Ngani Syambone Syaŵalembile Yohane

11 Sambano mundu jwine lina lyakwe Lasalo jwaliji mkulwala. Jwalakwe jwatamaga m’musi wa Betaniya yimpepe ni achalumbugwe, Maliya soni Malita. 2 Maliya jweleju ni ajula juŵatasile mawuta gakununjila mnope pa sajo sya Ambuje ni kwapukutaga ni wumbo syakwe. Jwalakweju jwaliji mlumbugwe Lasalo, mundu juŵalwalagajo. 3 Myoyo achalumbugwe Lasaloŵa ŵatumisye utenga kwa Yesu. Ŵatite, “Ambuje, mundu jwakusamnonyela jula akulwala.” 4 Nambo Yesu paŵapikene utengawu, ŵatite, “Ulwele welewu mapeto gakwe ngaŵa chiwa. Nambo yeleyi yitendekwe kuti yipeleche uchimbichimbi kwa Mlungu, ni chakulinga chakuti Mwanache jwa Mlungu achimbichikwe.”

5 Yesu ŵamnonyelaga Malita pampepe ni mpwakwe jula soni Lasalo. 6 Nambope Yesu paŵapikene yakuti Lasalo akulwala, ŵatemipe kumalo kuŵalijiko kwa masiku gaŵili. 7 Panyuma pamasiku gaŵiligo, jwalakwe ŵasalile ŵakulijiganya ŵakwe kuti, “Kwende tujawulesoni ku Yudeya.” 8 Ŵakulijiganya ŵakwewo ŵamsalile jwalakwejo kuti, “Labi, pachangakaŵapa ŵandu ŵa ku Yudeyako asachileje kwaponya maganga, ni akusaka kwawulasoni kukoko?” 9 Yesu ŵajanjile kuti, “Musi ukwete maawala 12, ngati myoyo? Naga mundu akwenda musi, nganaŵa akuŵele ni chindu chilichose, ligongo akusalola lilanguka lya chilambochi. 10 Nambo naga mundu akwenda chilo akusakuŵala, ligongo mwa jwalakwe mwangali lilanguka.”

11 Panyuma pakuŵecheta yeleyi, jwalakwe ŵasasilesoni kuti, “Mjetu Lasalo akugona, nambo ngwawula kukoko kuti ngamjimusye.” 12 Pelepo ŵakulijiganya ŵakwewo ŵamsalile kuti, “Ambuje, naga jwalakwejo akugona, nikuti chaŵe chenene.” 13 Nambope Yesu ŵaliji mkugopolela kuti Lasalojo awile. Nambo ŵakulijiganya ŵakwe ŵaganisyaga kuti Yesu akusala ya kugona kusyesyene. 14 Kaneko Yesu ŵasalile mwangapita mumbali kuti, “Lasalo awile, 15 soni ngusangalala ligongo lyakuti uneji nganimba kweleko, kuti jemanja mkulupilile. Nambo sambano kwende tujawule kwa jwalakwejo.” 16 Tomasi, jwele ŵamkolangagasoni kuti Didimo, ŵasalile ŵakulijiganya achimjakwe kuti, “Kwende m’wejisoni tujawule kukoko, kuti tukawile yimpepe ni jwalakweju.”

