Ngani Syambone Syaŵalembile Maliko

10 Kaneko jwalakwe ŵatyosile kweleko ni ŵayiche m’malile mwa chigawo* cha Yudeya, lisi line lya Yolodani. Kweleko gulu ja ŵandu jasongangenesoni kwa jwalakwejo. Mpela muŵatendelaga ndaŵi syosope, jwalakwe ŵatandite kwajiganya ŵanduwo. 2 Kaneko Afalisi ŵayiche kwa Yesu ni chakulinga chakuti amlinje, ni ŵamwusisye naga yili yakuŵajilwa kuti jwamlume amasyeje ulombela ni ŵamkwakwe. 3 Yesu ŵajanjile jemanjajo kuti, “Ana Mose ŵamlamwile chichi jemanja?” 4 Jemanjajo ŵatite, “Mose ŵakundile kuti jwamlume mpaka alembe chikalata chakumachisya ulombela ni kwaleka ŵamkwakwe.” 5 Nambo Yesu jwajanjile kuti, “Mose jwalembile lilamusi lyeleli kwa jemanja ligongo lya kumula kwa mitima jenu. 6 Nambope, kutandila pandanda, jwele juŵapanganyisye ŵandu, ‘Ŵampanganyisye jwamlume ni jwamkongwe. 7 Paligongo lyeleli jwamlume chachaleka babagwe ni mamagwe, 8 soni ŵaŵiliwo chachiŵa chilu chimpepe.’ Mwamti nganaŵasoni ŵaŵili nambo ali chilu chimpepe. 9 Myoyo, yayilumbikenye Mlungu pampepe, mundu jwine akayilekanganya.” 10 Paŵajinjilesoni m’nyumba, ŵakulijiganya ŵakwe ŵatandite kumwusya jwalakwejo ya nganiji. 11 Jwalakwe ŵajanjile jemanjajo kuti, “Jwamlume jwakwaleka ŵamkwakwe ni kulombela ŵane akutenda chikululu* soni ŵaleŵele ŵamkwakwewo, 12 soni naga jwamkongwe pamasisye ulombela ni ŵamkwakwe ni akulombedwa ni ŵane, nombenajo atesilesoni chikululu.”*

13 Kaneko ŵandu ŵatandite kwika kwa jwalakwe ni tuŵanache kuti atusajiche makono, nambo ŵakulijiganyawo ŵakalipile ŵanduwo. 14 Yesu paŵayiweni yeleyi, ŵatumbile, ni ŵasalile ŵakulijiganya ŵakwewo kuti, “Atuleche tuŵanacheto tuyiche kwa une soni akatulekasya, pakuŵa Uchimwene wa Mlungu uli wa ŵandu ŵamti mpela tuŵanachetu. 15 Nditu ngumsalichisya jemanja kuti, jwalijose jwangapochela Uchimwene wa Mlungu mpela kamwanache, ngasajinjila kose mu Uchimwenewo.” 16 Kaneko jwalakwe ŵatunyakwile tuŵanacheto ni kutanda kutupa upile mwakutusajika makono gakwe.

17 Sambano paŵaliji mkwawula, mundu jwine jwamwutuchile Yesu ni kutindiŵala pameso pakwe, kaneko jwamwusisye kuti, “Mwalimu jwambone, ana ngusosekwa kutenda chichi kuti ngapate umi wangamala?” 18 Yesu ŵamjanjile kuti, “Ligongo chichi mkusala kuti ndili jwambone? Pangali jwinesoni jwambone, nambo Mlungupe basi. 19 Mmwejo mkumanyilila kala malamusi gakuti, ‘Mkawulaga mundu, mkatenda chikululu,* mkajiŵa, mkapeleka umboni waunami, mkatenda yachinyengo, soni mwachimbichisyeje baba ni mama ŵenu.’” 20 Mundujo jwajanjile kuti, “Mwalimu, mbele ndili mkukuya yosopeyi kutandila ndili mwanache.” 21 Yesu ŵamlolite mundujo ni ŵamnonyele, kaneko ŵamsalile kuti, “Chindu chimo chikusoŵape mwa mmwejo. Mjawule mkasumisye yindu yosope yimkwete, ni mbiyasyo mkape ŵakulaga, mwamti chimchikola chipanje kwinani. Kaneko myiche, mŵe jwakulijiganya jwangu.” 22 Nambo mundujo paŵapikene yeleyi, yampweteche mumtima soni ŵatyosile ali mkudandawula mnope ligongo ŵakwete chipanje chejinji.

