Yehofa Chachapa Machili

1-2. Ana ni yakusawusya yapi yakusasimana nayo abale ni alongo ŵajinji?

NDUMETUME Paulo ŵamlimbikasisye Timoteyo soni Aklistu wosope kuti atendeje yampaka akombole kuti akwanilisyeje utumiki wawo. (2 Tim. 4:5) M’wejisoni tukusalingalinga kuti tukuyeje malangiso gelega. Nambope pakusapagwa yakusawusya. Abale ni alongo ŵajinji akusasosekwa kulimba mtima kuti akamule masengo gakulalichila. (2 Tim. 4:2) Agambe ganichisya ya abale ni alongo ŵakusatama m’yilambo yele masengo getu gakulalichila ŵagalekasisye. Jemanjaji akusalalichilape atamose ali mkumanyilila kuti mpaka aŵichidwe mundende.

² Ŵakutumichila ŵa Mlungu akusasimana ni yakusawusya yejinji yayikusiyatendekasya kuŵa ŵakutenguka. Mwachisyasyo, akusakamula masengo kwa maawala gejinji kuti apate yakusosechela ya maŵasa gawo. Jemanjaji akusasachilila kutenda yejinji mu utumiki, nambo wiki pajikumala akusaŵa ali apesile. Ŵane akusalepela kutenda yejinji mu utumiki ligongo lya uchekulu kapena kulwalalwala. Ŵanesoni yikusaŵa yakusawusya kutyoka panyumba, pele ŵanesoni akusalagaga ni nganisyo syakuliwona kuŵa ŵangasosekwa. Mlongo Marya jwatite, “Ngusasosekwa kulimbichila mnope kuti nganisyo syangu siŵe mmalo pandaŵi jandengwiche. Yeleyi yikusandendekasya kuti chilu changu chiŵeje changali machili soni kutamila kulijimba magambo ligongo lyakulepela kutenda yindu yejinji pautumiki wangu.”

 3. Ana chitukambilane chichi munganiji?

³ Atamose kuti tukusimana ni yakusawusya, Yehofa mpaka atupe machili gakuti tukomboleje kumtumichila mwampaka tukombolele. Mkanituŵe kulola yampaka atende Yehofa pakutukamuchisya, kwende tukambilane kaje yaŵatite pakumkamuchisya Paulo soni Timoteyo kuti akwanilisye utumiki wawo atamose kuti ŵasimanaga ni yakusawusya.

 4. Ana ni yakusawusya yapi yaŵasimanaga nayo Paulo?

⁴ Paulo jwasimene ni yakusawusya yejinji. Jwalakwe jwasosekwaga machili pandaŵi jele achimmagongo ŵakwe ŵamputaga, kumponya maganga soni kumŵika mundende. (2 Akoli. 11:23-25) Paulo nganatenda sooni kuŵecheta kuti jwalimbanaga ni yindu yakutengusya. (Alo. 7:18, 19, 24) Jwalakwe jwalagaga ni ulwele uŵawukolasile kuti “chakusoma mpela miŵa mchilu.” Mwamti Paulo ŵamŵendaga Mlungu kuti amtyochesye chakusomachi.—2 Akoli. 12:7, 8.

 5. Ana Paulo jwakombwele kutenda chichi atamose kuti jwasimanaga ni yakusawusya?

⁵ Yehofa ŵamkamuchisyaga Paulo pa masengo gakwe gakulalichila mwangasamala kandu kuti ŵasimanaga ni yakusawusya. Agambe kuganichisya yindu yiŵakombwele kutenda jwalakwe. Mwachisyasyo, pandaŵi jele Paulo jwaliji pa ukayidi wa panyumba ku Loma, jwapitilisyepe kulalichila kwa achimlongola ŵa Chiyuda nambosoni achakulungwakulungwa ŵaboma. (Mase. 28:17; Afil. 4:21,22) Jwalalichilagasoni asilikali ni ŵandu ŵane ŵaŵayikaga kukumlola. (Mase. 28:30, 31; Afil. 1:13) Pandaŵiji Mlungu ŵamkamuchisye Paulo kuti alembe maloŵe gakwalimbikasya Aklistu. Maloŵe gaŵalembilega gakusatukamuchisyasoni m’weji. Konjechesya pelepa, chikalata cha Paulo chalimbikasisye Aklistu ŵa mumpingo wa ku Loma. Yeleyi yakamuchisye kuti abale ‘ŵajinji alimbe mtima mwa AMBUJE, ni kulalichilaga maloŵe ga Mlungu mwangali woga.’ (Afil. 1:14) Atamose kuti papali yindu yejinji yayamtendechelaga Paulo, nambope jwatesile yakakombwele kuti ŵandu “akulupilile ngani syambone.”—Afil. 1:12.

