Ngani Syambone Syaŵalembile Maliko

15 Chakumasikusiku, ŵakulolela ŵakutaga mbopesi yimpepe ni achakulungwa soni alembi, tugambe kuti Luŵala Lwekulungwa lwa Ayuda, lwasongangene. Jemanjaji ŵamtaŵile Yesu ni ŵapite najo kukumpeleka kwa Pilato. 2 Kweleko Pilato ŵamwusisye jwalakwe kuti, “Ana mmweji mli Mwenye jwa Ayuda?” Yesu ŵajanjile kuti, “Wawojo asyene ni ŵakuŵecheta yeleyi.” 3 Nambo ŵakulolela ŵakutaga mbopesiwo ŵaliji kumŵechetela yejinji mwakumjimba magambo. 4 Pelepo Pilato ŵatandite kumwusyasoni kuti, “Wuli ngamkwanga chilichose? Ngamkulola winji wa magambo gakumjimbaga?” 5 Nambo Yesu nganajanga chilichose, mwamti Pilato ŵasimonjile mnope.

6 Sambano pa chisangalalo chilichose cha Pasika, Pilato ŵagopolelaga ŵandu mkayidi jumo jwakumsaka ŵanduwo. 7 Pandaŵi jeleji, jwapali mundu jwine lina lyakwe Balaba, juŵaliji m’nyumba ja ukayidi. Mundu jweleju pampepe ni achimjakwe ŵaliji mu ukayidi ligongo lyakwimuchila boma, soni jemanjaji ŵawuleje mundu pakwimuchila kwawoko. 8 Myoyo gulu ja ŵandu jayiche kwa Pilato ni kutanda kumŵenda kuti ŵatendele yaŵatendelaga ndaŵi syosope. 9 Jwalakwe ŵawusisye ŵanduwo kuti, “Ana mkusaka namgopolele Mwenye jwa Ayuda?” 10 Pakuŵa Pilato jwamanyililaga kuti ŵakulolela ŵakutaga mbopesi ampeleche Yesu ligongo lya jelasi.* 11 Nambo ŵakulolela ŵakutaga mbopesi ŵatendekasisye ŵanduwo kuŵenda kuti ŵagopolele Balaba mmalo mwa Yesu. 12 Pilato ŵawusisyesoni jemanjajo kuti, “Sambano, mkusaka kuti ndende najo chichi mundu jwamkumkolanga kuti Mwenye jwa Ayudaju?” 13 Jemanjaji ŵajanjilesoni mwakugumila kuti, “Akamwulaje jwelejo!” 14 Nambo Pilato ŵapitilisye kwawusya kuti, “Ligongo chichi? Ana jwalakweju alemwisye chichi?” Nambo jemanjaji ŵagumisilesoni mnope kuti, “Akamwulaje jwelejo!” 15 Pelepo Pilato, pakusaka kwanilisya yaŵasakaga ŵanduwo, ŵagopolele Balaba. Panyuma pakwe ŵalamwile kuti Yesu amkwapule, kaneko ŵampeleche kuti akamkomele pachitela.

16 Sambano asilikali ŵamjigalile Yesu m’luŵala lwamkati lwa nyumba ja Pilato, jwakulamulila, kaneko ŵagaŵilasile magulu gosope ga asilikali ni kugasonganganya pamo. 17 Kaneko ŵam’wechiche jwalakwejo mkanjo wakuwoneka mpela wechejewu soni ŵaluchile chisoti chaumwenye chamiŵa ni kum’wecha. 18 Nambosoni ŵatandite kumŵechetela maloŵe gachipongwe kuti, “Apochele ulemu, wawo Mwenye jwa Ayuda!” 19 Jemanjaji ŵamputagasoni jwalakwejo mumtwe ni litete soni kumsunilaga mata, kaneko ŵamtindiŵalile. 20 Paŵamalisisye kumtendela yachipongweyi, ŵamwusile nguwo jechejewu jila ni kum’wecha yakuwala yakwe yakusa, kaneko ŵapite najo kuti akamkomele pachitela. 21 Kaneko jemanjajo ŵamkanganichisye mundu jwine kuti anyakule chitela chakulagasichilacho.* Mundujo jwaliji Simoni jwa ku Kulene, juŵaliji babagwe Alekisanda ni Lufu, soni jwaliji mkupita kutyochela ku musi wine.

