* soni yindu yine yayaliji mkutendekwa, woga wakamwile mnope ni ŵatite, “Yisyene, jweleju jwaliji Mwanache jwa Mlungu.”

55 Pelepo papalisoni achakongwe ŵajinji ŵaŵagambaga kulolela ali chapakutalichila. Jemanjaji ŵamkuyisye Yesu paŵatyokaga ku Galileya kuti amtumichileje. 56 Ŵane mwa achakongwewo ŵaliji Maliya jwa ku Magadala, Maliya mamagwe Yakobo ni Yose, soni paliji pana mama ŵawo Yakobo ni Yohane.*

57 Chakumagulo, mundu jwine jwakusichila jwakutyochela ku Alimateya, lina lyakwe Yosefe jwayiche. Jwalakweju jwalijisoni jwakulijiganya jwa Yesu. 58 Mundu jweleju jwapite kwa Pilato kukuŵenda chilu cha Yesu. Myoyo Pilato ŵalamwile kuti ampe chilucho. 59 Yosefe ŵajigele chilucho ni kuchiŵijilila mu nguwo jambone. 60 Kaneko ŵapite kukusika chilucho m’malembe gakwe gasambano, gaŵatesile kusepa pa lwala. Paŵagudubuchisye* liganga lyekulungwa ni kuwugala pamlango wa malembego, jwatyosile. 61 Nambo Maliya jwa ku Magadala soni Maliya jwine jula ŵatemipe kukoko chiŵandika ni malembego.

62 Palisiku lyakuyichisya, lyalyaliji lisiku lya Sabata, ŵakulolela ŵakutaga mbopesi ni Afalisi ŵasongene kwa Pilato, 63 ni ŵamsalile jwalakwejo kuti, “Bwana, m’we tukukumbuchila yaŵaŵechete mundu jwaunami jula paŵaliji chiŵela umi kuti, ‘Panyuma pa masiku gatatu chinjijimuka.’ 64 Sambano, alamule kuti alondele mwakusamala chenene pa lilembe lyakwelyo mpaka pa lisiku lyatatu, ni chakulinga chakuti ŵakulijiganya ŵakwe akayika ni kwiŵa chilu chakwe kaneko ni kwasalilaga ŵandu kuti, ‘Jwalakwejo ajimwiche ku chiwa!’ Myoyo chinyengo chakumalisyachi chichiŵa chakogoya mnope kupunda chandanda chila.” 65 Pilato ŵasalile jemanjajo kuti, “Mpaka mjigale ŵakulondela. Mjawule nawo kuti akalondele malembego mpela mwamkusatendela mula.” 66 Pelepo jemanjajo ŵapite ni kuja kuwugala mwamachili pa lilembelyo ni liganga soni kuŵika ŵakulondela.