Ŵakutumichila Ŵakamuchisya Akusakamula Masengo Gakusosekwa Mnope

PAŴAWULEMBELAGA mpingo wa ku Filipi, ndumetume Paulo ŵasasile kuti, “Chikalatachi chikutyochela kwa une Paulo ni Timoteyo, ŵatuli ŵakutumichila ŵa Yesu Klistu. Tukulembela chikalatachi kwa ŵandu wosope ŵa mumsinda wa Filipi ŵali mu umpepe ni Klistu Yesu nambosoni kwa amchilongola sikati ja achakulungwa ŵa mpingo ni ŵakwakamuchisya.” (Afi. 1:1) Alole kuti jwalakwe mu chikalata chakwe ŵapelesoni moni ŵakutumichila ŵakamuchisya. Achalumeŵa ŵakamulaga masengo gakusosekwa pakwakamuchisya achakulungwa ŵa mumpingo. Yeleyi yili yakulandana ni masiku getu gano. Ŵakutumichila ŵakamuchisya akusakamula masengo gakusosekwa gagakusakamuchisya achakulungwa ŵa mumpingo, soni kuti mpingo ujendeje chenene.

² Ana akusiŵamanyilila ŵakutumichila ŵakamuchisya ŵali mumpingo mwawo? Ana akusagamanyilila masengo gakusatenda gagakusigakamuchisya wawojo, soni mpingo wosope? Yehofa akusayamichila mnope masengo gakusakamula achalumeŵa. Paulo ŵalembile kuti, “Ŵandu ŵakukamula chenene masengo gakutumichila, akusalijigalila achimsyene mbili jambone, nambosoni akusalimba mtima kusyesyene pakuŵecheta ya chikulupi chakwete mwa Klistu Yesu.”—1 Tim. 3:13.

³ Ŵakutumichila ŵakamuchisya akusasosekwa kuŵa ni umi wambone wa Chiklistu soni kuŵa ŵakulupichika yampaka yakamuchisye kuti asamalileje maudindo gawo mwakuŵajilwa. Yeleyi yikusawoneka chenene patukuganichisya yaŵalembile Paulo m’chikalata chakwe chakwawula kwa Timoteyo kuti, “Ŵakutumichila mumpingo akwenela kuŵa ŵele ŵakuchimbichisidwa ni ŵakulupichika; akaŵaga ŵakumwelesya mnope yakumwa ya ukali, kapena kuŵa ŵakutunduchila mbiya. Aŵe ŵandu ŵa mtima wangali chakuwusisya pakusunga yakuwona yisyesye ya chikulupi chiŵajuwulile Mlungu. Pandanda jemanjajo akwenela kulinjidwa, nipo kaneko, naga akusimanikwa kuti ŵangali ulemwa akwenela kutumichila. Jwakutumichila mumpingo aŵeje jwa jwamkongwe jumpepe. Aŵeje jwakulela ŵanache ŵakwe chenene, nambosoni jwakwendesya chenene liŵasa lyakwe.” (1 Tim. 3:8-10, 12) Kuya ndamo syapenanisi pakusagula ŵakutumichila ŵakamuchisya kukusateteya mpingo kwa ŵandu ŵakusanyosya pakwamba ya achalume ŵapegwile maudindo gapajika.

⁴ Atamose aŵe mnyamata kapena jwamkulungwa, jwakutumichila jwakamuchisya akusalalichila mwakulimbichila mwesi uliwose. Jemanjaji akusalipeleka pakulalichila pakuya chisyasyo cha Yesu. Pakutenda Yeleyi, akusalosya mtima wa Yehofa wakusaka kwakulupusya ŵandu.—Yes. 9:7.

⁵ Achalume ŵakusatumichila mpela ŵakutumichila ŵakamuchisya akusaŵasoni ŵachisyasyo chambone pa kawale kawo, kalisalalisye, kaŵechete, kaganisye, soni katende kawo ka yindu. Akusatenda yindu mwaganisya chenene, yayikusatendekasya kuti ŵane ŵachimbichisyeje. Konjechesya pelepa, Akusawuwona unasi wawo ni Yehofa, soni upile wawo wakutumichila mumpingo kuŵa wakusosekwa mnope.—Tito 2:2, 6-8.

