Genesesi

32 Kaneko Yakobo ŵapitilisye ulendo wakwe. Ali mwitala, jwalakwe ŵasimene ni malayika ga Mlungu. 2 Paŵagambile kugawona malayikago, Yakobo ŵaŵechete kuti, “Jeleji jili gulu jangondo ja Mlungu.” Myoyo jwalakwe ŵagapele malogo lina lyakuti Mahanaimu.*

3 Myoyo Yakobo ŵatumisye ŵamitenga kuti alongole kwawula kwa Esawu mkulugwe juŵatamaga ku Seili ku dela ja Edomu. 4 Jwalakwe ŵalamwile jemanjajo kuti, “Pachimkasimane ni ambuje ŵangu Esawu mkasalileje kuti, ‘Kapolo jwawo Yakobo aŵechete kuti, “Une ndemi ni Labani kwandaŵi jelewu mpaka apano. 5 Pandaŵi jeleji mbatile ng’ombe, abulu, ngondolo soni ŵamasengo ŵachalume ni ŵachakongwe, soni utenga welewu nawutumisye kwa wawojo ambuje ŵangu ni chakulinga chakuti asalalile mtima.”’”

6 Pali papite ndaŵi, ŵamitenga ŵala ŵawujile kwa Yakobo ni kumsalila kuti, “Tusimene ni Esawu mkulugwawo mwamti apano ali mwitala, akwika kuti asimane ni wawojo soni ali yimpepe ni achalume ŵakwana 400.” 7 Yakobo paŵagambile kupikana yeleyi ŵatesile woga soni ŵalagasiche mnope nganisyo. Myoyo jwalakwe ŵagaŵile ŵandu ŵaŵaliji nawowo pampepe ni ngondolo, mbusi, ng’ombe soni ngamila, ni kuŵa magulu gaŵili. 8 Jwalakwe ŵaŵechete kuti, “Naga Esawu akwimuchila gulu jimpepe ni kuti gulu jinejo mpaka jikombole kutila.”

9 Panyuma pakwe Yakobo jwapopesile kuti, “Yehofa, Mlungu jwa anganga ŵangu Abulahamu soni Mlungu jwa baba ŵangu Isaki. Wawojo ni ŵaŵasalile une kuti, ‘Mwujile ku chilambo cha kumangwenu soni kwa achalongo achimjenu, soni une chinjitendekasya kuti yindu yimjendele chenene mmwejo.’ 10 Unetu nganimba jwakuŵajilwa kupochela chinonyelo chawo changamala soni kukulupichika kosope kwakusandosya une jwakutumichila jwawo. Panajombokaga lusulo lwa Yolodani nakwete simbope, nambo sambano ngwete magulu gaŵili. 11 Chonde, ngwaŵenda kuti angulupusye mmyala mwa mkulugwangu, Esawu, pakuŵa ngogopa kuti jwalakwejo mpaka ayiche ni kunjimuchila pampepe ni achakongweŵa soni ŵanacheŵa. 12 Nambotu wawojo aŵechete kuti, “Nditu une chinjitendekasya kuti mmwejo yindu yimjendele chenene, soni chinjatendekasya ŵanache ŵenu kutupa mpela mchenga wa mungulugulu nyasa, wawukusaŵa wangaŵalanjika.”

13 Palisiku lyelelyo, jwalakwe ŵagonile papopo. Kaneko jwalakwe ŵajigele yindu yakwe yine kuti akampe Esawu, mkulugwe jula, mpela mtuka. 14 Ŵajigele mbusi syekongwe syakwana 200, mbusi syelume syakwana 20, ngondolo syakwana 200, soni ngondolo sine syelume syakwana 20. 15 Ŵajigelesoni ngamila syakonjesya syakwana 30, ng’ombe syekongwe syakwana 40, ng’ombe syelume syakwana 10, abulu ŵachakongwe ŵakwana 20 soni abulu ŵachalume ŵakulungwakulungwa chenene ŵakwana 10.

