Buku Jandanda ja Ayimwene

20 Sambano Mwenye Beni-hadadi jwa ku Siliya ŵasongangenye asilikali ŵakwe wosope pampepe ni mamwenye gane gakwana 32. Ŵagasongangenye mamwenyega yalumo ni mahachi gawo soni magaleta* gawo. Jwalakwe ŵapite kukuwusyungulila msinda wa Samaliya ni ŵatandite kumenyana nawo. 2 Kaneko jwalakwe ŵatumile ŵandu ku msindawo kuti akamsalile Ahabu mwenye jwa Ayisalayeli utenga wakuti, “Beni-hadadi aŵechete kuti, 3 ‘Silifa jwenu soni golide jwenu ali jwangu pampepe ni achakongwe ŵenu ŵakusalala mnope soni ŵanache ŵenu ŵachalume.’” 4 Pelepo mwenye jwa Ayisalayeli ŵajanjile kuti, “Mwakamulana ni maloŵe gawo ambuje ŵangu mwenye, une ndili jwawo pampepe ni yosope yangwete.”

5 Ŵandu ŵala ŵayichesoni kukusala utenga wakuti, “Beni-hadadi aŵechete kuti, ‘Une natumisye utenga kwa mmwejo wakuti, “Une chimumbe silifa jwenu, golide jwenu, achiŵamkwenu, soni ŵanache ŵenu ŵachalume.” 6 Malaŵi ndaŵi mpela jinojino chinjatumisya ŵakutumichila ŵangu kwa mmwejo, soni jemanjajo chachiwungunya mwakusamala m’nyumba jenu soni m’nyumba sya ŵakutumichila ŵenu, mwamti yindu yenu yosope yambone mnope chachiyijigala ni kwawulaga nayo.’”

7 Pelepo mwenye jwa Ayisalayelijo ŵaŵilasile achakulungwakulungwa wosope ŵa m’chilambocho ni kwasalila kuti, “Chonde amanyilile ayi, mundu jweleju akusaka kwikasya yakusawusya, pakuŵa jwalakwe ŵalamwile kuti nampe achiŵamkwangu, ŵanache ŵangu, silifa jwangu, soni golide jwangu, mwamti une nganinamkanya.” 8 Nambo achakulungwakulungwa wosopewo soni ŵandu wosope ŵamjanjile jwalakwejo kuti, “Akapikanila yeleyo, soni akakamulana nayo.” 9 Myoyo jwalakwe ŵasalile ŵandu ŵaŵatumile Beni-hadadi ŵala kuti, “Mkasalile ambuje ŵangu mwenyewo kuti, ‘Yindu yosope yaŵalamwile une jwakutumichila jwawo kandanda kala chinayitende. Nambo yindu yalamwile apanoyi nganimba ndesile.’” Pelepo ŵandu ŵaŵayiche ni utenga ŵala ŵanyakwiche ni kuja kumsalila Beni-hadadi maloŵega.

10 Sambano Beni-hadadi ŵamtumichisye Ahabu utenga wakuti, “Milungu jimbe chilango* chekulungwa naga mu Samaliya mwana luwundu lwakwanila kugumbasya ligasa limo lya mundu jwalijose jwakunguya.” 11 Mwenye jwa Ayisalayeli ni jwajanjile kuti, “Mkamsalile Beni-hadadijo kuti, ‘Mundu jwakuwala yida yakwe yangondo ngakusosekwa kulilapilila mpela mundu jwakuwula yida yakwe yangondo.’” 12 Beni-hadadi paŵagambile kupikana yaŵajanjile Ahabuyi pandaŵi jele jwalakwe ŵaliji mkumwa yimpepe ni achayimwene ŵane m’matenti* gawo, ŵasalile ŵakutumichila ŵakwe kuti, “Mkoseche kuti tukapute ngondo.” Myoyo jemanjajo ŵakoseche kuti awujimuchile msindawo.

13 Sambano jwakulochesya jwayiche kwa Mwenye Ahabu jwa ku Isalayeli ni kumsalila kuti, “Yehofa aŵechete kuti, ‘Ana mjiweni gulu jekulungwa josopeji? Une ngujipeleka gulu josopeji mmyala mwenu lelo. Pelepo mmwejo chimmanyilile kuti une ndili Yehofa.’” 14 Ahabu ni ŵawusisye kuti, “Chakamulichisye masengo ŵani pakutenda yeleyo?” Jwakulochesyajo ni jwajanjile kuti, “Yehofa aŵechete kuti, ‘Chakamulichisye masengo ŵakutumichila ŵa ŵakulamulila ŵakusalolela madela.’” Ahabujo ni jwawusisye kuti, “Ni ŵani ŵachajitande ngondojo?” Jwakulochesyajo jwajanjile kuti, “Wawojo.”

