Chikalata Chakwawula kwa Tito

2 Nambo mmwejo, mkusosekwa mpitilisye kuŵecheta yindu yakamulana ni chijiganyo chisyesyene.* 2 Achalume ŵachikulile akusosekwa atendeje yindu mwangapelenganya malile, aŵe ŵangali uwanache, ŵaganisya chenene, ŵachikulupi chakulimba, ŵachinonyelo chekulungwa soni ŵakupilila mnope. 3 Nombenawo achakongwe ŵachikulile akusosekwa akole ndamo syakusakola ŵandu ŵandamo syeswela, akaŵa ŵamiseche, akaŵa achikapolo ŵa finyo jwejinji, nambo aŵeje ŵakwiganya ŵa yindu yambone, 4 kuti ŵajiganyeje* achakongwe ŵachisikana kwanonyela achiŵamkwawo, kwanonyela ŵanache ŵawo, 5 kuŵa ŵaganisya chenene, ŵandamo syeswela, ŵakamula masengo gapamlango,* ŵambone, soni ŵakwapikanila achiŵamkwawo, kuti ŵandu akaganyosya maloŵe ga Mlungu.

6 Myoyosoni, mpitilisye kwalimbikasya ŵachinyamata kuti aŵeje ŵaganisya chenene. 7 Mlosyeje kuti mli chisyasyo chambone pa yosope. Mjiganyeje yayili yeswela mwangali uwanache. 8 Mŵecheteje yayili yakuŵajilwa* yele ŵandu nganaŵa ayikanile, kuti ŵandu ŵakusisya atende sooni, soni kuti akatuŵechetela chilichose chakusakala. 9 Achikapolo akusosekwa ŵapikanileje achambuje ŵawo mu yosope, atendeje yakwasangalasya, akatendelaga mwano, 10 akajiŵilaga, nambo ŵalosyeje kukulupichika kwawo kosope, kuti m’yitendo yawo yosope anonyelesyeje chijiganyo cha Mkulupusyo jwetu, Mlungu.

11 Pakuŵa umbone mtima wekulungwa wa Mlungu uwonechele, soni uyikasisye chikulupusyo kwa mundu jwalijose. 12 Umbone mtimawu ukusatujiganya kuŵambala umi wangamjogopa Mlungu soni yakumbila yakuchilambo soni kuti tuŵeje ŵaganisya chenene, ŵakulungama soni ŵakulipeleka kwa Mlungu mu ndaŵi* ajino. 13 Tutendeje yeleyi patukwembecheya kwanilichikwa kwa chembecheyo chakusangalasya, soni ndaŵi jele Mlungu jwamkulungwajo soni Mkulupusyo jwetu, Yesu Klistu, chachiwonechela mwauchimbichimbi. 14 Jwalakwe jwalipeleche mmalo mwa m’weji kuti atuwombole* ku umi wakutenda yangapikanila malamusi soni kwaswejesya ŵandu kuti aŵe mpela chipanje chakwe chapenani, soni kuti aŵe ŵakulipeleka pa masengo gambone.

15 Mpitilisye kuŵecheta yindu yeleyi, mwadandawulileje* soni mwajamucheje mwakamulana ni ulamusi wamwapochele. Mkakunda kuti jwalijose amdelele.