Asangalale Ligongo Lyakamula Masengo Mwamtawu

1-3. (a) Ana ŵandu ŵajinji akusagawona wuli masengo gakusakamula? (b) Ana Baibulo jikusalimbikasya kuti tugawoneje mwatuli masengo, soni ana mu mtwe awuno citulole yiwusyo yapi?

MOŴA agano, ŵandu ŵajinji ŵangasangalala ni kukamula masengo. Ŵajinji ŵanganonyela kwawula kumasengo ligongo lyakuti akusakamula masengo gangakusasangalala nago kwa ma awala gejinji lisiku lililyose. Ana cici campaka cakamucisye ŵandu ŵakwete nganisyo syati m’yiyiŵa kuti anonyeleje, soni kusangalala ni masengo gawo?

² Baibulo jikusalimbikasya ŵandu kuti akamuleje masengo mwamtawu. Jikusasala kuti masengo, soni yakusapata mundu pakamwile masengogo yili mtuka. Solomoni ŵalembile kuti: “Mundu jwalijose alye, amwe, soni asangalale ni yindu yambone yapatile ligongo lyakamula masengo mwamtawu. Yeleyi yili mtuka wakutyocela kwa Mlungu.” (Mlaliki 3:13) Yehofa akusatunonyela, soni akusasaka kutupa yindu yayili yambone mnope kwa m’wejo. M’yoyo akusasaka kuti tusangalaleje ni masengo getu, ni yampaka tupate ligongo lyakamula masengogo. Kuti tujendelecele kuŵa m’cinonyelo cakwe, tukusosekwa tugawoneje masengo mpela mwakusagawonela jwalakwejo, soni mwakamulana ni malamusi gakwe.​—Aŵalanje Mlaliki 2:24; 5:18.

³ Mu mtwe awuno, citulole yiwusyo mcece ayi: Ana mpaka tusangalale catuli ligongo lyakamula masengo mwamtawu? Ana masengo gapi gangaŵajilwa kwa Aklistu ŵasyesyene? Ana mpaka tutende wuli kuti masengo getu gakatulilaga ndaŵi josope jakutendela yausimu? Soni ana masengo gakusosekwa mnope gampaka tukamule ni gapi? Nambo candanda, kwende tulole kaje cisyasyo ca ŵamasengo acakulungwakulungwa ŵaŵili pa cilambo cosope, ŵali Yehofa Mlungu ni Yesu.

4, 5. Ana Baibulo jikusalosya catuli kuti Yehofa ali jwamtawu pamasengo?

⁴ Yehofa ali jwamtawu pamasengo kupunda wosope. Lilemba lya Genesis 1:1 likusati: “Pandanda Mlungu ŵapanganyisye kwinani ni cilambo capasi.” Mlungu paŵamalisisye masengo gakupanganya cilambo capasi, jwalakwe ŵasasile kuti yiŵapanganyisyeyo yaliji “yambone kwamnope.” (Genesis 1:31) Yeleyi yikulosya kuti jwalakwe ŵajikutile ni masengo gakwe gakupanganya cilambo capasi. Mwangakayicila, Yehofa jwali “Mlungu jwakusangalala,” ŵasangalele ni masengo gakwega.​—1 Timoteo 1:11, NW.

⁵ Mlungu jwetu jwamtawu, akusakamula masengo ndaŵi syosope. Pali papite ndaŵi jelewu Yehofa ali amalisisye kupanganya cilambo capasi ni yosope ya mwelemo, Yesu ŵaŵecete kuti: “Atati ŵangu akupanganya masengo masiku gosope.” (Yohane 5:17) Ana Atati aŵele ali mkutenda masengo gapi? Atamose kuti ali kwinani, jwalakwe aŵele ali mkwalolela, soni kwasamalila ŵandu pacilambo capasi. Mlungu apanganyisye “ciwumbe casambano,” cacili Aklistu ŵasagulwe ni msimu ŵacacilamulila yimpepe ni Yesu kwinani. (2 Akolinto 5:17) Mlungu aŵele ali mkukamula masengo gakwanilisya lisosa lyakwe kwa ŵandu, kuti jwalijose jwakusamnonyela jwalakwejo capate umi wangamala m’cilambo casambano. (Aloma 6:23) Yehofa ali jwakusangalala ni yakuyicisya ya masengoga. Ŵandu ŵajinji akupikanila utenga wa Ucimwene, akulongolelegwa ni Mlungu, soni akucenga yitendo yawo kuti ajendelecele kuŵa m’cinonyelo ca Mlungu.​—Yohane 6:44.

