Genesesi

18 Kaneko Yehofa jwawonechele kwa Abulahamu pasikati pa yitela yekulungwakulungwa ya ku Mamule. Jwalakwe jwaliji ali atemi pamlango wa tenti jakwe ndaŵi ja musi lyuŵa lili mkuŵala mnope. 2 Abulahamu paŵalolite, ŵaweni achalume ŵatatu ali ajimi pakutalichila panandi ni paŵaliji jwalakwe. Jwalakwe paŵaweni jemanjajo ŵanyakwiche pamlango paŵatemi pala ni kuwutuka kuti akasimane nawo. Kaneko jwalakwe jwatindiŵele mpaka ngope jakwe pasi. 3 Pelepo jwalakwe ni jwaŵechete kuti, “Yehofa, naga mpaka asalalile mtima ngwaŵenda kuti akagamba kumpita jwakutumichila jwawo. 4 Chonde ajembecheye tukajigale mesi kuti tujojesye sajo syawo soni kuti kaneko apumule pasi pa chitelachi. 5 Pakuŵa ayiche kwa jwakutumichila jwawo, ajembecheye nalinganyile yakulya kuti apate machili. Kaneko mpaka apitilisye ulendo wawo.” Pelepo jemanjajo ŵajanjile kuti, “Pangali chakusawusya. Basi mtende mwamŵechetelemo.”

6 Myoyo Abulahamu ŵawutuchile mutenti muŵaliji Sala ni kumsalila kuti, “Mtende chitema. Mjigale milingo* jakwana jitatu ja utandi wambone. Mwuwunye chenene utandiwo ni mlinganye mikate.”* 7 Kaneko Abulahamu ŵawutuchile kuyaliji yilango, ni ŵasagwile ng’ombe jelume jamwana jambone mnope. Ni ŵajipeleche kwa jwamasengo jwakwe jwele ŵajilinganyisye mwachitema. 8 Pelepo Abulahamu ŵajigele mawuta soni mkaka ni ng’ombe jamwana jaŵajilinganyisye jila ni kwapa achalumewo. Achalumeŵa paŵalyaga ali pasi pa chitela pala, Abulahamu ŵajimi chiŵandika ni jemanjaji.

9 Achalumewo ni ŵamwusisye Abulahamu kuti, “Ana ŵamkwenu Sala ali kwapi?” Jwalakwe jwajanjile kuti, “Ali mutentimu.” 10 Myoyo jumo mwa achalumewo jwapitilisye kuŵecheta kuti, “Chinjiyika nditu kwa mmwejo chaka chamalaŵi ndaŵi mpela jinojino, mwamti ŵamkwenu Sala chachiŵa ali akwete mwanache jwamlume.” Pandaŵiji Sala jwapikanaga ali cha pamlango wa tenti jajaliji chakunyuma kwa jwamlumejo. 11 Abulahamu soni Sala ŵaliji ŵachekulupe mwamti ŵakwete yaka yejinji. Pandaŵiji Sala ŵaliji ali apundile msingu wakuŵelechela mwanache. 12 Myoyo Sala jwatandite kuseka mumtima mwakwe soni kuŵecheta kuti, “Une mwamalilemu soni mwachekulupile ambuje ŵanguŵa, ana yisyene yakusangalasya mpela yeleyi mpaka yindendechele une?” 13 Kaneko Yehofa ŵamwusisye Abulahamu kuti, “Ligongo chichi Sala akuseka ni kuŵechetaga kuti, ‘Ana yisyene une mpaka ngole mwanache mwanjekulupilemu?’ 14 Ana pana chilichose chele Yehofa mpaka alepele kuchitenda? Chinjiyika kwa mmwejo chaka chamalaŵi ndaŵi mpela jinojino, mwamti Sala chachiŵa ali akwete mwanache jwamlume.” 15 Nambo Sala ŵakanile ni ŵatite, “Unetu nganiseka.” Jwalakwe ŵakanile ligongo ŵatendaga woga. Pelepo jwalakwe ŵatite, “Mkakana, msechile mmwejo.”

