“Mŵeje Ŵaswela”

 1. Ana Petulo jwapeleche malangiso gamtuli kwa ŵakulupilila achimjakwe? Ana ligongo chichi malangisoga mpaka gawoneche kuŵa gakusawusya kugakuya?

CHINGA tukwete chembecheyo chakwawula kwinani kapena chakutama pachilambo chapasi, kuganichisya malangiso gaŵapeleche ndumetume Petulo kwa Aklistu ŵasagulwe mpaka kutukamuchisye. Petulo jwalembile kuti, “Nambo mŵeje ŵaswela mtima mu yosope yimkusatenda mpela Mlungu jwenu juŵamŵilasile jemanja ali jwamswela. Paja yilembedwe m’Malemba kuti, ‘Mŵeje ŵaswela mtima pakuti Une ndili jwamswela mtima.’” (1 Pet. 1:15, 16) Maloŵega gakutukamuchisya kumanyilila kuti mpaka tukombole kumsyasya Yehofa jwali jwamswela. Yili yakomboleka kuŵa ŵaswela mu yitendo yetu. Nambotu yeleyi mpaka yiwoneche yangakomboleka ligongo tuli ŵangali umlama. Atamose kuti Petulo jwatesile yakulemwa yejinji, nambope chisyasyo chakwe chikusalosya kuti mpaka ‘tuŵe ŵaswela.’

 2. Ana munganiji chitukambilane yiwusyo yapi?

² Munganiji, chitukambilane yiwusyo yakuyichisyayi. Ana kuŵa ŵaswela kukusagopolela chichi? Ana Baibulo jikusatusalila yamtuli pangani jakuti Yehofa ali jwamswela? Ana mpaka tuŵe chamtuli ŵaswela mundamo syetu? Ana pana kukamulana kwamtuli pasikati pa kuŵa ŵaswela ni unasi wetu ni Yehofa?

 3. Ana ŵandu ŵajinji akusaganisya yamtuli pakwamba ya kuŵa ŵaswela? Nambi yisyesyene yakwe mpaka tuyipate kwapi?

³ Ŵandu ŵajinji pakuganichisya ya mundu jwakwete ndamo syeswela, akusaganisya ya mundu jwangaseka jwakusawala yakuwala ya dini. Nambo yeleyo nganiyiŵa yisyene. Yehofa jwali jwamswela akusamkolangaga kuti ali “Mlungu jwakusangalala.” (1 Tim. 1:11, NWT.) Nombe ŵandu ŵakusamtumichila akusakolanjidwa kuti ali “ŵakusangalala.” (Sal. 144:15, NWT.) Yesu jwajamwiche ŵandu ŵaŵawalaga yakuwala yapenani soni kutenda yachilungamo ni chakulinga chakuti ŵane ŵawoneje. (Mat. 6:1; Maliko 12:38) Aklistu ŵasyesyene akusamanyilila ngopolelo ja kuŵa ŵaswela ligongo akusalijiganya yajikusasala Baibulo. Tukusamanyilila kuti Mlungu akusatunonyela, soni kuti jwalakwe nganaŵa atusalile kutenda yindu yanganituŵa tuyikombwele. Myoyo Yehofa pakutusalila kuti, “mŵeje ŵaswela mtima,” ngatukusakayichila kuti yeleyi yili yakomboleka. Nambope, mkanituŵe kuŵa ŵaswela mundamo syetu, chandanda tukusosekwa kumanyilila yayikusagopolela kuŵa ŵaswela.

 4. Ana maloŵe gakuti “ŵaswela” gakusagopolela chichi?

⁴ Ana kuŵa ŵaswela kukusagopolela chichi? M’Baibulo, maloŵe gakuti “ŵaswela” gakusasala ya kuŵa ŵaswela mundamo soni pa kalambile ketu. Maloŵega mpaka gagopolelesoni kola yakulinga yakumtumichila Mlungu. Kuŵecheta kwine, mpaka tuŵe ŵaswela naga tukukola ndamo syambone, tukumlambila Yehofa m’litala lyakusalijitichisya, soni naga tuli najo paunasi wambone. Yili yakusangalasya kumanyilila kuti atamose kuti Yehofa ali jwamswela, nambope jwalakwe akusasaka kuti tuŵe najo paunasi.

