Numeli

32 Sambano ŵanache ŵa Lubeni soni ŵanache ŵa Gadi ŵakwete yilango yejinji, mwamti ŵayiweni kuti dela ja Yaseli soni dela ja Giliyadi galiji madela gambone kulanjila yilango. 2 Myoyo ŵanache ŵa Gadi soni ŵanache ŵa Lubeni ŵayiche pameso pa Mose, jwakutaga mbopesi Eliyesala soni pameso pa achakulungwakulungwa ŵa ŵanduwo ni ŵasalile jemanjajo kuti, 3 “Tujiweni dela ja Ataloti, Diboni, Yaseli, Nimila, Hesiboni, Eleyale, Sebamu, Nebo soni Beoni. 4 Madela gelega ni gaŵagagomeche Yehofa pameso pa Ayisalayeli. M’weji ŵakutumichila ŵawo tukwete yilango yejinji, ni tuyiweni kuti madela gelega gali gambone kulanjila yilango.” 5 Jemanjaji ŵapitilisye kuŵecheta kuti, “Naga mpaka yasangalasye, atupe chilambo chelechi kuti chiŵe chipanje chetu. Tukajomboka nawo lusulo lwa Yolodani.”

6 Pelepo Mose ŵasalile ŵanache ŵa Gadi soni ŵanache ŵa Lubeniwo kuti, “Ana jemanja mkusaka mtameje akuno achalongo achimjenu ali mkuputa ngondo? 7 Ligongo chichi mkusaka kwatengusya Ayisalayeli kuti akajinjila mchilambo chele Yehofa asimichisye kwapa jemanjajo? 8 Yeleyi ni yaŵatesilesoni achinangolo ŵenu panatumisye jemanjajo kutyochela ku Kadesi-balineya kuti akasonde chilambocho. 9 Jemanjajo paŵapite ku Chitiŵi* cha Esikolo ni kuchiwona chilambocho ŵatengwisye Ayisalayeli kuti akajinjila m’chilambocho, chele Yehofa ŵasakaga kwapa Ayisalayeliwo. 10 Palisiku lyelelyo Yehofa ŵatumbilile mnope jemanjajo, mwamti jwalumbile kuti, 11 ‘Ŵandu wosope ŵaŵatyochele ku Iguputo, ŵakutandila yaka 20 kwawulaga msogolo ngasachiwona chilambo chanamlumbilile Abulahamu, Isaki nambosoni Yakobo kuti chinjapa. Yeleyi yili myoyo ligongo lyakuti ŵandu ŵelewo nganambikanila une ni mtima wosope. 12 Nambo Kalebe mwanache jwa Yefune jwa muliŵasa lya Kenisi nambosoni Yoswa mwanache jwa Nuni ni ŵachachichiwona chilambocho ligongo jemanjaji ŵampikanile Yehofa ni mtima wosope. 13 Yehofa ŵatumbilile mnope Ayisalayeli mwamti ŵatendekasisye kuti jemanjaji aŵe ali mkwenda m’chipululu kwa yaka 40. Ŵatesile yeleyi mpaka m’bado* wosope wawatendaga yakusakala pameso pa Yehofawo uli umasile wosope. 14 Sambano jemanja ŵandu ŵakulemwa mkutenda yindu mpela muŵatendelaga achinangolo ŵenu yayatendekasisye kuti Yehofa ŵatumbilile mnope Ayisalayeli. 15 Naga jemanja mkuleka kumpikanila, nditu jwalakwejo chachalekasoni ŵanduŵa m’chipululu, yayichitendekasya kuti ŵandu wosope ŵeneŵa ajonasiche.”

16 Jemanjajo ŵayiche kanesoni kwa Mose ni kumsalila kuti, “Uli atukunde kuti tutaŵe machinga ga maganga gakutama yilango yetu nambosoni misinda jakutama ŵanache ŵetu akunokuno. 17 Nambope m’weji chituŵe ŵakoseka kuputa ngondo soni kuŵa pasogolo pa Ayisalayeliwo ni kulongana nawo mpaka tuli twakamuchisye kwika kumalo gawo. Nambo ŵanache ŵetu chasigale akuno ali mkutama m’misinda jakola yakulichenjela ni chakulinga chakuti aŵe ŵakuteteyeka kwa ŵandu ŵa m’chilambo achino. 18 M’weji tuchiwujila msimangwetu panyuma pakuti Myisalayeli jwalijose apochele malo gakwe mpela chipanje chakwe. 19 M’wejo ngasitupochela nawo malo mpela chipanje chetu pampepe ni jemanjajo ku lisi linelyo lya lusulo lwa Yolodani ligongo lyakuti tupochele kala malo getu mpela chipanje chetu kumbali ajino ja kungopokolyuŵa kwa lusulo lwa Yolodani.”