17 Yesu paŵayikaga, galiji gali gamasile masiku mcheche Lasalo ali m’malembe. 18 Sambano msinda wa Betaniya waliji mwakuŵandikana ni Yelusalemu, palutando lwa makilomita chiŵandika gatatu. 19 Myoyo Ayuda ŵajinji ŵayiche kwa Malita ni Maliya kukwamyalasya ligongo lya chiwa cha mlumbugwawo. 20 Malita paŵapikene kuti Yesu akwika, ŵanyakwiche kuti akasimane najo, nambo Maliya ŵasigalile kunyumba. 21 Kaneko Malita ŵamsalile Yesu kuti, “Ambuje, akaŵe kuti wawojo ŵaliji akuno, alumbuŵangu ngamkanawa. 22 Nambope ngumanyilila kuti chilichose champaka amŵende Mlungu, jwalakwejo mpaka ŵape.” 23 Yesu ŵamsalile jwalakwejo kuti, “Alumbuŵenu chajimuche.” 24 Malita ŵamjanjile jwalakwe kuti, “Ngumanyilila kuti chachijimuka pakwimuka kwa ŵandu pa lisiku lyakumalisya.” 25 Yesu ŵamsalile jwalakwejo kuti, “Une ndili kwimuka soni umi. Jwalijose jwakungulupilila une, atamose awe, chachikolasoni umi. 26 Nambosoni jwalijose jwakwete umi soni akungulupilila une ngasawa mpaka kalakala. Ana mmwejo mkukulupilila yeleyi?” 27 Jwalakwe ŵajanjile kuti, “Elo, Ambuje, ngukulupilila kuti wawojo ali Klistu, Mwanache jwa Mlungu, jwele ŵamsasile kuti chachiyika pachilambo.” 28 Malita paŵaŵechete yeleyi, ŵapite kuja kumŵilanga Maliya mpwakwe. Ŵamjigalile pambali ni kumsalila kuti, “Mwalimu ayiche soni akumŵilanga mmwejo.” 29 Jwalakwe paŵapikene yeleyi, ŵanyakwiche mwachitemachitema ni kwawula kuŵaliji Yesuko.

30 Pandaŵiji Yesu ŵaliji mkanakopochelepe m’musimo. Jwalakwe ŵaliji chiŵela pamalo paŵasimene ni Malita pala. 31 Sambano Ayuda ŵaŵaliji ni Maliya m’nyumbamo paŵayiweni kuti jwalakwejo anyakwiche mwachitemachitema kwawula pasa, ŵamkuyisye. Jemanjaji ŵaliji mkuganisya kuti jwalakwejo akwawula ku malembe kuti akalileje kweleko. 32 Maliya paŵayiche kuŵaliji Yesu kula soni ali agambile kumwona jwalakwejo, ŵaligwichisye pasajo sya Yesu ni kumsalila kuti, “Ambuje, akaŵe kuti wawojo ŵaliji akuno, alumbuŵangu ngamkanawa.” 33 Sambano Yesu paŵam’weni jwalakwe ali mkulila pampepe ni Ayuda ŵaŵayiche nawo, chamkamwile mnope chanasa mwamti ŵalagasiche mnope mumtima. 34 Kaneko ŵawusisye kuti, “Ana amŵisile kwapi?” Jemanjajo ŵajanjile kuti, “Ambuje, kwende akalole.” 35 Pelepo Yesu ŵalisile. 36 Ayudawo paŵayiweni yeleyi ŵatandite kuŵecheta kuti, “Alole, mundujutu ŵamnonyelaga mnope jwalakwe.” 37 Nambo ŵane mwa jemanjajo ŵaŵechetaga kuti, “Mundu jweleju ŵakombwele kuwugula meso ga mundu jwangalola, ana ngamkanatendapo kandu kuti jwalakweju akawa?”

38 Panyuma pakuti Yesu chimkamwilesoni chanasa, ŵapite kumalembe kula. Malembe gakwe galiji mbanga soni ŵawugelepo ni liganga. 39 Yesu ŵatite, “Atyosye ligangalyo.” Nambo Malita, alumbugwe mundu juŵawilejo ŵatite, “Ambuje, pakwikaga lelo komboleka kuti atandite kala kununga, ligongo pamasile masiku mcheche.” 40 Yesu ŵamsalile jwalakwejo kuti, “Ana nganinamsalila kuti naga mkukulupilila chimwuwone uchimbichimbi wa Mlungu?” 41 Myoyo ŵatyosisye ligangalyo. Kaneko Yesu ŵalolite kwinani ni kuŵecheta kuti, “Atati, ngwayamichila ligongo ambikene. 42 Ngumanyilila kuti wawojo akusambikana ndaŵi syosope, nambo nguŵecheta yeleyi ligongo lya gulu ja ŵandu ŵajimi apanoŵa. Ngutenda yeleyi ni chakulinga chakuti jemanjaji akulupilile kuti wawojo ŵandumile une.” 43 Paŵaŵechete yeleyi, jwalakwe ŵagumisile kuti, “Lasalo, mkopoche!” 44 Kaneko mundu jwam’wejo jwakopweche, sajo syakwe, makono soni ngope jakwe yili yeŵijilile ni nguwo. Pelepo Yesu ŵasalile ŵanduwo kuti, “Amgopole, soni amleche ajawuleje.”

