Yoswa

24 Kaneko Yoswa ŵasisongangenye pampepe mbumba* syosope sya Isalayeli ku Sekemu, soni ŵasongangenye achakulungwakulungwa ŵa Ayisalayeli, mitwe ja maŵasa, ŵakwelusya soni ŵakulolela. Jemanjaji ŵayiche ni kwima pameso pa Mlungu jwakuwona. 2 Pelepo Yoswa ŵasalile ŵandu wosopewo kuti, “Ayi ni yaŵechete Yehofa Mlungu jwa Ayisalayeli: ‘Kalakala achinangolo ŵenu ŵatamaga ku lisi line lya Lusulo Lwekulungwa* ni ŵajitindiŵalilaga milungu jine. Jumo mwa achinangolowo ŵaliji Tela, baba ŵawo Abulahamu soni Naholi.

3 “‘Pali papite ndaŵi namjigele nangolo jwenu Abulahamu kutyochela ku lisi line lya Lusulo Lwekulungwa* soni namlongolele pakuchijendela chilambo chosope cha Kanani. Nambosoni namtendekasisye kuti mwanache jwakwe* aŵeleche ŵanache ŵajinji. Nampele upile jwalakwe mwamti ŵaŵeleche Isaki. 4 Kaneko Isaki jwaŵeleche Yakobo ni Esawu. Pali papite ndaŵi, nampele Esawu Litumbi lya Seili mpela chipanje chakwe. Nambo Yakobo ni ŵanache ŵakwe natumisye ku Iguputo. 5 Kaneko namtumisye Mose ni Aloni ku Iguputo ni natendekasisye milili kuti jagwile ŵandu ŵa kweleko. Pambesi pakwe, namkopwesye jemanja ku Iguputoko. 6 Panakoposyaga achinangolo ŵenu ku Iguputo, soni mpaka paŵayiche pa Nyasa Jechejewu, Aiguputo ŵatoposyaga achinangolo ŵenu ni magaleta* ga ngondo soni asilikali ŵa pamahachi mpaka ŵayiche ku Nyasa Jechejewu. 7 Jemanjajo paŵatandite kumlilila Yehofa, jwalakwe ŵatendekasisye chipi pasikati pa Aiguputo ni jemanjajo. Kaneko ŵatiŵisye Aiguputowo ni mesi ga m’nyasajo ni gawunichile. Jemanja mwayiweni ni meso genu yanatesile ku Iguputo. Panyuma pakwe mwatemi m’chipululu kwa yaka yejinji.*

8 “‘Kaneko namlongolele jemanja ku chilambo cha Aamoli, ŵaŵatamaga ku lisi line* lya lusulo lwa Yolodani. Ŵandu ŵeleŵa ŵaputile ngondo pakulimbana ni jemanja. Nambo une napeleche jemanjajo mmyala mwenu ni chakulinga chakuti mjigale chilambo chawocho. Soni uneji napyajisile wosope ŵene pameso penu. 9 Kaneko payiche Balaki mwanache jwa Sipoli mwenye jwa ku Mowabu kuti alimbane ni Ayisalayeli. Myoyo jwalakwe ŵamŵilasile Balamu mwanache jwa Beoli kuti amtembelele jemanja. 10 Nambo une nganinampikanila Balamujo. Mmalomwakwe, namtendekasisye jwalakwejo kuti ampe upile jemanja mwakuwilisyawilisya, soni namkulupwisye jemanja mmyala mwakwe.

11 “‘Kaneko jemanja mwajombweche lusulo lwa Yolodani ni kwika ku Yeliko. Ŵakulongolela* ŵa ku Yeliko nambosoni Aamoli, Apelesi, Akanani, Ahiti, Agiligasi, Ahifi soni Ayebusi ŵaputile ngondo jakulimbana ni jemanja. Nambo une napelechesoni jemanjajo mmyala mwenu. 12 Myoyo mkanimyiche m’chilambo achino, natendekasisye jemanjajo kwasa mtima,* mwamti ligongo lya yeleyi jemanjajo ŵatisile pameso penu pampepe ni mamwenye gaŵili ga Aamoli. Ngaŵa kuti mwakombwele kwagomeka jemanjajo ni upanga* soni ukunje wenu, iyayi. 13 Une nampele jemanja chilambochi chele nganimlajilila kuti mchipate, soni mkutama m’misinda jinampele jele nganimlitaŵila jika. Jemanja mkulyasoni yisogosi ya mipeleya soni ya maolifi yele nganimpanda mwachisyene.’

14 “Myoyo jemanja mumjogopeje Yehofa nambosoni mumtumichileje ni mtima weswela* soni mwakulupichika.* Mtyosye milungu jiŵajitumichilaga achinangolo ŵenu ku lisi line lya Lusulo Lwekulungwa* soni ku Iguputo ni mumtumichileje Yehofa. 15 Sambano naga kutumichila Yehofa kukumsakalisya, mlisagulile mwachimsyene lelo jwakuti mumtumichileje. Chinga chimsagule milungu jiŵajitumichilaga achinangolo ŵenu ku lisi line lya Lusulo Lwekulungwa* kapena milungu ja Aamoli ŵali achimsyene ŵachilambo chamkutamachi. Nambo une ni wosope ŵa m’nyumba jangu chitumtumichileje Yehofa.”

