Chikalata Chakwawula kwa Ahebeli

6 Myoyo, pakuŵa sambano tutyosile pa yijiganyo yandanda yakwamba Klistu, kwende tutende yiliyose yakomboleka kuti tuŵe ŵachikulile. Tukawujilasoni ku yindu yatwalijiganyisye pandanda, yayili, kugalawuka mtima ku ndamo syangali mate, kukulupilila Mlungu, 2 chijiganyo chakwamba ubatiso, kusajika makono, kwimuka kwa ŵandu ku chiwa soni kulamula kwangamala. 3 Chitutendeje yiliyose yakomboleka kuti tuŵe ŵachikulile naga Mlungu akukunda.

4 Nambo pana ŵandu ŵane ŵele pandaŵi jine Mlungu ŵamulichile soni ŵapasisye mtuka walulele wakwinani nambosoni ŵapochele msimu weswela. 5 Ŵapasisyesoni maloŵe gambone ga Mlungu nambosoni machili gele Mlungu chachigalosya mu ndaŵi* jajikwikajo. 6 Nambo ŵandu ŵeleŵa apano ŵagwile, mwamti yili yangakombolekasoni kwajimusya kuti agalawuche mtima. Yeleyi yili myoyo ligongo jemanjaji akumkomelasoni pachitela Mwanache jwa Mlungu soni akutendekasya kuti ŵandu amnyosyeje jwalakwejo. 7 Pakuŵa litaka likusapochela upile kutyochela kwa Mlungu pajigwile wula mwakuwilisyawilisya. Litakalyo palimwele mesi likusakoposyaga mbeju syapandile ŵandu kuti syakamuchisyeje. 8 Nambo naga likukoposya yitela yamiŵa soni maluŵa gamiŵa, juŵalimile pelepo akusagamba kulileka litakalyo mwamti akusaŵa ali asigele panandi kulitembelela, soni pambesi pakwe akusalijocha moto.

9 Nambo atamose tukuŵecheta yeleyi, m’weji tuli ŵakusimichisya pakwamba ya jemanja achalongo achimjetu ŵapamtima kuti yindu yili chenene kwa jemanja soni kuti mkutenda yosope yakumkamuchisya kuti mkulupuche. 10 Pakuŵa Mlungu ali jwachilungamo, myoyo ngasaliŵalila masengo genu soni chinonyelo chimwalosisye pa lina lyakwe mwakwatumichila ŵaswelawo* soni apano mkupitilisya kwatumichila. 11 M’weji tukusachilila kuti jemanja wosope mpitilisye kulosya mtima wakulipeleka wamwakwete pandanda, ni chakulinga chakuti chembecheyo chenu chiŵe changakayikasya mpaka kumbesi. 12 Mtendeje yeleyi kuti mkaŵa ŵaulesi. Nambo mwasyasyeje ŵandu ŵele ligongo lya chikulupi soni kuwusimana mtima kwawo, Mlungu ŵapele yindu yaŵatite chachapa.

13 Mlungu ŵalumbilile pa lina lyakwe paŵamsalilaga Abulahamu kuti chachimpa upile. Ŵatesile yeleyi ligongo pangali jwine jwamkulungwa kupunda Mlungujo. 14 Ŵatite, “Nditu, une chinjimpa upile mmwejo soni ngumsimichisya kuti chinjimtenda kuŵa mtundu wekulungwa.” 15 Myoyo Abulahamu paŵalosisye kuti ali jwakuwusimana mtima, ŵapochele upile welewu. 16 Ŵandu akusalumbila pa lina lya mundu jwamkulungwa, mwamti kulumbila kwawo kukusamasya ngani jilijose jajili pasikati pawo ligongo kulumbilako kukusaŵa umboni wakusimichisya kuti yaŵechete yili yisyene. 17 Mwelemu ni muŵatendelesoni Mlungu paŵaganisisye yakulosya chenene chakulinga chakwe changachenga kwa ŵandu ŵakupochela upilewo. Jwalakwe ŵalumbile pakusaka kwasimichisya kuti chachapa upilewo. 18 Jwalakwe ŵatesile yeleyi ni chakulinga chakuti kupitila mu yindu yaŵechete soni mu kulumbila kwakwe, m’weji ŵatutilile kwa Mlungujo tukamule mwakulimba chembecheyo chetu ligongo atulimbikasisye mnope. Jwalakwejo nganaŵa alambwisye ligongo yalumbile soni yaŵechete yangachenga. 19 Chembecheyo chatukwetechi chili mpela nangula* jwa umi wetu jwakutukamuchisya kuti tuŵe ŵakulimbangana soni ŵangakayichila, mwamti chikusatujinjisya m’nyumba ja Mlungu mpaka kupelenganya nguwo jakulekanganya yipinda ya m’nyumbajo. 20 Kweleko ni kuŵajinjile Yesu m’weji mkanituŵe kwinjila kuti atuwugulile litala. Jwalakwejo aŵele jwamkulungwa jwa ŵakutaga mbopesi mpaka kalakala mwakulandana ni Melekisedeki.