Chiwunukuko Chakwawula kwa Yohane

20 Kaneko naliweni lilayika lili mkutuluka kutyochela kwinani lili lijigele mmyala mwakwe kiyi ja palisimbo soni unyolo wekulungwa. 2 Ŵachikamwile chingwena chila, lijoka lyakalakalalyo, chele chikusamanyikasoni kuti Jwakulambusya soni Satana, ni kuchitaŵa kwa yaka 1,000. 3 Kaneko ŵachiponyisye mwisimbo mula ni kuwugala pamlango wa lisimbolyo soni kuŵika chidindo, kuti chikajisokonasyasoni mitundu ja ŵandu mpaka yaka 1,000 yila yili yimasile. Panyuma pakwe chachichigopola kwakandaŵi kamnono.

4 Kaneko najiweni mipando jaumwenye, soni ŵaŵatemi pa mipandojo ŵapele ulamusi wakuwelusya. Nawenisoni* ŵele ŵaŵawuleje* ligongo lyakutendela umboni yakwamba Yesu soni ligongo lyakuŵecheta yakwamba Mlungu, elo, wosope ŵele nganachitindiŵalila chilombo chila kapena chiwanichisyo chakwe, soni ŵele nganakola chimanyisyo cha chilombocho pausyo ni pamkono pawo. Jemanjaji ŵaŵelesoni ni umi soni ŵalamulile mpela mamwenye yimpepe ni Klistu kwa yaka 1,000. 5 Kweleku kuli kwimuka kwandanda. Nambo ŵawe ŵane wosope nganaŵasoni ni umi mpaka payamasile yaka 1,000 yila. 6 Wosope ŵakwimuka nawo pakwimuka kwandanda akwete upile soni ali ŵaswela, mwamti chiwa chaŵili nganichikola machili pa jemanjaji. Nambo chachiŵa ŵakutaga mbopesi ŵa Mlungu soni ŵa Klistu, soni jemanjaji chachilamulila mpela mamwenye yimpepe ni jwalakwejo kwa yaka 1,000.

7 Sambano payichimala yaka 1,000 yeleyi, Satana chachimgopola mu ukayidi mwakwe mula. 8 Pelepo jwalakwe chachijawula kukusokonasya mitundu ja ŵandu kumbali mcheche sya chilambo chapasi. Mitundu jeleji jili Gogi soni Magogi. Jwalakwe chachijisonganganya mitundujo pampepe kuti jipute ngondo. Winji wa ŵanduwo uli mpela mchenga wa mungulugulu nyasa. 9 Jemanjaji chachiŵa palipose pachilambo chapasi, mwamti chachigasyungulila masakasa ga ŵaswelawo soni msinda wele Mlungu akusawunonyela. Nambo moto uchiyika kutyochela kwinani ni kwatinisya jemanjajo. 10 Nombenajo Satana jwele ŵaliji mkwasokonasya jemanjajo chachimponya m’nyasa jakolela mnope moto wa sulufule. Mwelemu ni muŵachiponyisyesoni chilombo ni jwakulochesya jwaunami jula. Jemanjaji chachiŵa ali mkulaga* musi ni chilo mpaka kalakala.

11 Kaneko nawuweni mpando waumwenye weswela soni wekulungwa yimpepe ni jwele juŵatemi pampandowo. Chilambo chapasi soni kwinani yatisile pameso pakwe, mwamti nganiyiwonekasoni. 12 Nawenisoni ŵawe, ŵakuchimbichika soni ŵangachimbichika ali ajimi pasogolo pa mpando waumwenyewo. Pelepo mipukutu ŵajiwugwile. Nambo mpukutu wine waŵawuwugwile waliji mpukutu wa umi. Soni ŵawe ŵaliji mkwawelusya pakujigalila yiŵalembile m’mipukutujo, mwakamulana ni yitendo yawo. 13 Nyasa japeleche ŵawe ŵaŵaliji mwelemo. Nombenacho chiwa soni Malembe* yapeleche ŵawe ŵaŵaliji mwelemo. Jwalijose ŵaliji mkum’welusya mwakamulana ni yitendo yakwe. 14 Pelepo chiwa soni Malembe* ŵayiponyisye m’nyasa jakolela moto. Nyasa jeleji jikwimila chiwa chaŵili. 15 Nambosoni, jwalijose jwele lina lyakwe nganilisimanikwa mu buku ja umi ŵamponyisye m’nyasa jakolela moto.