22 Myoyo ŵayiche najo pamalo gakolanjikwa kuti Gologota. Linali likusagopolela kuti, “Malo ga Chikalakasa.” 23 Pelepo ŵalinjile kumpa finyo jwewanganye ni mtela wakolanjikwa kuti mule, nambo jwalakwe ŵakanile kumwa. 24 Kaneko ŵamkomele jwalakwejo pachitela ni ŵagaŵene yakuwala yakwe yakusa mwakutenda kalotalota* kuti amanyilile chachajigale mundu jwalijose. 25 Ndaŵi jaŵamkomelaga pachitelaji jaliji cha mma 9 koloko* kundaŵi. 26 Soni maloŵe gaŵagalembile pachikwangwani gakwamba magambo gaŵamjimbaga galiji gakuti, “Mwenye jwa Ayuda.” 27 Nambosoni ŵachiswamba ŵaŵili ŵakomele payitela chiŵandika ni jwalakwejo, jwine kumlyo jwine kumchiji. 28 *—— 29 Ŵandu ŵaŵapitaga pelepo, ŵapukunyaga mitwe jawo kwineku ali mkuŵecheta mwamwano kuti, “Aa! Ngati mwatiga mpaka mgwisye nyumba ja Mlungu ni kujitaŵasoni m’masiku gatatu? 30 Mlikulupusyetu soni mtuluche pachitela chakulagasichilacho.”* 31 Nombenawo ŵakulolela ŵakutaga mbopesi pampepe ni alembi ŵaliji mkumnyosya kuti, “Ŵakombwele kwakulupusya ŵandu ŵane, nambo akulepela kulikulupusya msyene! 32 Sambanotu Klistu, Mwenye jwa Yisalayeli, atuluche pachitela chakulagasichilacho* kuti m’weji tulole ni kulupilila.” Atamose ŵele ŵaŵaliji payitela chiŵandika ni jwalakwejo nombenawo ŵamnyosyaga.

33 Ndaŵi pajakwanaga 12 koloko* musi, chipi chatesile m’chilambocho mpaka cha mma 3 koloko* kwigulo. 34 Cha mma 3 kolokomo, Yesu ŵagumisile kuti, “Eli, Eli, lamasabakitani?” kugopolela kuti, “Mlungu jwangu, Mlungu jwangu, ligongo chichi andesile une?” 35 Ŵandu ŵaŵaliji pelepo paŵapikene yeleyi, ŵatandite kuŵecheta kuti, “Apikane! Munduju akumŵilanga Eliya.” 36 Sambano mundu jwine jwawutwiche kuja kujigala siponji ni kujiloŵeka mu finyo jwewanganye ni yindu yakuŵaŵa, kaneko ŵajiŵisile ku ndodo ni kumpa Yesu kuti amwe, ni jwaŵechete kuti, “Amleche! Tulole naga Eliyajo chayiche kuti amtulusye.” 37 Nambo Yesu ŵagumisile mnope kaneko jwamalichiche. 38 Ndaŵi jijojo nguwo ja m’nyumba ja Mlungu japapwiche pasikati, kutyochela penani mpaka pasi. 39 Sambano jwamkulungwa jwa asilikali juŵajimi pakuŵandika mwakulolegana ni Yesu paŵayiweni yosope yayatendekwe pandaŵi ja kuwa kwa Yesuji, jwatite, “Yisyene, mundu aju jwaliji Mwanache jwa Mlungu.”

40 Papalisoni achakongwe ŵaŵaliji mkulolela ali chapakutalichila. Ŵane mwa achakongweŵa ŵaliji Maliya jwa ku Magadala, Maliya mamagwe Yakobo Jwamnondi* ŵelesoni ŵaliji mamagwe Yose, soni papali Salome. 41 Achakongweŵa ŵajendaga ni jwalakwejo soni kumtumichila paŵaliji ku Galileya. Ŵapalisoni achakongwe ŵajinji ŵaŵayiche najo kutyochela ku Yelusalemu.

42 Sambano pakuŵa kwaliji chakumagulo, soni ligongo lyakuti lyeleli lyaliji Lisiku Lyakosechela, kugopolela kuti, lisiku lyakuti malaŵi gakwe chikuŵe Sabata, 43 jwayiche Yosefe jwa ku Alimateya. Jwalakweju jwaliji jumo jwa achakulungwakulungwa ŵa mu Luŵala Lwekulungwa lwa Ayuda, soni jwaliji jwakuchimbichikwa mnope. Munduju jwaliji mkwembecheya Uchimwene wa Mlungu. Jwalakwe, mwakulimba mtima, jwapite kwa Pilato kukuŵenda chilu cha Yesu. 44 Nambo Pilato ŵakayichilaga naga Yesu ŵaliji ali awile kala. Myoyo ŵamŵilasile jwamkulungwa jwa asilikali ni kumwusya naga Yesu awile. 45 Pilato paŵasimichisye kutyochela kwa jwamkulungwa jwa asilikalijo kuti Yesu awile, ŵakundile kuti Yosefe akajigale chilu cha Yesu. 46 Sambano Yosefe ŵasumile nguwo jambone kaneko ŵachitulwisye chilucho ni kuchiŵijilila ni nguwo jambonejo, ni ŵapite kukusika chilucho m’malembe gaŵatesile kusepa pa lwala. Pambesi pakwe, ŵagudubuchisye* liganga pamlango wa malembego. 47 Nambo Maliya jwa ku Magadala soni Maliya mamagwe Yose ŵagambaga kulolechesya paŵaŵisile chilu cha Yesu.