Detulonomo

4 “Sambano jemanja Ayisalayeli mpikanile malamusi soni yakulamula ya Mlungu yangumjiganya jemanja kuti myikuyeje. Mtende yeleyi ni chakulinga chakuti mpitilisye kutama ni umi soni kuti mkajinjile m’chilambo chele Yehofa Mlungu jwa achinangolo ŵenu akumpa jemanja kuti chiŵe chipanje chenu. 2 Pa maloŵe gangumlamulaga ngamkusosekwa konjechesya gane galigose kapena kugatyosya. Mkatenda yeleyi ni chakulinga chakuti mpitilisye kusunga malamusi ga Yehofa Mlungu jwenu gangumlamula jemanja.

3 “Jemanja mwayiweni ni meso genu yaŵatesile Yehofa ligongo lya Baala jwa ku Peoli. Yehofa Mlungu jwenu ŵampyajisile mundu jwalijose pasikati penu juŵamkuyaga Baala jwa ku Peoli. 4 Nambo jemanja wosope ŵamkupitilisya kumnyambatila Yehofa Mlungu jwetu mli ni umi mpaka lelo. 5 Mlole, une namjiganyisye malamusi soni yaŵalamwile Mlungu mwakamulana ni yatite Yehofa Mlungu jwangu pakulamula unejo. Ndesile yeleyi ni chakulinga chakuti mkakuyeje yeleyi m’chilambo chamkwawula kukuchijigala kuti chiŵe chipanje chenucho. 6 Mkakuyeje mwakusamala yindu yeleyi ligongo naga mkutenda yeleyo chimchilosya kuti mli ŵalunda soni ŵakupikanichisya yindu pameso pa ŵandu ŵachachipikana yakwamba malamusi gosopega, mwamti jemanjajo chachiŵecheta kuti, ‘Nditu mtundu welewu uli wekulungwa soni uli mtundu wa ŵandu ŵalunda nambosoni ŵakupikanichisya yindu.’ 7 Jemanja mkumanyilila chenene kuti Yehofa Mlungu jwetu akusaŵa chiŵandika ni m’weji ndaŵi jilijose jatuŵendile kwa jwalakwejo kuti atukamuchisye. Ana panasoni mtundu wine wekulungwa wele milungu jawo jikusaŵa chiŵandika ni jemanjajo mpela mwayiŵelele ni Mlungu jwetu kwa m’weji? 8 Ana panasoni mtundu wine wekulungwa wawukwete yaŵalamwile Mlungu soni malamusi gachilungamo mpela mwachiŵelele Chilamusi chosope changumpa jemanja lelojinochi?

9 “Jemanja mŵe ŵakusamala soni mlolechesyeje mwamkutendela yindu paumi wenu, ni chakulinga chakuti mkaliŵalila yindu yamwayiweni ni meso genu soni kuti mitima jenu jikaliŵalila yindu yeleyo m’masiku gosope ga umi wenu. Nambosoni mwamanyisyeje yindu yeleyo ŵanache ŵenu soni yisukulu yenu. 10 Palisiku lyamwajimi jemanja pameso pa Yehofa Mlungu jwenu ku Holebe, Yehofa ŵasalile une kuti, ‘Mwasonganganye ŵandu wosope kwa une kuti apikane maloŵe gangu. Atende yeleyi ni chakulinga chakuti jemanjajo alijiganye kunjogopa une masiku gosope gachatameje ni umi pachilambo chapasi soni kuti ŵajiganyeje ŵanache ŵawo maloŵe gelego.’

11 “Myoyo jemanja mwayiche ni kwima chiŵandika litumbi lyele lyaliji mkukolela moto wawakwelaga mpaka mwinani. Pamalopo patesile chipi soni liwunde lyawunichile ni kutendekasya kuti paŵe chipi mnope. 12 Yehofa ŵatandite kuŵecheta kwa jemanja kutyochela m’motowo. Jemanja mwagambile kupikana maloŵe nambo nganimumwona jwalakwejo, gapikanikaga maloŵepe basi. 13 Jwalakwe ŵamsalile jemanja maloŵe gakwe ga chilanga mwagombelesya, gele gaŵamlamwile kuti mgakuyeje, gagali Malamusi 10.* Kaneko jwalakwe ŵalembile malamusigo pa maganga gaŵili gakusepa. 14 Pandaŵi jelejo, Yehofa ŵandamwile une kuti namjiganyeje jemanja malamusi soni yiliyose yaŵalamulaga. Yindu yeleyi yili yakuti mkayikuyeje m’chilambo chachimkajinjile ni kuchijigala kuŵa chipanje chenucho.

