Detulonomo

12 “Malamusi soni yamlamwile Mlungu mkusosekwa kuyikuya mwakusamala m’masiku genu gosope gachimchiŵa ni umi m’chilambo chachachimpa Yehofa Mlungu jwa achinangolo ŵenu kuti mchijigale. 2 Mkajonanje malo gosope gajikusakamulichisya masengo mitundu jachimkajigomechejejo pakujitumichila milungu jawo. Mkajonanje malogo, chinga gali penani pa matumbi gekulungwa kapena penani pa matumbi gamwana kapenasoni pasi pa chitela chilichose cheŵisi chachikwete masamba gejinji. 3 Mkagwisye malo gawo gakupelechela mbopesi, mkagumulanye yipilala yawo yapadela nambosoni mkajoche pamoto njalamila syawo syapadela.* Mkakatanyekatanyesoni yiwanichisyo yakusepa ya milungu jawo ni kugamasya mena ga milungujo pamalo gelego.

4 “Ngamkusosekwa kumtumichilaga Yehofa Mlungu jwenu m’litala lyelelyo. 5 Mmalomwakwe, mkamtumichileje Yehofa Mlungu jwenu kumalo galigose gachakasagule jwalakwejo kuti atamilikasye lina lyakwe soni kuti kuŵe mpela malo gakwe gakutama pasikati pa mbumba syenu syosope. Jemanja mkajawuleje kweleko. 6 Kweleko ni kwamkusosekwa kwika nasyo mbopesi syenu syakutinisya, mbopesi syenu sine, yalikumi yenu, soni yakupeleka yakutyochela mmyala mwenu. Mkayichejesoni ni mbopesi syamkusapeleka pakukwanilisya chilanga, mbopesi syamkusapeleka mwakusaka kwenu nambosoni ŵanache ŵandanda kupagwa ŵa ng’ombe syenu, mbusi syenu soni ngondolo syenu. 7 Jemanja pampepe ni ŵamwiŵasa mwenu mkusosekwa mkalileje kweleko mbopesi syenusyo pameso pa Yehofa Mlungu jwenu, ni kusangalalaga ni yosope yamtesile ligongo lyakuti Yehofa Mlungu jwenujo ampele upile jemanja.

8 “Mkaja kutenda yindu mpela mwatukutendela akuno lelo, pakuŵa jwalijose akuno agamba kutenda yakuyiwona kuti yili yakuŵajilwa mmeso mwakwe.* 9 Mkaja kutenda yeleyo ligongo jemanja nganimŵepe kwinjila ku malo genu gakupumulila soni kupochela malo gakusaka kumpa Yehofa Mlungu jwenu mpela chipanje chenu. 10 Pachimjomboche lusulo lwa Yolodanilu ni kutanda kutama m’chilambo chakumpa Yehofa Mlungu jwenu kuti chiŵe chenu, nditu jwalakwe chachimpumusya jemanja kwa adani ŵenu wosope ŵakumsyungulila, mwamti chimchitamaga mwamtendele pali pangali chakumjogoya. 11 Mkayicheje nayo yindu yosope yangumlamulayi kumalo gachakasagule Yehofa Mlungu jwenu kuti kuŵe lina lyakwe. Mkayicheje nasyo mbopesi syenu syakutinisya, mbopesi syenu sine, yalikumi yenu, yakupeleka yakutyochela mmyala mwenu nambosoni mbopesi jilijose jakupeleka pakusaka kukwanilisya chilanga chamtesile kwa Yehofa. 12 Jemanja mkasangalaleje pameso pa Yehofa Mlungu jwenu pampepe ni ŵanache ŵenu ŵachalume soni ŵachakongwe, achikapolo ŵenu ŵachalume soni ŵachakongwe. Nambosoni pampepe ni Alefi ŵakutama m’misinda jenu, ligongo Alefiwo nganapochela nawo malo pampepe ni jemanja mpela chipanje chawo. 13 Mkasamale kuti mkaja kupeleka mbopesi syenu syakutinisya pamalo galigose gamgaweni. 14 Mmalomwakwe, mkapelecheje mbopesi syenu syakutinisya pamalo gachakasagule Yehofa kutyochela pamalo ga mbumba jimo pasikati pa mbumba syenu. Kweleko ni kwachimkatendeje yiliyose yangumlamula jemanja.

