Yiwusyo Yakutyochela Kwa Ŵakuŵalanga

Baibulo jangasala ligongo lyakwe. Nambo jikusagamba kulondesya yindu yine yele komboleka ni yayatendekasisye kuti akawujila ku Nasaleti.

Lilayika lya Yehofa lyamsalile Maliya kuti chachikola msigo mwamti chachiŵeleka mwanache. Lilayikali palyapelekaga utengawu Maliya ni Yosefe ŵaliji ali mkutama mu msinda wa Nasaleti ku Galileya kukwaliji kumangwawo Yosefe. (Luk. 1:26-31; 2:4) Kaneko, jemanjaji ali awusile kutyochela kuti Iguputo, ŵawujile ku Nasaleti. Yesu jwakulile kweleku mwamti jwaŵele Mnasaleti. (Mat. 2:19-23) Yeleyi ni yayikusatutendekasya kuganichisya ya msinda wa Nasaleti patukuŵecheta ya Yesu, Yosefe soni Maliya.

Maliya jwakwete jwachinasi lina lyakwe Elisabeti juŵatamaga ku Yuda. Elisabetiju jwalombedwe ni jwakutaga mbopesi Sekaliya, mwamti jwaliji mamagwe Yohane M’batisi. (Luk. 1:5, 9, 13, 36) Pandaŵi jine Maliya jwapite ku Yuda kukumlola Elisabeti, mwamti jwatemi kweleko miyesi jitatu. Kaneko jwawujile ku Nasaleti. (Luk. 1:39, 40, 56) Yeleyi yamkamuchisye Maliya kujimanyilila chenene dela ja Yuda.

Pandaŵi jine, Yosefe jwapikanile lilamusi lyakusala ya ‘kulembesya.’ Yeleyi yatendekasisye kuti Yosefe atyoche ku Nasaleti ni kwawula ku Betelehemu, wawaliji “msinda wa Daudi.” Betelehemu galijisoni malo gaŵalochesye kuti chachipagwilako Mesiya. (Luk. 2:3, 4; 1 Sam. 17:15; 20:6; Mik. 5:2) Panyuma pakuti Yesu apagwile ku Betelehemu, Yosefe nganalinganya yakuwujila ni likandilyo ku Nasaleti ulendo wawaliji welewu mnope. Jemanjaji ŵapitilisye kutama ku Betelehemuku lutando lulwaliji chiŵandika makilomita 9 kutyochela ku Yelusalemu. Yeleyi yakamuchisye jemanjaji kuti akomboleje kumjigalila mwanachejo ku nyumba ja Mlungu kuja kupeleka mbopesi.—Lef. 12:2, 6-8; Luk. 2:22-24.

Chakundanda kwene, lilayika lya Mlungu lyaliji lili limsalile Maliya kuti mwanache jwakwe chachipochela “mpando wa umwenye wa Daudi” mwamti “chachilamulila mpela Mwenye.” Komboleka kuti Yosefe ni Maliya ŵayiweni kuti yatesile chenene kuti Yesu apagwile ku msinda wa Daudi. (Luk. 1:32, 33; 2:11, 17) Kombolekasoni kuti jemanjaji ŵayiweni kuti lwaliji lunda kutamape kukoko ni kwembecheyaga yachiŵasalile Mlungu kuti atende.

Ngatukumanyilila ya ulewu wa ndaŵi jiŵatemi jemanjaji ku Betelehemu mpaka paŵayiche ŵakulupilila ndondwa. Pandaŵiji liŵasali lyaliji mkutama mnyumba jine jakwe, soni pandaŵijo “mwanachejo” nganaŵa likandi. (Mat. 2:11) Yikuwoneka kuti mmalo mwakuwujila ku Nasaleti jemanjaji ŵatemipe ku Betelehemu kuti akusyoŵelele.

Kaneko Helodi jwalamwile kuti, “ŵanache wosope ŵachalume mu Betelehemu. . . kutandila ŵa yaka yiŵili kwawula pasi” awulajidwe. (Mat. 2:16) Lilayika lya Mlungu lili lyakalamwisye ya nganiji, Yosefe ni Maliya ŵamjigele Yesu ni kutilila ku Iguputo mwamti ŵatemi kweleko mpaka pajwawile Helodijo. Kaneko, Yosefe ŵalijigele liŵasa lyakwe ni kuwujilasoni ku Nasaleti. Ligongo chichi jemanjaji nganawujila ku Betelehemu? Jemanjaji ŵatesile yeleyi pakusaka kupikanila yaŵakalamwisye Mlungu, soni ŵapikene kuti pandaŵijo mwanache jwa Helodi lina lyakwe Alikelawo ni juŵalamulilaga ku Yudeya mmalo mwa babagwe, soni jwalakweju jwaliji jwangasa mnope. Ku Nasaleti ni kukwaliji kwambone mnope kuti Yosefe amkamuchisye Yesu kuti amtumichileje Mlungu.—Mat. 2:19-22; 13:55; Luk. 2:39, 52.

Nambotu Yosefe jwawile Yesu mkanaŵe kuwugula litala lyakwawula kwinani. Yeleyi yikulosya kuti jwalakwe chachijimuka ku chiwa ni kutamaga pachilambopa. Mwamti ŵandu ŵajinji chachikola upile ŵakusimana najo soni kumwusya yejinji kupwatikapo ligongo lyakwe jwalakwe ni Maliya ŵasagwile kupitilisya kutama ku Betelehemu Yesu ali apagwile.