Ngani Syambone Syaŵalembile Luka

7 Yesu paŵamalisisye kuŵecheta yindu yeleyi kwa ŵanduwo, ŵajinjile mu msinda wa Kapelenawo. 2 Kweleko kwapali jwamkulungwa jwa asilikali jwine juŵakwete kapolo juŵamnonyelaga mnope. Sambano kapolojo jwalwaliche mwamti jwasigele panandi kuwa. 3 Msilikalijo paŵapikene yakwamba Yesu, ŵatumisye achakulungwa ŵane ŵa Ayuda kwa jwalakwejo kuti akamŵende kuti ayiche kukumposya* kapolo jwakwejo. 4 Jemanjajo paŵayiche kwa Yesu ŵatandite kumŵenda mwakumchondelela kuti, “Jwalakwejo ali jwakuŵajilwa kuti amkamuchisye, 5 ligongo akusawunonyela mtundu wetu soni jwatutaŵile sunagoge.” 6 Myoyo Yesu ŵalongene ni jemanjajo. Nambo ali asigele panandi kwika panyumba, jwamkulungwa jwa asilikalijo ŵaliji ali ŵatumisye kala achimjakwe kuti akamsalile Yesu kuti, “Ambuje, akalaga, une nganimba mundu jwakuŵajilwa kuti wawo ayiche kunyumba jangu. 7 Ni ligongo lyakwe nganinaliwona kuŵa jwakuŵajilwa kwika kwa wawojo. Nambo agambe kuŵecheta maloŵe, ni jwakutumichila jwangu chalame. 8 Pakuŵa unesoni ndili mundu jwaulamusi, soni ngwete asilikali ŵangusinalolela. Panamsalile jwine kuti, ‘Mjawule ako!’ akusajawulaga, soni panamsalile jwine kuti, ‘Myiche!’ akusayikaga, nambosoni panamsalile kapolo jwangu kuti, ‘Mtende ayi!’ akusatendaga.” 9 Yesu paŵapikene yeleyi, jwasimonjile mnope ni ŵagalawuchile kwa ŵandu ŵaŵamkuyagawo ni kwasalila kuti, “Kusala yisyene, mwa ŵandu wosope mu Yisalayeli nganinamsimaneje mundu jwachikulupi chekulungwa mpela chelechi.” 10 Sambano ŵandu ŵaŵatumidwe ŵala paŵawujile kunyumba, ŵamsimene kapolo jula ali alamile.

11 Pambesi pakwe, jwalakwe ŵapite ku msinda wakolanjidwa kuti Naini. Ŵakulijiganya ŵakwe soni ŵandu ŵane ŵajinji ŵaliji mkumkuya. 12 Paŵaliji mkuŵandichila mlango wa msindawo, ŵasimene ni ŵandu ali anyakwile mundu jwam’we. Mundujo jwaliji mwanache jwamlume jumopejo jwa jwamkongwe jwine jwamasije. Nambosoni gulu jekulungwa ja ŵandu jakutyochela mumsindawo jalijisoni pelepo pampepe ni jwamkongwejo. 13 Sambano Ambujewo paŵam’weni jwamkongwejo, chakamwile mnope chanasa, ni ŵamsalile kuti, “Mleche kulila.” 14 Kaneko jwalakwe ŵaŵandichile machila* ni kugakwaya, mwamti ŵaŵanyakwilewo ŵajimi. Pelepo jwalakwe ŵaŵechete kuti, “Mnyamatammwe, ngumsalila mmwejo kuti, mjimuche!” 15 Myoyo mundu jwam’wejo ŵajimwiche ni kutanda kuŵecheta, kaneko Yesu ŵampeleche kwa mamagwe. 16 Pelepo ŵandu wosopewo wakamwile woga, soni ŵatandite kumkwesya Mlungu mwakuŵecheta kuti, “Jwakulochesya jwamkulungwa awonechele pasikati petu,” soni kuti, “Mlungu ŵakumbuchile ŵandu ŵakwe.” 17 Ngani jakwamba yaŵatesile Yesuyi japikaniche palipose mu Yudeya mosope soni m’yilambo yosope yakusyungulila.