⁶ Achalumeŵa akusaŵa kuti ‘alinjidwe’ kala. Atamose mkanapochele udindo wawo, akusaŵa ali alosisye kala kuti ali achalume ŵakulipeleka pakutumichila. Akusaŵa ali alosisye kuti akusaŵika yindu ya Uchimwene pamalo gandanda pa umi wawo, soni akusaŵa ŵakusachilila kupochela upile wa utumiki uliwose. Kusala yisyene akusaŵa yisyasyo yakuti ŵane mumpingo mpaka ajigalile.—1 Tim. 3:10.

⁷ Ŵakutumichila ŵakamuchisya akusakamula masengo gakulekanganalekangana gakwakamuchisya Aklistu achimjawo, yayikusakamuchisya kuti ŵakulolela amalileje ndaŵi jejinji pakusamalila maudindo gawo gakwiganya soni gakuchinga. Pakwapa masengo, achakulungwa wosope ŵa mumpingo akusalola yindu yampaka akwanisye jwalijose, soni yakusosekwa ya pa mpingowo.

⁸ Gane mwa masengo ga ŵakutumichila ŵakamuchisya gali aga: Kusamalila mabuku kuti tujigaleje mwangasawusya gakamulichisya masengo achimsyewe, soni ga mu utumiki, kusamalila mbiya sya mpingo, mafayilo ga madela gakulalichila, kupelechela mayikolofoni, kulolechesya kuti maloŵe gakupikanika chenene pa yida yakwechesya maloŵe. Ŵane akusaŵa ŵakupochela achalendo, soni ŵane akusiŵakamuchisya achakulungwa ŵa mumpingo pamasengo gane. Pakusaŵa masengo gamajinji pakusamalila Nyumba ja Uchimwene kuti jiwonecheje ja chasa. Myoyo ŵakutumichila ŵakamuchisya akusiŵaŵenda kuti asamalileje udindowu.

⁹ Mipingo jine, jwakutumichila jwakamuchisya mpaka akomboleche kumpa masengo gamo. Nambo mipingo jine mpaka yiŵe yakombolekasoni kuti jwakutumichila jwakamuchisya ampe mbali syakupunda jimo. Payakutendekwa yine, ŵakutumichila ŵakamuchisya ŵakupunda jumo mpaka asamalilejesoni mbali jimo. Naga pa mpingopo pana ŵakutumichila ŵakamuchisya ŵamnono ŵampaka asamalile gane mwa masengoga, achakulungwa wosope ŵa mumpingo mpaka asagule achalume ŵabatisidwe ŵane ŵali ŵachisyasyo chambone kuti atendeje gane mwa masengoga. Yeleyi mpaka yitendekasye kuti amanyilileje chenene yindu yakuti yichakamuchisya pachachisagulidwa kuŵa ŵakutumichila ŵakamuchisya ŵa mumpingo. Naga pangali achalume ŵakuŵajilwa, Mlongo jwachisyasyo chambone mpaka amsalile kuti atendeje mbali sine, atamose kuti jwalakwe ngaŵa mkusagulidwa kuŵa jwakutumichila jwakamuchisya. Mundu jwachisyasyo chambone akusaŵa jwakuti ŵane mpaka ajigalile ndamo soni kalambile kakwe. Yakusatenda jwalakwe mpela kusimanikwa pamisongano, kujigala nawo mbali pakulalichila, mwaliŵelele liŵasa lyakwe, yakusangalasya yakusasagula, kawale soni kalisalalisye kakwe, soni yindu yine, yikusaŵa yisyasyo yambone yakuti ŵane mpaka ayikuye.

¹⁰ Mipingo jajikwete achakulungwa ŵamnono, ŵakutumichila ŵakamuchisya ŵakusatenda chenene yindu mpaka ŵakamulichisye masengo pakuwusya yiwusyo ya ŵakusaka kubatisidwa yakwayana ni yijiganyo ya m’Baibulo. Yeleyi yikusimanikwa ku Yakonjechesya, Mbali 1, “Yikulupi ya Chiklistu.” Ligongo lyakuti Mbali 2: “Umi wa Chiklistu” jikusakwaya yakutendekwa yakusosekwa mnope ya pa umi wa mundu, jwamkulungwa jwa mumpingo ni jwakusosekwa kutenda mbaliji.