6, 7. Ana Yesu akwete mbili jatuli jajikulosya kuti ŵakamulaga masengo mwamtawu?

⁶ Yesu akwete mbili jakuti akusakamula masengo mwamtawu. Mkanayice pacilambo capasi, jwalakwe ŵaliji “namatetule pamasengo” ga Mlungu gakupanganya yindu yosope, “yakwinani ni pacilambo pano.” (Miyambo 8:22-31; Akolose 1:15-17) Ali ayice pacilambo capasi, Yesu ŵajendelecele kukamula masengo mwamtawu. Piŵaliji mcanda, ŵalijiganyisye masengo gakutaŵataŵa, mwati ŵamanyikaga kuti “jwakupala matabwa.”a (Maliko 6:3) Masengo gelega gasosecelaga macili, soni lunda mnopemnope ligongo lyakuti ndaŵi jelejo kwaliji kwangali makina gakukatila matabwa, kwakuja kusuma matabwa, soni yida yamagesi. Ana mpaka am’wone Yesu munganisyo mwawo ali mkugwisya yitela ni kukata matabwa kaneko kuganyakula ni kwawulaga nago kumalo gaŵakamulilaga masengo? Ana mpaka am’wone jwalakwe ali mkukoma msakasa, matanga, soni yindu yine yamatabwa? Mwangakayicila Yesu ŵamanyililaga umbone wakukamula masengo mwamtawu, soni mwalunda.

⁷ Yesu ŵalimbicilaga mnope pakukamula masengo gakwe ga kulalicila. Kwa yaka yitatu ni litika, jwalakwe ŵakamwile masengo gakusosekwa mnopega mwamtawu. Pakusaka kuti ŵakamucisye ŵandu ŵajinji, Yesu ŵakamulicisyaga masengo cenene ndaŵi jakwe. Jwalakwe ŵatandaga kukamula masengoga kundaŵi mnope mpaka cilo. (Luka 21:37, 38; Yohane 3:2) Jwalakwe ŵajendaga “m’misinda ni m’misi acilalicilaga ni kwasalila ŵandu ngani syambone syakwamba ya Ucimwene wa Mlungu.” (Luka 8:1) Pelepa mpaka tujile kuti Yesu ŵajesile makilomita gejinji wapasi, m’misewu jaluwundu kuti akalalicile utenga wambone kwa ŵandu.

8, 9. Ana Yesu ŵasangalele ligongo lyakamula masengo mwamtawu?

⁸ Ana Yesu ŵasangalalaga ligongo lyakamula mwamtawu masengo gakulalicila? Elo! Jwalakwe ŵapandile mbeju sya usyesyene sya Ucimwene, soni ŵalesile mbejusyo sili sikomele kulindilila kuti asigowole. Kukamula masengo ga Mlungu kwamlimbikasyaga Yesu, soni jwalakwe ŵakuwonaga mpela cakulya, mwati ŵakombolekaga kutama ngalya pakusaka kuti akamule masengoga. (Yohane 4:31-38) Agambe ganicisya muŵapikanile Yesu kumbesi kwa undumetume wakwe wapacilambo capasi paŵasalile Atati ŵakwe kuti: “Une nalulosisye lumbili lwawo pacilambo capasi, malisisye kupanganya masengo giŵambele kuti nagatende.”​—Yohane 17:4.

⁹ Kusala yisyene, Yehofa ni Yesu ali yisyasyo yambone ya ŵamasengo ŵaŵasangalele ligongo lyakamula masengo mwamtawu. Cinonyelo cetu kwa Yehofa cikusatulimbikasya ‘kulinjilila kuŵa mpela jwalakwejo.’ (Aefeso 5:1) Cinonyelo cetu kwa Yesu cikusatukanganicisya kuti ‘tukuyeje sajo syakwe.’ (1 Petulo 2:21) Sambano kwende tulole mwele m’wejisoni mpaka tusangalalile ligongo lyakamula masengo mwamtawu.