 6. Mwakamulana ni 2 Akolinto 12:9, 10, ana chichi chichamkamuchisye Paulo kuti akwanilisye utumiki wakwe?

⁶ Paulo jwamanyililaga kuti yosope yaŵatendaga pakumtumichila Yehofa, yakombolekaga ni machili ga Mlungu. Jwalakwe jwasasile kuti machili ga Mlungu gakusawoneka kusyesyene “kwa ŵandu ŵakulepetala.” (Aŵalanje 2 Akolinto 12:9, 10.) Paulo jwakombwele kutenda utumiki wakwe ligongo lyakuti Yehofa ŵamkamuchisyaga ni msimu weswela. Mwamti jwapitilisyepe kulalichila atamose kuti ŵalagasidwaga, kuŵichidwa mundende soni kusimana ni yakusawusya yine.

 7. Ana Timoteyo jwasosekwaga kupilila yakusawusya yapi kuti apakombole kutenda chenene utumiki wakwe?

⁷ Nombenajo Timoteyo jwasosekwaga kumdalila Mlungu kuti akombole kutenda utumiki wakwe. Timoteyo jwajesile ni Paulo pa maulendo gejinji ga umishonale. Paulo ŵamtumagasoni jwalakwe kuti akalimbikasye mipingo. (1 Akoli. 4:17) Kombolekatu kuti pandaŵiji Timoteyo ŵalikayichilaga. Mwine yeleyi ni yiyamtendekasisye Paulo kumsalila kuti, “Mkakunda kuti mundu jwalijose amchembulusye [kapena kuti amdelele] ligongo lyakuti mli mchanda.” (1 Tim. 4:12) Konjechesya pelepa, Timoteyo jwalagagasoni ni chakusawusya chine. Jwalakwe ‘jwalwalagalwalaga.’ (1 Tim. 5:23) Nambo jwamanyililaga kuti Yehofa ni jwampaka ampe machili kuti akombole kulalichila ngani syambone soni kwakamuchisya abale ni alongo.—2 Tim. 1:7.

 8. Ana Yehofa akusiŵalimbikasya chamtuli ŵandu ŵakwe masiku agano?

⁸ Masiku agano Yehofa akusiŵapa ŵakutumichila ŵakwe “machili gekulungwa” kuti apitilisye kumtumichila jwalakwe mwakulupichika. (2 Akoli. 4:7) Kwende tukambilane yindu mcheche yakusakamulichisya masengo Yehofa pakusaka kutulimbikasya soni kutukamuchisya kuti tuŵepe ŵakulupichika kwa jwalakwe. Yindu yakwe yili, lipopelo, kusongana yimpepe ni abale ni alongo soni kulalichila.

