Buku Jandanda ja Ayimwene

21 Panyuma pa yeleyi, patendekwe ngani jine jakwayana ni mgunda wa mipeleya wa Naboti jwa ku Yeseleeli. Mgundawu waliji ku Yeseleeli chiŵandika ni nyumba ja umwenye ja Ahabu mwenye jwa ku Samaliya. 2 Ahabu ŵamsalile Naboti kuti, “Mumbe mgunda wenu wa mipeleyawu kuti nawutende kuŵa litimbe lyakuti mbandeje liponda. Pakuŵa mgundawu uli chiŵandika ni nyumba jangu. Naga mkumba, une chinampe mgunda wine wa mipeleya wambone mmalo mwa welewu. Soni naga mkusaka, mpaka nampe mbiya syakwilana ni mtengo wa mgundawu.” 3 Nambo Naboti ŵamjanjile Ahabujo kuti, “Nganiŵa yiŵele yambone pameso pa Yehofa kuti une mbeleche kwa wawojo chipanje chanapochele kutyochela kwa achinangolo ŵangu.” 4 Myoyo Ahabu jwapite ku nyumba jakwe ali atumbile soni mtima uli kumpweteka ligongo lya kwanga kwaŵajanjile Naboti jwa ku Yeseleeli juŵaŵechete kuti, “Une nganimba napele wawojo chipanje chanapochele kutyochela kwa achinangolo ŵangu.” Kaneko Ahabujo jwagonile pa bedi jakwe ni kulola kumbali soni jwakanaga kulya.

5 Myoyo Yesebele ŵamkwakwe ŵala ŵayiche kwa jwalakwe ni kumwusya kuti, “Ligongo chichi atumbile mnope mpaka kwikana pakukana kulya?” 6 Jwalakwe ni ŵajanjile kuti, “Ligongo lyakuti namsalile Naboti jwa ku Yeseleeli kuti, ‘Musumisye mgunda wenu wa mipeleya, kapena naga mkusaka chinampe mgunda wine wa mipeleya mmalo mwa welewu.’ Nambo jwalakwe ŵanjanjile kuti, ‘Une nganimba napele mgunda wangu wa mipeleya.’” 7 Ŵamkwakwewo ni ŵamsalile jwalakwe kuti, “Ana ngati wawo ali mwenye jwakwalamulila Ayisalayeli? Ajimuche pelepo alye soni mtima wawo uŵe wakusangalala. Une chinape wawojo mgunda wa Naboti jwa ku Yeseleelijo.” 8 Myoyo jwamkongwejo jwalembile yikalata mu lina lya Ahabu ni ŵayidindile ni chidindo cha mwenyewo. Kaneko ŵayitumisye yikalatayo kwa achakulungwakulungwa soni kwa ŵandu ŵakuchimbichika ŵa mu msinda waŵatamaga Naboti. 9 Jwalakwe ŵalembile mu yikalatamo kuti, “Alengesye kuti ŵandu alijime kulya, soni Naboti atame kusogolo kwa ŵanduwo. 10 Nambosoni apate achalume ŵaŵili ŵangali mate ni ŵaŵiche pasogolo pa Nabotijo. Jemanjajo chapeleche umboni wakumlambuchisya jwalakwejo. Chaŵechete kuti, ‘Wawojo amnyosisye Mlungu soni mwenye.’ Kaneko akamkoposye jwalakwejo mu msindamo ni kuja kumponya maganga mpaka kumwulaga.”

11 Myoyo achakulungwakulungwa soni achalume ŵakuchimbichika ŵa mumsinda waŵatamaga Naboti ŵatesile yayaliji m’yikalata yaŵatumichisye Yesebele yila. 12 Jemanjaji ŵalengesye kuti ŵandu alijime kulya soni kuti Naboti atame kusogolo kwa ŵanduwo. 13 Kaneko achalume ŵaŵili ŵangali mate ŵala ŵayiche ni kutama pasogolo pa jwalakwe, soni jemanjajo ŵatandite kupeleka umboni wakumlambuchisya Nabotijo pameso pa ŵanduwo. Jemanjajo ŵaŵechete kuti, “Naboti amnyosisye Mlungu soni mwenye.” Panyuma pakwe ŵanduwo ŵamjigele Nabotijo ni kwawula najo kusa kwa msinda mwamti ŵamponyisye maganga mpaka kumwulaga. 14 Kaneko ŵatumisye utenga kwa Yesebele wakuti, “Naboti julatu amsomile maganga mwamti awile.”