10, 11. Ana cici campaka citukamucisye kugawona masengo getu kuŵa gakusosekwa?

¹⁰ Aklistu ŵasyesyene akusakamulasoni masengo ga kucilambo. Tukusosekwa tusangalaleje, soni kwikutila ni masengo getu. Nambope ndaŵi sine yeleyi mpaka yiŵe yakusawusya naga tukukamula masengo gangatukuganonyela. Naga yeleyi yikusatutendecela, ana mpaka tutende cici kuti tusangalaleje ligongo lyakamula masengo mwamtawu?

¹¹ Tugawoneje masengo getu kuŵa gakusosekwa. Mpaka yiŵe yakusawusya kucenga yindu ku masengo kwetu, nambo mpaka tugambe kucenga nganisyo syetu pa masengogo. Kuganicisya mwakusagawonela Mlungu masengo mpaka kutukamucisye kuti tugawoneje kuŵa gakusosekwa. Mwambone, naga wawojo ali mtwe wa liŵasa, mpaka yiŵe cenene kuganicisya kuti atamose kuti masengo gawo gangasangalasya, nambope gakusakamucisya kusamalila liŵasa lyawo. Kusamalila liŵasa lyawo ngaŵa ngani jamwana pameso pa Mlungu. Maloŵe gakwe gakusasala kuti mundu jwakusalepela kusamalila liŵasa lyakwe “kusakala kwakwe kuli kwakupunda mundu jwangakulupilila.” (1 Timoteo 5:8) Kumanyilila kuti masengo gawo gakwakamucisya kukwanilisya ukumu waŵapele Mlungu, mpaka kwakamucisye kuŵa ŵakwikutila ni masengogo yele acimjawo ŵakumasengo mpaka yaleme.

12. Ana kuŵa jwamasengo jwamtawu, soni jwacilungamo kuli kwambone catuli?

¹² Tukamuleje masengo mwamtawu, soni mwacilungamo. Kukamula masengo mwamtawu, soni mwalunda kukusaŵa kwakamucisya mnope. Ndaŵi syejinji ŵamasengo ŵamtawu, soni ŵalunda akusayamiciligwa ni mabwana gawo. (Miyambo 12:24; 22:29) Mpela Aklistu ŵasyesyene, tukusosekwa tuŵejesoni ŵacilungamo kumasengo. Tukajiŵaga mbiya, yindu yakamulicisya masengo, kapena ndaŵi ja ŵandu ŵatukwakamulila masengo. (Aefeso 4:28) Mpela mutwalijiganyicisye mu mtwe umasile, kuŵa mundu jwacilungamo kukusapatikasya upile. Ŵandu akusamkulupilila mnope jwamasengo jwacilungamo. Cinga ŵaŵatulembile masengo akutuwona kuti tukusakamula masengo mwamtawu kapena iyayi, mpaka tuŵe ŵakusangalala ligongo lyakola “mtima wangali kandu kakuwusisya,” soni kumanyilila kuti tukumsangalasya Mlungu jwatukusamnonyela.​—Ahebeli 13:18; Akolose 3:22-24.

13. Ana cisyasyo cetu cambone kumasengo mpaka cikole yakuyicisya yatuli?

¹³ Tumanyilileje kuti yitendo yetu mpaka yatendekasye ŵandu kumlumba Mlungu. Naga kumasengo kwetu tukusalosya ndamo syambone sya Ciklistu, ŵandu ŵane akusalola yeleyo. Ana yeleyi yikwete umbone wapi? Yikusatukamucisya ‘kulosya umbone wa majiganyo gakwamba ya Mlungu, Mkulupusyo jwetu.’ (Tito 2:9, 10) Kusala yisyene, yitendo yetu yambone mpaka yatendekasye ŵane kuwuwona umbone wa kalambile ketu, ni kutanda kola nako lung’wanu. Agambe ganisya mwampaka apikanile mumtima mwawo kum’wona mjawo jwakamula najo masengo ali mkutenda lung’wanu ni usyesyene ligongo lya cisyasyo cawo cambone kumasengo! Cakusosekwa mnope, soni cakusangalasya cili kumanyilila kuti yitendo yawo yambone yikusatendekasya ŵandu kumlumba Mlungu, soni kusangalasya mtima wakwe.​—Aŵalanje Miyambo 27:11; 1 Petulo 2:12.