 9. Ana kupopela mpaka kutukamuchisye chamtuli?

⁹ Yehofa akusatulimbikasya kupitila mu lipopelo. Pa Aefeso 6:18, Paulo jwatulimbikasisye kuti tupopeleje kwa Mlungu “ndaŵi jilijose.” Mlungu akusajanga mapopelo getu mwakutukamuchisya. Jonnie jwakusatama ku Bolivia, jwayiweni yaŵatite Yehofa pakumkamuchisya pandaŵi jiŵasimene ni yakusawusya. Ŵamkwakwe soni achinangolo ŵakwe ŵalwasile pandaŵi jimpepe. Yaliji yakusawusya kuti akombole kwasamalila ŵakulwalaŵa. Kaneko mamagwe ŵajasiche, soni pajigele ndaŵi jelewu kuti ŵamkwakwe ni baba aŵe chenene. Jwalakwe paŵakumbuchilaga yaŵasimene nayoyi jwatite, “Kumsalila Yehofa yindu yanasimanaga nawo kwangamuchisye mnope pandaŵi jinalagasikaga nganisyo.” Yehofa ŵamkamuchisye m’baleju kuti akombole kupilila yakusawusya yaŵasimanaga nayo. Jwamkulungwa jwa mumpingo jwine jwa ku Bolivia lina lyakwe Ronald, jwapikene kuti mamagwe akulwala ulwele wa kansa. Kaneko pali pagambile kupita mwesi umo, mamagweŵa ŵajasiche. Ana chichi chichamkamuchisye kupilila? Jwalakwe jwatite, “Kupopela kwa Yehofa kukusangamuchisya kuti namsalile mwangupikanila mumtima mwangu. Ngumanyilila kuti Yehofa akusambikanichisya mnope kupunda jwalijose, atamose namsyene.” Ligongo lya yakusawusya yatukusasimana nayo, ndaŵi sine ngatukusamanyilila yampaka tuŵechete patukupopela. Nambope Yehofa akusatuŵenda kuti tupopeleje kwa jwalakwe atamose kuti pane yikusaŵa yakusawusya kuti tumsalile mwatukupikanila mumtima.—Alo. 8:26, 27.

10. Mwakamulana ni Ahebeli 4:12, ligongo chichi kuŵalanga Baibulo soni kuganichisya yatuŵalasile kuli kwakusosekwa mnope?

¹⁰ Baibulo jikusatulimbikasya. Mpela mwayaŵelele ni Paulo kuti jwadalilaga Malemba kuti gamlimbikasye, m’wejisoni tukusosekwa kudalila Malemba kuti gatulimbikasyeje. (Alo. 15:4) Patukuŵalanga Maloŵe ga Mlungu soni kugaganichisya, Yehofa mpaka atukamuchisye ni msimu wakwe kuti tupikanichisye yatuŵalasile. Nambosoni kuti tukombole kupilila yakusawusya yatusimene nayo. (Aŵalanje Ahebeli 4:12.) Ronald jwatumkolasile kundanda kula, jwasasile kuti, “Ngusayamichila mnope ligongo lyakuti lisiku lililyose ngusaŵalangaga Baibulo. Ngusaganichisyaga mnope ndamo syambone syakwete Yehofa soni yakusatenda pakwanonyela ŵakutumichila ŵakwe. Yeleyi yikusangamuchisyaga kuti mbateje machili.”

11. Ana Baibulo jamkamuchisye chamtuli Mlongo jwine juŵasimene ni yakusawusya?

¹¹ Kuŵalanga Maloŵe ga Mlungu soni kugaganichisya mpaka kutukamuchisye kuti tukoleje nganisyo syakuŵajilwa patusimene ni yakusawusya. Apikane yindu yambone yaŵapatile mlongo jwine ligongo lya kuŵalanga Baibulo. Mlongoju ŵamkwakwe ŵajasiche. Jwamkulungwa jwa mumpingo jwine ŵamsalile jwalakwe kuti mpaka apate yindu yakamuchisya mnope naga ali aŵalasile buku ja Yobu m’Baibulo. Ali agambile kuŵalanga, jwayichile kuyiwona kuti Yobu nganaganisyaga chenene. Mwamti chamumtima ŵamsalile Yobu kuti, “Mkatamilaga kuganichisya yakusawusya yenu basi.” Nambo kaneko mlongoju jwayiweni kuti kaganisye kakwe ni muŵaganichisyaga Yobu pangali yiyalekanganaga. Yeleyi yamkamuchisye kuti achenje kaganisye kakwe soni kuti akombole kupilila chiwa cha ŵamkwakwe.

