Chikalata Chakwawula kwa Ahebeli

1 Kalakala Mlungu ŵaŵechete kwa achinangolo ŵetu kupitila mwa ŵakulochesya. Ŵatesile yeleyi ndaŵi syejinji soni m’matala gejinji. 2 Nambo kumbesi kwa masiku agano jwalakwe aŵechete ni m’weji kupitila mwa Mwanache jwakwe, jwele ŵamŵisile kuti aŵe jwakupochela yindu yakwe yosope. Kupitila mwa jwalakwejo, Mlungu ŵapanganyisye ndaŵi* syakulekanganalekangana. 3 Jwalakwe akusalosya uchimbichimbi wa Mlungu soni ali chiwulili chisyesyene cha Mlungu jusyesyenejo. Jwalakwe akusayichinjilichisya yindu yosope ni maloŵe gakwe gamachili, soni panyuma pakutuswejesya ni kututyochesya ulemwa wetu, jwalakwe ŵatemi kumkono wamlyo wa Mlungu m’malo gakwinani mnope. 4 Sambano jwalakwe ali jwakupunda malayika pakuŵa jwapochele lina lyapenani mnope kupunda lina lya malayikago.

5 Mwachisyasyo, Mlungu nganalisalileje lilayika lililyose kuti, “Mmwe mli mwanangu, lelo mbele baba ŵenu.” Kapena kusala kuti, “Une chinjiŵa babagwe, soni jwalakwe chachiŵa mwanangu.” 6 Nambo pakumtumisyasoni Mwanache jwakwe jwandanda pachilambo chapasi kwali ŵandu, Mlungu akuti, “Malayika gosope ga Mlungu gamtindiŵalile jwalakwejo.”

7 Nambosoni pakuŵecheta ya malayika, jwalakwe akuti, “Akusagatenda malayika gakwe kuŵa misimu, soni akusiŵatenda ŵakutumichila ŵakwe kuŵa lilamba lya moto.” 8 Nambo pakwamba ya Mwanachejo, Mlungu akuti, “Mlungu ali mpando wenu waumwenye mpaka kalakala, soni simbo ja Uchimwene wenu jili simbo jachilungamo. 9 Mwanonyele chilungamo, soni mwaŵengene ni ungapikanila malamusi. Ni ligongo lyakwe Mlungu, jwali Mlungu jwenu, ŵamsagwile mmwejo mwakumpakasya mawuta soni ŵampele chisangalalo chekulungwa kupunda mayimwene gane.” 10 Jwalakwe akuŵechetasoni kuti, “Wawo Ambuje, pandanda pene wawojo ŵaŵisile fendeshoni* ja chilambo, soni kwinani gali masengo ga makono gawo. 11 Yindu yeleyi yichijonasika, nambo wawojo chachiŵape chitamile. Yindu yosopeyi yichimala mpelaga chakuwala, 12 mwamti wawojo chachiyipindanya pampepe mpela mkanjo soni kuyichenga mpela chakuwala. Nambo wawojo ngasachenga, soni yaka ya umi wawo ngasiyimala.”

13 Pangalisoni lilayika line lyele Mlungu ŵalisalile kuti, “Mtame kumkono wangu wamlyo mpaka pachinjaŵika adani ŵenu pasi mpela chakupondapo sajo syenu.” 14 Ana malayika gosopego nganigaŵa misimu jakutumichila Mlungu?* Ana Mlungu ngaŵa ni jwakusagatuma malayikago kuti gakamuchisyeje ŵandu ŵachachikulupuka?