Buku Jandanda ja Mbili

5 Aŵa ni ŵanache ŵachalume ŵa Lubeni, mwanache jwandanda jwa Isalayeli. Atamose kuti ŵaliji mwanache jwandanda kupagwa, nambo udindo wakwe wakuŵa jwandanda kupagwa wapelechedwe kwa ŵanache ŵa Yosefe, mwanache jwa Isalayeli. Yaliji myoyo ligongo lyakuti ŵagonile ni ŵamkwawo ŵapambali ŵa babagwe.* Myoyo nganamjigala mpela mwanache jwandanda kupagwa pakusala msela wawo wakupagwila. 2 Yuda ŵaliji jwakuchimbichikwa mnope pasikati pa achalongo achimjakwe, soni mwa jwalakwe mwakopweche mundu juŵaliji jwakuti chachiŵa jwakulamulila. Atamose yaliji myoyo udindo wakuŵa mwanache jwandanda kupagwa ŵapite kwa Yosefe. 3 Lubeni, mwanache jwandanda jwa Isalayeli, ŵanache ŵakwe ŵachalume ŵaliji Hanoki, Palu, Hesiloni, soni Kalimi. 4 Ŵandu aŵa ni ŵaŵatyochele mwa Yoweli: Yoweli ŵaŵeleche Semaya. Semaya ŵaŵeleche Gogi. Gogi ŵaŵeleche Simeyi. 5 Simeyi ŵaŵeleche Mika. Mika ŵaŵeleche Leyaya. Leyaya ŵaŵeleche Baala. 6 Baala ŵaŵeleche Beela. Beela ŵajigalidwe ni mwenye Tigilati-pilinesa jwa ku Asiliya ni kumjawusya ku ukapolo. Jwalakwe ŵaliji jumo mwa achalume ŵakulongolela ŵa mu mbumba* ja Lubeni. 7 Achalongo achimjakwe ŵa Beela, pakujigalila msela wa maŵasa gawo ŵaliji aŵa: Papali Yeiyeli juŵaliji jwakulongolela, kaneko papali Sekaliya, 8 soni Bela. Bela ŵaliji mwanache jwa Asasi. Asasi ŵaliji mwanache jwa Sema. Sema ŵaliji mwanache jwa Yoweli. Ŵandu ŵa m’liŵasa lya Bela ŵatamaga kutandila ku Aloeli mpaka kuja kwika ku Nebo soni ku Baala-meoni. 9 Dela jaŵatamagaji, chakungopokolyuŵa kwakwe, jajile kwika mpaka kwachatandilaga chipululu chachayiche ku Lusulo lwa Filate. Yeleyi yaliji myoyo ligongo lyakuti yilango yawo yatupile mnope m’chilambo cha Giliyadi. 10 Mu ndaŵi ja mwenye Sauli jemanjaji ŵamenyene ngondo ni yisukulu ya Hagali, mwamti ŵayigomeche yisukulu ya Hagaliyo. Kaneko ŵatandite kutama m’matenti ga jemanjajo mudela josope jakungopokolyuŵa kwa chilambo cha Giliyadi.

11 Yisukulu ya Gadi yatamaga m’chilambo cha Basana mpaka kuja kwika ku Saleka. Jemanjaji ŵatamaga mwakuŵandikana ni yisukulu ya Lubeni. 12 M’chilambo cha Basanacho Yoweli ni juŵaliji jwakulongolela. Jwakuyichisya ŵaliji Safamu. Yanai ni Safati ŵalijisoni ŵakulongolela ŵakweleko. 13 Achalongo achimjawo jemanjaji pakujigalila maŵasa gakumanyika ni mena ga achinangolo ŵawo ŵaliji aŵa: Mikayeli, Mesulamu, Seba, Yolayi, Yakani, Siya, soni Ebele. Wosope pampepe ŵaliji 7. 14 Jemanjaji ali ŵakutyochela mwa Abihayilo. Abihayilo ŵaliji mwanache jwa Huli. Huli ŵaliji mwanache jwa Yalowa. Yalowa ŵaliji mwanache jwa Giliyadi. Giliyadi ŵaliji mwanache jwa Mikayeli. Mikayeli ŵaliji mwanache jwa Yesisayi. Yesisayi ŵaliji mwanache jwa Yado, soni Yado ŵaliji mwanache jwa Busi. 15 Ahi ni juŵaliji jwakulolela m’liŵasa lyakumanyika ni lina lya nangolo jwawo. Jwalakwe ŵaliji mwanache jwa Abidiele, soni Abidiele ŵaliji mwanache jwa Guni. 16 Ŵandu ŵakutyochela mwa Abihayiloŵa ŵatamaga mu dela ja Giliyadi soni mu dela ja Basana pampepe ni m’matawuni gamwanamwana gakuŵandikana ni madelaga.* Ŵatamagasoni m’malo gosope ga ku Saloni gagaliji gambone kulichisya yilango mpaka kugalechesye malogo. 17 Wosopeŵa ŵalembedwe mumsela wa maŵasa gawo mu ndaŵi ja mwenye Yotamu jwa ku Yuda soni mu ndaŵi ja mwenye Yelobowamu* jwa ku Isalayeli.

