Ngani Syambone Syaŵalembile Luka

22 Sambano Chisangalalo cha Mikate* Jangali Chakusasaŵisya, chakolanjidwa kuti Pasika, chaliji chili chiŵandichile. 2 Ŵakulolela ŵakutaga mbopesi soni alembi ŵasakaga kumwulaga Yesu. Nambo ligongo lyakogopa ŵandu, jemanjaji ŵaliji mkusosasosa litala lyambone lyakumwulajila. 3 Sambano Satana ŵajinjile mwa Yudasi jwakolanjidwa Isikaliyoti, juŵaliji jumo mwa ŵakulijiganya 12 ŵala. 4 Kaneko jwalakwejo ŵapite kwa ŵakulolela ŵakutaga mbopesi soni ŵakulolela nyumba ja Mlungu kukukambilana yakumpeleka Yesu kwa jemanjajo. 5 Jemanjajo ŵasangalele nayo yeleyi mwamti ŵakamulene yakuti champe mbiya syasilifa. 6 Myoyo Yudasi ŵajitichisye ni ŵatandite kusosasosa ndaŵi jambone jakuti ampelechele Yesu pali pangali ŵandu ŵajinji.

7 Sambano lisiku lyandanda lya Chisangalalo cha Mikate Jangali Chakusasaŵisya lyakwanile. Palisikuli ni paŵapelekaga mbopesi ja Pasika. 8 Myoyo Yesu ŵamtumile Petulo ni Yohane, ni kwasalila kuti, “Mjawule mkalinganye Pasika kuti wosope tukalye.” 9 Jemanjajo ŵamwusisye Yesu kuti, “Ana akusaka tukalinganyile kwapi?” 10 Jwalakwe ŵajanjile kuti, “Pachimkajinjile mumsindamo, chimkasimane ni mundu ali anyakwile lulo lwa mesi. Mkamkuye jwalakwejo kunyumba jachakajinjile. 11 Ni mkamsalile msyenenyumbajo kuti, ‘Mwalimu akuti, “Ana chipinda cha achalendo chili kwapi chele une ngusaka kulila Pasika ni ŵakulijiganya ŵangu?”’ 12 Jwalakwejo chakamlosye jemanja chipinda chekulungwa chamwinani chachikwete yindu yosope yatukusosechela. Mkalinganyile Pasika mwelemo.” 13 Myoyo jemanjajo ŵanyakwiche mwamti yatendekwe mwakamulana ni yaŵasalile Yesu yila, soni ŵalinganyisye yakusosechela yosope ya Pasika.

14 Sambano ndaŵi pajakwanile, Yesu ni ŵandumetume ŵakwe ŵatemi mwakusyungulila tebulo. 15 Kaneko ŵasalile jemanjajo kuti, “Mbele ndili mkusachilila mnope kulya Pasikaji yimpepe ni jemanja mkanindande kusimana ni yakusawusya. 16 Pakuŵa ngumsalila kuti, une ngasindyasoni Pasikaji mpaka yosope yajikwimila yili yitendekwe mu Uchimwene wa Mlungu.” 17 Myoyo Yesu ŵapochele chikapu cha finyo ni kuyamika, kaneko ŵaŵechete kuti, “Mjigale chikapuchi ni kumwa yayili mwelemu jemanja wosope, 18 pakuŵa ngumsalila kuti, kutandila apano, une ngasimwasoni chakumwa chilichose chakutyochela ku mpeleya mpaka Uchimwene wa Mlungu uli uyiche.”

19 Jwalakwe ŵajigelesoni mkate ni kuyamika, kaneko ŵawugaŵenyegaŵenye ni kwapa ŵakulijiganya ŵakwe, ni ŵasalile kuti, “Mkate welewu ukwimila chilu changu chachichipelechedwe mmalo mwa jemanja. Mtendeje yeleyi kuti mungumbuchileje.” 20 Ŵatesilesoni myoyo ni chikapu cha finyo ali alile chakulya chaligulo, ni ŵatite, “Chikapuchi chikwimila chilangano chasambano kupitila m’myasi jangu, jajichisulula mmalo mwa jemanja.

21 “Nambo ngumsalila jemanja kuti mundu juchambeleche une ali patebulo panopano. 22 Pakuŵa Mwanache jwa mundu akwawula nditu mwakamulana ni yayalembedwe yakwamba jwalakwejo. Nambope, akwete likungu* mundu jwakumpelekajo.” 23 Pelepo jemanjajo ŵatandite kuwusyana kuti amanyilile mundu juŵasakaga kutenda yeleyi.