14-16. Naga tukusaka kusagula masengo, ana tukusosekwa kuganicisya yiwusyo yapi?

¹⁴ Baibulo ngajikusasala ndandanda ja masengo gagali gakuŵajilwa kwa Mklistu kapena iyayi. Nambo yeleyi ngayikugopolela kuti mpaka tukamuleje masengo galigose. Malemba mpaka gatukamucisye kusagula masengo gambone gakumsangalasya Mlungu ni kuŵambala masengo gangamsangalasya jwalakwe. (Miyambo 2:6) Naga tukusaka kusagula masengo, pana yiwusyo yiŵili yatukusosekwa kuyiganicisya.

¹⁵ Ana kukamula masengo gelega kuli kutenda yindu yele Baibulo jikusalekasya? Maloŵe ga Mlungu gakusalekasya kwiŵa, unami, soni kupanganya milungu. (Eksodo 20:4; Masengo 15:29; Aefeso 4:28; Ciunukuko 21:8) M’weji mpaka tukane masengo galigose gampaka tusosekwe kutenda yindu mpela yeleyi. Cinonyelo cetu pa Yehofa ngaŵa mkutukunda kuti tujinjile masengo gagakusapwatika kutenda yindu yakasa malamusi ga Mlungu.​—Aŵalanje 1 Yohane 5:3.

¹⁶ Ana kukamula masengo gelega mpaka kuŵe kwakamucisya kapena kwalimbikasya ŵane kutenda yindu yakulemweceka? Kwende tulole cisyasyo. Kukamula masengo ga yakutaŵataŵa ngaŵa kwakulemweceka. Nambi uli naga Mklistu apatile masengo gakutaŵa calici? Kukamula masengoga nganikuŵa kukamucisya kulambila kwawunami mwakuwonecela. Nambope, ana kukamula masengo gakutaŵa calici ngakuŵa kukamucisya ŵandu kuti ajiganyeje Maloŵe ga Mlungu mwaunami? (Ciunukuko 18:4) Mpela ŵandu ŵatukusamnonyela Yehofa, ngatukusosekwa kukamulana ni ndamo jilijose jangajilana ni malemba.

17. (a) Pakusagula masengo, ana tukusosekwa kuganicisya mwakusamala yindu yapi? (Alole libokosi pa peji 177.) (b) Ana tukusosekwa kutenda cici kuti cikumbumtima cetu citukamucisyeje kusagula yindu yakumsangalasya Mlungu?

¹⁷ Kwanga kwa yiwusyo yiŵili ya mu ndime 15 ni 16 mpaka kutukamucisye kumalana ni yiwusyo yejinji yakwamba masengo. Konjecesya pelepa, panasoni yindu yine yatukusosekwa kuyiganicisya mwakusamala patukusagula masengo.b Ngatukusosekwa kwembeceya kuti kapolo jwakulupicika ni jwalunda catusalile yosope yakwayana ni masengo. Pelepa ni patukusosecela kuti tutende yindu mwalunda. Mpela mwatwalijiganyicisye mu Mtwe waŵili, tukusosekwa kucijiganya cikumbumtima cetu, mwakulijiganya kukamulicisya masengo Maloŵe ga Mlungu pa umi wetu wa lisiku ni lisiku. Ligongo ‘lyakulijiganya kwetu,’ cikumbumtima cetu mpaka citukamucisye kusagula yindu yakumsangalasya Mlungu, soni kutukamucisya kuti tujendelecele kuŵa m’cinonyelo cakwe.​—Ahebeli 5:14.

