Chikalata Chandanda cha Petulo

5 Myoyo, une mpela jwamkulungwa soni mboni ja yakupweteka yaŵasimene nayo Klistu, nambosoni jwakupochela nawo uchimbichimbi wawuchiwonechelawo, ngwete maloŵe aga kwa achakulungwa ŵali pasikati penu, gakuti, 2 Mlanjeje ngondolo sya Mlungu siŵamlechele kuti msisamalileje. Mpela ŵakulolela, mkamuleje masengo genu ngaŵaga mwakulikanganichisya nambo mwakusachilila pakuŵa mli ŵakutumichila ŵa Mlungu. Ngaŵagasoni mwakusaka kupata yindu mwachinyengo, nambo mwakulipeleka. 3 Mkatendaga umwenye pa ŵandu ŵele ŵali chipanje cha Mlungu, nambo mŵeje yisyasyo kwa ngondolo sya Mlungu. 4 Soni jwakuchinga jwamkulungwa pachachiwonechela, jemanja chimchipochela singwa jauchimbichimbi janganijiŵa jinyasile.

5 Myoyosoni jemanja ŵachinyamata, mwapikanileje achakulungwa.* Nambo jemanja wosope mtendelaneje yindu mwakulinandiya pakuŵa Mlungu akusiŵakana ŵandu ŵakulikwesya, nambo akusapeleka umbone mtima wekulungwa kwa ŵandu ŵakulinandiya.

6 Myoyo, mlinandiyeje pasi pa mkono wamachili wa Mlungu, ni chakulinga chakuti Mlungujo chamkwesye jemanja pandaŵi jakwe jakuŵajilwa. 7 Soni mumtulileje jwalakwe yakudandawulisya yenu yosope, ligongo jwalakwe akusasamala mnope ya jemanja. 8 Mŵeje ŵaganisya chenene, soni mŵeje mesope. Satana, jwali mdani jwenu, akwendajenda aku nakuku mpela lisimba lyakutongola, kupita mchisosasosa jwakuti amlye. 9 Nambo jemanja mlimbane najo jwalakwejo, soni mŵeje ŵakulimba m’chikulupi. Mmanyilileje kuti achalongo achimjenu pachilambo chosope* akusimanasoni ni yakusawusya yakulandana ni yamkusimana nayo jemanja. 10 Nambo panyuma pakuti mlasile kwakandaŵi, Mlungu jwakusalosya umbone mtima wakwe wekulungwa m’litala lililyose, jwelesoni ŵamŵilasile jemanja kuti mŵe ŵakamulana ni Klistu kuti mkapochele uchimbichimbi wakwe wangamala, jwalakwejo chachimalisya kumjiganya. Jwalakwe chachimlimbisya, chachimpa machili soni chachimkamuchisya kuti mŵe ŵangatenganyika. 11 Mlungujo ni jwakwete machili mpaka kalakala. Ame.

12 Ngumlembela jemanja chikalatachi ni maloŵe gamnono, soni Silifano* mlongo mjetu jwangusamwona kuti ali jwakulupichika ni jwangamuchisye pakulemba. Namlembele kuti namlimbikasye jemanja soni kuti nampe umboni wakusimichisya kuti umbone mtima wekulungwa wele Mlungu ŵamlosisye jemanja uli usyesyene. Myoyo mwukamuleje mwamachili. 13 Jwamkongwe jwali ku Babulo, jwelesoni Mlungu ŵamsagwile mpela jemanja, akumpa moni. Nombenajo Maliko jwali mpela mwanangu, akumpasoni moni. 14 Mkomasyaneje mwachinonyelo.

Mtendele uŵe ni jemanja wosope ŵamli ŵakamulana ni Klistu.