Ngani Syambone Syaŵalembile Luka

9 Kaneko Yesu ŵaŵilasile ŵakulijiganya ŵakwe 12 ŵala ni kwapa machili soni ulamusi wakuti akoposyeje yiŵanda soni kuposya* yilwele. 2 Myoyo ŵatumisye jemanjajo kuti akalalichile ya Uchimwene wa Mlungu soni kuti akaposyeje ŵandu. 3 Soni ŵasalile kuti, “Mkajigala chilichose paulendowu, kanga ndodo, mwakusunjila yakulya, mkate* soni mbiya. Mkajigalasoni chakuwala chine. 4 Nambo pamyiche panyumba ja mundu ni msyenejo akumpochela chenene, mtameje papopo mpaka pandaŵi jakutyoka. 5 Kulikose kwele ŵandu ngakumpochela, pamkutyoka mumsinda welewo, mkung’undeje luwundu kusajo kwenu kuti uŵe umboni kwa jemanjajo.” 6 Kaneko ŵakulijiganyawo ŵatandite kwenda m’musi uliwose mumkuliwo ni kulalichilaga ngani syambone soni kwaposyaga ŵandu kulikose.

7 Sambano Helodi* juŵaliji jwakulamulila jwa chigawo,* paŵapikene yosope yayatendekwaga, yamsokonasisye mnope nganisyo ligongo ŵane ŵaŵechetaga kuti Yohane ajimwiche ku chiwa. 8 Nambo ŵane ŵaŵechetaga kuti Eliya ayiche, soni ŵane ŵaŵechetaga kuti jumo mwa ŵakulochesya ŵakala ajimwiche ku chiwa. 9 Nambo Helodi jwatite, “Yohane namkatile mtwe, sambano jwakutenda yangupikanayi, ali ŵanisoni?” Myoyo jwalakwe jwasachililaga kumwona Yesu.

10 Ŵandumetume ŵala paŵawusile, ŵamsalile Yesu yosope yiŵatesile. Kaneko jwalakwe ŵajigele jemanjajo ni ŵatyosile mwangawonechela kwawula mu msinda wakolanjidwa kuti Betisaida. 11 Nambo ŵandu ŵamanyilile yeleyi ni ŵamkuyisye. Jwalakwe ŵapochele chenene soni ŵatandite kwasalila ya Uchimwene wa Mlungu, nambosoni ŵaposisye ŵandu ŵaŵaliji mkulwala. 12 Kaneko kusa kwatandite kuswa. Myoyo ŵandumetume ŵakwe ŵamsalile jwalakwejo kuti, “Ŵatumisye ŵanduŵa kumisi soni kumadela gakusyungulila kuti akapate malo gagona soni yakulya, ligongo kwatuli kuno kuli kwitinji.” 13 Nambo Yesu ŵajanjile jemanjajo kuti, “Jemanja ni ŵamkusosekwa kwapa yakulya.” Jemanjajo ni ŵatite, “Tugambile kola mitanda msano ja mkate soni somba siŵilipe, mwinetu tujawule tukasume yakulya yakwanila ŵandu wosopeŵa.” 14 Pamalopo papali achalume chiŵandika 5,000. Ni jwalakwe ŵasalile ŵakulijiganya ŵakwe ŵala kuti, “Mwasalile ŵanduŵa kuti atame m’magulu. Pagulu jilijose paŵeje ŵandu 50.” 15 Ŵakulijiganyawo ŵatesile yeleyo soni ŵanduwo ŵatemi m’magulu. 16 Sambano jwalakwe ŵajigele mikate msano ni somba siŵilisyo, kaneko ŵalolite kwinani ni kuyipopelela. Pambesi pakwe ŵajigaŵenyegaŵenye mikatejo ni kutanda kwapa ŵakulijiganya ŵakwe kuti ŵapeje ŵanduwo. 17 Pelepo wosopewo ŵalile mpaka kwikuta, mwamti ŵalokotele yakusigala ni yagumbele yitundu 12.

18 Lisiku line, jwalakwe paŵaliji mkupopela pajika, ŵakulijiganya ŵakwe ŵayiche, ni jwalakwe ŵawusisye kuti, “Ana ŵandu akutiga une ndili ŵani?” 19 Jemanjajo ŵajanjile kuti, “Akuti wawo ali Yohane M’batisi, nambo ŵane akuti wawo ali Eliya, soni ŵane akuti jumo mwa ŵakulochesya ŵakala ajimwiche.” 20 Kaneko ŵawusisye jemanjajo kuti, “Nambi jemanja mkusati une ndili ŵani?” Petulo ŵajanjile kuti, “Wawo ali Klistu jwakutumidwa ni Mlungu.” 21 Kaneko jwalakwe ŵasalile jemanjajo mwamachili kuti akamsalila jwalijose yeleyi. 22 Ŵasalilesoni kuti, “Mwanache jwa mundu akusosekwa kusimana ni yakusawusya yejinji, nambosoni achakulungwa soni ŵakulolela ŵakutaga mbopesi ni alembi chachimkana. Panyuma pakwe chachiwulajidwa, nambo pa lisiku lyatatu chachijimuka.”