15 Kaneko Ahabu jwaŵalasile ŵakutumichila ŵa achakulungwakulungwa ŵakulolela madela, ni ŵapatile kuti jemanjaji ŵapali ŵakwana 232. Kaneko ŵaŵalasile achalume wosope ŵa ku Isalayeli ŵaŵapali ŵakwana 7,000. 16 Pandaŵi ja musi jemanjaji ŵakopweche. Pandaŵiji Beni-hadadi ŵaliji ali mkumwa m’matenti* gala mwamti ŵakolelwe. Jwalakwe ŵaliji yimpepe ni achayimwene ŵakwana 32 ŵaŵaliji mkumkamuchisya ŵala. 17 Ŵakutumichila ŵa ŵakulongolela ŵakulolela madela ŵala ni ŵaŵatandite kukopoka. Ndaŵi jijojo Beni-hadadi ŵatumisye ŵandu kuti akalole yayikutendekwa. Jemanjaji ŵamsalile jwalakwejo kuti, “Kuyiche ŵandu kutyochela ku Samaliya.” 18 Pelepo Beni-hadadijo ŵatite, “Naga ayichile mtendele ŵajigale ni kwika nawo akuno ali ŵaumi, atamose jemanjajo aŵe kuti ayichile ngondo ŵajigalepe ni kwika nawo akuno ali ŵaumi.” 19 Nambo ŵakutumichila ŵa ŵakulongolela ŵakulolela madela ŵala pampepe ni asilikali ŵaŵakuyaga jemanjaji paŵagambile kukopoka mumsinda mula, 20 jwalijose jwatandite kumwulaga mdani jwakwe. Kaneko Asiliyawo ŵatandite kutila, mwamti Ayisalayeliwo ŵatandite kwatoposya jemanjajo. Nambo Mwenye Beni-hadadi jwa ku Siliya ŵatisile pa hachi yimpepe ni achalume ŵane ŵakwela pamahachi. 21 Kaneko mwenye jwa ku Isalayeli ŵayiche ni kupitilisya kwawulaga adani ŵawo ŵaŵakwesile pamahachi soni pamagaleta, mwamti jwalakwe ŵawuleje Asiliya ŵajinji mnope.

22 Panyuma pakwe jwakulochesya jwayiche kwa mwenye jwa ku Isalayeli ni kumsalila kuti, “Ajawule akajilimbisye gulu jawo ja asilikali soni kulola yampaka atende pakuŵa chakundanda kwa chaka cha malaŵi mwenye jwa Asiliya chachiyikasoni kukulimbana ni wawojo.”

23 Sambano ŵakutumichila ŵa mwenye jwa ku Siliya ŵamsalile mwenyejo kuti, “Mlungu jwa jemanjajo ali Mlungu jwa m’matumbi. Ni ligongo lyakwetu jemanjajo ŵatugomeche m’weji. Nambo naga tukwawula kukumenyana nawo ku malo gafulati chitukagomeche. 24 Nambosoni atende ayi, agatyosye mamwenye gosope m’maudindo gawo ni kuŵikamo achibwanamkubwa mmalo mwawo. 25 Kaneko ŵasonganganye asilikali. Winji wakwe uŵe wakulandana ni asilikali ŵaŵawile ŵala. Nombe winji wa mahachi soni magaleta uŵe wakulandana ni wapandanda ula. Panyuma pakwe tukamenyane ni jemanjaji pamalo gafulati, mwamti nditu chitwagomeche.” Beni-hadadi ŵapikanile yiŵamsalileyo soni ŵayitesile.

26 Chakundanda kwa chaka, Beni-hadadi ŵasongangenye Asiliya ni kwawula ku Afeki kuti akamenyane ngondo ni Ayisalayeli. 27 Nombenawo Ayisalayeli ŵasongangene pampepe soni ŵajigele yindu yawo yakusosechela ni kuja kusimana ni Asiliyawo. Ayisalayeliwo paŵakunjile matenti gawo chakusogolo kwa jemanjajo ŵawonekaga mpela tumagulu tuŵili twa mbusi. Nambo Asiliyawo ŵagumbalene dela josopejo. 28 Kaneko mundu jwa Mlungu jwakuwona jwayiche kwa mwenye jwa Ayisalayeli ni kumsalila kuti, “Yehofa aŵechete kuti, ‘Ligongo lyakuti Asiliya aŵechete kuti, “Yehofa ali Mlungu jwa m’matumbi, soni kuti nganaŵa Mlungu jwa mmalo gafulati,” une chinajipeleche gulu josopeji mmyala mwenu, soni jemanja chimmanyilile nditu kuti une ndili Yehofa.’”

29 Jemanjaji ŵaŵele ali akunjile matenti gawo mwakulolegana kwa masiku 7, soni palisiku lya 7 lyelelyo ngondo jatandite. Ayisalayeli ŵawuleje asilikali ŵakwenda pasi ŵa Asiliya ŵakwana 100,000 palisiku limo. 30 Asilikali ŵakusigalawo ŵatilile mu msinda ŵa Afeki. Nambo lipupa lyagwilile asilikali ŵakwana 27,000 pa asilikali ŵaŵasigeleŵa. Nombenajo Beni-hadadi ŵatisile ni kwinjila mu msindamo, mwamti ŵajuŵile mu chipinda chamkati.

