Kutyosya Citumbo

YAKUSAŴECETA ŴANDU ŴANE

Acakongwe ŵakusatyosya yitumbo akusatenda yeleyi pamagongo gejinji mpela kusoŵa kwa mbiya, yakusawusya ya mu ulombela kapena uganja, kusacilila kuti apitilisye sukulu, kapena kuti alijiganye masengo, soni kuyiwona kuti ngaŵa mkukombola kulela jika mwanace. Nambope, ŵane akusayiwona kuti Mlungu ngaŵa mkusangalala ni kutyosya citumbo. Akusayiwonasoni kuti kutenda yeleyi kukusalosya kuti jwamkongwejo ngakuyamicila ukumu waŵampele Mlungu wakuŵeleka mwanace.

YAJIKUSASALA BAIBULO

Mlungu akusawuwona umi wa mundu kuŵa wapajika. (Genesis 9:6; Salimo 36:9) Yeleyi yikusapwatikasoni umi wa mwanace jwanganapagwe jwali m’citumbo ca mamagwe, malo gambone gele Mlungu ŵagalinganyisye kuti mwanace atameje mpaka pandaŵi jakupagwa. Jwakulemba Baibulo jwine jwatite, “Wawo ŵambanganyisye m’citumbo mwa mama ŵangu.” Jwaŵecetesoni kuti, “Meso gawo gambweni ndili m’citumbo, yiŵalo yangu yosope yalembedwe m’buku jawo, ŵalembilesoni masiku giyapanganyikwe.”—Salimo 139:13, 16.

Nganisyo sya Mlungu syakwamba mwakusawuwonela umi wa mwanace jwanganapagwe syawonecele cenene m’Cilamusi caŵapele Ayisalayeli, soni sikusawonecela cenene kupitila mu cikumbumtima cetu. Cilamusi ca Mlungu casalaga kuti naga mundu amputile jwamkongwe jwakwete citumbo ni kum’wulaga mwanace jwali m’citumbojo, jwasosekwaga kulipila umi wakwe mwa kuwulajidwa ligongo lya umi wawutyosisyewo. (Eksodo 21:22, 23) Nambope ŵakulamula ŵasosekwaga kujiganicisya ngani josope cenene mkanapelece cilango.—Numeri 35:22-24, 31.

Mwacipagwa, ŵandu akusakola cikumbumtima. Naga jwamkongwe akucipikanila ni ngatyosya citumbo, cikumbumtima cakwe cangamjimba magambo.a Nambo naga atyosisye citumbo cikumbumtima cakwe cikusamjimba magambo. (Aloma 2:14, 15) Ŵakuwungunya ŵapatile yakuti acakongwe ŵakusatyosya yitumbo mpaka atande kulwala ulwele wakulagasika nganisyo mwangasawusya.

Nambi wuli naga citumboco ciyice mwangosi, ni tukuyiwona kuti yiciŵa yakusawusya kulela mwanacejo? Ngakusosekwape kutyosya citumboco. Mlungu akusasala yakulimbikasya kwa ŵandu ŵakusaŵa ŵakulupicika kwa jwalakwe. Akusati, ‘Kwa mundu jwakulupicika cacimtendela mwakulupicika. Kwa mundu jwangali cakulemwa cacimtendela mwacilungamo.’ (Salimo 18:25) Tukusaŵalangasoni kuti, “Pakuŵa Yehofa akusanonyela cilungamo, jwalakwe ngasiŵaleka ŵandu ŵakwe ŵakulupicika.”—Salimo 37:28.

“Cikumbumtima cawo cikusiŵatendele umboni pampepe ni jemanjajo, soni nganisyo syawo sikusiŵasisya kapena kwajiticisya.”—Aloma 2:15.

YAKUSAŴECETA ŴANDU ŴANE

Ruth,b jwakulela jika ŵanace jwatite, “Nakwete kala ŵanace ŵatatu ŵacinondipile, ni panakwete citumbo ca mwanace jwamcece, nayiwonaga kuti ngaŵa mkukombola kumsamalila. M’yoyo natyosisye citumboco. Nambo panatesile yeleyi nalipekene kuti ndesile cakulemweceka cekulungwa.” Ana jwamkongweju jwalemwisye mnope mwakuti Mlungu ngaŵa mkumkululucila?

YAJIKUSASALA BAIBULO

Yesu jwalosisye kuti jwayiwonaga yindu mpela mwakusayiwonela Mlungu pajwatite, “Une nganiyika kukwaŵilanga ŵandu ŵakulungama, nambo ŵandu ŵakulemwa kuti apitikuce mitima.” (Luka 5:32) Mundu palitendele canasa ligongo lya cakulemwa cakwe ni kupitikuka yisyesyene, soni kum’ŵenda Mlungu kuti amkululucile, akusamkululucila ni mtima wosope atamose yakulemwa yekulungwa. (Yesaya 1:18) Lilemba lya Salimo 51:17 likusati, “Wawo Mlungu, ngasawucembulusya mtima wekasice ni wacanasa.”

Mundu jwapitikwice mtima, Mlungu mpaka amkamucisye kola cikumbumtima cambone, soni kumpa mtendele wamumtima papopesile kwa jwalakwe. Lilemba lya Afilipi 4:6, 7 likusati, “Kupitila mu lipopelo soni kuyamicila yalumo ni kucondelela, yakuŵenda yawo yimanyice kwa Mlungu. Pakutenda m’yoyo, mtendele wa Mlungu wawukusapunda kuganisya mwakusokoka kulikose, ucicenjela mitima jawo soni nganisyo syawo.”c Ruth, jwamkongwe jwatumkolasile kundanda jula, paŵalijiganyisye Baibulo soni paŵapopesile kwa Mlungu ni kumsalila yosope ya mumtima mwakwe, ŵakwete mtendele wamumtima. Jwalakwe jwalijiganyisye kuti Mlungu ‘akusakululuka yisyesyene.’—Salimo 130:4.

‘Mlungu nganatutendela yindu mwakamulana ni yakulemwa yetu, kapena kutupa cilango mwakamulana ni yakulemwa yetu.’—Salimo 103:10.