23 Kaneko jwalakwe ŵasalilesoni jemanjajo kuti, “Jwalijose jwakusaka kunguya une, akusosekwa kuleka yakusaka ya mtima wakwe ni kunyakula chitela chakwe chakulagasichila* lisiku lililyose ni kunguyaga une ndaŵi syosope. 24 Pakuŵa jwalijose jwakusaka kuwukulupusya umi wakwe chachiwujasa, nambo jwalijose jwakwasa umi wakwe ligongo lya une, chachiwukulupusya. 25 Ana mundu mpaka apindule chichi ali apatile chilambo chosope nambo ni kwasa kapena konanga umi wakwe? 26 Pakuŵa jwalijose jwakutenda sooni ligongo lya une soni ligongo lya maloŵe gangu, Mwanache jwa mundu chachimtendelasoni sooni mundu jwelejo pachachiyika mu uchimbichimbi wakwe soni wa Atati ŵakwe ni wa malayika geswela. 27 Nambo ngumsalichisya jemanja kuti ŵane ŵajimi apano ngasapasya chiwa mpaka ali awuweni chandanda Uchimwene wa Mlungu.”

28 Pali papite chiŵandika masiku 8 chiŵechetele maloŵe gelega, jwalakwe ŵamjigele Petulo, Yohane, soni Yakobo ni ŵakwesile nawo mwitumbi kuti akapopele. 29 Soni jwalakwe paŵaliji mkupopela, ngope jakwe jachenjile kawoneche soni yakuwala yakwe yaŵele yeswela mnope soni yanyesimilaga. 30 Kaneko pawonechele achalume ŵaŵili ali mkuŵechetana ni jwalakwejo. Achalumewo ŵaliji Mose ni Eliya. 31 Jemanjaji ŵawonechele mwauchimbichimbi soni ŵatandite kambilana ya kutyoka kwakwe pachilambo, kwele panyuma pakwe kwatendechele ku Yelusalemu. 32 Sambano Petulo ni achimjakwe ŵala ŵaliji ali apesile ni lugono, nambo lugonolo palwamasile, jemanjaji ŵawuweni uchimbichimbi wa Yesu soni ŵaweni achalume ŵaŵili ŵala ali ajimi pampepe ni jwalakwejo. 33 Achalumewo paŵatyokaga, Petulo ŵamsalile Yesu kuti, “Mwalimu, mpaka yiŵe chenene kuti tutameje panopano. Myoyo atukunde kuti tutaŵe yisakasa yitatu, chimo cha wawojo, chine cha Mose soni chine cha Eliya.” Pelepa Petulo nganamanyililaga yaŵaliji mkuŵecheta. 34 Jwalakwe paŵaŵechetaga yeleyi, pawoneche liwunde ni lyatandite kwawunichila jemanjajo. Liwundelyo palyawunichile, ŵatesile woga mnope. 35 Kaneko papikaniche maloŵe kutyochela mwiwundemo kuti, “Aju ali Mwanangu jwakusagulidwa. Mumpikanileje.” 36 Maloŵego pagapikanikaga, jemanjajo ŵagambile kumwona Yesu ali asigele jika. Kwa masiku nditu, jemanjajo ŵagambile kutama ngamsalila jwalijose yindu yosope yaŵayiweni yila.

37 Lisiku lyakuyichisya, paŵatulwiche mwitumbimo, ŵasimene ni gulu jekulungwa ja ŵandu. 38 Kaneko mundu jwine mugulujo ŵaŵechete mwakwesya maloŵe kuti, “Mwalimu, ngwaŵenda kuti amlole mwanangu jwamlume, ligongo mwanache jwangwete ni jumopeju basi. 39 Msimu ukusamkamulaga, soni papopo jwalakwe akusagumilaga mnope, kaneko ukusamtendekasya kutetemela ni kumgwichisya pasi kwineku ali mkukopoka chiwulo kukamwa. Msimuwo ukusasawusyaga kuti umleche, soni pakumleka ukusaŵa uli umwulesye mnope. 40 Naŵendile ŵakulijiganya ŵawo kuti awukoposye msimuwo, nambo alepele.” 41 Pelepo Yesu ŵaŵechete kuti, “Jemanja ŵa m’bado* wangali chikulupi soni wangalondeka, ana chimbepe ni jemanja soni kumpilila mpaka chakachi? Myiche najo akuno mwanagwenujo.” 42 Mnyamatajo paŵayikaga, chiŵandacho chamgwichisye pasi soni chamtendekasisye kutetemela ni kuliputikasyaga pasi. Nambope Yesu ŵawujamwiche msimu wakusakalawo soni ŵamposisye* mwanachejo, kaneko ŵampeleche kwa babagwe. 43 Pelepo ŵandu wosope ŵasimonjile mnope ni machili gekulungwa ga Mlungu.