18. Ligongo cici kulolecesya kuti masengo ngagakutulila ndaŵi jakutendela yindu yausimu nganikuŵa kwangasawusya?

¹⁸ Kusagula yindu yampaka yitendekasye kuti Yehofa atunonyelejepe, nganikuŵa kwangasawusya ‘m’masiku gambesi’ ga “ndaŵi ja yakusawusya” gano. (2 Timoteo 3:1) Kupata masengo ni kwendelecela kuŵa pamasengogo mpaka kuŵe kwakusawusya mnope. M’weji mpela Aklistu ŵasyesyene, tukusamanyilila kusosekwa kwa kukamula masengo mwamtawu kuti tupatile liŵasa lyetu yakusosecela. Nambo naga ngatukusamala, yakutendekwa kumasengo kapena nganisyo syakusakala sya kunonyela yipanje mpaka yisokonasye yatukusatenda pakutumicila, soni pakulambila Mlungu. (1 Timoteo 6:9, 10) Kwende tulole yampaka tutende kuti masengo getu gakatulilaga ndaŵi jakutendela yindu yausimu, mwakulolecesya kuti tukutenda yindu “yakusosekwa mnope.”​—Afilipi 1:10 NW.

19. Ligongo cici Yehofa ali jwakuŵajilwa kuti tumkulupilileje mnope, soni ana cikulupi celeci cikusatukamucisya kuŵambala cici?

¹⁹ Amkulupilileje Yehofa ni mtima wosope. (Aŵalanje Miyambo 3:5, 6.) Ana jwalakwe nganaŵa jwakuŵajilwa kumkulupilila cati m’yiyi? Konjecesya pelepa, jwalakwe ni jwakusatusamalila. (1 Petulo 5:7) Jwalakwe akusamanyilila cenene yatukusasosecela kutupunda acimsyewe, soni mkono wakwe nganiwuŵa wejipi. (Salimo 37:25) M’yoyo tukusosekwa kupikanila Maloŵe gakwe pagakutukumbusya kuti: “Mtima wenu ukaŵaga pa mbiya, nipo yele yimkweteyo, mjikutileje nayo. Pakuti Mlungu ŵatite, ‘Ngasinamleka kapena kumjasa kose.’” (Ahebeli 13:5) Ŵandu ŵajinji ŵali mu undumetume wandaŵi syosope mpaka apelece umboni wakuti Mlungu akusakombola kupeleka yakusosecela ya paumi. Naga tukusakulupilila ni mtima wosope kuti Yehofa cacitusamalila, tuciŵambala kudandawula mnope kuti liŵasa lyetu tucilipatila catuli yakusosecela. (Matayo 6:25-32) Ngasitukunda kuti masengo getu gakucilambo gatutendekasyeje kuti tukaŵicilaga mtima pa yindu yausimu, mpela kulalicila ngani syambone, soni kwawula ku misongano.​—Matayo 24:14; Ahebeli 10:24, 25.

20. Ana kusala kuti meso gawo gaŵeje “cenene” yikugopolela cici, soni cici campaka cakamucisye kuti gaŵeje “cenene” ndaŵi syosope?

²⁰ Aŵiceje nganisyo syawo syosope pa kutenda lisosa lya Mlungu. (Aŵalanje Matayo 6:22, 23.) Yesu ŵasasile kuti meso getu gakusosekwa kuŵa “cenene.” Yeleyi yikugopolela kuti ngatukusosekwa kuwusokonasya umi wetu ni yindu yanganiyiŵa yakusosekwa kusyesyene. Mklistu akusosekwa kuŵika nganisyo syakwe syosope pakutenda lisosa lya Mlungu. Naga tukutenda m’yoyo, ngasitulagasika ni kusosasosa masengo ga mbiya syejinji, soni kusaka kukola yindu yejinji mnope pa umi. Ngasitujigalikasoni ni yindu yambone mnope yasambano yayikukopoka moŵa agano, yele ŵamalonda akusaka tukulupilileje kuti tukusosecela yeleyo kuti tuŵe ŵakusangalala. Ana cici campaka cakamucisye kuti aŵiceje nganisyo syawo syosope pakutenda lisosa lya Mlungu? Aŵambaleje kulisitopesya ni ngongole syangakusosecela. Akasaliwunjicila yipanje yampaka yisaceje ndaŵi jejinji pakuyisamalila. Apikanileje yajikusasala Baibulo kuti ajikutileje ni “yakulya ni yakuwala.” (1 Timoteo 6:8) Atende yakomboleka kuti acenje yindu yine pa umi wawo kuti akasakaga yejinji.

21. Ligongo cici tukusosekwa tuŵiceje yindu yakusosekwa mnope pamalo gandanda, soni ana cici cacikusosekwa kuŵa pamalo gandanda?

