Ligongo Chichi Pachilambopa Pana Yakusakala Soni Yipwetesi?

Patusimene ni yipwetesi, tukusaliwusya kuti, “Ligongo chichi yeleyi yitendekwe?” Nambo chasangalale kumanyilila kuti Baibulo jikusajanga chiwusyo chelechi mwakupikanika chenene.

1. Ana Satana jwayikasisye chamtuli yakusakala pachilambopa?

Satana jwali Jwakulambusya jwamjimuchile Mlungu. Chakulinga chakwe chaliji chakuti ŵalamulileje ŵandu. Nambo kuti yeleyi yikomboleche jwalakwe jwatendekasisye achinangolo ŵetu ŵandanda ŵali Adamu soni Hawa kuti nombe nawo amjimuchile Mlungu. Satana jwatesile yeleyi pakumsalila Hawa yindu yaunami. (Genesesi 3:1-5) Jwalakwe jwatesile yakuti Hawa aganisyeje kuti Yehofa akumjima yindu yambone. Satana jwagopolelaga kuti ŵandu mpaka asangalaleje atamose ali ngakumpikanila Mlungu. Myoyo, jwalakwe jwamlabwisye Hawa mwakumsalila kuti ngasawa. Ni ligongo lyakwe Baibulo jikusamkolanga Satana kuti, “jwa unami ni ali atati ŵa unami wosope.”—Yohane 8:44.

2. Ana Adamu ni Hawa ŵasagwile kutenda chichi?

Yehofa mwakoloŵa makono ŵapele Adamu ni Hawa yindu yejinji. Mwamti jwalakwe jwasalile jemanjaji kuti alyeje yisogosi yosope ya mu ngunda wa Edeni, nambo chitela chimope akalya yisogosi yakwe. (Genesesi 2:15-17) Nambo mwamelepe, jemanjaji ŵasagwile kulya chisogosi cha m’chitelachi. Hawa ‘ŵakaŵile chisogosi chine cha mchitelacho ni ŵalile.’ Kaneko nombe najo Adamu “ŵalile.” (Genesesi 3:6) Pelepatu wosopeŵa nganampikanila Mlungu. Ligongo lyakuti Adamu ni Hawa ŵaliji ŵamlama, yikaliji yangasawusya kuti ampikanile Mlungu. Nambo ligongo lyakuti nganampikanila Mlungu mwamelepe, jemanjaji ŵaŵele ŵakulemwa soni ŵakanile kuti Mlungu ŵalamulileje. Yaŵasagwileyi, yayikasisye yipwetesi yekulungwa.—Genesesi 3:16-19.

3. Ana yaŵasagwile Adamu ni Hawa yikutukwaya chamtuli?

Adamu ni Hawa ali alemwisye, ŵaŵele ŵangali umlama. Soni jemanjaji ŵapelele ŵanache ŵawo wosope ungali umlama wawowo. Ni ligongo lyakwe pakwamba ya Adamu, Baibulo jikusasala kuti, “Ulemwa wayiche pa chilambo chapasi ligongo lya mundu jumo, nipo ulemwawo wayiche nacho chiwa. Myoyo chiwa chijendelechele kwa ŵandu wosope.”—Aloma 5:12.

Pana magongo gejinji gagakusatendekasya kuti tusimaneje ni yipwetesi. Ndaŵi sine tukusasimana ni yipwetesi ligongo lyakuti tusagwile kutenda yindu yakulemwecheka. Nambo ndaŵi sine tukusasimana ni yipwetesi ligongo lyakuti ŵandu ŵane asagwile yindu yakulemwecheka. Konjechesya pelepa tukusasimana ni yipwetesi ligongo lyakuti tuli pa malo gakulemwecheka soni pandaŵi jakulemwecheka.—Aŵalanje Jwakulalichila 9:11, NWT.