20 Pelepo Mose ŵajanjile jemanjajo kuti, “Chambone, chiyiŵe myoyo naga jwalijose akutenda ayi: Mjigale yida yenu kuti mkapute ngondo pameso pa Yehofa, 21 soni mjomboche lusulo lwa Yolodanilu kuti mkapute ngondo sya Yehofa mpaka jwalakwe ali ŵatopwele adani ŵakwe wosope pameso pakwe, 22 nambosoni mpaka Yehofajo ali amalisisye kuchigomeka chilambocho pameso pakwe. Panyuma pakwe, jemanja chimchiwujila akuno soni chimchiŵa ŵangali magambo pameso pa Yehofa soni pameso pa Ayisalayeli. Pelepo ni pachimchijigala chilambo achino ni kuŵa chipanje chenu pameso pa Yehofa. 23 Nambo naga ngasimtenda yeleyi, chimchiŵa kuti mumlemwechesye Yehofa, soni mmanyilile kuti chimchipochela chilango ligongo lya kulemwa kwenuko. 24 Myoyo mpaka mtaŵe misinda jakutama ŵanache ŵenu soni machinga ga yilango yenu akuno. Nambope ngasimlepela kukwanilisya chilanga chamtesilechi.”

25 Ŵanache ŵa Gadi soni ŵanache ŵa Lubeni ŵamjanjile Mosejo kuti, “M’weji ŵakutumichila ŵawo chitutende yakutulamula wawojo ambuje ŵetu. 26 Ŵanache ŵetu soni achiŵamkwetu chatameje m’misinda ja chilambo cha Giliyadi pampepe ni yilango yetu yosope. 27 Nambo m’wejo ŵakutumichila ŵawo chitujomboche lusulo lwa Yolodani, jwamlume jwalijose ali ajigele yida kuti akapute ngondo pameso pa Yehofa mpela mwaŵechetele wawojo ambuje ŵetu.”

28 Myoyo pakwamba ya jemanjajo, Mose ŵamlamwile jwakutaga mbopesi Eliyesala, Yoswa mwanache jwa Nuni soni achakulungwakulungwa ŵakwimila maŵasa gakumanyika ni lina lya achinangolo ŵawo ga mbumba* sya Isalayeli, 29 kuti, “Naga ŵanache ŵa Gadi soni ŵanache ŵa Lubeni akomboka lusulo lwa Yolodani pampepe ni jemanja, jwamlume jwalijose ali ajigele yida kuti akapute ngondo pameso pa Yehofa soni jemanja pachimkachigomeche chilambocho, pelepo chimwape jemanjajo chilambo cha Giliyadi kuŵa chipanje chawo. 30 Nambo naga jemanjajo ngasajigala yida yawo ni kulongana namwe komboka lusulo lwa Yolodani kuti akamkamuchisye kuputa ngondo, pelepo chachitamaga ni jemanja m’chilambo cha Kanani.”

31 Pelepo ŵanache wa Gadi soni ŵanache ŵa Lubeni ŵajanjile kuti, “Yiliyose yalamwile Yehofa m’weji ŵakutumichila ŵawo chituyitende. 32 M’weji chitujigale yida ni komboka Lusulo lwa Yolodani kuti tukapute ngondo pameso pa Yehofa m’chilambo cha Kanani. Nambo malo gakuti chitupochele mpela chipanje chetu gaŵe kumbali jakungopokolyuŵa kwa lusulo lwa Yolodani kunokuno.” 33 Myoyo Mose ŵapeleche kwa ŵanache ŵa Gadi, ŵanache ŵa Lubeni soni hafu ja mbumba ja Manase jwali mwanache jwa Yosefe malo gakuyichisyaga. Ŵapele jemanjajo misinda jaŵalamulilaga Sihoni mwenye jwa Amoli pampepe ni malo gane gakusyungulila misindajo. Nambosoni misinda jaŵalamulilaga Ogi mwenye jwa ku Basana pampepe ni malo gakwe gakusyungulila misindajo.

34 Myoyo ŵanache ŵa Gadi ŵataŵile* msinda wa Diboni, Ataloti, Aloeli, 35 Atiloti-sofani, Yaseli, Yogibeha, 36 Beti-nimila soni msinda wa Beti-halani. Jeleji jaliji misinda jakola yakulichenjela. Jemanjajo ŵataŵilesoni machinga ga maganga ga yilango yawo. 37 Ŵanache ŵa Lubeni ŵajitaŵilesoni misindaji. Msinda wa Hesiboni, Eleyale, Kiliyataimu, 38 Nebo, Baala-meoni soni msinda wa Sibima. Paŵajitaŵilesoni misindaji ŵajichenjile mena gakwe.

39 Ŵanache ŵa Makili juŵaliji mwanache jwa Manase ŵapite kuja kuputa ngondo ni Aamoli ŵaŵatamaga ku Giliyadi, mwamti ŵatopwele jemanjajo ni kusumula chilambocho. 40 Myoyo Mose ŵapeleche chilambo cha Giliyadi kwa ŵanache ŵa Makili juŵaliji mwanache jwa Manase, mwamti jemanjajo ŵatandite kutama m’chilambocho. 41 Nombenajo Yayili jwakutyochela mu mbumba ja Manase ŵapite kukusumula misi ja matenti ja m’chilambo cha Giliyadi. Kaneko misijo ŵajipele lina lyakuti Hafoti-yayili.* 42 Nambosoni Noba ŵapite kukusumula msinda wa Kenati pampepe ni tumisinda twine twamwanamwana.* Kaneko ŵawupele msindawo lina lyakuti Noba pakujigalila lina lyakwe.