Chikalata Chandanda cha Yohane

1 Ngumlembela pakwamba ya jwele juŵapali kutandila pandanda, jutwampikene, jutwam’weni ni meso getu, jutwamlolechesye soni jwele makono getu gamkwayisye, jwelesoni jwali maloŵe gaumi. 2 (Nditu, umi wawonechele, soni twawuweni mwamti tukutendela umboni soni tukwasalila jemanja ya umi wangamala wawaliji kwa Atati soni wawonechele kwa m’weji.) 3 Ngumsalila jemanja pakwamba ya jwele jutwam’weni soni kumpikana, ni chakulinga chakuti jemanjasoni mŵe ŵakamulana ni m’weji mpela mwatuŵelele ŵakamulana ni Atati soni Mwanagwe, Yesu Klistu. 4 Nambosoni ngumlembela yindu yeleyi ni chakulinga chakuti chisangalalo chetu chiŵe chakwanila.

5 Maloŵe gatwapikene kutyochela kwa jwalakwejo soni gatukwasalila jemanja ni gakuti: Mlungu ali lilanguka, soni mwa jwalakwe mwangali chipi ata panandi. 6 Naga tukuŵecheta kuti, “Tuli ŵakamulana ni jwalakwe,” nambo tuli mkwendape m’chipi, nikuti tukulambusya soni ngatukutenda yindu mwakamulana ni yayili yisyesyene. 7 Nambope, naga tukwenda m’lilanguka, pakuŵa Mlungu akusatama m’lilanguka, nikuti tuli ŵakamulana, soni myasi ja Yesu Mwanagwe jikusatuswejesya ku ulemwa wosope.

8 Naga tukuŵecheta kuti, “Nganitukola ulemwa,” nikuti tukulilambusya soni ngatukusakulupilila yijiganyo yisyesyene. 9 Naga tukwitichisya yakulemwa yetu, jwalakwejo ali jwakulupichika soni jwakulungama, myoyo chachitukululuchila yakulemwa yetu ni yitendo yetu yosope yakusakala. 10 Naga tukuŵecheta kuti, “Nganituŵa ŵakulemwa,” nikuti tukumtendekasya jwalakwejo kuŵa jwaunami, soni maloŵe gakwe nganigaŵa mwa m’weji.