Ngani Syambone Syaŵalembile Yohane

5 Panyuma pakwe ndaŵi ja chisangalalo cha Ayuda jakwanile, mwamti Yesu jwapite ku Yelusalemu. 2 Sambano ku Yelusalemu, pa Mlango wa Ngondolo papali litanda lyakolanjidwa kuti Betisata mu Chihebeli. Litandali lyakwete mapenu msano gakola yipilala. 3 M’mapenumo mwagonaga ŵandu ŵajinji ŵakulwala, ŵangalola, ŵalemale, nambosoni ŵandu ŵele ŵaliji ŵawe makono soni ngongolo. 4 *—— 5 Sambano pelepo paliji pana mundu jwine juŵaliji mkulwala kwa yaka 38. 6 Yesu paŵam’weni munduju ali chigonele soni pakumanyilila kuti aŵele ali mkulwala kwa ndaŵi jelewu, ŵamwusisye kuti, “Ana mkusaka kuŵa chenene?” 7 Mundu jwakulwalajo jwajanjile kuti, “Ambuje, nganingola jwalijose jwampaka anjinjisye mu litandamu mesi pagakuwinduka.* Pangwawula kuti ngajinjile ŵane akumbitililaga.” 8 Yesu ŵamsalile mundujo kuti, “Mjimuche! Mjigale ugono wenu ni mtande kwenda.” 9 Ndaŵi jijojo mundujo jwaposile,* soni jwajigele ugono wakwewo ni kutanda kwenda.

Lisikuli lyaliji lya Sabata. 10 Myoyo Ayuda ŵatandite kumsalila mundu juŵaposilejo kuti, “Lelo lili lisiku lya Sabata, ni nganikuŵa kwakuŵajilwa kuti mmwejo mnyakuleje ugono.” 11 Nambo jwalakwe jwajanjile jemanjajo kuti, “Mundu jwambosisye asalile kuti, ‘Mjigale ugono wenu ni mtande kwenda.’” 12 Jemanjajo ŵamwusisye kuti, “Ana ŵamsalile mmwejo kuti, ‘Mjigale ugono wenu ni mtande kwenda’ ali ŵani?” 13 Nambo jwalakwe nganammanyilila mundu juŵamposisyejo, ligongo Yesu ŵaliji ali ajinjile kala mugulu ja ŵandu ŵaŵaliji pelepo.

14 Panyuma pakwe Yesu ŵamsimene mundujo ku nyumba ja Mlungu ni ŵamsalile kuti, “Sambano pakuŵa mposile, mkasimtenda chakulemwa, kogopela kuti chindu chinechakwe chakogoya mpaka chimtendechele.” 15 Mundujo jwatyosile ni kuja kwasalila Ayuda kuti juŵamposisye jwalakwejo ali Yesu. 16 Pelepo Ayuda ŵatandite kumlagasya Yesu, ligongo lyakuti ŵatendaga yindu mpela yeleyi pa lisiku lya Sabata. 17 Nambo jwalakwe jwajanjile jemanjajo kuti, “Atati ŵangu aŵele mkukamula masengo mpaka apano, unesoni ngukamulape masengo.” 18 Ni ligongo lyakwe Ayuda ŵatandite kusachilila mnope kuti amwulaje, ligongo jwalakwe jwakasaga lilamusi lya Sabata soni ligongo lyakuti jwasalaga kuti Mlungu ali Atati ŵakwe, yele yaŵaga mpela akulitendekasya kuŵa jwakulandana ni Mlungu.

19 Myoyo Yesu jwajanjile jemanjajo kuti, “Nditu ngumsalichisya, Mwanache nganaŵa atesile chindu chilichose mwajika, nambo akusatenda yele peyo yayiweni Atati ŵakwe ali mkutenda. Pakuŵa yindu yiliyose yakusatenda Atati, Mwanache akusatendasoni yeleyo. 20 Pakuŵa Atati akusamnonyela Mwanache soni akusamlosya yindu yosope yakusatenda, nambosoni chachimlosya jwalakwe masengo gekulungwa kupunda gelega, kuti jemanja msimonje. 21 Pakuŵa mpela mwakusatendela Atati pakwimusya ŵawe, myoyosoni Mwanache akusiŵajimusya ŵaliwose ŵakwasaka. 22 Pakuŵa Atati ngakusam’welusya mundu jwalijose, nambo apeleche udindo wosope wakuwelusya kwa Mwanache, 23 ni chakulinga chakuti wosope amchimbichisye Mwanache mpela mwakusatendela pakwachimbichisya Atati. Jwalijose jwangamchimbichisya Mwanache nikuti jwangachimbichisyasoni Atati ŵaŵamtumile jwalakwe. 24 Nditu ngumsalichisya jemanja kuti, jwalijose jwakupikanila maloŵe gangu soni kumkulupilila Juŵandumile une, chachipata umi wangamala. Nambosoni jwalakwe ngasajimbidwa magambo nambo atyosile ku chiwa ni kwawula ku umi.

