Lefitiko

18 Yehofa ŵapitilisye kuŵecheta ni Mose kuti, 2 “Mŵechete kwa Ayisalayeli ni mwasalile jemanjajo kuti, ‘Une ndili Yehofa Mlungu jwenu. 3 Mkatendaga yindu mpela yakusatenda ŵandu ŵa m’chilambo cha Iguputo, chilambo chamwatamaga jemanja. Mkatendagasoni yindu mpela yakusatenda ŵandu ŵa m’chilambo cha Kanani, chilambo chele changumpa jemanja, nambosoni mkakuyaga ndamo syawo. 4 Mkuyeje yangumlamula jemanja soni msunjeje malamusi gangu nambosoni mpikanileje yeleyi. Une ndili Yehofa Mlungu jwenu. 5 Mkuyeje malamusi gangu soni mpikanileje yangumlamulayi. Jwalijose jwakutenda yeleyi chachipitilisya kutama ni umi. Une ndili Yehofa Mlungu jwenu.

6 “‘Mundu jwalijose akamŵandichilaga jwachibale* jwakwe kuti agonane najo.* Une ndili Yehofa Mlungu jwenu. 7 Ngamkusosekwa kugonana ni baba ŵenu nambosoni ngamkusosekwa kugonana ni mama ŵenu. Ŵelewo ali mama ŵenu, myoyo ngamkusosekwa kugonana nawo.

8 “‘Ngamkusosekwasoni kugonana ni mama ŵenu ŵakumsimana.* Kweleko kuli kwatesya sooni baba ŵenu.*

9 “‘Mkagonana ni alumbu ŵenu, chinga alumbu ŵenu ŵa baba ŵenu ŵane kapena alumbu ŵenu ŵa mama ŵenu ŵane, chinga alumbu ŵenuwo apagwile m’liŵasa lyamkutama mmwejo kapena line.

10 “‘Ngamkusosekwa kugonana ni mwanache jwamkongwe jwali chisukulu chenu, chinga chisukulucho chakuŵeleka mwanache jwenu jwamlume kapena chakuŵeleka mwanache jwenu jwamkongwe, ligongo kutenda yeleyo kuli kulitesya sooni mwasyene.*

11 “‘Ngamkusosekwa kugonana ni mwanache jwamkongwe jwa mama ŵenu ŵane, jwali mwanache jwa baba ŵenu, ligongo ŵelewo ali alumbu ŵenu.

12 “‘Ngamkusosekwa kugonana ni baba ŵenu ŵakongwe, ligongo ŵelewo ali myasi jimo ni baba ŵenu.

13 “‘Ngamkusosekwa kugonana ni mama ŵenu ŵanandi kapena ŵakulungwa, ligongo ŵelewo ali myasi jimo ni mama ŵenu.

14 “‘Mkatesya sooni akuluŵawo baba ŵenu kapena apwawo* mwakugonana ni ŵamkwawo, ligongo ŵelewo ali alongo ajenu.

15 “‘Ngamkusosekwa kugonana ni ŵamkwawo mwanache jwenu jwamlume. Ŵelewo ali akwegwe ŵenu, myoyo ngamkusosekwa kugonana nawo.

16 “‘Ngamkusosekwa kugonana ni ŵamkwawo achimwene ŵenu kapena ŵamkwawo apwenu, ligongo kweleko kuli kwatesya sooni achimwene ŵenu kapena apwenuwo.*

17 “‘Pamlombele ŵakongwe, ngamkusosekwa kugonanagasoni ni mwanache jwawo jwamkongwe. Ngamkusosekwasoni kugonana ni chisukulu cha ŵamkwenuwo, chinga chisukulucho chakuŵeleka mwanache jwawo jwamlume kapena mwanache jwawo jwamkongwe, ligongo jemanjaji ali alongo achimjawo ŵa ŵamkwenuwo. Jeleji jili ndamo jakutesya sooni.

18 “‘Ngamkusosekwa kujigala akuluŵawo ŵamkwenu kapena apwawo kuti aŵe ŵamkwenu ŵaŵili ni kugonanaga nawo, ŵamkwenuwo ali chiŵela umi.

19 “‘Mkaŵandichila ŵakongwe kuti mgonane nawo pandaŵi jakoga.*

20 “‘Mkagonanaga ni ŵakongwe ŵa ajenu ni kulitendekasya kuŵa ŵangaswejela.

21 “‘Ngamkusosekwa kukunda kuti mwanache jwenu jwalijose ampeleche kwa Moleki. Mkalisakasya lina lya Mlungu jwenu m’litala lyelelyo. Une ndili Yehofa Mlungu jwenu.

22 “‘Ngamkusosekwa kugonana ni jwamlume mpela yamkusati pagonana ni jwamkongwe. Jeleji jili ndamo jakunyalaya.

23 “‘Jwamlume ngakusosekwa kugonana ni chinyama ni kulitendekasya kuŵa jwangaswejela. Nambosoni jwamkongwe ngakusosekwa kulipeleka kwa chinyama kuti agonane nacho. Jeleji jili ndamo jakutindana ni chipago.

24 “‘Mkalitendekasya kuŵa ŵangaswejela ni ndamo syelesi. Pakuŵa ŵandu ŵamitundu jine ŵangwatopola pameso penu alisakesye ni ndamo syosope syenesi ni kuŵa ŵangaswejela. 25 Ni ligongo lyakwe chilambocho chili changaswejela. Unejo chinjipeleka chilango* kwa ŵandu ŵa m’chilambomo ligongo lya yakulemwa yawo, mwamti chilambocho chichajasa ŵandu ŵakutama mwelemo. 26 Nambo jemanja mkuyeje malamusi gangu soni mpikanileje yangumlamulayi. Ngamkusosekwa kutenda chine chilichose mwa yindu yakunyalaya yeleyi, chinga mundujo jwa Chiyisalayeli kapena mundu jwamtundu wine jwakutama pasikati penu. 27 Pakuŵa yindu yakunyalaya yosopeyi ni yaŵele ali mkutenda ŵandu ŵaŵele ali mkutama m’chilambo chamkwawula jemanjacho, mwamti chilambocho sambano chili changaswejela. 28 Myoyo jemanja mkaja kuchisakasya chilambocho pakogopela kuti mpaka chimjase mpela yachichijile pakwajasa ŵandu ŵamitundu jine ŵaŵele ali mkutama m’chilambomo jemanja mkanimŵe kwawula. 29 Naga mundu jwalijose akutenda chimo mwa yindu yakunyalaya yeleyi, mkusosekwa kumwulaga mundu jwelejo kuti akasimanikwasoni pasikati pa ŵandu ŵakwe. 30 Mpikanileje yosope yangumlamulayi mwakuŵambala kutenda ndamo syakusakala syaŵele ali mkutenda ŵandu ŵa m’chilambomo jemanja mkanimŵe kwawula. Mŵambale ndamosi kuti mkalisakasya nasyo. Une ndili Yehofa Mlungu jwenu.’”