Ngani Syambone Syaŵalembile Luka

8 Pali papite kandaŵi kamnono, Yesu ŵatandite ulendo wakwawula mu msinda ni msinda soni musi ni musi kukulalichila soni kuwandisya ngani syambone sya Uchimwene wa Mlungu. Jwalakwe ŵaliji ni ŵandumetume ŵakwe 12 ŵala. 2 Ŵalijisoni ni achakongwe ŵane ŵaŵakwete misimu jakusakala jele jwalakwejo ŵajikopwesye soni ŵane ŵaŵaposisye* yilwele yawo. Mena gawo galiji Maliya juŵakolanjidwagasoni kuti Magadala, jwele ŵamkopwesye yiŵanda 7, 3 Jowana ŵamkwakwe Kusa, ŵele ŵaliji ŵakulolela panyumba ja Helodi, nambosoni Susana. Papalisoni achakongwe ŵane ŵajinji. Jemanjaji ŵamtumichilaga Yesu ni ŵandumetume ŵakwe pakamulichisya masengo yindu yawo.

4 Sambano gulu jekulungwa ja ŵandu nambosoni ŵandu ŵane ŵakutyochela m’misinda jakulekanganalekangana ŵasongene pampepe. Kaneko jwalakwe ŵatandite kuŵechetana ni jemanjajo pakamulichisya masengo chiwanichisyo. Ŵatite, 5 “Mundu jwine jwakumisa mbeju jwapite kukumisa mbeju syakwe. Paŵaliji mkumisa, sine syagwilile mumbali mwa msewu, mwamti ŵandu ŵasipondile soni yijuni yamwinani yayiche ni kulya mbejusyo. 6 Mbeju sine syagwilile pa lwala, soni pasyamesile, syajumwile ligongo lyakusoŵa chinyesi. 7 Mbeju sine syagwilile pamiŵa, soni pasyakulilaga pampepe, miŵasyo syalepelekasisye mbejusyo kukula. 8 Nambo mbeju sine syagwilile pa litaka lyachajila, soni pasyamesile, syasogwele songolo 100 pa mbeju jilijose.” Paŵamalisisye kuŵecheta yeleyi, jwalakwe ŵaŵechete mwakwesya maloŵe kuti, “Jwalijose jwakwete mawiwi apikane.”

9 Panyuma pakwe, ŵakulijiganya ŵakwe ŵamwusisye jwalakwejo kugopolela kwa chiwanichisyo chila. 10 Jwalakwe ŵajanjile kuti, “Mlungu ampele jemanja upile wakupikanichisya yakusisika yakwamba Uchimwene wa Mlungu, nambo kwa ŵane yindu yosope yikusagamba kuŵa muyiwanichisyope basi. Yeleyi yili myoyo ni chakulinga chakuti, atamose kuti akulola nambo kulola kwawo kuli kwangali mate, soni atamose kuti akupikana nambo ngakusapikanichisya kugopolela kwakwe. 11 Sambano chiwanichisyo chila kugopolela kwakwe ni aku: Mbeju sikwimila maloŵe ga Mlungu. 12 Mbeju syasyagwilile mumbali mwa msewu sila sikwimila ŵandu ŵakusagapikana maloŵe, nambo kaneko Satana akusayika ni kutyosya maloŵego m’mitima jawo ni chakulinga chakuti akakulupilila ni kukulupuka. 13 Mbeju syasyagwilile palwala sikwimila ŵandu ŵele pagapikene maloŵe, akusagapochela mwakusangalala, nambo mbejusyo syangakola michiga. Jemanjaji akusakulupilila kwa kandaŵi, nambo palinjidwe akusajasa chikulupi. 14 Pakwamba ya mbeju syasyagwilile pamiŵa, sikwimila ŵandu ŵakusapikana maloŵe, nambo yakudandawulisya, chipanje, soni yakusangalasya ya umi awuno yikusiyasokonasya, mwamti yeleyi yikusalepelekasya maloŵego kukula soni gangasogola yisogosi yambone. 15 Nambo mbeju syasyagwilile pa litaka lyachajila sila, sikwimila ŵandu ŵele pagapikene maloŵe ni mtima wambone, akusagasungaga soni akusasogola yisogosi mwakupilila.

16 “Pangali mundu jwakusapamba nyali ni kujiwunichila ni chiŵiga kapena kujiŵika kusi kwa bedi,* nambo akusajiŵika pa chakuŵikapo nyali ni chakulinga chakuti mundu pajinjile m’nyumbamo akuwoneje kuŵala. 17 Pakuŵa pangali chindu chakusisika chele ngasichiwonechela kwa ŵandu, soni pangali chindu chewunichile chenene chele ngasichimanyika ni ngawonechela pakulanguka. 18 Myoyo mlolechesye kuti mkupikanila mwakusamala, pakuŵa jwalijose jwakwete, chachipochela yejinji, nambo jwalijose jwanganakola, chachimsumula atamose yindu yamnono yakuganisya kuti akwete.”

