Chikalata Chatatu cha Yohane

1 Une mundu jwachikulile,* ngumlembela mmwejo Gayo, jwangusinamnonyela yisyesyene.

2 Mlongo mjangu jwapamtima, ngupopela kuti yindu yipitilisye kumjendela chenene soni kuti mkole umi wambone, mpela mwayikuti pakumjendela apanopano. 3 Pakuŵa nasangalele mnope achalongo achimjetu paŵayiche akuno ni kupeleka umboni wakuti mkukuya yijiganyo yisyesyene, soni ngusangalala kuti mkupitilisya kutenda myoyo. 4 Pangali chachikusasangalasya* mnope kupunda kupikana kuti ŵanache ŵangu akukuyape yijiganyo yisyesyene.

5 Mlongo mjangu jwapamtima, mkusalosya kulupichika kwenu pa yindu yamkusimwatendela achalongo achimjetu, atamose kuti ngamkwamanyilila. 6 Jemanjaji apeleche umboni ku mpingo pakwamba ya chinonyelo chenu. Ŵandu mpela ŵeleŵa pakutyoka, ngumŵenda kuti mwatendeleje yindu yampaka yimsangalasye Mlungu. 7 Jemanjaji akwenda ni kulalichilaga ya lina lya Mlungu, soni ngakujigalaga kalikose kutyochela kwa ŵandu ŵamitundu jine. 8 Myoyo tukwete udindo wakwapochela chenene ŵandu ŵamti mpela ŵeleŵa, kuti tuŵe ŵamasengo achimjawo pakulalichila yijiganyo yisyesyene.

9 Namlembele chikalata jemanja wosope mumpingo wenu, nambo Diyotilefe jwakusasaka kuŵa jwandanda pasikati pa jemanja, jwangapochela mwaulemu chilichose chakutyochela kwetuwe. 10 Ni ligongo lyakwe pachinjiyika, chinjisala kwa wosope yakutenda jwalakwejo. Jwalakweju akuŵecheta yachipongwe* yakwamba m’weji. Mwangajikutilasoni ni yeleyi, jwalakwejo akusakana kwapochela mwaulemu achalongo achimjetu, soni ŵandu ŵakusasaka kwapochela jemanjaji, akusiŵalekasya soni kwatyosya mumpingo.

11 Mlongo mjangu jwapamtima, mkasyasyaga yindu yakusakala nambo msyasyeje yindu yambone. Mundu jwakusatenda yambone ali jwakutyochela kwa Mlungu. Nambo mundu jwakusatenda yakusakala ngakummanyilila Mlungu. 12 Achalongo achimjetu wosope akumtendela umboni wambone Demetiliyo, soni yeleyi yikukamulana ni yayili yisyesyene. M’wejisoni tukumtendela umboni, soni mmwejo mkumanyilila kuti umboni watukusapeleka m’weji ukusaŵa wakuwona.

13 Ngwete yindu yejinji yakuti namlembele, nambo ngangusaka kuti mbitilisye kuyilemba ni chakulembela soni inki. 14 Nambope, ndili jwakusachilila kwika pachangakaŵa kuti namlole, mwamti tuchiŵechetana pameso ni pameso.

Mtendele uŵe ni mmwejo.

Achimjetu akuno akumpa moni. Unesoni mumbelechele moni kwa achimjetu wosope kweleko jwalijose pajikapajika.