Chikalata Chandanda Chakwawula kwa Atesalonika

4 Pakumalisya achalongo achimjangu, pakuŵa mwapochele maloŵe kutyochela kwa m’weji gakusala yampaka mtendeje kuti mumsangalasyeje Mlungu, mpela mwamkutendela apano, tukumŵenda soni tukumchondelela m’lina lya Ambuje Yesu kuti mpitilisye kutenda yeleyi mwakulipeleka. 2 Jemanja mkumanyilila maloŵe* gatwamsalile kupitila mwa Ambuje Yesu.

3 Pakuŵa Mlungu akusaka kuti jemanja mŵe ŵaswela soni mŵambaleje ndamo ja chikululu.* 4 Mundu jwalijose akusosekwa kumanyilila yampaka atende pakuchilamulila chilu chakwe, ni chakulinga chakuti aŵe jwamswela soni jwakuchimbichika pameso pa Mlungu. 5 Mkakuyaga yakusatendaga ŵandu ŵamitundu jine ŵele ŵangammanyilila ­Mlungu. Jemanjaji akwete ndamo jakumbila yachikululu mwangalilekasya. 6 Pangani jeleji, mundu jwalijose akatendaga mwakupundaganya malile ni kumlemwechesya mlongo mjakwe, ligongo Yehofa chachipeleka chilango* kwa ŵandu ŵakusatenda yindu yeleyi. Twamsalile kala ya ngani jeleji soni twamkalamwisye mwamachili. 7 Pakuŵa Mlungu nganatuŵilanga kuti tutendeje yakunyalaya nambo kuti tuŵe ŵaswela. 8 Myoyo, mundu jwalijose jwakukana kupikanila yindu yeleyi, ngaŵa kuti ngakutupikanila m’weji, nambo ngakumpikanila Mlungu jwakusampa jemanja msimu wakwe weswela.

9 Nambo pakwamba yakwanonyela achalongo achimjetu, ngatukusosekwa kuti tumlembele chilichose ligongo Mlungu ŵamjiganyisye kala jemanja kuti mnonyelaneje. 10 Sonitu yeleyi ni yamŵele mli mkutenda kwa achalongo achimjetu wosope ku Makedoniya kosope. Nambo sambano achalongo achimjetu, tukumŵenda kuti mpitilisye kutenda yeleyi kupunda pandanda. 11 Mlinjilileje kutama mwamtendele soni jwalijose akajinjililaga ya asyene. Nambosoni jwalijose akamuleje masengo ni makono gakwe, mpelaga yatwatite pakumsalila. 12 Mtendeje yeleyi ni chakulinga chakuti mjendeje mwakuŵajilwa pameso pa ŵandu ŵangakulupilila soni kuti mŵe ŵangasoŵa chilichose.

13 Nambosoni achalongo achimjetu, ngatukusaka kuti mŵe ŵangamanyilila chilichose pakwamba ya ŵandu ŵakugona mu chiwa. Chakulinga chetu chili chakuti mkakola chanasa chakulandana ni cha ŵandu ŵane wosope ŵanganakola chembecheyo. 14 Naga tukusakulupilila yakuti Yesu ŵawile ni kwimuka, myoyosoni Mlungu chachajimusya wosope ŵaŵamkuyaga Yesu ŵele ŵakugona mu chiwa kuti aŵe pampepe ni jwalakwejo. 15 Kupitila m’maloŵe ga Yehofa tukusaka mmanyilile kuti, m’weji ŵatuchiŵa umi mpaka pandaŵi jakwikasoni kwa Ambuje ngasitwapitilila ŵandu ŵakugona mu chiwa. 16 Pakuŵa Ambuje ŵetu chachituluka kutyochela kwinani. Ŵalakwewo chachigumila mwamachili ni maloŵe ga jwamkulungwa jwa malayika ali anyakwile lipenga lya Mlungu. Kaneko ŵakumkuya Klistu ŵaŵawile chachijimuka chandanda. 17 Panyuma pakwe m’weji ŵatuli umi, chachitujigala ni kwawula m’mawunde kuti tukaŵe ni jemanjajo soni kuti tukasimane ni Ambuje mwinani. Kaneko tuchitamaga ni Ambujewo kwa ndaŵi syosope. 18 Myoyo mpitilisye kulimbikasyana ni maloŵe gelega.