Ŵasangalesye Babagwe, soni Yehofa

Ana mkum’wona msikana jwali pacipikicapa?— Ali mwanace jwa Yefita. Baibulo jangasala lina lya msikanaju, nambo tukumanyilila kuti jwasangalesye babagwe, soni Yehofa. Kwende tulijiganye yejinji yakwamba jwalakweju, soni ya babagwe, Yefita.

Yefita ŵaliji mundu jwambone. Ŵamalile ndaŵi jejinji ali mkujiganya mwanagwejo pakwamba ya Yehofa. Ŵaliji mundu jwamacili, soni mlongola jwambone. M’yoyo Ayisalayeli ŵam’ŵendile jwalakwe kuti ŵalongoleleje pakuputa ngondo ni acimmagongo ŵawo.

Yefita ŵapopesile kwa Mlungu kuti amkamucisye kupunda ngondo. Yefita ŵamsalile Yehofa kuti naga capunde pangondojo cacimpa Yehofa mundu jwandanda kopoka m’nyumba jakwe, jwalakwe pacaciwujila kutyocela ku ngondo. Mundujo cacitama, soni kamula masengo pa nyumba ja Mlungu kwa umi wakwe wosope. Pandaŵi jelejo kunyumba ja Mlungu kwaliji kumalo kwele ŵandu ŵajawulaga kukulambila Mlungu. Sambano Yefita ŵapundile ngondo jila! Ana mkumanyilila juŵatandite kopoka m’nyumba jakwe jwalakwe paŵawujile kunyumba?—

Jwaliji mwanagwe jwamkongwe jula, juŵaliji mwanace jikape jwa Yefita! Nambope Yefita ŵasosekwe kumpeleka mwanacejo. Yeleyi yamtengwisye mnope. Nambotu ŵaliji ali atesile kala cilanga. Ndaŵi jijojo mwanacejo ŵasalile babagwe kuti: ‘Baba, wawojo ŵatesile cilanga ni Yehofa, ni akusosekwa kucikwanilisya.’

Nombenajo mwanaceju yeleyi yamtengwisye. Kunyumba ja Mlungu kula jwalakwe ngamkanalombegwa, soni kola ŵanace. Nambo jwalakwe ŵasacile kwanilisya cilanga ca babagwe, soni kumsangalasya Yehofa. Yeleyi yaliji yakusosekwa mnope kupunda kulombegwa, soni kola ŵanace. Jwalakwe ŵatyosile ku nyumba ja babagwe ni kuja kutama kunyumba ja Mlungu kula kwa umi wakwe wosope.

Ana mkuganisya kuti yaŵatesileyi yasangalesye babagwe, soni Yehofa?— Elo, yasangalesye! Naga mli jwakupikanila, soni mkusanonyela Yehofa, cimciŵa mpela mwanace jwa Yefita. Nombemmwe cimcatendekasya acinangolo ŵenu, soni Yehofa kuŵa ŵakusengwa.