Ngani Syambone Syaŵalembile Luka

6 Sambano pa lisiku line lya sabata, Yesu ali mkwenda mumsewu wakupita m’migunda ja tiligu, ŵakulijiganya ŵakwe ŵatandite kupulula masache ga tiligu ni kutikitaga mmyala mwawo kaneko ni kulyaga. 2 Afalisi ŵane paŵayiweni yeleyi ŵatite, “Ligongo chichi jemanja mkutenda yindu yele malamusi ngagakukunda kuyitenda pa lisiku lya Sabata?” 3 Nambo Yesu ŵajanjile jemanjajo kuti, “Ana nganimŵalanjeje yaŵatesile Daudi ni achalume ŵaŵaliji nawo pajakwete sala? 4 Ana jwalakwejo nganajinjila m’nyumba ja Mlungu? Soni ana nganapochela mikate* jakupelechedwa kwa Mlungu* ni kulya, jine ni kwapa achalume ŵaŵaliji nawo? Yindu yeleyi malamusi gakundaga ŵakutaga mbopesipe kutenda ngaŵaga jwalijose.” 5 Kaneko ŵasalile jemanjajo kuti, “Mwanache jwa mundu ali Ambuje ŵa Sabata.”

6 Pa lisiku linesoni lya sabata, jwalakwe jwajinjile mu sunagoge ni ŵatandite kwiganya. Mwelemo mwapalisoni mundu jwine jwele mkono wakwe wamlyo waliji wewe.* 7 Sambano alembi ni Afalisi ŵagambaga kumlolechesya Yesu kuti alole naga champosye* mundujo pa lisiku lya Sabata. Chakulinga chawo chaliji chakuti apate ligongo lyakumjimbila magambo. 8 Nambo jwalakwe jwamanyilile nganisyo syawo, myoyo ŵamsalile mundu jwamkono wewejo* kuti, “Mjimuche, myiche mjime pasikatipa.” Jwalakwe jwajimwiche ni kuja kwima pelepo. 9 Kaneko Yesu ŵaŵechete kwa jemanjajo kuti, “Ngusaka namwusye jemanja, Ana malamusi gakusakunda kutenda yapi pa lisiku lya Sabata, yambone kapena yakusakala? Kukulupusya umi kapena kuwujonanga?” 10 Pelepo Yesu ŵalolechesye jemanjajo, kaneko ŵamsalile mundu jula kuti, “Mtambasukule mkono wenu.” Jwalakwe paŵatesile yeleyi, mkonowo waŵele chenene. 11 Nambo jemanjajo ŵatumbile mnope, soni ŵatandite kukambilana kuti apate yampaka atende najo Yesu.

12 Lisiku line jwalakwe ŵapite kwitumbi kukupopela, mwamti ŵatemi chilo chosope ali mkupopela kwa Mlungu. 13 Pakwachele, ŵaŵilasile ŵakulijiganya ŵakwe wosope ni ŵasagwile ŵakulijiganya 12 pasikati pawo. Jemanjaji ŵakolasile kuti ŵandumetume. 14 Mena gawo galiji: Simoni, jwele ŵampelesoni lina lyakuti Petulo, soni Andileya mpwakwe. Yakobo, Yohane, Filipo, Batolomeyo, 15 Mateyu, Tomasi, Yakobo mwanache jwa Alifeyo, Simoni jwakolanjidwasoni kuti “jwakulimbichila mnope,” 16 Yudasi mwanache jwa Yakobo, nambosoni Yudasi Isikaliyoti jwele pasogolo pakwe ŵampeleche jwalakwe.

