Genesesi

49 Kaneko Yakobo ŵaŵilasile ŵanache ŵakwe ŵachalume ni kwasalila kuti, “Msongangane pampepe kuti namsalile yindu yayichimtendechela jemanja kusogoloku. 2 Mtame wosope pampepe soni mpikane yangusaka kumsalila. Jemanja ŵanache ŵa Yakobo, mpikane yakusaka kumsalila Isalayeli baba ŵenu.

3 “Lubeni, mmwejo mli mwanache jwangu jwandanda kupagwa, mli machili soni pakutandila machili gangu gakuŵeleka. Mmwejo mli ŵakuchimbichika mnope soni mli ŵamachili mnope. 4 Nambo mmwejo ngasimŵasoni ŵakuchimbichika ligongo mwatesile yindu mpela mesi gakusefuchila, mwakugona ni ŵamkwangu.* Pandaŵi jeleji mmwejo mwasakesye bedi jangu. Jweleju ŵapite pabedi jangu nditu.

5 “Simiyoni ni Lefi ali ŵa paulongo. Maupanga* gawo gali yida yakutendela yindu yachiwawa. 6 Umi wangu ukatama yimpepe ni jemanjaji. Pagulu jatemi jemanjaji une ngasisimanikwa nawo, ligongo jemanjaji ali atumbile ŵawuleje ŵandu, soni paŵasangalele ŵasilemesye* mwangasa ng’ombe syelume. 7 Matembelelo gaŵe pa kutumbila kwawo ligongo kutumbila kwawoko kwaliji kwangasa, soni matembelelogo gaŵe pa ukali wawo ligongo ukali wawowo waliji wakonanga. Une chinamwasanye jemanjaji mwa Yakobo, soni chinabalalikanganye pasikati pa Isalayeli.

8 “Nambo pakwamba ya mmwejo Yuda, achalongo achimjenu chachimchimbichisya. Mkono wenu uchikamula lukosi lwa adani ŵenu. Nambosoni ŵanache ŵachalume ŵa baba ŵenu chachimtindiŵalila mmwejo. 9 Yuda ali mpela mwanache jwa lisimba. Mwanangu, mmwejo chimchiwulaga nyama ni kulya, soni chimchiwuja chenenepe. Jwalakwe chachipinda malungo gakwe ni kugona pasi soni chachilijongola mpela lisimba, soni mpela lisimba, ana ŵani ŵampaka alimbe mtima ni kumtanda jwalakwe? 10 Ndodo ja umwenye ngasijityoka pa Yuda, soni ndodo ja jwakulamula ngasijityoka pasajo syakwe mpaka pele Silo* chachiyika, soni mitundu ja ŵandu jichimpikanila jwalakwe. 11 Chachitaŵa bulu jwakwe ku chitela cha mpeleya, soni jwalakwe chachitaŵa mwanache jwa bulu jwakwe ku chitela cha mpeleya chambone. Jwalakwe chachichapa yakuwala yakwe mufinyo, soni chachichapa chakuwala chakwe chakusa mu myasi ja mipeleya. 12 Meso gakwe gachiŵa gechejewu ligongo lya finyo, soni meno gakwe gachiŵa geswela ligongo lya mkaka.

13 “Sebuloni chachitama mungulugulu nyasa. Jwalakwe chachitamaga mwakuŵandikana ni yiko pagakusajima masitima, soni malile gakwe gakutalichila gachija kwika cha ku Sidoni.

14 “Isakala ali mpela bulu jwa mawupa gakulimbangana, jwakusagona pasi ali anyakwile misaku jiŵili jakunyakulila katundu mumbali mwakwe, wine aku wine kwineku. 15 Jwalakwe chachigawona malo gakupumulila kuti gali gambone, soni kuti chilambocho chili chakusangalasya. Jwalakwe chachijinama kuti anyakule katundu jwakusitopa, soni chachikunda kukamula masengo gakupweteka.

