Sukulu ja Undumetume wa Mlungu ja 2015 Cijitukamucisye Kongolela Kajiganye Ketu

¹ Jwamalumbo Daudi ŵalembile kuti: “Maloŵe ga mkamwa mwangu, soni yaganisya ya mumtima mwangu, yasangalasye, wawo Yehofa, Lwala lwangu ni Mkulupusyo jwangu.” (Sal. 19:14) M’wejisoni tukusaka kuti maloŵe getu gamsangalasyeje Yehofa ligongo tukusayamicila upile watukwete wakuŵeceta usyesyene mumpingo soni mu undumetume. Litala limo lyakukamulicisya masengo Yehofa pakutujiganya mwampaka tutendele undumetume lili Sukulu ja Undumetume wa Mlungu. Sukuluji jikusatendekwa cijuma cilicose m’mipingo jakupunda 111,000 pacilambo cosope. Sukuluji jiŵele jili mkukamucisya abale ni alongo pacilambo cosope kuŵa ŵandumetume ŵakwenela kulalicila ngani syambone, kwiganya cenene, mwalunda, soni mwakulimba mtima.—Mase. 19:8; Akolo. 4:6.

² Ndandanda ja sukulu ja 2015 cijikolesoni ngani syakutyocela m’kabuku kakuti “Kabuku Kothandiza Kuphunzira Mawu a Mulungu.” Konjecesya pelepa ndaŵi ja songa syekulungwa sya m’Baibulo soni ngani Na. 1 jicenjile. Ndime syakuyicisyasi sikusala yakucenga kweleku soni yine yakusosekwa kuya pakuŵeceta ngani sya mu sukuluji.

³ Songa Syekulungwa sya m’Baibulo: Abale ŵakupegwa mbali jeleji cakoleje maminisi gaŵili gakusala songa jimo jajiweni kuŵa jakamucisya kutyocela m’Malemba ga cijuma celeco. Kuti apakombole kupata songa jakamucisya, soni kuti akalya ndaŵi akusosekwa kosecela cenene. Kaneko, abale ni alongo capeleceje songa syawo kwa maminisi 6, nambo jwalijose casosekweje kupeleka songa jakwe kwa masekandi 30 kapena ngakwana. Kuti mundu apate songa jakulimbikasya ni kujisala kwa masekandi 30 pakusosekwa kosecela cenene soni kola mtima wakwaganicisya ŵane, kutenda yeleyi kuli mbali jakulijiganya kwetu. Yeleyi yikusapelekasoni upile wakuti ŵane apelece songa syawo syalijiganyisye paŵawungunyaga.

⁴ Ngani Na. 1: Jwakutenda mbali jeleji caŵalanjeje ndime syamnono sya m’Baibulo kwa maminisi gatatu kapena ngakwana. Jwakuŵalangajo akusosekwa kosecela cenene pakuŵalanga mwakwesya maloŵe, soni kulola naga akukolanga maloŵe mwakuŵajilwa ni cakulinga cakuti akacenga songa sya mbali jakuŵalangajo. Ŵandu ŵa Yehofa wosope akusosekwa kulinjilila kuŵalangaga cenene, ligongo kuŵalanga kuli kwakusosekwa mnope pakulambila kwetu. Yili yakusangalasya mnope kuti ŵanace ŵajinji akusaŵalanga cenene. Tukwayamicila acinangolo ligongo lya mtawu wawo pakwakamucisya ŵanace ŵawo kuŵalanga cenene.

⁵ Ngani Na. 2: Nganiji caŵeceteje alongo kwa maminisi 5. Akusosekwa kamulicisya masengo mtwe waŵapele. Naga nganijo jikutyocela m’kabuku kakuti Kabuku Kothandiza Kuphunzira Mawu a Mulungu, akusosekwa kujitenda mpela ali mu undumetume wa mumgunda mwakamulana ni mwakusatendela ŵandu kumangwawoko. Komboleka kamulicisya masengo malemba gane gagakukamulana ni mtwe wa nganijo. Jwakulolela sukulu ni jucacipata mlongo jwakamucisya.

⁶ Ngani Na. 3: Nganiji mpaka aŵecete m’bale kapena mlongo nambo kwa maminisi 5. Naga akujiŵeceta mlongo, akusosekwa kutenda mpela mwatusasile mu Ngani Na. 2. Nambo naga caŵecete m’bale akusosekwa kujiŵeceta mpela ngani. Jwakuŵeceta nganijo akusosekwa kugombelecesya mtwe wa nganijo, kusagula malemba gakuŵajilwa nganijo, soni kusala yakulijiganya ŵandu panganijo.