24 Sambano jemanjajo ŵatandite kukangana mnope pasikati pawo yakuti jwamkulungwa ali ŵani. 25 Nambo Yesu ŵasalile jemanjajo kuti, “Ŵakulamulila ŵa ŵandu ŵamitundu jine akusatenda umwenye pa ŵandu ŵawo, soni ŵandu ŵakwete ulamusi akusapochela mena gauchimbichimbi.* 26 Nambo jemanja mkaŵa mpela jemanjajo. Myoyo mundu jwamkulungwa pasikati penu aŵeje mpela kamwanache, soni jwakwalongolela ŵane aŵeje mpela jwakutumichila. 27 Ana jwakulya patebulo ni jwakutumichila, jwamkulungwa ni jwapi? Ana ngaŵa ni jwakulya patebulojo? Nambotu une ndili pasikati penu mpela jwakutumichila.

28 “Nambope jemanja mŵele ni une mu yakusawusya yangu. 29 Myoyo chindende chilangano ni jemanja, mpelasoni mwele Atati ŵatesile chilangano cha Uchimwene ni une, 30 ni chakulinga chakuti jemanja mkalye ni kumwa pampepe ni une patebulo jangu mu Uchimwene wangu, soni kuti mkatame m’mipando ja umwenye ni kulamulilaga mbumba 12 sya Yisalayeli.

31 “Simoni, Simoni, mpikane. Satana akumsaka jemanja wosope kuti ampete mpela tiligu. 32 Nambo une mbopesile kala yakwamba mmwejo kuti chikulupi chenu chikamala. Myoyo pachimŵesoni ŵakulimba m’chikulupi, mkalimbikasye achalongo achimjenu.” 33 Pelepo Petulo jwatite, “Ambuje, une ndili jwakoseka kwawula ku ukayidi soni kuwa pampepe ni ŵalakwe.” 34 Nambo Yesu ŵamsalile jwalakwejo kuti, “Une ngumsalila mmwejo Petulo kuti, lelo tambala mkanalile, chimungane katatu kose kuti ngamkumanyilila une.”

35 Yesu ŵasalilesoni ŵakulijiganya ŵakwewo kuti, “Panamsalile kuti pamkwawula kukulalichila mkajigala yikwama ya mbiya, mwakusunjila yakulya, soni sapato, ana mwasoŵile chilichose mpela?” Jemanjajo ŵajanjile kuti, “Iyayi!” 36 Pelepo ŵasalile jemanjajo kuti, “Nambo sambano, jwalijose jwakwete chikwama cha mbiya soni mwakusunjila yakulya ajigale, soni jwalijose jwanganakola upanga asumisye chakuwala chakwe ni akasume upangawo. 37 Pakuŵa ngumsalila jemanja kuti yindu yayalembedwe yakwamba une yikusosekwa kukwanilichikwa, yakuti, ‘Ŵam’weni mpela jumo mwa ŵandu ŵakasa malamusi.’ Yeleyi yikukwanilichikwa kwa une.” 38 Kaneko jemanjajo ŵatite, “Ambuje, alole, tukwete maupanga gaŵili aga.” Jwalakwejo ŵatite, “Gali gakwanila.”

39 Paŵatyosile kweleko, ŵapite ku Litumbi lya Maolifi, mpela mwa ndaŵi syosope, soni ŵakulijiganya ŵakwe ŵamkuyisye. 40 Paŵayiche kwitumbiko, ŵasalile jemanjajo kuti, “Mpopeleje kuti mkagwila mu kulinjidwa.” 41 Kaneko ŵalesile jemanjajo pelepo ni kwawula chapasogolo panandi, lutando lwakwe lwamti mpaka payichile liganga mundu ali aliponyisye. Pelepo ŵatindiŵele ni kutanda kupopela 42 kuti, “Atati, naga akusaka, nguŵenda kuti andyochesye chikapuchi.* Nambope ngusaka kuti yakusaka yawo yitendekwe, ngaŵaga ya une.” 43 Kaneko lilayika lyakutyochela kwinani lyawonechele kwa jwalakwejo ni kumlimbikasya. 44 Nambo jwalakwejo jwaliji mkulagasika mnope mumtima mwamti jwapitilisye kupopela mwakuchondelela, soni jwakopokaga chitukuta chele chawonekaga mpela madondo ga myasi gakugwa pasi. 45 Kaneko ŵatyosile paŵaliji mkupopelapo ni kwawula paŵaliji ŵakulijiganya ŵakwe ŵala. Pelepo ŵasimene jemanjajo ali mkugona ligongo chakamwile chanasa. 46 Myoyo ŵasalile kuti, “Ligongo chichi mkugona? Mjimuche soni mpitilisye kupopela kuti mkagwila mu kulinjidwa.”