18 Sambano ŵakulijiganya ŵa Yohane ŵapite kukumsalila Yohane yindu yosopeyi. 19 Myoyo Yohane ŵaŵilasile ŵakulijiganya ŵakwe ŵaŵili ni kwatuma kuti akawusye Ambujewo kuti, “Ana wawojo ali Mundu jutwamjembecheyaga jula, kapena tujembecheyeje jwine?” 20 Ŵanduwo paŵayiche kwa Yesu, ŵatite, “Yohane M’batisi atutumile kwa wawojo kuti twawusye kuti, ‘Ana wawojo ali Mundu jutwamjembecheyaga jula, kapena tujembecheyeje jwine?’” 21 Pandaŵi jijojo Yesu ŵaposisye* ŵandu ŵajinji yilwele yekulungwa soni yamwana, ŵakopwesye misimu jakusakala, nambosoni ŵakamuchisye ŵangalola ŵajinji kuti atande kulola. 22 Kaneko jwalakwe ŵajanjile jemanjajo kuti, “Mjawule mkamsalile Yohane yindu yamyiweni soni kuyipikana. Ŵangalola akulola, ŵalemale akwenda, ŵamatana akwaswejesya soni ŵangapikana akupikana. Ŵawe akwajimusya soni ŵakulaga akwajiganya ngani syambone. 23 Jwana upile mundu jwele ngakupata chakuŵasya mwa une.”

24 Sambano ŵakulijiganya ŵa Yohane ŵala paŵanyakwiche, Yesu ŵatandite kwasalila ŵandu yakwamba Yohane kuti, “Ana jemanja mwapite ku chipululu kukulola chichi? Ana mwapite kukulola mundu jwali mpela litete lyakutenganyika ni mbungo? 25 Sambano ni mwapite kukulola chichi? Kapena mwapite kukulola mundu jwakuwala yakuwala yapenani?* Nambotu ŵandu ŵakusawala yakuwala yapenani soni ŵangasoŵa chilichose akusatama m’nyumba sya mamwenye. 26 Sambano ni mwapite kukulola chichi kusyesyene? Jwakulochesya kapena? Elo yisyene, soni jwakupunda jwakulochesya. 27 Pakwamba ya jwalakwejo, malemba gatite, ‘Mlole! Une ngumtumisya jwamtenga jwangu pasogolo penu, soni jwalakwejo chachilinganya chenene litala lyenu!’ 28 Ngumsalichisya jemanja kuti, pa ŵandu wosope ŵakupagwa mwa achakongwe, pangali jwine jwakupunda Yohane. Nambo mundu jwamnandi mu Uchimwene wa Mlungu ali jwamkulungwa kupunda jwalakwejo.” 29 (Ŵandu wosope soni ŵakomesya msongo paŵapikene yeleyi, ŵasimichisye kuti Mlungu ali jwakulungama, pakuŵa jemanjajo ŵabatisidwe ni ubatiso wa Yohane. 30 Nambo Afalisi soni ŵane ŵakumanyilila Chilamusi nganapikanila yaŵasalile Mlungu, pakuŵa jemanjajo nganabatisidwa ni Yohanejo.)

31 Yesu ŵapitilisye kuŵecheta kuti, “Ana ŵandu ŵa m’bado* awu mpaka nalandanye ni ŵani, soni ana ali mpela ŵani? 32 Ali mpela ŵanache ŵatemi pamsika ni kwasalilaga achimjawo kuti, ‘Twamjimbile yitolilo nambo nganimŵina. Twalisile mnope nambo jemanja nganimlila pampepe ni m’weji.’ 33 Myoyosoni, Yohane ŵayiche, nganalyaga mkate* soni kumwa finyo, nambo jemanja mwaŵechetaga kuti, ‘Akwete chiŵanda.’ 34 Mwanache jwa mundu jwayiche ni kulyaga soni kumwa, nambo jemanja mkuŵecheta kuti, ‘Amlole! Mundu jwakutunduka soni jwakunonyela kumwa finyo, nambosoni mjakwe jwa ŵakomesya msongo soni ŵakulemwa.’ 35 Nambope, lunda lukusamanyika kuti luli lwakulungama ligongo lya masengo gakwe.”*