Ŵanduwo paŵaliji mkusimonga ni yindu yosope yaŵatesile, jwalakwe ŵasalile ŵakulijiganya ŵakwe kuti, 44 “Mpikanile mwakusamala soni mkumbuchileje maloŵe aga: Mwanache jwa mundu chachimpeleka mmyala mwa ŵandu.” 45 Nambo ŵakulijiganyawo nganapikanichisya maloŵe gakwega. Maloŵega gasisiche kwa jemanjajo ni chakulinga chakuti akagapikanichisya, nambo ŵajogopagasoni kumwusya jwalakwejo kugopolela kwakwe.

46 Kaneko jemanjajo ŵatandite kukangana yakuti jwamkulungwa ali ŵani pasikati pawo. 47 Yesu paŵamanyilile yaŵaganisyaga m’mitima jawo, ŵakaŵilasile kamwanache ni kukajimika pasikati pawo, 48 ni ŵasalile jemanjajo kuti, “Jwalijose jwakupochela kamwanache keleka ligongo lya lina lyangu, akumbochelasoni une. Soni jwalijose jwakumbochela une, akumpochelasoni Jwele juŵandumile une. Pakuŵa jwele jwakutenda yindu mpela jwamnandi pasikati penu ni jwali jwamkulungwa.”

49 Sambano Yohane ŵamsalile jwalakwejo kuti, “Mwalimu, m’we tum’weni mundu jwine ali mkukoposya yiŵanda m’lina lyawo, nambo twalinjile kumlekasya, ligongo jwalakwejo ngakutukuya m’weji.” 50 Nambo Yesu ŵamjanjile Yohane kuti, “Mkalinga kumlekasya mundu jwelejo, pakuŵa jwalijose jwangakulimbana ni jemanja ali kumbali jenu.”

51 Masiku gakuti jwalakwejo ajawuleje kwinani pagaŵandichile,* ŵasimichisye mtima yakwawula ku Yelusalemu. 52 Myoyo jwalakwe ŵalongwesye ŵane mwa ŵakulijiganya ŵakwe. Jemanjajo ŵapite kukwinjila m’musi wa Asamaliya kuti akalinganye yindu pakosechela kwika kwakwe. 53 Nambo ŵandu ŵa kweleko nganampochela chenene ligongo lyakuti jwalakwejo ŵajawulaga ku Yelusalemu. 54 Yakobo ni Yohane ŵaŵaliji ŵakulijiganya ŵakwe, paŵayiweni yeleyi, ŵaŵechete kuti, “Ambuje, ana akusaka kuti tuŵilasye moto kutyochela kwinani kuti watinisye ŵanduŵa?” 55 Nambo Yesu ŵalolite jemanjajo ni kwajamuka. 56 Myoyo Yesu ni ŵakulijiganya ŵakwewo ŵapite m’musi wine.

57 Sambano jemanjajo paŵaliji mkwenda mumsewu, mundu jwine ŵamsalile Yesu kuti, “Une chinakuyeje kulikose kuchajawuleje.” 58 Nambo Yesu ŵamjanjile kuti, “Makule gakwete mbanga syakwe soni yijuni yikwete yisusi, nambo Mwanache jwa mundu nganakola atamose pagoneka mtwe wakwe.” 59 Kaneko jwalakwe ŵamsalile mundu jwine kuti, “Mŵe jwakulijiganya jwangu.” Mundujo jwajanjile kuti, “Ambuje, angunde njawule kaje ngasiche malilo ga baba ŵangu.” 60 Nambo jwalakwe ŵamsalile mundujo kuti, “Mwaleche ŵawe kuti ŵasicheje ŵawe achimjawo, nambo mmwejo mjawule ni mkalalichileje ya Uchimwene wa Mlungu kulikose.” 61 Mundu jwinesoni jwasasile kuti, “Ambuje, une chinakuyeje, nambo angunde ngalanje kaje kwa ŵamwiŵasa mwangu.” 62 Yesu ŵamjanjile jwalakwejo kuti, “Mundu jwakukamula pulawo* nambo ni kulolaga yindu yamunyuma, nganaŵa jwakuŵajilwa Uchimwene wa Mlungu.”