17 Kaneko jwalakwe ŵatulwiche yimpepe ni jemanjajo ni ŵayiche pamalo gafulati. Pelepo ŵajisimene gulu jekulungwa ja ŵakulijiganya ŵakwe soni ŵandu ŵajinji ŵakutyochela ku Yudeya, ku Yelusalemu nambosoni ku madela ga mungulugulu nyasa gagaliji ku Tulo ni Sidoni. Jemanjaji ŵayiche kukumpikanila jwalakwe soni kuti ŵaposye yilwele yawo. 18 Atamosesoni ŵandu ŵaŵalagasikaga ni misimu jakusakala ŵaliji mkwaposya. 19 Nambosoni ŵandu wosope ŵasachililaga ali agambile kumkwaya jwalakwe, ligongo machili galiji mkukopoka mwa jwalakwejo ni kwaposyaga wosopewo.

20 Kaneko jwalakwe ŵalolite ŵakulijiganya ŵakwewo ni kutanda kuŵecheta kuti,

“Mkwete upile jemanja ŵamli ŵakulaga, ligongo Uchimwene wa Mlungu uli wenu.

21 “Mkwete upile jemanja ŵajikumkola sala apano, ligongo chimchijikuta.

“Mkwete upile jemanja ŵamkulila apano, ligongo chimchisechelela.

22 “Mkwete upile jemanja ŵandu pakumŵenga, soni pakumŵambala ni kumnyosyaga nambosoni kukana lina lyenu ni kuŵechetaga kuti lili lyakusakala ligongo lya Mwanache jwa mundu. 23 Pakuŵa yeleyi yili yindu yele achinangolo ŵawo ŵakala ŵayitesile kwa ŵakulochesya. Myoyo palisiku lyakumtendela yeleyi, msangalale ni kusumbasumba* ligongo mboto* jenu jili jekulungwa kwinani.

24 “Nambo mkwete likungu* jemanja ŵandu ŵakusichila, ligongo mkupochelela chile yindu yambone yosope.

25 “Mkwete likungu jemanja ŵamkwikuta apano, ligongo chimchiŵa ni sala.

“Mkwete likungu jemanja ŵamkusechelela apano, ligongo chimchiŵa ni chanasa soni chimchilila.

26 “Mkwete likungu ŵandu wosope pakuŵecheta yambone ya jemanja, ligongo mwelemu ni muŵatendele achinangolo ŵawo ŵakala kwa ŵakulochesya ŵaunami.

27 “Nambo une ngumsalila jemanja ŵamkupikanila kuti, mpitilisye kwanonyela adani ŵenu soni kutenda yambone kwa ŵandu ŵakusamŵenga. 28 Mpitilisye kwasosela yambone ŵandu ŵakusamtembelela, soni kwapopelela ŵandu ŵakusamnyosya. 29 Naga mundu akumputa pa lijeje, mumpesoni linelyo. Naga jwine akumsumula mkanjo wenu, mkasimumlekasya kujigalasoni malaja genu gamkati. 30 Mundu pamŵendile chindu mumpeje, soni naga jwine akumsumula chindu, mkasimumŵilasya.

31 “Nambosoni yindu yimkusaka kuti ŵandu amtendele, jemanjasoni mwatendeleje yeleyo.

32 “Naga mkwanonyela ŵelepewo ŵakusamnonyela, ana chimchipindula chichi? Pakuŵa atamose ŵandu ŵakulemwa akusiŵanonyelasoni ŵelepewo ŵakusiŵanonyela jemanjajo. 33 Soni naga mkwatendela yambone ŵelepewo ŵakusamtendela yambone, ana chimchipindula chichi? Pakuŵa atamose ŵandu ŵakulemwa akusatendasoni myoyo. 34 Nambosoni, naga mkwasimisya yindu kwa ŵelepewo ŵamkwembecheya kuti chachimwuchisya, ana chimchipindula chichi? Atamose ŵandu ŵakulemwa akusajasimisya yindu kwa ŵakulemwa achimjawo ni chakulinga chakuti chiŵawuchisye iyoyo. 35 Mwakulekangana ni yeleyi, jemanja mpitilisye kwanonyela adani ŵenu soni kutenda yambone nambosoni kwasimisya yindu mwangajembecheya kupochela kanekakwe. Naga mkutenda yeleyi, mboto jenu jichiŵa jekulungwa, soni chimchiŵa ŵanache ŵa Jwakwinani Mnope, pakuŵa jwalakwe akusiŵatendela yambone ŵandu ŵangayamika ni ŵakusakala ŵakwe. 36 Mpitilisye kwatendela ŵane chanasa, mpela mwaŵelele Atati ŵenu kuti ali ŵachanasa.