KULIJIGANYA YEJINJI

4. Ana ŵani ŵakusatendekasya yipwetesi yetu?

Ŵandu ŵajinji akusakulupilila kuti Mlungu ni jwakulamulila chilambochi. Ana yeleyi yili yisyene? Alolele FIDIYO.

FIDIYO: Ana Ŵani Ŵakulamulila Chilambo? (1:24)

Aŵalanje Yakobo 1:13 soni 1 Yohane 5:19, kaneko akambilane chiwusyo achi:

• Ana Mlungu ni jwakutendekasya yipwetesi soni yakusakala?

5. Alole yakuyichisya ya ulamusi wa Satana

FIDIYO: Ana Ligongo Chichi Mlungu Akuyikunda Yipwetesi?—Kambali ka Fidiyo (3:07)

Aŵalanje Genesesi 3:1-6, kaneko akambilane yiwusyo ayi:

• Ana ni unami wapi waŵasasile Satana?—Alole mavesi 4 soni 5.

• Ana Satana jwasasile yamtuli yakulosya kuti Mlungu akwajima ŵandu yindu yambone?

• Ana Satana jwalosisye chamtuli kuti ŵanduwe ngaŵa kuŵa ŵakusangalala naga Mlungu akutulamulila?

Aŵalanje Jwakulalichila 8:9, kaneko akambilane chiwusyo achi:

• Ana pandaŵi jele Yehofa aŵele ali ngakulamulila chilambochi, paŵele pali mkutendekwa yamtuli?

1. Adamu ni Hawa ŵaliji ŵamlama soni ŵatamaga mu Paladaiso. Nambo jemanjaji ŵampikanile Satana ni kumjimuchila Yehofa

2. Kwimuchilaku, kutendekasisye kuti pachilambopa paŵe ulemwa, yipwetesi soni chiwa

3. Yehofa chachimasya ulemwa, yipwetesi soni chiwa. Ŵandu chachiŵasoni ŵamlama ni kutamagasoni mu Paladaiso.

6. Yehofa yikusamkwayaga patukusimana ni yipwetesi

Ana Mlungu yikusamkwayaga patukusimana ni yipwetesi? Alole yaŵalembile Mwenye Daudi soni ndumetume Petulo. Aŵalanje Salimo 31:7 soni 1 Petulo 5:7, kaneko akambilane chiwusyo achi:

• Ana akupikana uli mu mtima pamanyilile kuti Yehofa akusayiwona soni yikusamkwayaga patukusimana ni yipwetesi?

YALIJIGANYISYE

Satana ni achinangolo ŵetu ŵandanda ni ŵaŵatendekasisye kuti pachilambopa paŵe yakusakala. Nambo Yehofa yikusamkwayaga mnope patukusimana ni yipwetesi, mwamti pamkaŵapa chayimasye.

Yiwusyo Yakuwilisya

• Ana Satana jwasasile unami wapi kwa Hawa?

• Ana kwimuchila kwa Adamu ni Hawa kukutukwaya chamtuli?

• Ana tukumanyilila chamtuli kuti Yehofa yikusamkwayaga mnope yipwetesi yetu?

YAKULINGA YINESONI

Amanyilile ngopolelo ja liloŵe lyakuti ulemwa kutyochela m’Baibulo.

“Ana Ulemwa ni Chichi?” (Ngani ja pa intaneti)

Aŵalanje kuti amanyilile yejinji yakwamba ngani jaŵajitandisye Satana mu mgunda wa Edeni.

“Ligongo Chichi Mlungu Ayikundile Yipwetesi?” (Sanja ja Mlonda, Januwale 1, 2014)

Awungunye kuti apate kwanga kwakamuchisya kwa chiwusyo chakusawusya.

“Ligongo Chichi Mlungu Ŵakundile Kuti Ŵandu Ŵajinji Awulajidwe mu Ulamusi wa Nazi ku Germany?” (Ngani ja pa intaneti)

Alole yaŵalijiganyisye jwamlume jwine pakwamba ya yipwetesi yaŵayiwonaga.

Nganimba Jika (5:09)