Ngani Syambone Syaŵalembile Maliko

5 Kaneko jemanjajo ŵayiche ku lisi line lya nyasa mu chigawo* cha Agelasa. 2 Nambo Yesu paŵagambile kutuluka mwiboti, ŵasimene ni mundu jwine juŵakwete msimu wakusakala ali mkutyochela kumalembe. 3 Mundujo jwatamaga kumalembe kukoko, soni kutandila kalakala pangali mundu juŵakombolaga kumtaŵa, atamose ni unyolo. 4 Ndaŵi syejinji ŵandu ŵajigalaga maunyolo ni kumtaŵa ngongolo soni makono. Nambo jwalakwe jwakutulaga maunyologo, soni paliji pangali mundu juŵakwete machili gakulimbana najo. 5 Musi ni chilo jwalakwe jwaliji mkugumila kumalembeko soni m’matumbi kwineku ali mkuliwulasya ni maganga. 6 Nambo paŵam’weni Yesu ali mkwika chapakutalichila, jwalakwe jwawutwiche ni kumtindiŵalila. 7 Kaneko jwalakwe jwagumisile mnope kuti, “Ana akusaka chichi kwa une, wawo Yesu, Mwanache jwa Mlungu Jwakwinani Mnope? Chonde alumbile pameso pa Mlungu kuti ngamba chilango.”* 8 Jwalakwe jwagumisile myiyi ligongo Yesu ŵaliji mkuwusalila msimuwo kuti, “Mkopoche mwa munduju, mmwe msimu wakusakala.” 9 Nambo Yesu ŵawuwusisye kuti, “Ana lina lyenu ŵani?” Msimuwo wajanjile kuti, “Lina lyangu lili Chigulu, ligongo tupali ŵajinji.” 10 Msimuwo waliji mkumchondelela Yesu kuti akajitumisya kwakutalichila.

11 Sambano chapakutalichila paliji pana maguluŵe gejinji gagaliji mkulya mwitumbi. 12 Myoyo misimujo jamchondelele jwalakwejo kuti, “Chonde atutumisye kuti tukajinjile m’maguluŵego.” 13 Jwalakwe ŵajikundile misimujo. Pelepo misimu jakusakalajo jakopweche mwa mundujo ni kuja kwinjila m’maguluŵego, kaneko maguluŵego gawutwiche kutyochela pachikwesya ni kuliponya m’nyasa. Maguluŵego galiji 2,000, mwamti gosopego gatiŵile. 14 Nambo ŵaŵalisyaga maguluŵego ŵatisile ni kwawula mumsinda soni m’misi jakusyungulila kuja kusala ya nganiji, mwamti ŵandu ŵayiche kukulola yayatendekweyo. 15 Myoyo ŵanduwo paŵayiche kwa Yesu, ŵamsimene mundu juŵakamwilwe ni yiŵanda yejinji jula ali awete chenene soni mtwe wakwe uli mkukamula chenene. Pelepo jemanjajo woga wakamwile. 16 Nambosoni, ŵandu ŵaŵayiweni yeleyi yili mkutendekwa, ŵasalilaga jemanjajo muyaŵelele ni mundu juŵakwete yiŵanda jula soni yayatendekwe ni maguluŵe gala. 17 Myoyo ŵanduwo ŵatandite kumŵenda Yesu kuti atyoche mu chigawo chawocho.

18 Sambano Yesu paŵakwelaga liboti, mundu juŵakamwilwe ni chiŵanda jula ŵamŵendile jwalakwejo kuti ajawule nawo yalumo. 19 Nambope Yesu nganakunda kuti ajawule najo, nambo ŵagambile kumsalila kuti, “Mjawuleje kumangwenu kwa achalongo achimjenu, ni mkasalile yindu yosope yamtendele Yehofa soni chanasa chalosisye kwa mmwejo.” 20 Mundujo jwatyosile ni kuja kutanda kwasalila ŵandu ku Dekapoli* yindu yosope yaŵatesile Yesu kwa jwalakwejo, mwamti ŵandu wosope ŵasimonjile mnope.

21 Yesu paŵajombwechesoni kuwujila ku lisi line lya nyasa, gulu jekulungwa ja ŵandu jasongene kwa jwalakwe, mwamti jwalakwejo jwajimi mungulugulu nyasa. 22 Kaneko jumo mwa ŵakulongolela mu sunagoge lina lyakwe Yailo, jwayiche, soni paŵam’weni Yesu, ŵamtindiŵalile. 23 Jwalakwe ŵamchondelele Yesu mwakuwilisyawilisya kuti, “Mwanangu jwamkongwe akulwala mnope.* Chonde kwende kuti akamsajiche makono gawo ni chakulinga chakuti alame ni kuŵa umi.” 24 Sambano Yesu jwanyakwiche pampepe ni jwalakwejo, soni gulu jekulungwa ja ŵandu jamkuyaga jili mkwenda mwakumkanganika.