12. Ana Yehofa akusatukamuchisya chamtuli kupitila mwa abale ni alongo?

¹² Tukusalimbikasyana ni abale ni alongo patuli kumisongano. Yehofa akusatulimbikasyasoni kupitila mwa Aklistu achimjetu. Paulo jwalembile kuti jwaliji jwakusachilila ‘kulimbikasyana’ ni abale ni alongo. (Alo. 1:11, 12) Mlongo Mary jwatumkolasile jula, akusasangalala pakukunguluka ni abale ni alongo. Jwalakwe jwatite, “Yehofa aŵele mkulimbikasya kupitila mwa abale ni alongo atamose kuti jemanjaji nganamanyililaga yakusawusya yanasimanaga nayo. Jemanjaji ŵaŵechetaga soni kulembela utenga wakulimbikasya. Yaŵatendagayi yaliji chikamuchisyo chapandaŵi jakwe. Yeleyi yangamuchisyaga kuti mbechetaneje mwagopoka ni alongo ŵakusimana ni yakusawusya mpela ya une. Nalijiganyagasoni yaŵatesile ŵane pakumalana ni yakusawusya yawo. Nombe yaŵatendaga achakulungwa ŵa mumpingo yangamuchisyaga kuti naliwoneje kuŵa jwakusosekwa mnope mumpingo.”

13. Ana mpaka tulimbikasyane chamtuli pandaŵi jatuli kumisongano?

¹³ Kumisongano ja mpingo gali malo gambone gatukusalimbikasyana. Patupite kumisongano twalimbikasyeje ŵandu ŵane mwakwasalila kuti tukusitwanonyela soni tukusayamichilaga yakusatenda. Mwachisyasyo, lisiku line misongano mkanijitande, jwamkulungwa jwa mumpingo jwine lina lyakwe Peter ŵamsalile mlongo jwine jwele ŵamkwakwe nganaŵa ŵamboni. Jwalakwe jwatite, “Patwaweni wawojo ali ayiche kumisongano, yikusatulimbikasya mnope. Ndaŵi syosope akusayika ni ŵanache ŵawo wosope 6, soni ndemanga syakusapeleka sikusalosya kuti ŵakosechele chenene.” Mlongoju jwayamichile mnope yiŵaŵechete m’baleju, mwamti jwajanjile kwineku misosi jili mkujilima. Jwatite, “Yaŵecheteyi yilimbikasisye kwabasi, soni yeleyi niyasosecheleje kuti mbikane.”

14. Ana masengo gakulalichila gakusatukamuchisya chamtuli?

¹⁴ Masengo gakulalichila gakusatulimbikasya. Patukukambilana ni ŵandu ya usyesyene wa m’Baibulo tukusaŵa ŵakusangalala mnope. Tukusaŵape ŵakusangalala atamose ŵandu ali mkukana utenga wetu. (Mis. 11:25) Mlongo Stacy jwajitichisye kuti kulalichila kukusalimbikasya mnope. Pandaŵi jele jwachibale jwakwe ŵamtyosisye mumpingo, yamkwayiye mnope mumtima, soni jwaliwusya kuti, ‘Ana pangali changatesile kuti namkamuchisye mlongo mjanguju?’ Jwalakwe jwatamilaga kuganichisya yayatendekweyi. Ana chamkamuchisye chichi kuti amalane ni yeleyi? Masengo gakulalichila ni gagamkamuchisye. Mlongoju pajwalalichilaga jwaganichisyaga mnope ya ŵandu ŵa mudela jakwe, ŵaŵasosekwaga kwakamuchisya. Jwalakwe jwatite, “Pandaŵiji Yehofa ŵangamuchisye kuti mbate mundu jwakuti namjiganyeje Baibulo, jwaŵajawulaga pasogolo mnope. Yeleyi yangamuchisyaga, mwamti mpaka mbechete kuti chindu chekulungwa chachingamuchisye chili kukamula masengo gakulalichila.”