15 “Pakuŵa nganimchiwona chilichose m’moto wula palisiku lyele Yehofa ŵaŵechetaga ni jemanja kutyochela pakatikati pa moto ku Holebe kula. Myoyo, mlolechesyeje mwamkutendela yindu paumi wenu. 16 Mtendeje yeleyi ni chakulinga chakuti mkalipanganyichisya chiwanichisyo chine chilichose chakusepa, yampaka yitendekasye kuti mliyikachisye yakupweteka. Mkalipanganyichisya chiwanichisyo, chinga cha jwamlume kapena jwamkongwe, 17 chiwanichisyo cha nyama jine jilijose ja pachilambo chapasi kapena chiwanichisyo cha chijuni chine chilichose chaguluka mwinani. 18 Mkalipanganyichisyasoni chiwanichisyo cha chinyama chine chilichose chakwaŵa cha pachilambo chapasi kapena chiwanichisyo chasomba ja mtundu wine uliwose ja m’mesi ga pachilambo. 19 Pamlolite kwinani ni mkulola yosope yakwinaniko mpela lyuŵa, mwesi soni ndondwa, mkalinjidwa ni yindu yeleyo ni kutanda kuyitindiŵalila soni kuyitumichila. Yehofa Mlungu jwenu ayipeleche yindu yeleyi kwa ŵandu wosope ŵapasi pano. 20 Mkatenda yeleyi ligongo jemanja mli ŵandu ŵele Yehofa ŵamjigele ni kumkoposya m’chilambo cha Iguputo, chachaliji mpela ng’anjo jamoto jakusungunukulila yisyano. Jwalakwe ŵamkopwesye jemanja ni kumjigala kuti mŵe chipanje chakwe mpela mwayiŵelele lelojino.

21 “Yehofa ŵandumbilile une ligongo lya jemanja, mwamti ŵalumbile kuti ngajomboka nawo Yolodani kapena kwinjila nawo m’chilambo chambone chele Yehofa Mlungu jwenu akumpa jemanja kuti chiŵe chipanje chenu. 22 Myoyo, une chimbwile m’chilambo achino, nganjomboka nawo Yolodani. Nambo jemanja chimjomboche lusulolu ni kuja kujigala chilambo chambonecho kuti chiŵe chipanje chenu. 23 Mŵe ŵakusamala kuti mkaliŵalila chilanga cha Yehofa Mlungu jwenu chaŵatesile ni jemanja. Nambosoni mkalipanganyichisya chiwanichisyo chakusepa cha chindu chine chilichose chaŵamlekasisye Yehofa Mlungu jwenu. 24 Mkatenda yeleyo, ligongo Yehofa Mlungu jwenu ali mpela moto wakutinisya. Jwalakwe ali Mlungu jwakusasaka kuti ŵandu alipelecheje kwa jwalakwe jikape basi.

25 “Jemanja chimkayiche m’chilambomo soni chimkatame kwa ndaŵi jelewu ni kola ŵanache soni yisukulu. Payichitendekwa yeleyi, naga chimchitanda kutenda yindu yampaka yimtendekasye konasika, mwakulipanganyichisya chiwanichisyo cha mtundu wine uliwose, soni naga chimchitanda kutenda yindu yakusakala pameso pa Yehofa Mlungu jwenu yampaka yimtumbilikasye jwalakwejo, 26 lelo kwinani soni chilambo chapasi yiŵe mboni jangu kuti jemanja chimchijonasika mwachitema. Chimchijonasika nditu mwachitema m’chilambo chamkwawula kukujigala kuti chiŵe chipanje chenucho panyuma pakomboka Yolodaniju. Jemanja ngamja kutama kwa ndaŵi jelewu nambo chachimpyajila nditu wosope ŵene. 27 Yehofa chachim’balalikanganya jemanja ni chichitamaga pasikati pa ŵandu ŵamitundu jine. Jemanja chimchigamba kusigala ŵandu ŵamnono pasikati pa ŵandu ŵamitundu jinejo kuchachim’balalichisya Yehofako. 28 Kweleko jemanja chimchitanda kutumichila milungu ja yitela soni ja maganga jakupanganya ŵandu, jajili milungu jangalola kapena kupikana, soni jangalya kapena kupikana liwungo line lililyose.

29 “Pachimkaŵe kweleko naga chimkamsosesose Yehofa Mlungu jwenu ni mtima wenu wosope soni ni umi wenu wosope, nditu chimchimsimana jwalakwejo. 30 Yindu yeleyi payichikwanilichikwa kwa jemanja soni pachimkaŵe payipwetesi yekulungwa, mwangakayichila jemanja chimchiwujila kwa Yehofa Mlungu jwenu soni chimchipikanila maloŵe gakwe. 31 Jwalakwe ngasamleka jemanja soni ngasakunda kuti jemanja mmale wosope. Ngasaliŵalilasoni chilanga chaŵalumbile kwa achinangolo ŵenu, pakuŵa Yehofa Mlungu jwenu ali Mlungu jwachanasa.

