Chikalata Chakwawula kwa Aloma

13 Mundu jwalijose ŵapikanileje ŵakulamulila, pakuŵa pangali ulamusi uliwose waupali mwangakundidwa ni Mlungu. Ŵakulamulila wosopeŵa ali m’maudindo gawo mwakundidwa ni Mlungu. 2 Myoyo, jwalijose jwakusisyana ni ŵakulamulila nikuti akwimuchila yaŵalinganyisye Mlungu. Jwalijose jwakusisyana ni yaŵalinganyisye Mlunguyi chachipochela chilango.* 3 Ŵakulamulila ŵeleŵa akusaŵa ŵakogoya mundu pakutenda yakusakala, ngaŵaga pakutenda yambone. Ana mkusaka kuti mkatendaga woga ni ŵakulamulila? Mpitilisye kutenda yambone mwamti ŵakulamulilawo tachimlapilila. 4 Pakuŵa ŵakulamulilaŵa ali ŵakutumichila ŵa Mlungu kuti yindu yimjendeleje chenene. Nambo naga mkutenda yakusakala, mtendeje woga pakuŵa ŵangakamula upanga pali pangali magongo. Jemanjaji ali ŵakutumichila ŵa Mlungu ŵaŵaŵisile kuti aŵe ŵakupeleka chilango kwa ŵandu ŵakutenda yakusakala.

5 Myoyo pana magongo gambone gakumtendekasya jemanja kuŵa ŵakupikanila, ngaŵaga ligongo lyakogopa chilangope, nambosoni kuti mkole chikumbumtima chambone. 6 Ni ligongo lyakwe jemanja mkusakomaga msongo, pakuŵa jemanjaji ali ŵamasengo ŵa Mlungu ŵakutumichila ŵandu mwamti ndaŵi syosope akusakwanilisya chakulinga chelechi. 7 Jwalijose mumpeje yakusaka. Jwakusaka kumpa msongo, mumpeje msongo. Jwakusaka mbiya ja chipaso mumpeje mbiya ja chipaso. Jwakusosekwa kumjogopa, mumjogopeje, soni jwakusosekwa kumchimbichisya, mumchimbichisyeje.

8 Mkasimkola magongo* ni mundu jwalijose, nambo mnonyelaneje. Ligongo jwalijose jwakumnonyela mjakwe akutenda yachikusasala Chilamusi. 9 Pakuŵa pana malamusi gakuti, “Mkatenda chikululu,* mkawulaga mundu, mkajiŵa, soni mkakumbila yindu ya ŵane mwakulemwecheka.” Malamusi gelega soni gane gosope, gali mu lilamusi ali lyakuti, “Mumnonyeleje mjenu mpela mwamkusalinonyelela mwasyene.” 10 Mundu jwachinonyelo ngaŵa mkwatendela ŵane yakusakala. Myoyo naga mundu akwanonyela ŵane nikuti akutenda yachikusasala Chilamusi.

11 Mtendeje yeleyi ligongo mkumanyilila kuti ndaŵi jakwimuka kulugono jikwanile. Pakuŵa ndaŵi jakuti tukulupuche jisigele panandi mnope kulekangana ni pandaŵi jitwaŵele ŵakulupilila. 12 Chipi chisigele panandi kumala, mwamti kusa kusigele panandi kucha. Myoyo kwende tuleche kutenda yindu yakamulana ni chipi, nambo tujigale* yida yakamulichisya masengo musi. 13 Kwende tukole ndamo syambone mpelaga ŵandu ŵakutenda yindu kusa kuli kulangwiche. Tukatendaga yisangalalo yangalondeka soni kukolelwa. Tuŵambaleje chikululu soni ndamo jakulijasilila,* nambosoni tukatendaga yandewu kapena kuŵa ŵajelasi.* 14 Mmalomwakwe kwende tukuyeje chenene chisyasyo cha Ambuje ŵetu Yesu Klistu, soni tukakosechelaga kutenda yakumbila ya chilu chetu.