MUNDU JWAMACILI MNOPE

ANA akumanyilia lina lya mundu jwamacili mnope kupunda ŵandu wosope ŵaŵatemi pacilambo capasi? Ali jwakwelusya lina lyakwe Samusoni. Yehofa ni juŵampele macili. Samusoni mkanapagwe, Yehofa akwasalila mamagwe kuti: ‘Pacangakaŵa cimkole mwanace jwamlume. Jwalakwe cacalongola Ayisalayeli pakwakulupusya kwa Afilisiti.’

Afilisiti ali ŵandu ŵakusakala ŵakutama m’cilambo ca Kanani. Jemanjaji akwete acalume ŵajinji ŵakuputa ngondo, soni akwalagasya Ayisalayeli. Pandaŵi jine, Samusoni ali mkwawula kwakusatama Afilisiti, akusimana ni lisimba lyekulungwa lili mkutongola liciyikaga kuŵaliji jwalakwe. Nambo Samusoni akuliwulaga lisimbalyo ni makono basi. Jwalakwe akuwulagasoni mahandiledi gamajinji ga Afilisiti ŵakusakala.

Kaneko Samusoni akutanda kumnonyela jwamkongwe lina lyakwe Delila. Acimlongola ŵa Afilisiti akumsimicisya Delila kuti cacimpa mbiya sya silifa syakwana 1,100 naga akwasalila cacikusamtendekasya Samusoni kuŵa jwamacili mnope. Delila akusisaka mbiyasyo. Jwalakwe ngakumnonyela Samusoni yisyesyene, soni jwanganonyela yisyesyene ŵandu ŵa Mlungu. Sambano jwalakwe ŵajendelecele ndaŵi ni katema kum’ŵenda Samusoni kuti amsalile cacikusamtendekasya kuŵa jwamacili mnope.

Pambesi pakwe, Delila akumtendekasya Samusoni kusala mtemela wa macili gakwe. Samusoni akuti: ‘Cipagwile umbo syangusi nganasenjeje. Citandilile paŵasagwile Mlungu kuti mbe jwakutumicila jwapajika jwakolanjikwa Mnasili. Naga akusenga umbo syangusi, macili gangu gosope mpaka gamale.’

Sambano Delila paŵagambile kupikana yeleyi, ŵamgonesye Samusoni pa ngongolo syakwe. Kaneko ŵam’ŵilasile mundu kuti asenje umbo syakwe. Samusoni paŵajimukaga nganakolasoni macili gala. Kaneko Afilisiti ŵayice ni kumkamula. Ŵamkolotwele meso gakwe gosope, soni ŵaŵele kapolo jwawo.

Lisiku line Afilisiti ŵaliji pacindimba cekulungwa caŵalambilaga mlungu jwawo Dagoni, ni ŵam’ŵilasisye Samusoni kutyocela m’nyumba ja ukayidi kuti amtende cipongwe. Pandaŵiji umbo sya Samusoni syaliji sili sikusilesoni. Samusoni ŵakasalile kamcanda kakamlongolelaga mwakumkamula pamkono kuti: ‘Mungunde ngamule njalamila sya nyumbaji.’ Kaneko Samusoni ŵapopesile kwa Yehofa kuti ampe macili, ni ŵakamwilenjalamila sila. Jwalakwe ŵagumisile kuti: ‘Angunde kuti mbwe yimpepe ni Afilisiti.’ Pacindimba pala papali ŵandu ŵakwana 3,000. Sambano Samusoni akututa njalamila sya nyumba jila ni jikugwa nikuwulaga ŵandu wosope ŵakusakala ŵala.