15 “Nambo ndaŵi jilijose jamkusaka kulya nyamajo mjisikiteje ni kulya, mwakamulana ni upile wele Yehofa Mlungu jwenu ampele jemanja m’misinda jenu josope.* Mundu jwalijose jwali jwangaswejela soni jwamswejele mpaka akalyeje nyamajo. Mlyeje nyamajo mpela mwamkusalila nyama ja ngolombwe kapena mbaŵala. 16 Nambope ngamkusosekwa kulya myasi. Mmalomwakwe mjijitileje pasi mpela mesi. 17 Ngasimkundidwa kuti mkalileje m’misinda jenu chalikumi cha mbeju syenu, cha finyo jwenu jwasambano, soni cha mawuta genu. Ngasimkundidwasoni kulila m’misinda jenu* ŵanache ŵandanda kupagwa ŵa ng’ombe syenu, ngondolo syenu kapena mbusi syenu. Ngasimkundidwasoni kulila mbopesi syenu syamkusapeleka pakukwanilisya chilanga chamtesile, mbopesi syamkusapeleka mwakusaka kwenu, kapena yakupeleka yakutyochela mmyala mwenu. 18 Mkalileje yindu yeleyi pameso pa Yehofa Mlungu jwenu kumalo gele Yehofa Mlungu jwenujo chachisagula. Mkalyeje yeleyi jemanja pampepe ni ŵanache ŵenu ŵachalume soni ŵachakongwe, ŵakutumichila ŵenu ŵachalume soni ŵachakongwe nambosoni Alefi ŵakutama m’misinda jenu.* Chimkasangalaleje pameso pa Yehofa Mlungu jwenu ni yosope yamtesile. 19 Mkalolechesyeje kuti ngamkwaliŵalila Alefi pandaŵi josope jachimkatameje m’chilambo chenu.

20 “Yehofa Mlungu jwenu pachakakusye malo genu gakutama, mwakamulana ni chilanga chaŵatesile kwa jemanja, jemanja ni kuŵechetaga kuti, ‘Ngusaka kulya nyama,’ ligongo lyakuti msachile kulya nyamajo, mpaka mkalyeje nyamajo pandaŵi jilijose jamsachile. 21 Naga malo gachakasagule Yehofa Mlungu jwenu kuti kuŵe lina lyakwe kuli kwakutalikangana ni jemanja, mpaka mwulaje chilango chilichose chele Yehofa ampele jemanja chinga ng’ombe jenu, ngondolo jenu kapena mbusi jenu, mpela yandite pakumlamula jemanja. Mkalileje nyamajo m’misinda jenu* pandaŵi jilijose jamsachile. 22 Jemanja mkalyeje nyama jeleji mpela mwamkusalila nyama ja ngolombwe soni mbaŵala. Mundu jwalijose jwali jwangaswejela soni jwamswejele mpaka alye nyamajo. 23 Nambo mkagambe kuŵa ŵakusamala mnope kuti mkaja kulya myasi, ligongo myasi jili umi. Ngamkusosekwa kulya umi pampepe ni nyama. 24 Ngamkusosekwa kulya myasi. Mmalomwakwe mjijitileje pasi mpela mesi. 25 Ngamkusosekwa kuti mkalyeje myasi, kuti yindu yikamjendeleje chenene jemanja soni ŵanache ŵenu ŵakwika panyuma penu, ligongo lyakuti mkutenda yindu yayili yakuŵajilwa pameso pa Yehofa. 26 Pamkwawula kumalo kwachakasagule Yehofako mkajigaleje yindu yeswela yayili yenupeyo soni mbopesi syenu syakupeleka pakwanilisya chilanga. 27 Kweleko mkapelecheje mbopesi syenu syakutinisya. Mkapelecheje nyama sya mbopesisyo pampepe ni myasi jakwe pamalo gakupelechela mbopesi ga Yehofa Mlungu jwenu. Myasi ja mbopesi syenu sinesyo mkusosekwa mkajijitileje pasi mumbali mwa malo gakupelechela mbopesi ga Yehofa Mlungu jwenu. Nambo nyama jakwejo mpaka mkalyeje.

28 “Mkalolechesye kuti mkukuya maloŵe gosope gangumlamula jemanja, ni chakulinga chakuti ndaŵi syosope yindu yikamjendeleje chenene jemanja soni ŵanache ŵenu ŵakwika panyuma penu, ligongo lyakuti mkutenda yindu yayili yambone soni yakuŵajilwa pameso pa Yehofa Mlungu jwenu.

29 “Yehofa Mlungu jwenu chakajipyajile mitundu josope jachimkajisumule malo gawo, kaneko chimkatande kutama m’chilambo chawocho. 30 Pachiyikatendekwe yeleyi, mkasamale kuti mkaja kukuya matala ga jemanjajo, soni mkaja kuwusya yakwamba milungu jawo kuti, ‘Ana mitundu jeleji jatumichilaga chamtuli milungu jawo? Unesoni chindende myoyo.’ 31 Mkaja kumtumichila Yehofa Mlungu jwenu m’litala lyeleli ligongo jemanjajo akujitumichila milungu jawo mwakutenda yakunyalaya yiliyose yakusayiŵenga Yehofa, mwamti akusayikana pakwapeleka ŵanache ŵawo ŵachalume soni ŵachakongwe kwa milungu jawo mwakwajocha pamoto. 32 Mkalolechesye kuti mkukuya mwakusamala maloŵe galigose gangumlamula jemanja. Mkajonjechesya kapena kutyosya maloŵe galigose pa maloŵe gelega.