15. Ana tukulijiganya chichi pa yaŵaŵechete Mary?

¹⁵ Ŵandu mpaka ayiwoneje kuti nganaŵa akombwele kutenda yejinji mu utumiki ligongo lya yakusawusya yine. Naga wawojosoni akusalipikana chamti myiyi, akumbuchileje kuti Yehofa akusasangalala pakwawona ali mkulingalinga kumtumichila jwalakwe. Aganichisye chisyasyo cha Mlongo Mary jwatumkolasile kundanda kula. Ali asamile kudela ja chiŵecheto chine, jwayiwonaga kuti ngakutenda yejinji pakumtumichila Yehofa. Jwalakwe jwatite, “Kwandaŵi jelewu yanatendaga pandili pamisongano yaliji gamba kwanga mwakata kapena kuŵalanga Baibulo. Soni pandili mu utumiki nagambaga kugaŵila kapepala basi.” Yeleyitu yamtendekasyaga mlongoju kulipikana mpela kuti pangali chakutenda pakulandanya ni mwaŵatendelaga ŵandu ŵane ŵakuchimanyilila chenene chiŵecheto cha kudela jiŵalijijo. Kaneko jwachenjile muŵayiwonelaga yindu. Jwamanyilile kuti Yehofa mpaka amkamulichisye masengo atamose kuti ngakuchimanyilila chenene chiŵechetocho. Mlongoju jwatite, “Usyesyene wa m’Baibulo uli wangasawusya soni ukusiwakamuchisya ŵandu kuchenga ndamo syawo.”

16. Ana chichi champaka chakamuchisye ŵandu ŵakulepela kutyoka panyumba kuti akalalichile?

¹⁶ Yehofa akusalola soni kuyamichila yiliyose yatukusakombola kutenda patukukamula masengo gakulalichila atamose tuli ŵachitamile panyumba. Jwalakwe mpaka atukamuchisye kuti tukombole kugalalichila madokotala kapena ŵandu ŵane ŵakutusamalila. Nambo naga tukulandanya yindu yatwakombolaga kutenda munyumamu ni yatukutenda apano, nikuti mpaka yitutengusye. Kuganichisya yakutenda Yehofa pakutukamuchisya, mpaka kutukamuchisye kupilila yakusawusya yatukusimana nayo kwineku tuli mkusangalala.

17. Mwakamulana ni lilemba lya Jwakulalichila 11:6, ligongo chichi ngatukusosekwa kuleka kulalichila atamose kuti yakuchiyichisya ya masengo getugo nganiyiŵa yiwonechele mwachitema?

¹⁷ Patupandile mbeju sya usyesyene ngatukusamanyililaga mbeju jampaka jimele ni kutanda kukula. (Aŵalanje Jwakulalichila 11:6.) Mlongo jwine jwa yaka ya m’ma 80 lina lyakwe Barbara, akusalalichila ndaŵi syosope pa foni kapena kulemba yikalata. M’chikalata chakwe chine ŵaŵisilemo Sanja ja Mlonda ja Malichi 1, 2014. Sanjaji jakwete ngani jamtwe wakuti “Kodi Ndi Zinthu Ziti Zimene Mulungu Wakuchitirani?” Mlongoju nganamanyililaga kuti chikalatachi chapite ku liŵasa line lilyatyosyedwe mumpingo. Liŵasali pilyapochele Sanjaji ŵajiŵalasile mwakuwilisyawilisya. Mwamti jwamlume jwa m’liŵasali jwalipikanaga mpela kuti akuŵechetana ni Yehofa pameso ni meso. Kaneko liŵasali lyatandite kwawula kumisongano. Pali papitile yaka yakupunda 27, liŵasali lyawujile mumpingo. Mwangakayichila mlongo jula jwalimbikasidwe mnope ni yakuyichisya yambone ya chikalata chiŵalembilechi.

18. Ana tukusosekwa kutenda uli kuti Yehofa atupeje machili?

¹⁸ Yehofa atupele yindu yejinji yayikusatukamuchisya kuti tuŵe ŵamachili. Yindu yakwe yili, upile wakupopela, Baibulo, kusongana ni abale ni alongo soni masengo gakulalichila. Patukuyiwona yindu yeleyi kuŵa yakusosekwa, tukusalosya kumkulupilila kwetu Yehofa kuti mpaka akombole kutukamuchisya patusimene ni yakusawusya. Kwende ndaŵi syosope twadalileje Atati ŵetu ŵakwinani ‘ŵakusapeleka machili kwa ŵandu ŵakusampikanila jwalakwe.’—2 Mbi. 16:9.