16 Pelepo ŵanduwo ŵajanjile kuti, “M’weji nganituŵa tulinjile ata panandi kumleka Yehofa ni kujitumichilaga milungu jine. 17 Yehofa Mlungu jwetu ni juŵatukopwesye m’weji pampepe ni achinangolo ŵetu ku Iguputo kwatwaliji achikapolo. Jwalakwe ni juŵatesilesoni yakusimonjesya yekulungwa m’weji tuli mkulola. Mlungu jweleju ŵaŵelesoni ali mkutuchenjela paulendo wetu wosope soni kwa ŵandu wosope ŵa m’yilambo yatwapitile. 18 Yehofa ni juŵatopwele ŵandu wosope kupwatikapo Aamoli ŵaŵatamaga m’chilambo achino m’weji mkanituyiche. Myoyo m’wejisoni chitumtumichileje Yehofa ligongo jwalakwejo ali Mlungu jwetu.”

19 Sambano Yoswa ŵajanjile ŵanduwo kuti, “Jemanja nganiŵa mkombwele kumtumichila Yehofa, pakuŵa jwalakwejo ali Mlungu jwamswela. Jwalakwe ali Mlungu jwakusasaka kuti ŵandu wosope alipelecheje kwa jwalakwejo jika. Mwamti naga mkulepela kutenda yeleyi, jwalakwe ngasamkululuchila pa kwimuchila kwenuko soni ngasamkululuchila yakulemwa yenu. 20 Naga mkumleka Yehofa ni kutanda kujitumichila milungu ja ŵandu ŵa mitundu jine, jwalakwe chachimgalawuchila jemanja ni kumjonanga atamose kuti ŵamtendele kala yindu yambone.”

21 Nambo ŵanduwo ŵamjanjile Yoswa kuti, “Iyayi, Yehofape ni jwachitumtumichileje.” 22 Pelepo Yoswa ŵasalile ŵanduwo kuti, “Jemanja mwachimsyene mli mboni pa yamsagwile mwakusaka kwenu yakuti chimumtumichileje Yehofa.” Ŵanduwo paŵapikene yeleyi, ŵatite, “Elo m’weji tuli mboni!”

23 “Myoyo mtyosye milungu ja ŵandu ŵa mitundu jine jajili pasikati penu, soni mgalawuchile kwa Yehofa Mlungu jwa Isalayeli ni mtima wenu wosope.” 24 Pelepo ŵanduwo ŵamjanjile Yoswa kuti, “M’weji chitumtumichileje Yehofa Mlungu jwetu soni chitupikanileje maloŵe gakwe.”

25 Myoyo Yoswa palisikuli ŵatesile chilanga ni ŵanduwo ku Sekemu mwamti ŵapele jemanjajo malamusi gakuti akuyeje. 26 Kaneko Yoswa ŵalembile yindu yosopeyi m’buku ja Chilamusi cha Mlungu, soni ŵajigele liganga lyekulungwa ni kuja kuliŵika pasi pa chitela chekulungwa chachaliji mwakuŵandikana ni malo geswela ga Yehofa.

27 Yoswa ŵapitilisye kwasalila ŵandu wosopewo kuti, “Ngati aliweni ligangali? Liganga lyeleli lichiŵa mboni jakutusisya m’weji ligongo lipikene yosope yaŵechete Yehofa kwa m’weji. Liganga lyeleli lichiŵa mboni jakumsisya jemanja ni chakulinga chakuti mkamkana Mlungu jwenu.” 28 Yoswa paŵamalisisye kuŵecheta yeleyi ŵasalile ŵanduwo kuti ajawuleje, jwalijose ku malo gakwe gaŵapochele mpela chipanje chakwe.

29 Pambesi pa yindu yeleyi, nganipapita ndaŵi jelewu kaneko Yoswa mwanache jwa Nuni, jwakutumichila jwa Yehofa, ŵawile ali akwete yaka 110. 30 Myoyo Ayisalayeli ŵamsichile m’malembe jwalakwejo ku Timunati-sela, ku malo gakwe gaŵapochele mpela chipanje chakwe. Malo gelega gali mu dela jamatumbi ja Efulayimu, chakumpoto kwa Litumbi lya Geyasi. 31 Ayisalayeli ŵamtumichile Yehofa mundaŵi josope ja Yoswa. Jemanjaji ŵapitilisyesoni kutenda myoyo mundaŵi josope ja achakulungwakulungwa ŵaŵatumichile ni Yoswa, ŵele ŵaŵayiweni ni meso gawo yosope yaŵatesile Yehofa kwa Ayisalayeli.

32 Mawupa ga Yosefe gele Ayisalayeli ŵagajigele ku Iguputo, ŵagasichile m’malembe ku Sekemu, mumgunda wele Yakobo ŵawusumile kutyochela kwa ŵanache ŵa Hamoli, baba ŵawo Sekemu. Mgundawu ŵawusumile ni mbiya 100 sya silifa. Mgunda welewu waŵele wa yisukulu ya Yosefe mpela chipanje chawo.

33 Nombe najo Eliyesala mwanache jwa Aloni jwawile. Myoyo Ayisalayeli ŵamsichile jwalakwejo m’malembe, ku litumbi lya mwanache jwakwe Pinihasi. Litumbi lyeleli lili limo mwa matumbi gaŵapochele mu dela jamatumbi ja Efulayimu.