31 Myoyo ŵakutumichila ŵakwe ŵamsalile jwalakwejo kuti, “M’we twapikene kuti mamwenye ga ku Isalayeli gali mamwenye gachanasa.* Kwende chonde tuwale yiguduli mchiwunu mwetu soni tutaŵilile ngonji mitwe jetu ni kwawula kwa mwenye jwa ku Isalayeli. Mwine jwalakwejo ngaŵawulaga wawojo.” 32 Myoyo jemanjajo ŵawete yiguduli mchiwunu mwawo soni ŵataŵile ngonji m’mitwe mwawo, ni ŵayiche kwa mwenye jwa ku Isalayeli ni kumsalila kuti, “Jwakutumichila jwawo Beni-hadadi aŵechete kuti, ‘Chonde akambulaga.’” Pelepo jwalakwe ni ŵajanjile kuti, “Ana jwalakwe ali chiŵela umi? Jwejulatu ali mlongomjangu.” 33 Achalumewo ŵayiweni yeleyi mpela chimanyisyo chakuti yindu chiyiŵe chenene, soni jemanjajo ŵayiweni kuti yaŵechete mwenyeyo yili yisyene. Myoyo jemanjaji ŵatite, “Beni-hadadi ali mlongomjawo.” Pelepo Ahabujo ŵajanjile kuti, “Mjawule kamjigale jwalakwejo.” Kaneko Beni-hadadi ŵanyakwiche ni kwawula kwa Ahabu, soni Ahabujo ŵamkwesisye jwalakwejo mu ligaleta.*

34 Sambano Beni-hadadi ŵamsalile Ahabujo kuti, “Chinamwuchisye misinda jele baba ŵangu ŵasumwile baba ŵenu, soni mmwejo mpaka mtamilikasye misika jenu ku Damasiko mpela muŵatendele baba ŵangu ku Samaliya.” Ahabu ni ŵajanjile kuti, “Mwakamulana ni yatukamuleneyi chinamleche kuti mjawuleje.” Pelepo Ahabu ŵatesile mkamulano ni Beni-hadadi, ni ŵamlesile kuti ajawuleje.

35 Pakukuya yaŵalamwile Yehofa, jumo mwa ŵanache ŵa ŵakulochesya* ŵamsalile mjakwe kuti, “Chonde mumbute.” Nambo mundujo ŵakanile kumputa jwalakwe.

36 Myoyo jwalakwe ŵamsalile mundujo kuti, “Ligongo lyakuti mmwejo nganimpikanila maloŵe ga Yehofa, pachimgambe kulekangana ni une lisimba chilimwulaje mmwejo.” Jwalakwe paŵagambile kutyoka lisimba lyayiche ni kumwulaga.

37 Kaneko mwanache jwa jwakulochesya jula jwamsimene mundu jwine ni kumsalila kuti, “Chonde mumbute.” Myoyo mundujo ŵamputile jwalakwe mpaka kumwulasya.

38 Kaneko jwakulochesyajo ŵanyakwiche ni kwajembecheyaga mwenye mu mbali mwa msewu. Jwalakwe ŵalitaŵile kumeso kwakwe ni kaguwo kuti ŵandu akammanyilila. 39 Mwenyewo paŵapitaga jwalakwe ŵasalile mwenyewo kuti, “Une jwakutumichila jwawo najinjile mkatikati mwa gulu ja ŵandu ŵaŵamenyanaga ngondo. Ni papali mundu jwine juŵayiche ni mundu kwa une ni kusalila kuti, ‘Mumloleleje munduju. Naga mundu jweleju akusoŵa, umi wenu uchijinjila mmalo mwa umi wa jwalakwejo, kapena nikuti chimchipeleka talente* jimo jasilifa.’ 40 Sambano pandaŵi jele une jwakutumichila jwawo naliji ndili ndanganidwe ni yindu yine, ndaŵi jijojo yasimanikwe kuti mundu jula apite.” Pelepo mwenye jwa Ayisalayeli ŵamsalile jwalakwejo kuti, “Yamŵecheteyi ni yachiyiŵe chilango chenu, pakuŵa mŵechete jika.” 41 Ndaŵi jijojo jwalakwe ŵagopwele kaguwo kaŵataŵile kumeso kala, mwamti mwenye jwa Ayisalayelijo ŵammanyilile kuti jwaliji jumo jwa ŵakulochesya. 42 Jwakulochesyajo ni ŵasalile mwenyewo kuti, “Yehofa aŵechete kuti, ‘Ligongo lyakuti mumlesile soni kumkunda kuti atile mmyala mwenu mundu jwele namlamwile kuti mumwulaje, umi wenu chiwujinjile mmalo mwa umi wa jwalakwejo, soni ŵandu ŵenu chajinjile mmalo mwa ŵandu ŵa jwalakwejo.’” 43 Pelepo mwenye jwa Ayisalayelijo jwapite kumangwakwe ku Samaliya ali jwachanasa soni jwangasangalala.