Lefitiko

11 Kaneko Yehofa ŵamsalile Mose ni Aloni maloŵe aga: 2 “Mwasalile Ayisalayeli kuti, ‘Ayi ni yinyama yapachilambo chapasi yampaka mlyeje. 3 Chinyama chilichose chakola yikotwa yegaŵikangane ni kola mpata pakatikati pa yikotwayo nambosoni chachikusaselula* mpaka mlye chinyama chelecho.

4 “‘Nambo mkalyaga yinyama yayikusaselula nambo yangali yikotwa yegaŵikangane kapena yinyama yegaŵikangane yikotwa nambo yangaselula. Yinyama yakwe ayi: mkalyaga ngamila, ligongo nganijikola yikotwa yegaŵikangane yakola mpata pakatikati atamose kuti jikusaselula. Nyama jeleji mjiwoneje kuŵa jangaswejela. 5 Mkalyaga njechele, ligongo nganijikola yikotwa yegaŵikangane atamose kuti jikusaselula. Nyama jeleji mjiwoneje kuŵa jangaswejela. 6 Mkalyaga kalunga, ligongo nganijukola yikotwa yegaŵikangane atamose kuti jikusaselula. Nyama jeleji mjiwoneje kuŵa jangaswejela. 7 Nambosoni mkalyaga liguluŵe, ligongo lyangaselula atamose kuti likwete yikotwa yegaŵikangane yakola mpata katikati. Nyama jeleji mjiwoneje kuŵa jangaswejela. 8 Mkalyaga yinyama yeleyi kapena kuyikwaya payiwile. Myiwoneje yinyama yeleyi kuŵa yangaswejela.

9 “‘Pa yindu yaumi ya m’mesi mpaka mlyeje yindu ayi: Yaumi yiliyose ya m’mesi yayikwete yipyepye* soni maŵamba, chinga ya m’nyasa kapena ya mu lusulo mpaka mlye yeleyo. 10 Yaumi yosope ya m’nyasa soni ya mu lusulo yanganiyikola yipyepye soni maŵamba, kupwatikapo yaumi yamwanamwana ya m’mesi yayikusajenda m’tumagulu yanganiyikola yipyepye soni maŵamba, yosope yeneyi myiwoneje kuŵa yangaswejela. 11 Pakuŵa yeleyi yili yangaswejela, mkalyaga nyama jakwe kapena kuyikwaya pa yiwile. 12 Chaumi chilichose cha m’mesi changanichikola chipyepye soni maŵamba mchiwoneje kuŵa changaswejela.

13 “‘Sambano yijuni yangaswejela yangamkusosekwa kulya ni ayi: ngwasi, nyanga,* litumbusi lyepiliwu, 14 yitotola yechejewu soni yitotola yepiliwu, 15 makungulu ga mitundu josope, 16 ndiŵatiŵa, chisyamtima,* kawuye, mikokoko ja mtundu uliwose, 17 namame, mbipe, manjichi gelewu mawiwi, 18 mbata ja m’mesi, chingwititi, litumbusi, 19 lisekwe, yingongompale yamitundu josope, chijuni chakuwoneka mpela lisolokoto nambosoni chiputiputi. 20 Tulombo tosope twakwenda m’tumagulu twakola mapapiko soni twakwenda ni ngongolo mcheche mtuwoneje kuŵa twangaswejela.

21 “‘Pa tulombo tosope twakwenda m’tumagulu twakola mapapiko soni twakwenda ni ngongolo mchechetu, mpaka mlye tulombo twatukwete ngongolo sinesoni siŵili syelewulewu syakusumbila.* 22 Tulombo twampaka mlyeto ni atu: mitundu josope ja sombe syaguluka ulendo welewu, sombe sine syakusalya ŵandu, njelemba* nambosoni yitete. 23 Nambo tulombo twine tosope twakwenda m’tumagulu twakola mapapiko soni twakwenda ni ngongolo mcheche mtuwoneje kuŵa twangaswejela. 24 Myoyo naga mkulya yeleyi chimchilitenda mwachimsyene kuŵa ŵangaswejela nambosoni mundu jwalijose jwakwayiye tulombo tweletu patuwile, aŵeje jwangaswejela mpaka lyuŵa kukapila. 25 Jwalijose jwakukamula tulombo tweletu patuwile achapeje yakuwala yakwe. Jwalakwejo aŵeje jwangaswejela mpaka lyuŵa kukapila.

26 “‘Yinyama yosope yangaselula soni yayikwete yikotwa yegaŵikangane nambo yangali mpata pakatikati, yinyama yeleyo myiwoneje kuŵa yangaswejela. Mundu jwalijose jwakukwaya yinyama yeleyi aŵeje jwangaswejela. 27 Nyama jilijose jajikwete yikalaŵesa kusajo kwakwe pasikati pa yinyama yayikusajenda ni ngongolo mcheche, nyama jelejo mjiwoneje kuŵa jangaswejela. Mundu jwalijose jwakwayiye yinyama yeleyi payiwile aŵeje jwangaswejela mpaka lyuŵa kukapila. 28 Mundu jwakamwile yinyama yeleyi payiwile achapeje yakuwala yakwe soni jwalakwejo aŵeje jwangaswejela mpaka lyuŵa kukapila. Yinyama yeleyi myiwoneje kuŵa yangaswejela.

