Kwanga kwa Yiwusyo ya m’Baibulo / Satana ni Yiŵanda / Ana Satana Ali Jusyesyene?

Elo, Satana ali jusyesyene. Jwalakwe ali “jwakulamulila jwachilambo chapasi,” soni chakupanganyidwa chausimu chachamjimuchile Mlungu ni kuŵa jwakusakala. (Yohane 14:30; Aefeso 6:11, 12) Baibulo jikusasala ndamo ja Satana pakamulichisya masengo mena gagali pasiga.

• Lina lyakuti Satana, likusagopolela kuti “Jwakusisya.”—Yobu 1:6.

• Lina lyakuti Jwakusakala, likusagopolela kuti “Jwakulambusya.”—Chiwunukuko 12:9.

• Lina lyakuti Lijoka, lyalikusasimanikwa m’Baibulo likusagopolela “Jwachinyengo.”—2 Akolinto 11:3.

• Jwakulinga.—Mateyu 4:3, Malangano Gasambano 1992 Edition.

• Jwaunami.—Yohane 8:44.

Satana nganiwuŵa ulemwa wawukusaŵa mumtima mwa mundu

Ŵane akusaganisya kuti Satana uli ulemwa wawukusaŵa mwa mundu. Nambope, Baibulo jikusasala ya kukambilana kukwapali pasikati pa Mlungu ni Satana. Mlungu jwangali ulemwa. Myoyo, ngamkaniyikomboleka kuti jwalakwe aŵechetaneje ni ulemwa wawaliji mwa jwalakwe. (Detulonomo 32:4; Yobu 2:1-6) Soni ndaŵi jine Satana ŵamlinjile Yesu, jwali jwangali ulemwa. (Mateyu 4:8-10; 1 Yohane 3:5) Myoyo, Baibulo jikusalosya kuti Satana apali soni nganiwuŵa ulemwa wawukusaŵa mumtima mwa mundu.

Ŵandu ŵajinji ngakusakulupilila kuti Satana apali. Nambo yeleyi yikatusimonjesya. Yili myoyo ligongo lyakuti Baibulo jikusasala kuti Satana akusakamulichisya masengo unami pakusaka kwanilisya yakulinga yakwe. (2 Atesalonika 2:9, 10) Litala limo lyakusakamulichisya masengo lili kwatendekasya ŵandu kuti akamanyilila kuti jwalakwe apali.—2 Akolinto 4:4.

Yaunami: Lusifala lili lina line lya Satana.

Yisyesyene yakwe: Liloŵe lya Chihebeli lyele m’ma Baibulo gane ŵaligopolele kuti “Lusifala,” likusagopolela kuti “jwakuŵala.” (Yesaya 14:12, NW) Nganiji jikusalosya kuti maloŵega gasalaga ya mayimwene ga Babulo, gaŵasasile Mlungu kuti chachigajonanga ligongo lya kulikwesya kwawo. (Yesaya 14:4, 13-20) Liloŵe lyakuti “jwakuŵala” ŵalikamulichisye masengo pakusaka kwaseka Ababulo panyuma pakuti ŵagomeche.

Yaunami: Mlungu akusakamulichisya masengo Satana pakupeleka chilango kwa ŵandu.

Yisyesyene yakwe: Satana ali mmagongo jwa Mlungu ngaŵa jwakutumichila jwakwe. Satana akusiŵasisya ŵakutumichila ŵa Mlungu soni akusiŵalambuchisya yaunami.​—1 Petulo 5:8; Chiwunukuko 12:10.