18 Mbumba ja Lubeni, mbumba ja Gadi, soni hafu ja mbumba ja Manase jakwete asilikali ŵamachili ŵakwana 44,760. Jemanjaji ŵajigalaga yakuchijila, maupanga, soni ŵaliji ŵakombola kukamulichisya masengo ukunje.* Ŵalijisoni ŵamlijiganye chenene kuputa ngondo. 19 Jemanjaji ŵamenyene ngondo ni yisukulu ya Hagali, yisukulu ya Yetulu, yisukulu ya Nafisi, soni yisukulu ya Nodabu. 20 Paŵamenyanaga ngondo ni jemanjaji, Mlungu ŵakamuchisye, mwamti ŵayipeleche mmyala mwawo yisukulu ya Hagali pampepe ni wosope ŵaŵaliji kumbali jawo. Yeleyi yakomboleche ligongo lyakuti jemanjajo ŵamŵendile Mlungu kuti ŵakamuchisye pangondojo. Mlungujo ŵajanjile kuŵenda kwawoko pakuŵa jemanjajo ŵamdalilaga jwalakwejo. 21 Jemanjaji ŵasumwilesoni yilango yawo, nambosoni ŵajigele ŵandu ŵakwana 100,000 kuti akaŵe achikapolo. Pa yilango yaŵasumwileyi papali ngamila syakwana 50,000, ngondolo 250,000, soni abulu ŵakwana 2,000. 22 Ŵandu ŵajinji ŵawulajidwe pangondojo ligongo Mlungu jwakuwona ni juŵaputilaga ngondojo. Pambesi pakwe, jemanjaji ŵatandite kutama m’malo ga ŵandu ŵaŵagomechewo mpaka pandaŵi jaŵajigalidwe kwawula ku ukapolo.

23 Hafu ja mbumba ja Manase jatamaga ku Basana mpaka kuja kwika ku Baala-helimoni soni ku Senili ni ku Litumbi lya Helimoni. Jemanjaji ŵaliji ŵajinji mnope. 24 Achalume ŵakulongolela m’maŵasa gakumanyika ni mena ga achinangolo ŵawo ŵaliji aŵa: Efeli, Isi, Eliyele, Asiliyele, Yelemiya, Hodafiya, soni Yahadiyele. Jemanjaji ŵaliji asilikali ŵamachili, achalume ŵakumanyika mnope, soni ŵaliji ŵakulongolela maŵasa gakumanyika ni mena ga achinangolo ŵawo. 25 Nambo ŵandu ŵa mu mbumba syelesi* ŵatesile yindu mwangakulupichika kwa Mlungu jwa achinangolo ŵawo. Jemanjaji ŵatandite kujitindiŵalila milungu ja ŵandu ŵaŵatamaga kweleko pandanda, ŵandu ŵele Mlungu ŵapyajisile pameso pawo. 26 Paligongo lyeleli Mlungu jwa Ayisalayeli ŵamtendekasisye Mwenye Puli jwa ku Asiliya kuti ŵajigale ni kwawula nawo ku ukapolo. Jweleju jwamanyikagasoni kuti Mwenye Tigilati-pilinesa jwa ku Asiliya. Myoyo jwalakwe ŵajigele ŵandu ŵa mu mbumba ja Lubeni, mbumba ja Gadi, soni hafu ja mbumba ja Manase. Mwenyewo ŵayiche nawo jemanjajo ku Halaha, Haboli, Hala, soni ku lusulo lwa Gosani, kwele kwakutama mpaka lelo.