Ana Mpaka Amjiganye Wuli Mwanace Jwawo?

Yehofa paŵalinganyisye liŵasa, ŵaŵisile acinangolo kuti ŵaloleleje ŵanace ŵawo. (Akolose 3:20) Jemanja acinangolo, uli ukumu wenu kwajiganya ŵanace ŵenu kuti amnonyeleje Yehofa, kuti pacacikulapo cakombole kukwanilisya ukumu wawo mpela nangolo. (2 Timoteo 1:5; 3:15) Akusosekwasoni kumanyilila yayili mumtima mwa mwanace jwawo. Nambo pa yosopeyi, cisyasyo cawo cambone ni cacili cakusosekwa mnope. Mpaka amjiganye cenene mwanace jwawo Maloŵe ga Yehofa naga wawojo akulongolela kugaŵika maloŵego pamtima pawo.​—Salimo 40:8.

YAJIKUSASALA BAIBULO: “Jwalijose akwenela kuŵa jwacitema kupikana, jwakokoŵa kuŵeceta.” (Yakobo 1:19) Ŵanace ŵawo akusosekwa kulipikana kuti mpaka aŵecetane ni jemanja mwagopoka. Akusosekwa kumanyilila kuti jemanja ali ŵakoseka kwapikanila pakuŵeceta nawo. Atendeje yindu yampaka yakamucisye ŵanacewo kulipikana kuti nganiyiŵa yakusawusya kuŵecetana ni jemanja. (Yakobo 3:18) Ŵanace ŵawo mpaka alece kugopoka ni jemanja naga akulipikana kuti paciŵasalile yine yakwe ciŵakalipile. Aŵeje ŵakutulala mtima ni ŵanace ŵawo, soni ndaŵi syosope ŵasimicisyeje kuti akusiŵanonyela mnope.​—Matayo 3:17; 1 Akolinto 8:1.

YAMPAKA ATENDE:

• Aŵeje ŵakoseka kwapikanila ŵanace ŵawo pakusaka kuŵeceta nawo

• Aŵecetaneje ni ŵanace ŵawo ndaŵi syosope, ngaŵape pasimene ni yipwetesi

YAJIKUSASALA BAIBULO: “Mundu jwakulosya umanyilisi pa cine cakwe yindu yicimjendela cenene.” (Miyambo 16:20) Ndaŵi sine kuti amanyilile cenene mwakupikanila ŵanace ŵawo, akusosekwa kuwungunya ligongo lyaŵecetele yine yakwe. Yili yakuwanda kwa ŵanace kusala yindu mwakuyikandapasya kapena kwamba kusala yine yakwe nambo ali mkugopolela yine. “Mundu jwakwamba kwanjila ya ngani jine jakwe mkanapikane yisyesyene yakwe, ali jwakuloŵela.” (Miyambo 18:13) Akajanguyaga kutumbila.​—Miyambo 19:11.

YAMPAKA ATENDE:

• Mwanace jwawo pakuŵeceta cilicose, alolecesyeje kuti ngakumkata maloŵe kapena kumkalipila

• Alinjeje kumbucila mwaŵapikanilaga wawojo, soni yaŵayiwonaga kuŵa yakusosekwa mnope paŵaliji msingu mpela wa mwanagwawojo

YAJIKUSASALA BAIBULO: “Mwanangu, mpikanileje camuko ca baba ŵenu, soni mkasimkana lilamusi lya mama ŵenu.” (Miyambo 1:8) Yehofa apelece ukumu wakwiganya ŵanace m’miyala mwa baba ni mama. Ŵajiganyeje ŵanace ŵawo kuti ŵacimbicisyeje, soni kuti ŵapikanileje. (Aefeso 6:1-3) Ŵanace mpaka amanyilile naga acinangolo ŵawo nganaŵa “ŵakamulana ni ŵa mtima umpepe.” (1 Akolinto 1:10) Naga akulekangana nganisyo pa yine yakwe, akasalosya yeleyo pameso pa ŵanace ŵawo ligongo mpaka alece kwacimbicisya.

YAMPAKA ATENDE:

• Aŵecetane ni kamulana yampaka atende pakwajamuka ŵanace ŵawo

• Naga wawojo ni ŵamkwawo akulekangana nganisyo pakwamba ya kwiganya ŵanace, alinje kupikanicisya mwakuyiwonela yindu ŵamkwawo

YAJIKUSASALA BAIBULO: ‘Amjiganye mwanace mu litala lyakum’ŵajila.’ (Miyambo 22:6) Litala lyambone lyakwajiganyila ŵanace ŵawo nganiliŵa lipatikene mwangosi. Akusosekwa kulinganya litalalyo, yayikupwatikapo kwajamuka ŵanace ŵawo. (Salimo 127:4; Miyambo 29:17) Kwajamuka ŵanace ngakukusagopolela kwapa cilangope, nambo kukusapwatikapo kŵakamucisya ŵanacewo kumanyilila ligongo lyakwe aŵisile malamusi ganegakwe. (Miyambo 28:7) Konjecesya pelepa, ŵajiganyeje ŵanace ŵawo kuganonyela Maloŵe ga Yehofa, soni kugapikanicisya. (Salimo 1:2) Yeleyi yicakamucisya kola cikumbumtima cambone.​—Ahebeli 5:14.

YAMPAKA ATENDE:

• Alolecesye kuti ŵanace ŵawo akusam’wona Mlungu kuŵa jusyesyene jwampaka amkulupilileje

• Ŵajiganye ŵanace ŵawo kumanyilila yindu yampaka yijonanje ndamo syawo, soni yakusosekwa kuyiŵambala, mpela yindu yakusimanikwa pa Intaneti. Ŵajiganyeje yampaka atende pakwaŵambala ŵandu ŵakamulila