16 Kaneko achalumewo paŵanyakwiche ni kwinjililaga cha ku Sodomu, Abulahamu ŵapechesye jemanjajo. 17 Pelepo Yehofa jwaŵechete kuti, “Ana une mpaka namsisile Abulahamu yindu yangusaka kutenda? 18 Abulahamu chachiŵa mtundu wekulungwa soni wamachili mwamti mitundu josope ja pachilambo chapasi jichipochela upile kupitila mwa jwalakwe. 19 Pakuŵa ngummanyilila chenene jwalakwe, soni ngukulupilila kuti chachalamula ŵanache ŵakwe soni ŵandu ŵa m’nyumba jakwe kuti akuyeje matala ga Yehofa mwakutenda yindu yayili yambone soni yachilungamo. Chachitenda yeleyi ni chakulinga chakuti Yehofa atende yosope yaŵasasile yakwamba Abulahamu.”

20 Kaneko Yehofa jwatite, “Mbikene kudandawula kwa ŵandu pakwamba ya msinda wa Sodomu ni Gomola. Ulemwa wa misinda jeleji uli wekulungwa mnope. 21 Chinjawule kukoko kuti ngalole naga kudandawula kumbikeneko kuli kusyene kapena iyayi.”

22 Kaneko achalumewo ŵatyosile ni kwawulaga ku Sodomu, nambo Yehofa ŵasigele papopo ni Abulahamu. 23 Pelepo Abulahamu ŵamŵandichile ni kutanda kumwusya kuti, “Ana yisyene kuti wawojo mpaka ajonanje ŵandu ŵakulungama pampepe ni ŵakusakala? 24 Tujile kuti mumsindamo musimanikwe ŵandu ŵakwana 50 ŵali ŵakulungama. Ana wawojo chiŵajonanje jemanjajo? Ana ngasawukululuchila msindawo ligongo lya ŵandu ŵakulungama ŵakwana 50 ŵali mwelemo? 25 Wawojo nganaŵa atesile yeleyo. Nganaŵa awuleje mundu jwakulungama pampepe ni jwakusakala. Nganaŵa akundile kuti mundu jwakulungama soni jwakusakala asimane ni yakulandana. Wawojo nganaŵa atesile yeleyo ata panandi. Ana jwakuwelusya jwa chilambo chosope chapasi ngasatenda yakulungama?” 26 Pelepo Yehofa ŵajanjile kuti, “Naga ngwasimana ŵandu 50 ŵakulungama mumsinda wa Sodomu, ngasinjonanga msinda wosopewo ligongo lya jemanjajo.” 27 Nambo Abulahamu ŵaŵechetesoni kuti, “Chonde Yehofa, akambona mpela kuti ndili jwangali woga, pakuŵa une ndili luwundu soni liwu. 28 Tujile kuti pa ŵandu 50 ŵakulungama ŵala papelembelepo ŵandu msano. Ana chachiwujonangape msinda wosopewo ligongo lyakuti papelembelepo ŵandu msano?” Pelepo jwalakwe ŵajanjile kuti, “Ngasinjonanga msindawo naga ngwasimana ŵandu ŵakwana 45 ŵakulungama.”

29 Nambo Abulahamu ŵapitilisyepe kuwusya kuti, “Nambi wuli ali asimanikwe ŵandu 40 ŵakulungama?” Jwalakwe ŵajanjile kuti, “Ngasinjonanga msindawo ligongo lya ŵandu 40 ŵelewo.” 30 Nambo Abulahamu ŵapitilisye kuwusya kuti, “Yehofa, chonde, akandumbilila, nambo angunde kuti mbechetepe. Nambi wuli ali asimanikwe ŵandu 30 ŵakulungama?” Pelepo jwalakwe ŵajanjile kuti, “Ngasinjonanga msindawo naga ngwasimana ŵandu ŵakwana 30.” 31 Nambo jwalakwe ŵapitilisyesoni kuŵecheta kuti, “Yehofa, chonde, angunde mbechetesoni soni akambona mpela kuti ndili jwangali woga. Nambi wuli mumsindamo muli musimanikwe ŵandu 20 ŵakulungama?” Pelepo jwalakwe ni ŵajanjile kuti, “Ngasinjonanga msindawo ligongo lya ŵandu 20 ŵelewo.” 32 Pambesi pakwe Abulahamu ŵaŵechete kuti, “Yehofa, chonde, nguŵenda kuti akandumbilila. Angunde kuti mbechete kakumalisya. Nambi wuli mumsindamo muli musimanikwe ŵandu 10 ŵakulungama?” Jwalakwe ni ŵajanjile kuti, “Ngasinjonanga msindawo ligongo lya ŵandu 10 ŵelewo.” 33 Yehofa paŵamalisisye kuŵechetana ni Abulahamu ŵatyosile ni kwawulaga. Nombenajo Abulahamu jwawujile kumangwakwe.