23 Pelepo Yesu ŵalolite aku nakuku, kaneko ŵasalile ŵakulijiganya ŵakwe kuti, “Yichiŵatu yakusawusya kwa ŵandu ŵakusichila kuti akajinjile mu Uchimwene wa Mlungu!” 24 Nambo ŵakulijiganyawo ŵasimonjile ni maloŵe gelega. Pelepo Yesu ŵasalile jemanjajo kuti, “Ŵanache ŵangu, kwinjilatu mu Uchimwene wa Mlungu kuli kwakusawusya. 25 Yili yangasawusya kuti ngamila jijinjile pebowo lya singano kulekangana ni kuti mundu jwakusichila akajinjile mu Uchimwene wa Mlungu.” 26 Pelepo ŵakulijiganyawo ŵasimonjilesoni mnope ni ŵamwusisye jwalakwejo kuti,* “Naga yili myoyo, ni ŵani ŵampaka akulupuche?” 27 Yesu ŵalolechesye jemanjajo, ni ŵasalile kuti, “Ni ŵandu, yeleyi yili yangakomboleka nambo nganiyiŵa myoyo ni Mlungu, ligongo yindu yosope yili yakomboleka ni Mlungu.” 28 Kaneko Petulo ŵamsalile jwalakwejo kuti, “Alole! M’we tulesile yindu yosope ni kwakuya wawojo.” 29 Yesu ŵajanjile kuti, “Nditu ngumsalichisya jemanja kuti, jwalijose jwalesile nyumba jakwe, achakulugwe, achapwakwe, achalumbugwe, mamagwe, babagwe, ŵanache ŵakwe kapena migunda ligongo lya lina lyangu soni ligongo lya ngani syambone, 30 chachipata yindu kuwilisya ka 100 mu ndaŵi ajino. Jwalakwe chachipata nyumba, achakulugwe, achapwakwe, achalumbugwe, mamagwe, ŵanache, soni migunda pampepe ni yakusawusya, soni mu ndaŵi* jajikwikajo, chachipata umi wangamala. 31 Nambo ŵajinji ŵali ŵandanda sambano jino chachiŵa ŵakumalisya, soni ŵali ŵakumalisya chachiŵa ŵandanda.”

32 Sambano Yesu ni ŵakulijiganya ŵakwe ŵawutandite ulendo wakwawula ku Yelusalemu. Nambo Yesu ŵaliji mkwenda mwachitemachitema pasogolo pa jemanjajo, mwamti ŵakulijiganyawo ŵasimonjile mnope, soni ŵane ŵaŵamkuyaga ŵakwete woga. Kaneko jwalakwe ŵajigalile pambali ŵakulijiganya ŵakwe 12 ŵala ni kutanda kwasalila yindu yayikamtendechele kweleko kuti, 33 “Sambano tukwawula ku Yelusalemu. Kweleko Mwanache jwa mundu chakapelechedwe mmyala mwa ŵakulolela ŵakutaga mbopesi soni alembi. Jemanjajo chakamlamule kuti akusosekwa kumwulaga soni chakampeleche kwa ŵandu ŵamitundu jine. 34 Jemanjaji chakamtendele yachipongwe, kumsunila mata, kumkwapula soni chakamwulaje, nambo pa lisiku lyatatu chachijimuka.”