32 “Sambano mganichisye yamasiku gakala jemanja mkanimpagwe, kutyochela palisiku lyele Mlungu ŵapanganyisye mundu pachilambo chapasi. Nambosoni mwungunyewungunye kutandila kumbesi kwa chilambo mpaka kuja kwika mbali jine ja mbesi ja chilambo. Ana yindu yakusimonjesya mpela yeleyi pakwete payitendekwe kutandila ni kala kose? Ana apali jwalijose juŵapikene yindu mpela yeleyi? 33 Ana pana mtundu wine uliwose wa ŵandu wawampikene Mlungu ali mkuŵecheta kupitila m’moto, ŵanduwo ni kupitilisya kutama ni umi mpela mwayiŵelele ni jemanja? 34 Ana kapena Mlungu pakwete palinjile kujigala mtundu wa ŵandu kutyochela pasikati pa mtundu wine mwakupeleka chilango,* kutenda yimanyisyo soni yakusimonjesya, kutenda ngondo, nambosoni mwakutambasukula mkono wakwe ni kulosya machili gekulungwa, soni kutenda yindu yakutesya woga mpela yaŵamtendele Yehofa Mlungu jwenu ku Iguputo jemanja mli mkulola? 35 Jemanja ŵamlosisye yeleyi kuti mmanyilile kuti Yehofa ali Mlungu jwakuwona. Pangali Mlungu jwine kulekapo jwalakwe jikape basi. 36 Jwalakwe ŵatendekasisye kuti mpikane maloŵe gakwe kutyochela kwinani ni chakulinga chakuti amjongolele jemanja, soni pachilambo chapasi ŵatendekasisye kuti mwuwoneje moto wakwe wakogoya, nambosoni maloŵe gakwe mwagapikene kutyochela m’motowo.

37 “Pakuŵa jwalakwe ŵanonyele achinangolo ŵenu soni asagwile yisukulu yawo kuti yiŵe ŵandu ŵakwe, myoyo jwalakwejo ŵaliji ni jemanja paŵamkoposyaga m’chilambo cha Iguputo ni machili gakwe gekulungwa. 38 Jwalakwe ŵajitopwesye pameso penu mitundu jekulungwa soni jamachili kumpunda jemanja. Ŵatesile yeleyi ni chakulinga chakuti jemanja amjinjisye m’chilambo chawo ni kumpa chilambocho kuti chiŵe chipanje chenu mpela mwayiŵelele lelojino. 39 Paligongo lyelelyo, lelo ngusaka jemanja mmanyilile soni mkumbuchileje kuti Yehofa ni jwali Mlungu jwakuwona kwinani soni pachilambo chapasi, pangalisoni Mlungu jwine. 40 Jemanja msunjeje malamusi gakwe soni yaŵamlamwile jwalakwejo, yangumsalila lelojinoyi. Mtendeje yeleyi kuti yindu yimjendeleje chenene jemanja soni ŵanache ŵenu ŵakwika msogolo, ni chakulinga chakuti mkatame kwa ndaŵi jelewu m’chilambo chakumpa Yehofa Mlungu jwenu.”

41 Pandaŵi jelejo Mose ŵasagwile misinda jitatu kungopokolyuŵa kwa Yolodani kuti jiŵe misinda jakutilila. 42 Naga mundu jwalijose awuleje mjakwe mwangosi, nambo ngaŵa kuti jwaŵenganaga najo pandanda, mundu jwelejo, akusosekwa atilileje kumisinda jeleji kuti aŵe ni umi. 43 Mbumba* ja Lubeni japochele msinda wa Beseli wawuli m’chipululu pamalo gakwela.* Mbumba ja Gadi japochele msinda wa Lamoti wawuli ku Giliyadi. Nambosoni mbumba ja Manase japochele msinda wa Golani wawuli ku Basana.

44 Sambano Mose ŵapele Ayisalayeli malamusi. 45 Mwelemu mwaliji yakwakumbusya, malamusi soni yindu yaŵalamwile Mlungu, yele Mose ŵapele Ayisalayeli panyuma pakopoka m’chilambo cha Iguputo. 46 Ŵasalile yindu yeleyi paŵaliji chiŵandika dela ja Yolodani, mu lilambo lyalili mwakulolegana ni ku Beti-peoli. Dela jeleji jaliji ja Sihoni mwenye jwa Aamoli juŵatamaga ku Hesiboni, jwele Mose soni Ayisalayeli ŵamgomeche panyuma pakutyoka m’chilambo cha Iguputo. 47 Jemanjajo ŵasumwile chilambo cha mwenye jweleju soni chilambo cha mwenye Ogi jwa ku Basana. Mamwenye gaŵili gelega galiji ga Aamoli gagatamaga ku mbali jakungopokolyuŵa kwa Yolodani. 48 Dela jaŵasumwileji jaliji jakutandila ku Aloeli mungulugulu mwa Chitiŵi* cha Alinoni mpaka kuja kwika ku Litumbi lya Sioni, lyalili Litumbi lya Helimoni 49 nambosoni dela josope ja Alaba, jajili mbali jakungopokolyuŵa kwa Yolodani mpaka kuja kwika ku nyasa ja Alaba,* jajili kwiŵanda kwa malo gakuseleleka ga Pisiga.