29 “‘Yaumi yamwanamwana yayikusajenda m’tumagulu pachilambo chapasi yamkusosekwa kuyiwona kuŵa yangaswejela ni ayi: uko, mapuku, mitundu josope ja achipulundwe,* 30 nalimata, achipulundwe ŵachakulungwakulungwa, pulundwe jwampaka atame m’mesi soni pamkuli, pulundwe jwa mu mchenga nambosoni nalwiyi.* 31 Yaumi yamwanamwana yeleyi myiwoneje kuŵa yangaswejela. Jwalijose jwakukwaya yinyama yeleyi payiwile aŵeje jwangaswejela mpaka lyuŵa kukapila.

32 “‘Yinyama yeleyi payiwile ni kugwila pa chindu chinechakwe, chinducho chiŵeje changaswejela, chinga chinducho chiŵe chepanganye ni matabwa, chinga chakuwala, lipende kapena chiguduli. Chindu chilichose, chinga chinducho mkusachikamulichisya masengo gamtuli, mchiloŵecheje m’mesi soni mchiwoneje kuŵa changaswejela mpaka lyuŵa kukapila. Kaneko chiŵeje cheswela. 33 Naga yaumi yeleyi yiwile ni kugwila pa chiŵiga, chiŵigacho achikasanyeje soni chindu chilichose chachili mwelemo mchiwoneje kuŵa changaswejela. 34 Naga mesi ga m’chiŵigacho gagwilile pa yakulya yine yiliyose, yakulya yeleyo myiwoneje kuŵa yangaswejela soni yakumwa yiliyose ya m’chiŵiga chelecho myiwoneje kuŵa yangaswejela. 35 Yinyama yeleyi payiwile ni kugwila pa chindu chinechakwe, chindu chelecho mchiwoneje kuŵa changaswejela. Chinga chigwilile pa ufuni kapena pa mbawula jagumba ni litaka myikasanyeje yindu yeleyo. Yindu yeleyi yili yangaswejela soni jemanja myiwoneje yindu yeleyi kuŵa yangaswejela. 36 Nambo naga yaumi yeleyi payiwile yigwilile pachisima kapena pamalo galigose gakusunjila mesi, malo gelego gachipitilisya kuŵa geswela. Jwalijose jwakwayiye yindu yeweyo, aŵeje jwangaswejela. 37 Nambo naga yaumi yeleyi payiwile ni yigwilile pa mbeju jakwembecheya kupanda, mbeju jelejo jichipitilisya kuŵa jeswejele. 38 Nambo naga yaumi yeleyo payiwile ni mbali jakwe jine jikugwila m’mesi gatasile mu mbeju jakwembecheya kupandajo, mbeju jelejo ajiwoneje kuŵa jangaswejela.

39 “‘Sambano naga chinyama chakundidwa kulya chiwile jika, jwalijose jwakwayiye chinyama chelecho pachiwile, aŵeje jwangaswejela mpaka lyuŵa kukapila. 40 Mundu jwalijose jwakulya chinyama chewechi akusosekwa kuchapa yakuwala yakwe soni aŵeje jwangaswejela mpaka lyuŵa kukapila. Mundu jwalijose jwanyakwile chinyama chewechi, achapeje yakuwala yakwe soni aŵeje jwangaswejela mpaka lyuŵa kukapila. 41 Yaumi yosope yamwanamwana yayikusajendaga m’tumagulu pachilambo chapasi myiwoneje kuŵa yangaswejela. Mkalyaga yaumi yeleyi. 42 Mkalyaga yaumi yamwanamwana yayikusajenda m’tumagulu, chinga yikusajenda mwakwaŵa, chinga yikwete ngongolo mcheche kapena yikwete ngongolo syejinji. Yaumi yeleyi myiwoneje kuŵa yangaswejela. 43 Mkalitendekasya kuŵa ŵangaswejela ni yaumi yamwanamwana yeleyi soni mkalisakasya ni kuŵa ŵangaswejela ni yindu yeleyi. 44 Mliswejesye ni kuŵa ŵaswela, ligongo une ndili jwamswela. Une ndili Yehofa Mlungu jwenu. Myoyo jemanja ngamkusosekwa kulisakasya ni yaumi yiliyose yamwanamwana yayikusajendaga m’tumagulu pachilambo chapasi. 45 Pakuŵa une ndili Yehofa jwanamkopwesye jemanja m’chilambo cha Iguputo pakulosya kuti ndili Mlungu jwenu. Myoyo jemanja mŵeje ŵaswela, ligongo une ndili jwamswela.

46 “‘Lyeleli lili lilamusi lyakwamba yinyama, yaumi yosope yayikusaguluka, yaumi yosope ya m’mesi soni yaumi yosope yamwanamwana yayikusajendaga m’tumagulu pachilambo chapasi. 47 Lilamusi lyeleli chilimkamuchisyeje kulekanganya pasikati pa chindu cheswejele ni changaswejela, soni pasikati pa yindu yaumi yamkusosekwa kulya ni yele yangamkusosekwa kulya.’”