47 Ali mkuŵecheta yeleyi, pakopochele gulu ja ŵandu jili mkulongoleledwa ni Yudasi, jumo mwa ŵakulijiganya 12 ŵala. Jwalakweju ŵapite paŵaliji Yesu ni kumkomansya mwachinonyelo.* 48 Nambo Yesu ŵamwusisye jwalakwejo kuti, “Yudasi, ana mkumpeleka Mwanache jwa mundu mwakumkomasya mwachinonyelo?” 49 Ŵandu ŵaŵaliji ni Yesu paŵayimanyi yachiyitendekwe, ŵatite, “Ambuje, ana twakape jemanjaji ni maupanga?” 50 Jumo mwa jemanjajo jwayikene pakukata liwiwi lya kumlyo lya kapolo jwa jwamkulungwa jwa ŵakutaga mbopesi. 51 Nambo Yesu ŵatite, “Basi mleche yeleyo.” Kaneko jwalakwe ŵakamwile liwiwi lya kapolojo ni kumposya. 52 Sambano Yesu ŵaŵechete ni ŵakulolela ŵakutaga mbopesi, ŵakulolela nyumba ja Mlungu, soni achakulungwa ŵaŵayiche kuti amkamulewo. Jwatite, “Ligongo chichi jemanja myiche mli mjigele maupanga soni yimbonga mpela ndili jwachiswamba? 53 Naŵaga ni jemanja ku nyumba ja Mlungu lisiku lililyose nambo nganimungamula. Nambope ajino jili ndaŵi jenu, soni ndaŵi jakuti chipi chilamulile.”

54 Kaneko jemanjajo ŵamkamwile jwalakwejo ni kwawula najo ku nyumba ja jwamkulungwa jwa ŵakutaga mbopesi. Nambo Petulo ŵaliji mkwakuya chapakutalichila. 55 Kaneko ŵandu paŵakolesisye moto mkati mwa luŵala ni kutama mwakuwusyungulila, nombenajo Petulo ŵatemi papopo. 56 Sambano msikana jwamasengo paŵam’weni Petulo ligongo lya kuŵala kwa motowo, ŵamlolechesye mnope ni kuŵecheta kuti, “Mundu aju jwajendagasoni ni jwalakwejo.” 57 Nambo Petulo jwakanile kuti, “Mmwe msikana, une ngangummanyilila mundu jweleju.” 58 Pali papite kandaŵi kamnono mundu jwinesoni ŵam’weni jwalakwejo ni ŵatite, “Mmwesoni mli jumo mwa ŵakulijiganya ŵakwe.” Nambo Petulo ŵajanjile kuti, “Bwanawe, une nganimba jumo mwa jemanjajo.” 59 Soni pali papite chiŵandika awala jimo, mundu jwinesoni ŵaŵechete mwakusimichisya kuti, “Nditu, mundu aju jwajendagasoni ni jwalakwejo, pakuŵa akuwoneka kuti ali jwa ku Galileya!” 60 Nambo Petulo ŵajanjile kuti, “Bwanawe, nganguyimanyilila yamkuŵechetayo.” Ali mkati mwakuŵecheta yeleyi, tambala jwalisile ndaŵi jijojo. 61 Pelepo Ambujewo ŵagalawiche ni kumlolechesya Petulo, soni Petulo ŵakumbuchile maloŵe gaŵamsalile Ambujewo gakuti, “Lelo tambala mkanalile, chimungane katatu kose kuti ngamkumanyilila une.” 62 Kaneko jwalakwe jwakopweche pasa nikutanda kulila mnope mwakulitendela chanasa.

63 Sambano ŵandu ŵaŵamkamwile Yesu ŵala ŵatandite kumnyosya soni kumputa. 64 Soni ŵamwunichile ngope jakwe ni kumwusyaga kuti, “Naga mli jwakulochesya, mtusalile, ŵani ŵamputile?” 65 Jemanjaji ŵamŵechetelesoni yindu yine yejinji yachipongwe.

66 Kundaŵi kwakwe, ŵakulolela ŵakutaga mbopesi soni alembi ŵasongangene pampepe. Jemanjaji ŵaliji gulu ja achakulungwakulungwa. Ŵanduŵa ŵamjigele Yesu ni kumjinjisya mu Luŵala Lwekulungwa lwa Ayuda, kaneko ŵaŵechete kuti, 67 “Mtusalile naga mmwejo mli Klistu.” Nambo jwalakwejo ŵajanjile kuti, “Atamose ndili nasalile, nambo nganaŵa akulupilile ata panandi. 68 Soni atamose ndili nawusisye jemanja chiwusyo, ngakombola kunjanga. 69 Nambo kutandila apano kwawulaga msogolo Mwanache jwa mundu chachitama kumkono wamlyo wamachili wa Mlungu.” 70 Pelepo wosopewo ŵamwusisye kuti, “Sambano mmwejo nikuti mli Mwanache jwa Mlungu?” Jwalakwejo ŵajanjile kuti, “Jemanja mwachimsyene mŵechete kuti ndili Mwanache jwa Mlungu.” 71 Pelepo jemanjajo ŵatite, “Ana tukusosekwasoni umboni wine pelepa? Pakuŵa tulipikanile jika yaŵechete munduju.”