25 Pelepo papalisoni jwamkongwe jwine juŵaliji mkulwala ulwele wakwasa myasi kwa yaka 12. 26 Jwamkongweju jwalasile mnope m’makono mwa madokotala gejinji soni jwajonasile chipanje chakwe chosope, nambo ulwele wakwewo nganiwumalaga, mmalomwakwe waliji mkukulilape. 27 Paŵapikene yaŵatendaga Yesu, jwalakwe jwajinjile m’gulu ja ŵandujo ni kwika panyuma pa Yesu, kaneko jwakamwile mkanjo wakwe, 28 pakuŵa jwaliji mkuŵecheta kuti, “Pachingambe kukamulape mkanjo wakwewo, chimbe chenene.” 29 Paŵagambile kukamula mkanjo wakwewo, ulwele wakwasa myasi ula wamasile, mwamti jwapikene m’chilu mwakwe kuti alamile ku ulwele wakupwetekawo.

30 Ndaŵi jijojo Yesu jwamanyilile kuti machili gakopweche mwa jwalakwejo. Myoyo ali mkati mwa gulu ja ŵandujo, ŵagalawiche ni kuwusya kuti, “Ŵani ŵakamwile chakuwala changu?” 31 Nambo ŵakulijiganya ŵakwe ŵamjanjile kuti, “Wawo akuyiwona kuti gulu ja ŵanduji jikwenda mwakwakanganika, ni akuwusyasoni kuti, ‘Ŵani ŵangamwile?’” 32 Nambope, Yesu ŵaliji mkusosasosa kuti ampate juŵatesile yeleyi. 33 Jwamkongwe jula pakumanyilila yayamtendechele, jwatesile woga. Myoyo jwayiche ali mkutetemela ni jwatindiŵele pameso pa Yesu ni ŵamsalile yisyesyene yakwe. 34 Yesu ŵamsalile jwalakwejo kuti, “Mwanangu, chikulupi chenu chimposisye.* Jawulagani mumtendele, soni ulwele wenu wakupwetekawo umale.”

35 Yesu ali mkati mwakuŵecheta, achalume ŵane ŵakutyochela ku nyumba ja jwakulongolela mu sunagoge jula ŵayiche ni kuŵecheta kuti, “Mwanache jwawo awile! Basi amleche Mwalimuju akamlagasya.” 36 Nambo Yesu ŵapikene maloŵe gelega, ni ŵamsalile jwakulongolela mu sunagoge kuti, “Mkadandawula, mgambe kola chikulupi.” 37 Myoyo jwalakwe nganasaka kuti jwalijose amkuye, nambo ŵamjigele Petulo, Yakobo, soni Yohane mpwakwe jwa Yakobo.

38 Sambano paŵayiche kunyumba ja jwakulongolela mu sunagoge jula, ŵasimene ŵandu ali mkugumila soni kulila mnope. 39 Paŵajinjile m’nyumbajo, jwalakwe ŵatite, “Ana jemanja mkulila soni kugumila myiyi ligongo chichi? Mwanachejutu nganawa nambo akugona.” 40 Pelepo jemanjajo ŵatandite kumseka mwachipongwe. Nambo Yesu paŵakopwesye pasa ŵandu wosope, jwalakwe ŵajigele babagwe mwanachejo ni mamagwe pampepe ni ŵandu ŵaŵaliji ni jwalakwejo, ni ŵajinjile kuŵaliji mwanachejo. 41 Kaneko, jwalakwe jwakamwile mkono wa mwanachejo ni kuŵecheta kuti, “Talita kumi,” maloŵega gakusagopolela kuti, “Kamsikanammwe, ngumsalila kuti, mjimuche!” 42 Ndaŵi jijojo kamsikanako kajimwiche ni kutanda kwenda. (Kamsikanako kakwete yaka 12.) Pelepo achinangolo ŵakwe ŵasangalele mnope. 43 Nambo jwalakwe ŵasalile mwakuwilisyawilisya* kuti akamsalila jwalijose yayitendekweyo. Kaneko ŵasalile kuti ampe yakulya mwanachejo kuti alye.