16 Jwalakwe ŵayipeleche yosopeyi kwa ŵamasengo ŵakwe ŵala. Jwamasengo jwalijose ŵampele gulu jakwe ja yilango. Ni ŵasalile ŵamasengo ŵakwewo kuti, “Jemanja mlongoleleje soni mlolechesye kuti gulu jilijose jitalichilaneje ni jijakwe.” 17 Jwalakwe ŵamsalilesoni jwamasengo jwandanda juŵalongolele kuti, “Naga mkulugwangu Esawu akusimana ni mmwejo ni kumwusya kuti, ‘Ana mmwejo ambuje ŵenu ali ŵani soni mkwawula kwapi, nambi yilango yamjigeleyo yili ya ŵani?’ 18 Pelepo mmwejo mkajanje kuti, ‘Yeleyi yikutyochela kwa Yakobo jwali kapolo jwawo, soni yili mtuka wakwawula kwa ambuje ŵangu, Esawu, sonitu Yakobojo akwika munyuma mwetumu.’” 19 Ŵamsalilesoni jwamasengo jwakwe jwaŵili, jwatatu soni wosope ŵaŵayikaga ni yilango panyuma pawo kuti, “Jemanjasoni mkaŵecheteje maloŵe gelega pachimkasimaneje ni Esawu. 20 Mkaŵechetejesoni kuti, ‘Kapolo jwawo Yakobo akwikasoni munyuma mwetumu.’” Pakuŵa Yakobo ŵaŵechetaga mumtima mwakwe kuti, ‘Mwine jwalakwe mpaka asangalale naga ngulongola kumtumichisya yinduyi, kuti kaneko pachitukawonegane meso ni meso, mwine chakambochele chenene.’ 21 Myoyo mitukajo jalongwele, nambo jwalakwe ŵagonile pamalo palapala lisiku lyelelyo.

22 Kaneko jwalakwe ŵajimwiche chilo chichocho ni kwajigala achiŵamkwakwe ŵaŵili ŵala, ŵamasengo ŵakwe ŵachakongwe ŵaŵili, soni ŵanache ŵakwe ŵachalume ŵakwana 11, ni ŵajombweche lusulo lwa Yaboki. 23 Myoyo jwalakwe ŵajigele wosopewo ni komboka nawo lusulolo. Ŵajombwechesoni ni yosope yaŵakwete.

24 Kaneko Yakobo ŵasigele jika. Ni mundu jwine ŵatandite kulimbana najo chilo chosope mpaka kumasikusiku. 25 Mundu jula paŵayiweni kuti ngakupunda pakulimbanako, ŵamkamwile Yakobo pachiga chakwe pakulumbikanila mawupa ga lukongolo ni chiwuno, mwamti Yakobo ŵatiningwiche pakulumbikanila mawupapo paŵalimbanaga ni mundujo. 26 Panyuma pakwe mundu jula ŵatite, “Mundeche njawuleje, pakuŵa sambano kusaku kukucha.” Pelepo Yakobo ŵatite, “Ngangunda kuti mmwejo mjawuleje mpaka mli mumbele upile.” 27 Myoyo mundu jula ŵamwusisye jwalakwe kuti, “Ana lina lyenu ŵani?” Ni jwalakwe ŵajanjile kuti, “Ndili Yakobo.” 28 Kaneko mundu jula ŵatite, “Lina lyenu ngaliŵasoni Yakobo, nambo Isalayeli.* Pakuŵa mmwejo mlimbene ni Mlungu soni ŵandu, mwamti pambesi pakwe mpundile.” 29 Nombenajo Yakobo ŵamŵendile mundu jula kuti, “Chonde musalile lina lyenu.” Nambo mundu jula ŵatite, “Ligongo chichi mkuwusya lina lyangu?” Pelepo jwalakwe ŵampele upile Yakobo. 30 Myoyo Yakobo ŵagapele malogo lina lyakuti Penieli,* pakuŵa jwatite, “Yisyene nditu une nam’weni Mlungu meso ni meso, nambo nganimbwa.”

31 Jwalakwe paŵagambile kutyoka pa Penueli* pala, lyuŵa ni palyakopokaga. Pandaŵiji jwalakwe ŵaliji mkwenda mwakutundajila ligongo lya kutininguka kula. 32 Ali ni ligongo lyakwe ŵanache ŵa Isalayeli ŵangalyaga nyama ja pakulumbikanila mawupa ga lukongolo ni chiwunu. Yili myoyo ligongo lyakuti malo gelega ni gele mundu jula ŵamkamwile Yakobo mpaka kumtiningula.