Ŵandumetume Akulalicila Mwangali Woga

GALI gapite masiku likumi cijawulile Yesu kwinani, ŵakulijiganya ŵakwe ŵakwana 120 ŵasongene m’nyumba ku Yelusalemu pandaŵi ja Cindimba ca Ciyuda ca Pentekote, 33 C.E. Mwakusisimucisya, m’nyumbamo mwapikanice lisegwe mpela lya mbungo jekulungwa. Ŵakulijiganyawo mwakusimonjesya ŵatandite kuŵeceta mu yiŵeceto yanganayimanyililagakala. Ana yakusimonjesyayi yagopolelaga cici? Yalosisye kuti Mlungu ŵapele ŵakulijiganyawo msimu weswela.

Kusa kwa nyumbajo kwaliji ŵandu ŵajinji, ŵaŵayice kutyocela m’yilambo yine kukusimanikwa nawo pa cindimbapo. Ŵanduwo ŵasimonjile mnope paŵapikanaga ŵakulijiganya ŵa Yesu ali mkuŵeceta yiŵeceto ya jemanjanji. Pakutagulila yayatendekweyi, Petulo ŵakumbwisye ŵandu maloŵe gakulocesya ga Yoweli gakuti Mlungu “cacikusulila” msimu wakwe wawucatendekasya ŵakuwupocelawo kutenda yindu yakusimonjesya. (Yoweli 2:28, 29) Kupocela msimu weswelaku kwalosisye kuti patendece kusinda kwakusosekwa mnope. Kwalosisye kuti Mlungu alesile kukamulana ni Ayisalayeli, ni kutanda kukamulana ni mpingo wa Ciklistu wawagambile kutanda kwene. Ŵandu ŵaŵasakaga kumtumicila Mlungu mwakuŵajilwa, sambano ŵasosekwe kuŵa ŵakumkuya Klistu.

Nambope kusisya kwakusile, mwakuti acimmagongo ŵaponyisye ŵakulijiganyawo mu ukaidi. Nambo cilo lilayika lya Yehofa lyawugwile matanga ga nyumba ja akaidi ni kwasalila ŵakulijiganyawo kuti ajawule akajendelecele kulalicila. Mwakamulana ni yaŵasalileyo, ŵakulijiganyaŵa kundaŵindaŵipe ŵajendelecele kulalicila. Ŵajinjile m’nyumba jakupopelela, ni kutanda kulalicila ngani syambone syakwamba ya Yesu. Acimmagongo ŵawo ŵaŵaliji acimlongola ŵa dini yanyaleye mnope, ni ŵalamwile kuti alece kulalicilako. Mwangali woga ŵakulijiganyawo ŵajanjile kuti: ‘Tukwenela kumpikanila Mlungu kupundana ni kumpikanila mundu.’—Masengo 5:28, 29.

Ngalwe syajendelecele mnope. Ayuda ŵane ŵamlambucisye jwakulijiganya lina lyakwe Sitefano kuti ŵanyosyaga Mlungu, ni ŵamponyisye maganga mpaka kuwa. Mcanda jwine lina lyakwe Saulo jwa ku Taliso ŵalolelaga ni kukamulanaga nako kuwulagaku. Kaneko ŵapite ku Damasiko kuti akakamule wosope ŵaŵaliji ŵakumkuya Klistu. Saulo mwitala paŵaliji mkwawula, lilanguka lyakutyocela kwinani lyamsyungulile, soni ŵapikene maloŵe gakuti: “Saulo, Saulo, mkusawucisya cici une?” Ali alesile kulola ligongo lya lilanguka, Saulo ŵawusisye kuti, ‘Ana ŵalakwe ŵani?’ Maloŵego ni gaŵecete kuti, “Une ndili Yesu.”—Masengo 9:3-5.

Gali gapite masiku gatatu, Yesu ŵamtumisye jwakulijiganya lina lyakwe Ananiya kuti akamkamucisye Saulo kuti atandesoni kulola. Saulo ŵabatiswe ni kutanda kulalicila pakwamba ya Yesu mwangali woga. Saulo kaneko ŵatandite kumanyika ni lina lyakuti ndumetume Paulo, soni ŵaŵele jwakulimbicila mnope mu mpingo wa Ciklistu.

Ŵakulijiganya ŵa Yesu ŵaliji mkulalicila ngani syambone syakwamba ya Ucimwene wa Mlungu kwa Ayuda ni Asamaliyape basi. Sambano lilayika lyawonecele kwa Koneliyo, juŵaliji jwamkulungwa jwa asilikali ŵa Ciloma, jwakogopa Mlungu, ni ŵamsalile kuti atumisye utenga akam’ŵilanje Petulo. Ali ni acimjakwe, Petulo ŵalalicile kwa Koneliyo ni liŵasa lyakwe. Petulo paŵaliji mkuŵeceta, msimu weswela wajinjile mwa ŵandu ŵakulupilila ŵangosyo sineŵa, ni ndumetume Petulo ŵalamwile kuti jemanjaji abatiswe mu lina lya Yesu. Pelepa sambano litala lya ku umi wangamala lyawugucile ŵandu ŵa mitundu josope. Mpingowu waliji wakoseka kulalicila ngani syambone kulikose.

​—Nganiji jityocele pa Masengo 1:1–11:21.