Chikalata Chaŵili cha Petulo

2 Nambope, pasikati pa ŵandu ŵa Mlungu papalisoni ŵakulochesya ŵaunami, mpela mwayichiŵelasoni pasikati penu kuti pachiŵa ŵakwiganya ŵaunami. Ŵandu ŵeleŵa chachitandisya tumagulu kuti ajonanje chikulupi chenu, soni chachiyikana pakumkana mundu jwele juŵasumile jemanjajo. Ligongo lyakutenda yeleyi chachajonanga mwachitema. 2 Nambosoni, ŵandu ŵajinji chachijigalila ndamo jakulijasilila* ja ŵandu ŵeleŵa, soni ligongo lya jemanjaji ŵandu chachiŵechetaga yakunyosya yijiganyo yisyesyene. 3 Ligongo lyakusaka kupata yindu yejinji, jemanjaji chachimnyenjelelaga jemanja ni maloŵe gaunami. Nambo ndaŵi jawo jele Mlungu ŵaŵisile kuti ŵawelusye jikwika mwachitema, soni chachajonanga nditu.

4 Nditu, malayika gagalemwisye gala Mlungu nganagalechelela ata panandi ngagapa chilango.* Jwalakwe ŵagaponyisye malayikago mu Tatalasi,* ni kugataŵa mu chipi chekulungwa mnope* pakwembecheya kugawelusya. 5 Nambosoni jwalakwe nganalepela kupeleka chilango ku chilambo chachapali mundaŵi ja Nowa, pandaŵi jaŵayikasisye chigumula pa chilambo cha ŵandu ŵangapikanila Mlungu. Nambo ŵamkulupwisye Nowa, jwakulalichila jwachilungamo, pampepe ni ŵane 7. 6 Jwalakwe ŵajipelesoni chilango misinda ja Sodomu ni Gomola mwakujijocha moto mpaka jasigele liwuliwupe. Ŵatesile yeleyi kuti yiŵe chisyasyo cha yindu yachachitenda kwa ŵandu ŵangampikanila Mlungu. 7 Nambo ŵamkulupwisye Loti, mundu jwachilungamo, jwele ŵaliji mkulagasika mnope ni ndamo jakulijasilila* ja ŵandu ŵangapikanilawo. 8 Pakuŵa lisiku lililyosye mundu jwachilungamoju ŵaliji mkulagasika mnope mumtima, ligongo paŵaliji mkutama ni ŵanduwo ŵaliji mkuyiwona soni kupikana yitendo yangapikanila malamusi yaŵatendaga ŵanduwo. 9 Yeleyitu yikutusalila kuti Yehofa akusamanyilila kwakulupusya ŵandu ŵakulipeleka kwa jwalakwe pakusimana ni yakwalinga. Nambo akusiŵasunjila chilango ŵandu ŵangapikanila kuti chiŵajonanje pa lisiku lyakulamula, 10 mnopemnope ŵandu ŵele ŵakusagona ni ŵane pakusaka ­kwasakasya nambosoni ŵandu ŵele ŵakusanyosya* ŵakulamulila.

Jemanjaji ali ŵandu ŵangali woga, ŵakulikwesya, soni ŵangajogopa kuŵecheta maloŵe gachipongwe kwa ŵandu ŵele Mlungu ŵachimbichisye. 11 Nambotu malayika, atamose kuti gakwete machili gekulungwa, nambo gangaŵecheta yakwanyosya ŵakwiganya ŵaunamiŵa, pakusaka kumchimbichisya Yehofa. 12 Nambo ŵandu ŵeleŵa akusaŵecheta yachipongwe pa yindu yele ngakuyimanyilila. Pakutenda myoyo jemanjaji akusaŵa mpela yinyama yangali lunda yayikusagamba kutenda yindu mwachipago soni yayikusapagwa kuti ŵane ayikamule ni kuyijonanga. Jemanjaji chachijonasika ligongo lya yitendo yawo yakulipwetekasya. 13 Nambosoni chachipochela chilango mpela malipilo gawo pa yakusakala yakutenda.

Ŵandu ŵeleŵa akusayiwonaga kuti kutenda yakumbila ya chilu chawo atamose musi kuli kwakusangalasya. Jemanjaji ali mpela maŵasi soni yilema pasikati penu, soni akusasangalala kumjiganya yindu yaunami pakulya pampepe ni jemanja. 14 Meso gawo gali gegumbale ni kukumbila yachikululu,* soni ali ŵangakombola kulilekasya pa yakulemwa, nambosoni akusiŵanyenjelela ŵandu ŵali ŵangatamilichika pachikulupi. Jemanjaji akwete mtima wele ŵawujiganyisye chenene kukumbila yindu mwakulemwecheka. Ŵandu ŵeleŵa ali ŵalweseche.* 15 Jemanjaji ŵalesile litala lyambone, mwamti asokonechele. Ŵandu ŵeleŵa akuyisye litala lya Balamu mwanache jwa Beoli, jwele juŵasachililaga kupochela malipilo pakutenda yakusakala. 16 Nambo jwalakwejo ŵamjamwiche ligongo lya ndamo jakwe jakusakala. Bulu jwali chinyama changaŵecheta jwaŵechete mpela mundu mwamti jwamlepelekasisye jwakulochesyaju pa yakuloŵela yaŵasakaga kutenda.

17 Ŵandu ŵeleŵa ali mpela yisima yangali mesi soni ali mpela lipundugulu lyakututidwa ni chimbungo chamachili, mwamti chipi chakogoya mnope chikwajembecheya jemanjaji. 18 Jemanjaji akusaŵecheta yindu yakuwoneka mpela yakusosekwa nambo yili yangakamuchisya ata panandi. Ŵandu ŵeleŵa akusatendaga ndamo syakulijasilila,* soni akusiŵatendekasya ŵandu kuti atandilesoni kukumbila yakulemwecheka, mwamti akusiŵanyenjelela kuti atendeje yakusakala yagambile kuleka kwene kuyitenda. 19 Jemanjaji akusiŵasalila ŵanduŵa kuti chiŵakamuchisye kuŵa ŵagopoka nambo chitamilecho achimsyenewo ali achikapolo ŵa ulemwa. Pakuŵa mundu akusaŵaga kapolo jwa chindu chine naga chinducho chikumlamulila* jwalakwejo. 20 Panyuma pakuti jemanjaji alesile ndamo syakusakala sya m’chilambo ligongo lyakwamanyilila chenene Ambuje Yesu Klistu ŵali Mkulupusyo, ni kaneko akuwujilasoni ku ndamo syawo syakala mpaka ndamosyo nikutanda kwalamulila, pambesi pakwe jemanjaji akusaŵaga ŵakusakala mnope kupunda pandanda. 21 Yikaŵele chenene yikaŵe kuti jemanjaji agambile kutama ngamanyilila chenene litala lya chilungamo, kulekangana nikuti alimanyilile kaneko ni kuleka kukuya lilamusi lyeswela liŵapochele. 22 Pelepa nikuti maloŵe agala gakwanilichikwe pa jemanjaji, gakuti,* “Mbwa jiwujile ku matapisi gakwe, soni liguluŵe liŵalijojesye chenene lipite kugalagata m’matope.”