Chikalata Chaŵili Chakwawula kwa Akolinto

7 Achalongo achimjangu ŵapamtima, pakuŵa Mlungu atupele yilanga yeleyi, kwende tuliswejesye. Tutyosye chilichose chakusakasya chilu soni mtima,* ni chakulinga chakuti tuŵe ŵaswela chenene patukumjogopa Mlungu.

2 Mtupe malo m’mitima mwenu. M’wetu nganitumleŵela mundu jwalijose, nganitutenda yakumjonanga jwalijose, soni nganitumlambusya jwalijose kuti tupate kanekakwe. 3 Nganguŵecheta yeleyitu pakusaka kumjimba magambo. Pakuŵa mbechete kala kuti jemanja mli m’mitima jetu, chinga tukuwa kapena tukutama ni umi. 4 Nguŵecheta ni jemanja mwangasisa chilichose. Ngusinamnyadila mnope jemanja. Mtima wangu ulimbile, soni nguŵaga jwakusangalala mnope mu yakusawusya yangu yosope.

5 Nambosoni patwayiche ku Makedoniya yilu yetu nganiyipumula. Twasimanaga ni yakusawusya palipose, pakuŵa kusa* twalimbanaga ni ŵakusisya, soni pasikati petu twatamaga mwawoga. 6 Nambo Mlungu jwakusiŵalimbikasya ŵakasiche mtima, ŵatulimbikasisye paŵayiche Tito. 7 Ngaŵa kuti twalimbile ligongo lyakwika kwakwepe, nambo ligongo lyakuti jemanja mwamlimbikasisyesoni jwalakwejo. Jwalakwe ŵatusalile kuti jemanja mkusachilila kumbona, mkundendela chanasa, soni kuti mkusimunganichisya mnope. Myoyo ndili jwakusangalala mnope ligongo lya yeleyi.

8 Atamose kuti namtendekasisye kuŵa ŵachanasa ligongo lya chikalata changu chila, nambo ngangudandawula. Soni atamose kuti pandanda nadandawile pakuyiwona kuti chikalata changu chamtendekasisye jemanja kulitendela chanasa kwa kandaŵi kamnono, 9 nambope sambano ndili jwakusangalala. Ngaŵa kuti ngusangalala ligongo lyakuti namtendekasisye kuti mlitendele chanasa, nambo ligongo lyakuti mwakwete chanasa chachamtendekasisye kugalawuka mtima. Chanasa chamwakwetecho chaliji chakumsangalasya Mlungu, pakuŵa nganimjasa chilichose ligongo lya m’weji. 10 Chanasa chakusalitendela mundu pakusaka kumsangalasya Mlungu chikusamtendekasya mundu kugalawuka mtima kuti akulupuche, yele mundu nganaŵa adandawile nayo. Nambo chanasa cha chilambo chikusayikasya chiwa. 11 Mlole yachitite pakumkamuchisya chanasa chamlitendele pakusaka kumsangalasya Mlungu. Chimtendekasisye kuti mliswejesye, kuti mŵenganeje ni yakusakala, kuti mumjogopeje Mlungu, soni kuti mŵe ŵakulipeleka ni ŵakusachilila kulinganya yamwalemwisye. Mu yosopeyi, jemanja mlosisye kuti mli ŵaswela.* 12 Atamose kuti namlembele jemanja, nganindenda yeleyi ligongo lya mundu juŵalemwisyejo, kapena ligongo lya mundu juŵamlemwechesye, nambo kuti mlosye pameso pa Mlungu kuti mli ŵakusachilila kutupikanila. 13 Ni ligongo lyakwe yeleyi yitulimbikasisye.

Konjechesya pelepa, tukusangalala mnope ligongo lyakuti Tito ŵayiche ali mkusangalala, pakuŵa jemanja wosope mwamtamiche mtima pasi jwalakwe. 14 Pakuŵa naga namlapilile jemanja kwa jwalakwejo, nganimundesya sooni. Mpela muyaŵelele kuti yindu yosope yitwamsalile jemanja yaliji yisyene, yindu yatwamsalile Tito yakwamba jemanja yiŵelesoni yisyene. 15 Nambosoni, chinonyelo chakwete jwalakwe pa jemanja chili chekulungwa mnope pakukumbuchila mtima wenu wakupikanila, soni yamwatite pakumpochela jwalakwe mwawoga soni mwakutetemela. 16 Ndili jwakusangalala ligongo lyakuti ngusinamkulupilila jemanja* mu yosope.