15 Yesebele paŵagambile kupikana kuti Naboti amsomile maganga mpaka kumwulaga, ŵamsalile Ahabu kuti, “Anyakuche, ajawule akajigale mgunda wa mipeleya wa Naboti jwa ku Yeseleeli jula, mgunda wele jwalakwe ŵakanyisye wawojo kuti awusume, pakuŵatu jwalakwe kwangali. Awile basi.” 16 Ahabu paŵagambile kupikana kuti Naboti jula awile, jwalakwe ŵanyakwiche ni kwawula ku mgunda wa mipeleya wa Naboti jwa ku Yeseleeli, mwamti ŵawujigele ni kuŵa wakwe.

17 Nambo Yehofa ŵaŵechete ni Eliya jwa ku Tisibe, ni ŵamsalile kuti, 18 “Mnyakuche, mjawule mkasimane ni Ahabu mwenye jwa Ayisalayeli jwali ku Samaliya. Kweleko chimkamsimane jwalakwe ali mumgunda wa mipeleya wa Naboti. Jwalakwe apite kweleko kuti akawujigale mgundawo kuŵa wakwe. 19 Mkamsalile jwalakwejo kuti, ‘Yehofa aŵechete kuti, “Ana mmweji mwuleje mundu ni kumsumulasoni chipanje chakwe?” Kaneko mkamsalile kuti, ‘Yehofa aŵechete kuti, “Pamalo gele mbwa syalapite myasi ja Naboti, pamalo gagogo mbwa sichilapitasoni myasi jenu.”’”

20 Sambano Ahabu ŵamsalile Eliya kuti, “Mmwe mdani jwangu, myikopochele yindesile eti?” Pelepo Eliya ŵamjanjile jwalakwejo kuti, “Elo kwene, nayikopochele. ‘Ligongo lyakuti mmwejo msimichisye kutenda yindu yayili yakusakala pameso pa Yehofa, 21 une chiyikasye yakusawusya pa mmwejo, soni chinjipyajila ŵandu wosope ŵa m’nyumba jenu. Nambosoni chinjawulaga achalume wosope ŵa m’nyumba ja Ahabu, kupwatikapo jwalijose jwakutuluka kapena jwakutesya chanasa jwali mu Isalayeli. 22 Nambosoni chinjitendekasya kuti nyumba jenu jiŵe mpela nyumba ja Yelobowamu mwanache jwa Nebati, soni mpela nyumba ja Basa mwanache jwa Ahiya, pakuŵa mmwejo mundumbilikasisye soni mwatendekasisye Ayisalayeli kuti alemwe.’ 23 Nambosoni pakwamba ya Yesebele, Yehofa aŵechete kuti, “Mbwa sichimtawuna Yesebele mumgunda wa ku Yeseleeli. 24 Mundu jwalijose jwa m’liŵasa lya Ahabu juchachiwila mumsinda, mbwa sichilya mtembo wakwe, soni jwalijose juchachiwila mumgunda, yijuni yakwinani yichilya mtembo wakwe. 25 Kusala yisyene, paliji pangalisoni mundu jwine jwalijose juŵaliji mpela Ahabu, jwele ŵasimichisye* kutenda yindu yakusakala pameso pa Yehofa. Yesebele juŵaliji ŵamkwakwe ni juŵamlimbikasyaga Ahabu kutenda yeleyi. 26 Ahabu jwatesile yindu yakunyalaya mnope mwakujikuya milungu jakunyalaya* mpela muŵatendelaga Aamoli ŵele Yehofa ŵatopwele kuti akasawonekasoni pameso pa Ayisalayeli.’”

27 Ahabu paŵagambile kupikana maloŵe gelega ŵapapwile yakuwala yakwe ni kuwala yiguduli. Kaneko jwalakwe ŵatandite kulijima kulya soni ŵagonaga ali awete yiguduliyo nambosoni ŵajendaga ali jwachanasa. 28 Kaneko Yehofa ŵaŵechete kwa Eliya jwa ku Tisibe kuti, 29 “Ana myiweni yatite Ahabu pakulinandiya pameso pangu? Ligongo lyakuti jwalakwejo alinandiye pameso pangu, une ngayikasya yakusawusyayi jwalakwejo ali umi. Mmalomwakwe chinjiyikasya yakusawusyayi panyumba jakwe m’masiku ga mwanache jwakwe.”