16 “Dani chachawelusya ŵandu ŵakwe mpela jumo jwa mu mbumba sya Isalayeli. 17 Dani chachiŵa mpela lijoka lyakutama mumbali mwa msewu, lijoka lyakola tumisengo lyalikusatama mumbali mwa litala, lyele likusaluma chindende cha hachi ni chakulinga chakuti jwakwesile hachijo agwe chalugali. 18 Nambope une chinjajembecheya wawo Yehofa kuti angulupusye.

19 “Pakwamba ya Gadi, gulu ja ŵachiswamba jichimjimuchila. Nambo jwalakwe chachajimuchilasoni jemanjajo mwakuwulasya yindende yawo.

20 “Aseli chachikola yakulya yejinji, soni jwalakwe chachikola yakulya yakuŵajilwa kulya mamwenye.

21 “Nafitali ali mpela mbaŵala jekongwe jakuwutuka mwachitemachitema. Jwalakwe akusaŵecheta maloŵe gakunong’a.

22 “Yosefe ali mpela lunyambi lwakusipuka kwene lwa chitela chakusogola yisogosi, chitela chakusogola yisogosi chachili pa malo gakopoka mesi gejinji chele nyambi syakwe sitambalile penani pa lipupa. 23 Nambo ŵakuponya mipamba nganaleka kumlagasya jwalakwe. Ŵaliji mkumsoma soni kupitilisya kumŵenga jwalakwe. 24 Nambo ukunje wakwe nganiwutyoka pamalo gakwe, soni makono gakwe gaŵele gakulimbangana soni gachitema. Yeleyi yatyochele mmyala mwa jwamachili jwa Yakobo jwalisoni mkuchinga soni jwali liganga lya Isalayeli. 25 Jwalakwe* ali jwakutyochela kwa Mlungu jwa baba ŵenu, mwamti chachimkamuchisya jemanja. Soni jwalakwe ali ni jwamachiligosopejo, soni jwalakwe chachimpa jemanja upile wakutyochela kwinani, soni chachimpa upile wakutyochela pasi pakusokoka. Nambosoni chachimpa upile mwakumpa maŵele ga mkaka wejinji soni lutumbo lwakuŵeleka. 26 Upile wa baba ŵenu uchiŵa wekulungwa kupunda wa matumbi gakutama mpaka kalakala. Upilewo uchiŵasoni wakupunda yindu yambone ya m’masugulu gampaka kalakala. Upile wosopewo uchipitilisya kuŵa pamtwe pa Yosefe, pewuwo pa jwele ŵamsagwile pasikati pa achalongo achimjakwe.

27 “Benjamini chachipitilisya kupachulanya mpela lisogo. Kundaŵi chachikamula nyama ni kulya, soni ligulo chachigaŵanya yindu yasumwile.”

28 Ŵanache wosopeŵa ni ŵaŵaŵele mbumba syakwana 12 sya Isalayeli, soni yosopeyi ni yele baba ŵawo ŵaŵechete pandaŵi jaŵapaga upile. Jwalijose ŵampele upile wakwewakwe.

29 Panyuma pa yeleyi, Yakobo ŵasalile jemanjajo kuti, “Sambano ndaŵi jikwanile jakuti ambiche pampepe ni ŵandu ŵangu. Myoyo, jemanja mkambiche pampepe ni achinangolo ŵangu mumbanga jajili mumgunda wa Efuloni Mhiti. 30 Mbangaji jili mumgunda wa Makipela wawuli mwakulolegana ni Mamule m’chilambo cha Kanani. Mgundawu ni wele Abulahamu ŵawusumile kwa Efuloni Mhiti kuti gaŵe malembe. 31 Kweleko ni kuŵamsichile Abulahamu soni Sala ŵaŵaliji ŵamkwakwe. Nambosoni kweleko ni kuŵamsichile Isaki ni Labeka ŵaŵaliji ŵamkwakwe, soni kweleko ni kunamsichile Leya. 32 Mgunda welewo soni mbanga jajili mwelemo, ŵayisumile kwa ŵanache ŵa Heti.”

33 Myoyo Yakobo ŵamalisisye kuŵechetana ni ŵanache ŵakwe. Pelepo jwalakwe ŵakwesisye ngongolo syakwe pabedi ni kupumula kakumalisya. Kaneko ni ŵamŵisile pampepe ni ŵandu ŵakwe.*