Ngani Syambone Syaŵalembile Luka

19 Kaneko jwalakwe ŵapitaga mu msinda wa Yeliko. 2 Mumsindamo mwaliji mwana mundu jwine lina lyakwe Sakeyo. Jwalakweju jwaliji jwamkulungwa jwa ŵakomesya msongo, soni jwaliji jwakusichila. 3 Sakeyo jwasachililaga ali am’weni Yesu, nambo jwalepelaga ligongo lya winji wa ŵandu, pakuŵa jwaliji jwamjipi. 4 Myoyo jwalakwe jwawutuchile kusogolo ni kuja kukwela m’chitela cha mkuju kuti akombole kumwona, pakuŵa Yesujo ŵaliji mkupita mumsewu welewo. 5 Sambano Yesu paŵayiche pelepo, ŵalolite mwinani ni ŵamsalile jwalakwejo kuti, “Sakeyo, mtuluche mwachitema, ligongo lelo chingatame m’nyumba mwenu.” 6 Pelepo jwalakwe jwatulwiche mwachitema soni ŵampochele Yesu mwakusangalala mpela mlendo. 7 Nambo ŵandu paŵagambile kumwona jwalakwejo ali mkwinjila m’nyumba ja Sakeyo, yanyaleye mwamti ŵatandite kuŵecheta kuti, “Eti akwawula kuja kutama kunyumba ja mundu jwakulemwa.” 8 Nambo Sakeyo jwajimi ni kwasalila Ambujewo kuti, “Ambuje, apikane. Hafu ja yindu yangu chinape ŵandu ŵakulaga, soni chilichose chinamsumwile mundu chinjimwuchisya kuchuluya kacheche.” 9 Pelepo Yesu ŵamsalile jwalakwejo kuti, “Lelo chikulupusyo chiyiche panyumba ajino, ligongo mmwejosoni mli mwanache jwa Abulahamu. 10 Pakuŵa Mwanache jwa mundu jwayiche kukusosasosa soni kukukulupusya ŵandu ŵasokonechele.”

11 Sambano ŵakulijiganyawo paŵaliji mkupikanila yindu yeleyi, Yesu ŵasalilesoni chiwanichisyo chine ligongo ŵaliji ali asigele panandi kwika ku Yelusalemu soni jemanjajo ŵaganisyaga kuti Uchimwene wa Mlungu chiwukawonechele ndaŵi jijojo. 12 Myoyo jwalakwe ŵatite, “Mundu jwine jwakupagwila m’liŵasa lya mwenye jwapite ku chilambo chine chakutali kuti akapochele machili gakulamulila ni kuwujila ku chilambo chakwe. 13 Mkanajawule, jwalakwe ŵaŵilasile achikapolo ŵakwe 10, ni ŵapele mbiya 10 sya mina soni ŵasalile kuti, ‘Mbiyasi msitendeleje malonda mpaka pachinjiyika.’ 14 Nambo ŵandu ŵa m’chilambo chakwecho ŵaŵenganaga najo ni ŵatumisye ŵandu ŵane kuti ajawule kuchilambo chinecho kuja kusala kuti, ‘M’we ngatukusaka kuti mundu jweleju aŵe mwenye jwetu.’

15 “Mundu jula paŵawusile ali apochele umwenye ula, ŵaŵilasile achikapolo ŵaŵapele mbiya ŵala, ni chakulinga chakuti alole yapatile pa malonda gaŵatesile. 16 Myoyo jwandanda jwayiche ni kusala kuti, ‘Ambuje, pa mbiya jimo ja mina jila, mbatile mbiya sine 10.’ 17 Ambujewo ŵamsalile kuti, ‘Mtesile chenene, mmwe kapolo jwambone! Pakuŵa mlosisye kulupichika pa yindu yamnono, chinampe misinda 10 kuti mjilamulileje.’ 18 Sambano payiche kapolo jwaŵili, ni jwatite, ‘Ambuje, pa mbiya jimo ja mina jila, mbatile mbiya sine msano.’ 19 Ŵamsalilesoni jweleju kuti, ‘Mmwejosoni chinampe misinda msano kuti mjilamulileje.’ 20 Kapolo jwinesoni jwayiche ni kuŵecheta kuti, ‘Ambuje, mbiya jawo ja mina jila aji ajigale, najitaŵile panguwo ni kujisisa. 21 Natesile yeleyi pakwajogopa wawojo, ligongo wawo ali mundu jwakusawusya. Akusasaka kupindula pa masengo gele nganatenda, soni akusagowola panganapanda.’ 22 Ambujewo ŵamsalile jwalakwejo kuti, ‘Mmwe mli kapolo jwakusakala, chinamlamule mwakamulana ni maloŵe genu. Ngati mwamanyililaga kuti une ndili mundu jwakusawusya, kuti ngusasaka kupindula pa masengo gele nganindenda soni ngusagowola panganimbanda? 23 Sambano wuli nganimsunjisya mbiya jangujo ku banki kuti kaneko une pakwika, njigale mbiyajo pampepe ni jakonjechesya?’