²¹ Aŵiceje yindu yausimu pamalo gandanda ni kulingalingaga kuyikwanilisya. Ligongo lyakuti m’weji ngakomboleka kutenda yindu yosope ya paumi wetu ndaŵi jimo, tukusosekwa tuŵiceje yindu yakusosekwa pamalo gandanda. Naga ngatukutenda yeleyi, nikuti yindu yangasosekwa mnope mpaka yitumalileje ndaŵi jetu jajili japenani, ni ngapataga ndaŵi jakutendela yindu yakusosekwa mnope. Ana cici cacikusosekwa kuŵa pamalo gandanda pa umi wetu? Ŵandu ŵajinji m’cilamboci akusaŵika majiganyo gapenani pamalo gandanda kuti capate masengo gambone mnope. Nambope, Yesu ŵalimbikasisye ŵakumkuya ŵakwe kuti “ajendelecele kusosasosa candanda Ucimwene wa Mlungu.” (Matayo 6:33, NW) M’weji mpela Aklistu ŵasyesyene, tukusaŵika Ucimwene wa Mlungu pamalo gandanda pa umi wetu. Yindu yatukusasagula, yatukusasaka kuti citutende, soni yatukusatenda yikusosekwa yilosyeje kuti yindu ya Ucimwene, soni lisosa lya Mlungu yili yakusosekwa mnope pa umi wetu kupunda yipanje, soni yindu yine yakucilu.

22, 23. (a) Ana masengo gapi gagali gakusosekwa mnope kwa Aklistu, soni ana mpaka tulosye catuli kuti masengoga gali gakusosekwa mnope? (Alole libokosi pa peji 180.) (b) Pakwamba ya masengo ga kucilambo, ana wawojo asimicisye kutenda cici?

²² Ligongo lyakumanyilila kuti tuli mu ndaŵi jakumbesi, tukusaŵika nganisyo syetu syosope pa kulalicila, soni kwiganya ŵandu, gagali masengo gakusosekwa mnope kwa Aklistu. (Matayo 24:14; 28:19, 20) Tukusosekwa tukamuleje masengoga mwamtawu mpela mwaŵakamulilaga Yesu, ligongo gali gakulupusya umi wa ŵandu. Ana mpaka tulosye catuli kuti masengoga gali gakusosekwa kwa m’weji? Ŵajinji mwa ŵandu ŵa Mlungu akusalipeleka ni mtima wosope kukamula masengo gelega mpela ŵakulalicila ŵa mumpingo. Ŵane alingenye yakuti atumicileje mpela apayiniya kapena amishonale. Ligongo lyakumanyilila kusosekwa kwa kutenda yindu yausimu, acinangolo ŵajinji ŵalimbikasisye ŵanace ŵawo kuti catende undumetume wandaŵi syosope. Ana ŵakulalicila ya Ucimwene ŵakulipeleka akusasangalala ligongo lyakamula masengo mwamtawu mu undumetume? Kwene, akusasangalaga! Kutumicila Yehofa ni mtima wosope kukusakamucisya kuti mundu akole umi wakusangalala, wakwikutila, soni akusapata yindu yambone yejinji.​—Aŵalanje Miyambo 10:22.

²³ Ŵajinjiwe tukusasosekwa kukamula masengo gakucilu kwa ndaŵi jelewu kuti tupatile yakusosecela ya liŵasa lyetu. Tukumbucileje kuti Yehofa akusasaka kuti tusangalaleje ligongo lyakamula masengo mwamtawu. Naga nganisyo syetu, soni mwatukusakamulila masengo yikukamulana ni malamusi ga Yehofa, soni mwakusagawonela masengo jwalakwejo, mpaka tusangalaleje mnope ni masengo getugo. M’yoyo, kwende tukakunda kuti masengo ga kucilambo gatusokonasye kukamula masengo getu gakusosekwa mnope, gagali masengo gakulalicila ngani syambone syakwamba ya Ucimwene wa Mlungu. Kuŵika masengo gelega pamalo gandanda pa umi wetu, kukusalosya cinonyelo cetu kwa Yehofa, soni kukusatukamucisya kwendelecela kuŵa m’cinonyelo cakwe.