37 “Nambosoni, mleche kwawelusya ŵane, ni jemanjasoni Mlungu ngasam’welusya. Mleche kwapatila magongo ŵane kuti nomweŵakwe akasampatila magongo. Mpitilisye kwakululuchila ŵane, ni jemanja chimchikululuchidwasoni. 38 Mŵeje ŵakupeleka, ni jemanjasoni ŵandu chachimpa. Chachimkusulila mumsaku wenu mlingo wambone, wegumbale, wechinyindile, soni wakwasichila chenene. Pakuŵa mlingo wamkwalinjila nawo ŵane, chachimlinjilasoni uwowo.”

39 Kaneko jwalakwe ŵasalile jemanjajo yiwanichisyo. Jwalakwe ŵatite, “Mundu jwangalola nganaŵa amlongelele jwangalola mjakwe, mpaka atende myoyo mpela? Naga akutenda yeleyo wosope mpaka agwile mwisimbo, ngaŵa myoyo? 40 Jwakulijiganya jwangapunda jwakumjiganya, nambo jwalijose jwajiganyidwe chenene akusalandana ni jwamjiganyisyejo. 41 Sambano, ligongo chichi mkulola kachiswani m’liso lya mlongo mjenu nambo ngamkulola mgomba wawuli m’liso lyenu? 42 Ana mpaka mumsalile wuli mlongo mjenu kuti, ‘Bwanawe, odi namtyosye kachiswani m’liso lyenu,’ nambo chitamilecho mmwejo mli mkwete mgomba m’liso lyenu? Jwachinyengo mmwe! Mtyosye kaje mgomba wawuli m’liso lyenuwo, kaneko chimchilola chenene mwampaka mtyochesye kachiswani kakali m’liso lya mlongo mjenu.

43 “Pakuŵa pangali chitela chambone chachikusasogola yisogosi yewole, soni pangali chitela chewole chachikusasogola yisogosi yambone. 44 Pakuŵa chitela chilichose chikusamanyika ni yisogosi yakwe. Mwachisyasyo, ŵandu ŵangakaŵa nguju pachitela cha miŵa, kapena kukata mipeleya pa liwukutu lya miŵa. 45 Mundu jwambone akusakoposya yambone kutyochela mu chipanje chambone cha mumtima mwakwe, nambo mundu jwakusakala akusakoposya yakusakala kutyochela mu chipanje chakwe chakusakala. Pakuŵa pakamwa pakusaŵecheta yayigumbele mumtima.

46 “Sambano ligongo chichi jemanja mkusimungolanga une kuti ‘Ambuje! Ambuje!’ nambo mli ngamkutenda yindu yangusaŵecheta? 47 Jwalijose jwakusayika kwa une ni kupikanila maloŵe gangu soni kugatenda, chinamsalile jemanja mundu jwakusalandana najo: 48 Jwalakwe ali mpela mundu jwele, pakutaŵa nyumba, ŵasokwele mnope pasi ni kutaŵa fendeshoni* jakwe palwala. Kaneko lusulo palwasefuchile, mesi gatandite kuputa nyumbajo, nambo nganigaŵa gamachili kwakuti mpaka kutenganya nyumbajo, ligongo ŵajitaŵile mwakulimba. 49 Nambo mundu jwakusapikana maloŵe gangu ni ngatenda chilichose ali mpela mundu juŵagambile kutaŵa nyumba ngaŵika fendeshoni. Kaneko lusulo palwasefuchile ni kuputa nyumbajo, ndaŵi jijojo jagwile soni konasika kwakwe kwaliji kwakogoya mnope.”