45 Myoyo Ayuda ŵajinji ŵaŵayiche kwa Maliya soni ŵaŵayiweni yaŵatesile Yesu, ŵamkulupilile jwalakwejo. 46 Nambo ŵane mwa jemanjajo ŵapite kwa Afalisi ni kuja kwasalila yaŵatesile Yesuyi. 47 Myoyo ŵakulolela ŵakutaga mbopesi soni Afalisi ŵatendesye msongano wa Luŵala Lwekulungwa lwa Ayuda, ni ŵatite, “Ana tutende chichi pelepa, pakuŵa mundu jweleju akutenda yakusimonjesya yejinji? 48 Naga tukumlechelela mundu jweleju kuti apitilisye kutenda yeleyi, ŵandu wosope chamkulupilile. Kaneko Aloma chachiyika ni kujigala nyumba jetu ja Mlungu* nambosoni mtundu wetu.” 49 Nambo jumo mwa jemanjajo, lina lyakwe Kayafa, juŵaliji jwamkulungwa jwa ŵakutaga mbopesi m’chaka chelecho, ŵasalile jemanjajo kuti, “Jemanja ngamkumanyilila chilichose ata panandi. 50 Soni jemanja ngamkuyiwona kuti yili yakusosekwa kuti mundu jumo awe mmalo mwa ŵandu ŵajinji kulekangana nikuti mtundu wosope ujonanjidwe.” 51 Nambope jwalakwe nganaŵecheta yeleyi mwakusaka kwakwe. Nambo ligongo lyakuti jwaliji jwamkulungwa jwa ŵakutaga mbopesi m’chaka chelecho, myoyo ŵalochesye kuti Yesu chachiwila mtundu wosope. 52 Soni ngaŵa kuti chachigamba kuwilape mtunduwo, nambo chachisonganganyasoni pampepe ŵanache ŵa Mlungu ŵele ŵabalalikangene. 53 Myoyo kutandila lisiku lyelelyo jemanjajo ŵakamulene yakuti amwulaje jwalakwejo.

54 Kutandila pandaŵi jeleji, Yesu nganajendagasoni mwakuwonechela kwa Ayuda. Jwalakwe ŵatyosile kweleko ni kwawula ku msinda wa Efulayimu, wawaliji chiŵandika ni chipululu. Myoyo ŵatemi kweleko yimpepe ni ŵakulijiganya ŵakwe. 55 Sambano chisangalalo cha Ayuda cha Pasika chaliji chili chiŵandichile. Myoyo ŵandu ŵajinji kutyochela kumisi jakusyungulila, ŵapite ku Yelusalemu kukutenda mwambo wakuliswejesya chisangalalo cha Pasikachi mkanichitande. 56 Ŵanduwo ŵaliji mkumsosasosa Yesu, mwamti paŵaliji ku nyumba ja Mlungu ŵawusyanaga kuti, “Ana akuganisya uli? Ana mundu jwejula tujile kuti ngayika ku chisangalalo kuno?” 57 Nambo ŵakulolela ŵakutaga mbopesi soni Afalisi ŵasasile kuti jwalijose jwachamanyilile kwali Yesu, akasalile jemanjajo kuti akamkamule.*