25 “Nditu ngumsalichisya jemanja kuti, jikwika ndaŵi soni ni jinojino, pele ŵawe chachipikana maloŵe ga Mwanache jwa Mlungu, soni ŵachachipikanila chachipata umi. 26 Pakuŵa mpela mwaŵelele Atati kuti akwete machili gakupeleka umi, ni mwaŵelelesoni Mwanache kuti ŵampele machili gakupeleka umi. 27 Nambosoni jwalakwe ampele udindo wakuwelusya, ligongo ali Mwanache jwa mundu. 28 Mkasimonga ni yeleyi, pakuŵa jikwisa ndaŵi pele ŵandu wosope ŵali m’malembe* chachipikana maloŵe gakwe 29 ni chachijimuka. Ŵaŵatendaga yindu yambone chachipochela umi wangamala, nambo ŵaŵatendaga yindu yakusakala chachawelusya. 30 Nganimba ndesile chindu chilichose mwajika. Ngusawelusya mwakamulana ni yasasile Atati, soni kuwelusya kwangu kuli kwachilungamo ligongo ngangusatenda yakusaka yangu, nambo ngusatenda yakusaka ya jwele juŵandumile une.

31 “Naga ngulitendela umboni jika, nikuti umboni wanguwo nganiwuŵa wakuwona. 32 Nambo pana jwine jwakusandendela umboni une, soni ngusamanyilila kuti umboni wakusandendelawo uli wakuwona. 33 Jemanja mwatumisye ŵandu kwa Yohane, soni jwalakwejo jwapeleche umboni usyesyene pakwamba ya une. 34 Nambotu une jwangadalila umboni wakutyochela kwa ŵandu, nambo nguŵecheta yosopeyi kuti jemanja mkulupuche. 35 Yohane jweleju jwaliji mpela nyali jakolela soni jakuŵala, soni kwa ndaŵi jamnono jemanja mwasangalele mnope m’lilanguka lyakwe. 36 Nambo une ngwete umboni kupunda wa Yohane, pakuŵa masengo gaŵambele Atati ŵangu kuti ngwanilisye ni gele gangutendaga, soni gakundendela umboni kuti Atati ŵandumile uneji. 37 Nambosoni Atati ŵaŵandumile unewo atendele umboni pakwamba ya une. Jemanja chitandilile nganimpikaneje maloŵe gawo kapena kujiwona ngope jawo, 38 soni maloŵe gawogo nganigatamilichika mwa jemanja, ligongo nganimumkulupilila mundu jwele Atatiwo ŵamtumile.

39 “Jemanja mkusasosasosa m’Malemba ligongo mkusaganisya kuti chimchipata umi wangamala kupitila m’Malembago. Nambotu Malemba gagogo ni gagakusandendela umboni une. 40 Nambo jemanja ngamkusasaka kwika kwa une kuti mpate umi. 41 Unetu jwangasaka kuti ŵandu anjimbichisyeje, 42 nambo ngumanyilila chenene kuti jemanja ŵangamnonyela Mlungu. 43 Une mbiche m’lina lya Atati ŵangu nambo jemanja nganimumbochela. Nambo naga jwine akayiche m’lina lyakwe jemanja mkampochele jwelejo. 44 Ana jemanja mpaka mkulupilile uli naga mkupochela uchimbichimbi kutyochela kwa achimjenu nambo ngamkusaka kuti mpocheleje uchimbichimbi wakutyochela kwa Mlungu? 45 Mkaganisya kuti une chinjim’welusya jemanja pameso pa Atati kuti mli ŵakulemwa, pakuŵa apali jwine jwakusam’welusya jemanja. Jwalakwe ali Mose jwele jemanja mkusamkulupilila. 46 Yikaŵe kuti mkusamkulupilila Mose, nditu mkangulupililesoni une, pakuŵa jwalakwe jwalembile yakwamba une. 47 Nambo naga jemanja ngamkusakulupilila yakulemba yakwe, ni mpaka mkulupilile uli yangumsalilayi?”