¹¹ Ndaŵi sine, naga pali pana magongo gakupikanika chenene, achakulungwa wosope ŵa mumpingo mpaka asagule kuchenga masengo gane ga jwakutumichila jwakamuchisya jwine ni kumpa jwine. Nambope, mpaka yiŵe yakusosekwa mnope kuti jwakutumichila jwakamuchisya asamalileje mbali jakwejo kwa ndaŵi jelewu kuti agamanyilile chenene masengo gakwego.

¹² Pakujigalila mwayiŵelele yindu mumpingo, masengo gane mpaka ŵape ŵakutumichila ŵakamuchisya ŵele ‘ŵandu wosope akukuwona’ kwawula kwawo pasogolo. (1 Tim. 4:15) Naga mumpingomo mwana achakulungwa ŵamnono, jwakutumichila jwakamuchisya mpaka aŵe jwakamuchisya jwakulolela kagulu ka utumiki, nambo naga pangali jwakulolela kagulu jwalakwe mpaka aŵe jwakutumichila kagulu. Jwalakweju akusakamula masengo mwakulongoleledwa ni achakulungwa ŵa mumpingo. Ŵakutumichila ŵakamuchisya mpakasoni aŵecheteje ngani sine mu Msongano wa Utumiki ni Umi Wetu wa Chiklistu, nambosoni mpaka atendesyeje Lijiganyo lya Baibulo lya Mpingo, soni kuŵecheta ngani sya wosope naga pana kusosechela kweleko. Maudindo gane mpaka gapelechedwe kwa ŵakutumichila ŵakamuchisya naga pana kusosekwa kweleko, soni naga akuŵajilwa. (1 Pet. 4:10) Pakwakamuchisya achakulungwa ŵa mumpingo, ŵakutumichila ŵakamuchisya akusasosekwa kuŵa ŵakulipeleka.

¹³ Atamose kuti masengo gawo gali gakulekangana ni gakusatenda achakulungwa ŵa mumpingo, nambo masengo gosope gakusaŵa mbali ja kutumichila Mlungu soni gakusatendekasya kuti yindu yijendeje chenene mumpingo. Mkupita kwa ndaŵi, naga ŵakutumichila ŵakamuchisya akutenda chenene maudindo gawo, soni akuŵajilwa kuŵa ŵakuchinga kapena ŵakwiganya, mpaka aŵe ŵakwenela kuŵa achakulungwa ŵa mumpingo.

¹⁴ Naga wawojo ali Mklistu jwachinyamata kapena agambile kubatisidwa kwene, ana akulinjilila kwanilisya yakusosechela kuti aŵe jwakutumichila jwakamuchisya? (1 Tim. 3:1) Ligongo lyakuti ŵandu ŵajinji akwinjila mu guluji chaka chilichose, pakusosechela achalume ŵausimu kuti asamalileje maudindo ga mumpingo. Mpaka akwanilisye yeleyi naga akukola mtima wakusachilila kwakamuchisya ŵane. Litala limo lyakutendela yeleyi lili kuganichisya chisyasyo chambone cha Yesu. (Mat. 20:28; Yoh. 4:6, 7; 13:4, 5) Kusachilila kwawo kuchikula pakuwuwona upile wawukusayika ligongo lya kwagaŵila ŵane. (Mase. 20:35) Myoyo, alipelecheje pakwakamuchisya ŵane, kulinganya Nyumba ja Uchimwene, kapena kutenda mbali ja sukulu mu Msongano wa Utumiki ni Umi Wetu wa Chiklistu naga msyene mbaliji nganayika. (Sal. 1:1, 2; Agal. 5:22, 23) Konjechesya pelepa, m’bale jwakulingalinga kuti aŵe jwakutumichila jwakamuchisya, akusosekwa kulosya kulupichika pampele masengo mumpingo.—1 Akoli. 4:2.

¹⁵ Ŵakutumichila ŵakamuchisya akusasagulidwa ni msimu weswela kuti akamuchisyeje mpingo. Ŵandu wosope mumpingo mpaka alosye kuyamichila kulimbichila kwakusalosya ŵakutumichila ŵakamuchisya mwakukamulana nawo pakukamula masengo gawo. Mwakutenda myoyo, wosope akusaŵa ali mkuyamichila yapeleche Yehofa kuti yindu mumpingo yijendeje mwakulondeka.—Agal. 6:10.