19 Sambano mamagwe ni achapwakwe ŵayiche kwa jwalakwe, nambo ŵalepele kuwonegana najo ligongo lya winji wa ŵandu. 20 Myoyo ŵanduwo ŵamsalile jwalakwejo kuti, “Mama ŵawo ni achapwawo ali pasapa, akusaka kuwonegana ni wawojo.” 21 Jwalakwe ŵajanjile jemanjajo kuti, “Mama ŵangu soni achapwanga ni aŵa ŵele akusapikana maloŵe ga Mlungu ni kugatendaga.”

22 Lisiku line Yesu ni ŵakulijiganya ŵakwe ŵakwesile liboti, ni jwalakwe ŵasalile ŵakulijiganya ŵakwewo kuti, “Kwende tujombochele lisi line lya nyasa.” Myoyo jemanjajo ŵawutandite ulendo. 23 Nambo ali panyasapo, Yesu ŵagonile. Kaneko patandite chimbungo chamachili, mwamti libotilyo lyatandite kwinjila mesi soni lyasigele panandi kutiŵila. 24 Myoyo jemanjajo ŵapite kukumjimusya jwalakwejo mwakuŵecheta kuti, “Mwalimu, Mwalimu, chituwetu m’we!” Pelepo jwalakwe ŵajimwiche ni kujilekasya mbungojo soni matumbela gamachiligo, mwamti mbungojo jalesile soni kwatesile bata. 25 Kaneko jwalakwe ŵawusisye jemanjajo kuti, “Chikulupi chenu chili kwapi?” Nambo woga wakamwile soni ŵasimonjile mnope, ni ŵatandite kuŵechetana kuti, “Ana mundu jweleju ali ŵani kusyesyene? Eti akukombola kujilekasya mbungo ni mesi mpaka yikumpikanila.”

26 Kaneko jemanjajo ŵayiche mu chigawo* cha Agelasa. Chigawochi chaliji mwakulolegana ni chigawo cha Galileya chachaliji lisi line lya nyasa. 27 Yesu paŵatulwiche mwiboti ni kwika kumkuli, ŵasimene ni mundu jwine juŵakwete chiŵanda juŵatyochelaga mumsinda wine. Kwandaŵi jelewu, munduju jwagambaga kutama ngawala chilichose soni nganatamaga pamlango nambo kumalembe. 28 Mundujo paŵagambile kumwona Yesu, jwagumisile mnope soni jwaligwisisye pameso pakwe, kaneko jwaŵechete mwakwesya maloŵe kuti, “Ana akusaka chichi kwa une, wawo Yesu, Mwanache jwa Mlungu Jwakwinani Mnope? Chonde ngwaŵenda kuti akamba chilango.”* 29 Mundujo jwaŵechete yeleyi ligongo Yesu ŵawulamulaga msimu wakusakalawo kuti ukopoche mwa jwalakwejo. Ndaŵi syejinji msimuwo waliji mkumlamulila, soni ŵandu ŵatamilaga kumtaŵa makono soni ngongolo ni maunyolo ni kumlolelaga. Nambo jwalakwe jwakutulanyaga maunyologo soni chiŵandacho chamjawusyaga kwitinji. 30 Yesu ŵamwusisye mundujo kuti, “Lina lyenu ŵani?” Jwalakwe jwajanjile kuti, “Lina lyangu lili Chigulu.” Jwajanjile yeleyi ligongo yiŵanda yejinji yajinjile mwa jwalakwejo. 31 Soni yiŵandayo yaliji mkumchondelela Yesu kuti akaja kuyiponya kwisimbo. 32 Sambano chapakutalichila papali maguluŵe gejinji gagaliji mkulya mwitumbi. Myoyo misimujo jamchondelele jwalakwejo kuti ajikunde kuja kwinjila m’maguluŵego, ni jwalakwe ŵajikundile. 33 Pelepo yiŵandayo yakopweche mwa mundujo ni kuja kwinjila m’maguluŵego, kaneko maguluŵego gawutwiche kutyochela pachikwesya ni kuliponya m’nyasa ni gatiŵile. 34 Nambo ŵaŵalisyaga maguluŵego paŵagambile kuyiwona yayatendekweyi ŵatisile ni kwawula mumsinda soni m’misi jakusyungulila kuja kusala ya nganiji.