⁷ Litala Lyasambano Lyakuŵecetela Ngani Na. 3 ja Abale: Naga nganijo jikutyocela m’kabuku kakuti Kabuku Kothandiza Kuphunzira Baibulo, akusosekwa kujitenda mpela cilosyo cakulosya kulambila kwa peŵasa kapena mpela ali mu undumetume wa mumgunda. Jwakulolela sukulu cacisagula jwakamucisya soni litala lyakaŵecetane. Jwakamucisyajo akusosekwa kuŵa jumo jwa mu liŵasa lya m’bale jwacaŵecete nganijo kapena m’bale jwa mumpingowo. Pakuŵeceta nganijo mpaka akamulicisye masengo malemba gane gagakukamulana ni mtwe wa nganijo. Ndaŵi ni katema nganiji komboleka kujipelekasoni kwa jwamkulungwa jwa mumpingo. Naga ajipelece kwa jwamkulungwa jwa mumpingo, jwamkulungwajo mpaka asagule jika jwakumkamucisya soni litala lyakaŵecetane. Mwangakayicila yiciŵa yakulimbikasya kum’wona jwamkulungwa jwa mumpingo ali mkulosya lunda lwakwiganya yalumo ni ŵamwiŵasa mwakwe kapena m’bale jwine.

⁸ Kupeleka Camuko: Jwakulolela sukulu cam’yamicileje jwaŵecete ngani nambosoni kumsalila yine yakulimbikasya kwa maminisi gaŵili panyuma pa ngani jakwe mwakamulana ni buku ja Pindulani ndi Sukulu ya Utumiki wa Mulungu. Jwakulolela sukulu pakum’ŵilanga jwakuŵeceta ngani jwalijose, ngaja kusala mbali jakujitendela masengo jwakulijiganyajo. Panyuma pa ngani jilijose, jwakulolela sukulu cam’yamicileje jwaŵecete nganijo ni kusala mbali jele jwakulijiganyajo akutendelapo masengo, kusala ligongo lyakwe jwaŵecete nganijo atesile cenene pambali jelejo, kapena kusala mwacinonyelo ligongo lyakwe jwakulijiganyajo akasosekwe kutagulila cenene songa jine jakwe.

⁹ Yakusosekwa kutendela masengo jwakulijiganya yikusasimanikwa pa mapeji 79 mpaka 81 m’buku ja Pindulani ndi Sukulu ya Utumiki wa Mulungu. Jwakulijiganyajo pamalisisye kuŵeceta ngani jakwe, jwakulolela sukulu calembeje yatesile m’buku ja jwakulijiganya, soni cam’wusye pakasyepela naga ŵatesile yakusosekwa kutenda ŵakulijiganya yakamulana ni mbali jaŵampele. Misongano jili jimasile kapena pa ndaŵi jine jwakulolela sukulu mpaka am’yamicile jwakulijiganya kapena kumsalila yine yampaka yimkamucisye. Maloŵe gakamucisya gosope gakusapocela jwakulijiganya jwalijose pa sukulu jeleji akusosekwa kugawona kuŵa gakumkamucisya kwawula paujo mwausimu.—1 Tim. 4:15.

¹⁰ Naga jwakulijiganyajo atandite kulya ndaŵi pakuŵeceta ngani jakwe, jwakulolela sukulu kapena jwakumkamucisya akusosekwa kummanyisya mwa lunda, pakumjimbila kabelu kapena kugomba kanekakwe. Jwakulijiganyajo papikene yeleyo akusosekwa kumalisya kaje maloŵe gakuŵecetago kaneko atyoce pa pulatifomu.—Alole buku ja Pindulani ndi Sukulu ya Utumiki wa Mulungu, peji 282, ndime 4.

¹¹ Tukwalimbikasya wosope ŵakuŵajilwa kwinjila nawo mu Sukulu ja Undumetume wa Mlungu kuti alembesye mena gawo. (Alole buku ja Pindulani ndi Sukulu ya Utumiki wa Mulungu, peji 282, ndime 6.) Majiganyo gakusapocela ŵandu mu sukuluji gakusakamucisya ŵandu ŵa Yehofa kulalicila soni kwiganya ngani syambone sya Ucimwene mwakamula mtima, mwaucimbicimbi soni mwacinonyelo. Mwangakayicila Yehofa akusasangalala ni ŵandu ŵele sukulu ja undumetumeji jikwakamucisya kumlumba jwalakwejo!—Sal. 148:12, 13; Yes. 50:4.