36 Sambano Mfalisi jwine ŵaliji mkumŵenda Yesu kuti akalye najo yimpepe. Myoyo jwalakwe ŵapite kukwinjila m’nyumba ja Mfalisijo ni kutama pasi kuti alye. 37 Sambano jwamkongwe jwine juŵaliji jwakumanyika mumsindawo kuti akusatenda yakulemwa, ŵapikene yakuti jwalakwejo akulya m’nyumba ja Mfalisi jwine. Pelepo jwalakwe ŵapite kweleko ali ajigele libotolo* lya mawuta gakununjila mnope. 38 Kaneko ŵatindiŵele chiŵandika sajo sya Yesu ni kutanda kulila, mpaka ŵatandite kunyoŵesya sajo sya Yesu ni misosi. Jwamkongwejo jwaliji mkupukuta misosijo ni wumbo syakwe syamumtwe. Nambosoni jwalakwe ŵagundisyaga ngomo syakwe pa sajo sya Yesu soni ŵasitasile mawuta gakununjila mnope. 39 Mfalisi juŵamŵilasile Yesu jula paŵayiweni yeleyi jwatandite kuŵecheta mumtima mwakwe kuti, “Yikaŵe kuti mundu aju ali jwakulochesya jusyesyene, akammanyilile jwamkongwe jwakumkamulaju soni kuti akusatenda yamtuli. Akammanyilile kuti akusatenda yakulemwa.” 40 Nambo Yesu ŵamjanjile jwalakwejo kuti, “Simoni, ngusaka namsalile yineyakwe.” Jwalakwejo jwatite, “Mwalimu, aŵechete!”

41 “Achalume ŵaŵili ŵajigele ngongole kwa mundu jwine jwakongosya mbiya. Jwine ŵakongwele mbiya syakwana madinali 500, jwinejo 50. 42 Jemanjaji paŵalepele kuwusya ngongole syawo, mundu jula ŵakululuchile. Sambano paŵaŵiliŵa, ana ŵani ŵampaka amnonyele mnope mundu jula?” 43 Simoni ŵajanjile kuti, “Nguganisya kuti mpaka aŵe juŵamkululuchile ngongole jejinji jula.” Yesu ŵamsalile jwalakwejo kuti, “Mjanjile chenene.” 44 Pelepo jwalakwe ŵagalawiche ni kumlola jwamkongwejo kaneko ŵamsalile Simoni kuti, “Ana mum’weni jwamkongweju? Chijinjilile m’nyumba mwenu muno, mmwe nganimumba mesi gakojesya sajo syangu. Nambo jwamkongweju ajojesye sajo syangu ni misosi jakwe ni kujipukutaga ni wumbo syakwe. 45 Mmwejo nganimumbochela mwachinyonyelo,* nambo jwamkongweju, kutandila pandaŵi jinjinjile amuno, nganaleka kukamula sajo syangu mwachinonyelo.* 46 Mmwejo nganimundaga mawuta pamtwe pangu, nambo jwamkongweju atasile sajo syangu mawuta gakununjila mnope. 47 Paligongo lya yeleyi, ngumsalila kuti, atamose yakulemwa ya jwalakweju yili yejinji* mnope, nambo yikululuchidwe, ligongo alosisye chinonyelo chekulungwa mnope. Nambo mundu jwakululuchidwe yamnono, akusalosya chinonyelo chapanandi.” 48 Kaneko ŵamsalile jwamkongwejo kuti, “Yakulemwa yenu yikululuchidwe.” 49 Ŵandu ŵaŵaliji mkulya nawo yimpepe ŵatandite kuŵechetana kuti, “Ana mundu jweleju ali jwamtunduchi, mpaka akusakombola kululuchila yakulemwa?” 50 Nambo Yesu ŵamsalile jwamkongwejo kuti, “Chikulupi chenu chimkulupwisye, jawulagani mumtendele.”