35 Myoyo ŵandu ŵapite kuti akalole yayatendekweyo. Paŵayiche kwa Yesu, ŵamsimene mundu juŵamkopwesye yiŵanda jula ali awete chenene soni mtwe wakwe uli mkukamula chenene nambosoni ali atemi chiŵandika ni Yesu. Jemanjaji paŵayiweni yeleyi, woga wakamwile. 36 Ŵandu ŵaŵayiweni yeleyi yili mkutendekwa, ŵasalilaga jemanjajo muyaŵelele kuti mundu juŵakwete yiŵanda jula aŵe chenene. 37 Kaneko ŵandu ŵajinji ŵaŵatamaga mu chigawo cha Agelasa ŵamŵendile Yesu kuti atyoche kumangwawoko ligongo woga wakamwile mnope. Myoyo jwalakwe ŵakwesile liboti kuti ajawuleje. 38 Nambope mundu juŵamkopwesye yiŵanda jula jwaliji mkuŵenda kuti amkuyeje Yesujo, nambo jwalakwe ŵamtesile kuti ajawuleje. Ŵamsalile kuti, 39 “Jawulagani kumangwenu, soni mkasalileje ŵandu yamtendele Mlungu.” Myoyo jwalakwe jwapite ni kuja kutanda kuwandisya mumsinda wosope yaŵamtendele Yesu yila.

40 Yesu paŵawujile ku Galileya, ŵandu ŵajinji ŵampochele chenene ligongo ŵaliji mkumjembecheya. 41 Kaneko payiche mundu jwine lina lyakwe Yailo. Mundu jweleju jwaliji jwakulongolela mu sunagoge. Ni jwalakwe jwaligwisisye pasajo sya Yesu ni kutanda kumchondelela kuti ajawule kunyumba jakwe, 42 ligongo mwanache jwakwe jwamkongwe jumopejo, juŵaliji ni yaka chiŵandika 12, ŵaliji ali asigele panandi kuwa.

Yesu paŵajawulaga kweleko, gulu ja ŵandu jamkuyisye soni jaliji mkwenda mwakumŵandichila mnope. 43 Pelepo papalisoni jwamkongwe jwine juŵaliji mkulwala ulwele wakwasa myasi kwa yaka 12, soni paliji pangali mundu juŵakombwele kumposya.* 44 Jwamkongwejo jwayiche panyuma pa Yesu ni kukamula ulusi wa mumbesi* mwa mkanjo wakwe, mwamti ndaŵi jijojo jwalesile kwasa myasi. 45 Myoyo Yesu ŵawusisye kuti, “Ŵani ŵangamwile?” Wosope paŵakanile, Petulo jwatite, “Mwalimu, wawojo akuyiwonasoni kuti ŵanduŵa ŵasyungulile soni ŵaŵandichile mnope.” 46 Nambo Yesu ŵatite, “Apali mundu jwangwayisye, ligongo mbikene machili gali mkukopoka mwa une.” 47 Jwamkongwejo paŵayiweni kuti yaŵatesileyo yimanyiche, jwapite kwa Yesu ali mkutetemela ni jwatindiŵele pameso pakwe. Ni jwatandite kusala pameso pa ŵandu wosopewo ligongo lyakwe ŵamkamwile jwalakwejo nambosoni muyaŵelele kuti apole* mwachitema. 48 Nambo Yesu ŵamsalile jwalakwejo kuti, “Mwanangu, chikulupi chenu chimposisye.* Jawulagani mumtendele.”

49 Yesu ali mkati mwakuŵecheta, payiche mundu jwine jwakutyochela kunyumba ja jwakulongolela mu sunagoge jula ni kuŵecheta kuti, “Mwanache jwawo awile! Basi amleche Mwalimuju akamlagasya.” 50 Yesu paŵapikene yeleyi, ŵamsalile Yailo kuti, “Mkadandawula, mgambe kola chikulupi, soni mwanache jwenu chaŵe ni umi.”* 51 Paŵayiche panyumbajo, jwalakwe nganakunda kuti jwalijose ajinjile nawo, nambo ŵamjigele Petulo, Yohane, Yakobo, soni baba ni mamagwe msikanajo. 52 Nambo ŵandu wosope ŵaliji mkulila soni kuliputa pamtima ligongo lya chanasa. Myoyo Yesu ŵatite, “Aleche kulila, ligongo msikanaju nganawa nambo akugona.” 53 Pelepo jemanjajo ŵatandite kumseka mwachipongwe, ligongo ŵamanyililaga kuti msikanajo awile nditu. 54 Nambo jwalakwe ŵakamwile mkono wa msikanajo ni kumŵilanga kuti, “Mwanachemmwe, mjimuche!” 55 Msikanajo jwaŵelesoni umi* mwamti jwajimwiche ndaŵi jijojo. Kaneko Yesu ŵalamwile yakuti ampe msikanajo yakulya kuti alye. 56 Pelepo achinangolo ŵa msikanajo ŵasangelele mnope. Nambo Yesu ŵalamwile kuti akamsalila jwalijose yayitendekweyo.