35 Sambano Yakobo ni Yohane, ŵaŵaliji ŵanache ŵa Sebedayo, ŵayiche kwa Yesu ni ŵamsalile kuti, “Mwalimu, tukusaka kuti atutendele yiliyose yachitwaŵende.” 36 Jwalakwe ŵawusisye jemanjajo kuti, “Ana mkusaka kuti namtendele chichi jemanja?” 37 Jemanjajo ŵajanjile kuti, “Atukunde kuti tukatame jumo kumkono wawo wamlyo soni jwine kumkono wamchiji, mu uchimbichimbi wawo.” 38 Nambo Yesu ŵajanjile jemanjajo kuti, “Jemanja ngamkumanyilila yamkuŵenda. Ana mpaka mmwele nawo chikapu* changumwela une kapena kubatisidwa nawo mu ubatiso wangubatisidwa une?” 39 Jemanjajo ŵajanjile kuti, “Elo mpaka tukombole.” Pelepo Yesu ŵasalile jemanjajo kuti, “Chikapu changumwela une, jemanja chimchimwela, soni ubatiso wangubatisidwa une, jemanja chimchibatisidwasoni. 40 Nambope pakwamba ya kutama kumkono wangu wamlyo kapena wamchiji, une nganimba jwakupeleka upile welewo, nambo uchijawula kwa ŵandu ŵele ŵaŵalinganyichisye.”

41 Ŵakulijiganya 10 ŵane ŵala paŵapikene yaŵatesile Yakobo ni Yohane yila, ŵatumbilile. 42 Nambo Yesu ŵaŵilasile ŵakulijiganya wosopewo ni kwasalila kuti, “Jemanja mkumanyilila kuti ŵandu ŵakusawoneka kuti akwalamulila ŵandu ŵamitundu jine akusatenda umwenye pa ŵandu ŵawo, soni achakulungwakulungwa ŵawo akusalosya machili gawo pa jemanjajo. 43 Nambo ngayikusosekwa kuŵa myoyo pasikati penu. Jwalijose jwakusaka kuŵa jwamkulungwa pasikati penu akusosekwa kuŵa jwakutumichila jwenu, 44 soni jwalijose jwakusaka kuŵa jwandanda pasikati penu akusosekwa kuŵa kapolo jwa wosope. 45 Pakuŵa atamose Mwanache jwa mundu jwayiche, ngaŵa kuti ŵandu amtumichile nambo kukwatumichila jemanjajo soni kukupeleka umi wakwe kuti awombole ŵandu ŵajinji.”

46 Kaneko jemanjajo ŵayiche ku Yeliko. Nambo Yesu ni ŵakulijiganya ŵakwe pampepe ni gulu ja ŵandu paŵaliji mkukopoka mu Yeliko, Batimeyo (mwanache jwa Timeyo), juŵaliji jwangalola soni jwakuŵendaŵenda, jwatemi mumbali mwa msewu. 47 Jwalakwe paŵapikene kuti jwakupitajo ali Yesu jwa ku Nasaleti, jwatandite kugumila kuti, “Yesu, Mwanache jwa Daudi, andendele chanasa!” 48 Pelepo ŵandu ŵajinji ŵatandite kumkalipila ni kumsalilaga kuti ajile jii, nambo jwalakwe ni paŵalimbichile kugumila kuti, “Mwanache jwa Daudi, andendele chanasa!” 49 Myoyo Yesu ŵajimi ni kuŵecheta kuti, “Amsalile jwalakwejo ayiche akuno.” Pelepo ŵandu ŵamsalile mundu jwangalolajo kuti, “Mkatenda woga! Mjimuche, akumŵilanga.” 50 Jwalakwe jwaponyisye pasi mkanjo wakwe, kaneko jwajimwiche mwachitemachitema ni kwawula kuŵaliji Yesu. 51 Sambano Yesu ŵamwusisye jwalakwejo kuti, “Ana mkusaka namtendele chichi?” Mundu jwangalolajo jwajanjile kuti, “Mwalimu,* angamuchisye kuti ndandilesoni kulola.” 52 Yesu ŵamsalile jwalakwejo kuti, “Jawulagani. Chikulupi chenu chimposisye.”* Ndaŵi jijojo jwalakwe jwatandite kulola, mwamti jwatandite kumkuya Yesu.