24 Pelepo Ambujewo ŵasalile ŵandu ŵaŵaliji pamalopo kuti, ‘Amsumule jweleju mbiya ja minajo ni ampe jwakwete mbiya 10 jula.’ 25 Nambo ŵanduwo ŵajanjile kuti, ‘Ambuje, jwelejotu akwete kala mbiya 10 sya mina!’ 26 Ambujewo ŵajanjile jemanjajo kuti, ‘Ngumsalila jemanja kuti, jwalijose jwakwete yindu, chachipochela yejinji, nambo jwalijose jwanganakola, chachimsumula atamose yindu yamnono yakwete. 27 Nambosoni, mkajigale adani ŵangu ŵala ŵele nganasakaga kuti mbe mwenye jwawo soni mwawulaje une ndili mkulola.’”

28 Yesu paŵamalisisye kuŵecheta yindu yeleyi, ŵapitilisye ulendo wakwe wakwawula ku Yelusalemu. 29 Paŵayiche pa Litumbi lya Maolifi chiŵandika misi ja Betifagi ni Betaniya, jwalakwe ŵatumile ŵakulijiganya ŵakwe ŵaŵili, 30 ni kwasalila kuti, “Mjawule ku musi wamkuwuwonawo, ni pachimkajinjile m’musimo, chimkamsimane bulu jwamwana jwamkambako jwele mundu jwalijose nganamkweleje. Mkamgopole ni myiche najo akuno. 31 Naga mundu jwine akumwusya kuti, ‘Ligongo chichi mkumgopola bulujo?’ Jemanja mkajanje kuti, ‘Ambuje akumsaka.’” 32 Myoyo ŵandu ŵaŵatumilewo ŵapite ni ŵamsimene bulujo mwakamulana ni yaŵasalile yila. 33 Nambo paŵaliji mkumgopola, achimsyene bulujo ŵawusisye jemanjajo kuti, “Ligongo chichi mkumgopola bulujo?” 34 Jemanjajo ŵajanjile kuti, “Ambuje akumsaka.” 35 Myoyo ŵapite najo kwa Yesu, soni ŵatandiche yakuwala yawo pa bulujo kaneko Yesu ŵakwesile.

36 Paŵaliji mkwenda, ŵandu ŵatandikaga yakuwala yawo mumsewu. 37 Paŵaŵandichilaga mumsewu wakuseleleka kutyochela ku Litumbi lya Maolifi, gulu josope ja ŵakulijiganya jatandite kusangalala soni kumyamika Mlungu mwakwesya maloŵe ligongo lya masengo gamachili gaŵagaweni. 38 Jemanjajo ŵaŵechetaga kuti, “Jwana upile mundu jwakwika mpela Mwenye m’lina lya Yehofa! Mtendele kwinani soni uchimbichimbi kwa Mlungu jwakwinani mnope!” 39 Nambo Afalisi ŵane mu gulujo ŵamsalile Yesu kuti, “Mwalimu, ŵasalile ŵakulijiganya ŵawoŵa kuti atame jii.” 40 Pelepo jwalakwe ŵajanjile kuti, “Ngumsalila jemanja kuti, yikaŵe kuti jemanjaji atemi jii, maganga gakagumisile.”

41 Paŵaŵandichilaga msinda wa Yelusalemu soni paŵawuweni msindawo, Yesu ŵatandite kuwulilila 42 kuti, “Mmwe, ngutitu mmwejo, yikaliji chenene mkamanyilile lelo yindu yakuyikasya mtendele, nambo sambano yisisiche kuti mkayiwona ni meso genu. 43 Ligongo masiku gachiyika kwa mmwejo pele adani ŵenu chachitaŵa lutenje lwa yisonga kumsyungulila mmwejo. Jemanjajo chachimsyungulilasoni mmwejo ni kumlagasyaga kutyochela kumbali syosope. 44 Chachimgwichisya pasi soni kwajonanga ŵanache ŵenu, nambosoni ngasaleka liganga penani pa liganga lijakwe, ligongo mwalepele kujimanyilila ndaŵi jenu jakumjendela.”

45 Kaneko jwalakwe ŵapite ku nyumba ja Mlungu ni kutanda kwatopola ŵandu wosope ŵaŵasumisyaga yindu, 46 ni ŵasalile kuti, “Malemba gakusati, ‘Nyumba jangu chachijikolanga kuti nyumba jakupopelela.’ Nambo jemanja mjitesile kuŵa mbanga ja ŵachiswamba.”

47 Jwalakwe ŵapitilisye kwiganya lisiku lililyose ku nyumba ja Mlungu. Nambo ŵakulolela ŵakutaga mbopesi soni alembi pampepe ni ŵakulongolela ŵane ŵasosagasosaga litala lyakuti amwulajile. 48 Nambo nganalipataga litala lyakutendela yeleyi, ligongo ndaŵi syosope ŵandu ŵaliji mkwika kwa jwalakwejo kuti apikanile maloŵe gakwe.