 5. Ana yagatesile malayika gakulupichika yikutujiganya chichi pakwamba ya Yehofa?

⁵ Yehofa ali jwamswela mu chilichose. Tukusamanyilila yeleyi ligongo lya maloŵe gagaŵechete malayika gane gakolanjidwa kuti Aselafi gagakusatama chiŵandika chitengu cha Uchimwene wa Mlungu. Gane mwa malayikaga gagumilaga kuti, “Ŵaswela, ŵaswela, ŵaswela! AMBUJE ŵamachiligosope.” (Yes. 6:3) Myoyo pakusaka kuŵa paunasi wambone ni Mlungu jwawo jwali jwamswela, malayikaga gasosekwaga kuŵa geswela. Ali ni ligongo lyakwe malo gagapelechelaga malayika utenga pachilambo chapasi gasosekwaga kuŵa geswela. Yeleyi ni yayatendekwe Mose pajwaliji chiŵandika ni liwukutu lyalyakolelaga moto.—Eks. 3:2-5; Yos. 5:15.

6-7. (a) Mwakamulana ni Ekisodo 15:1, 11, ana Mose jwasasile yamtuli pangani jakuti Mlungu ali jwamswela? (b) Ana chichi chachakumbusyaga Aisalaeli kuti Mlungu ali jwamswela ? (Alole chiwulili chapachikuto.)

⁶ Mose ali ŵalongolele Aisalaeli komboka Nyasa Jechejewu, jwalakwe jwasalile Aisalaeliwo kuti Mlungu jwawo Yehofa ali jwagoloka kapena kuti jwamswela. (Aŵalanje Ekisodo 15:1, 11.) Ŵandu ŵa ku Iguputo ŵaŵalambilaga milungu jaunami nganaŵa ŵaswela. Nombe ŵandu ŵaŵalambilaga milungu ja ku Kenani nganaŵasoni ŵaswela. Kulambila kwawo kwapwatikagapo kupeleka mbopesi ŵanache soni kutenda chikululu. (Lef. 18:3, 4, 21-24; Det. 18:9, 10) Nambo Yehofa ali jwakulekangana ni milungu jelejo. Jwalakwe nganaŵa ŵasalile ŵakutumichila ŵakwe kuti atende yakusakala yiliyose yampaka yitendekasye kuti asimane ni yakusawusya. Jwalakwe ali jwamswela. Yeleyi yawonechele kupitila pa maloŵe gagaliji pa kachisyano ka golidi kajwawalaga jwamkulungwa jwa ŵakutaga mbopesi. Pakachisyanopa ŵalembile mwakusokola maloŵe gakuti, “chakupelechedwa cheswela kwa AMBUJE.”—Eks. 28:36-38.

⁷ Mundu jwalijose juŵagaweni maloŵe gagaliji pa kachisyanoka gamsimichisyaga kuti Yehofa ali jwamswela. Nambi wuli naga ŵandu ŵane ŵa ku Isalaeli nganakola upile wakulola maloŵego ligongo lyakuti nganasimana ni jwamkulungwa jwa ŵakutaga mbopesi? Ana ŵamanyililagape kuti Yehofa ali jwamswela? Elo. Ŵandu wosope ŵa ku Isalaeli ŵapikanaga maloŵega pandaŵi jichaŵalanjidwaga Chilamusi pameso pa achalume, achakongwe soni ŵanache. (Det. 31:9-12) Yikaŵe kuti wawojo ŵapali pandaŵijo, akapikene nawo maloŵe gakuti, “Pakuŵa une ndili AMBUJE Mlungu jwenu myoyo . . . mŵeje ŵaswela pakuŵa Une ndili jwamswela.” “Mtameje ŵaswela, pakuŵa Une ndili jwamswela.”—Lef. 11:44, 45; 20:7, 26.

 8. Ana tukulijiganya chichi kutyochela pa Lefitiko 19:2 soni pa 1 Petulo 1:14-16?

⁸ Uli tukambilane chenene maloŵe gane gagakusasimanikwa pa Lefitiko 19:2 gagaŵalanjidwaga kwa Aisalaeli wosope. Yehofa ŵamsalile Mose kuti, “Alisalile likuga lya Aisalaeli kuti, ‘Mŵeje ŵaswela pakuŵa une AMBUJE Mlungu jwenu, ndili jwamswela.’” Komboleka kuti Petulo jwawilisyaga maloŵega pajwasalilaga Aklistu kuti “mŵeje ŵaswela.” (Aŵalanje 1 Petulo 1:14-16.) Yisyene kuti m’weji nganituŵa pasi pa Chilamusi cha Mose. Nambo yaŵalembile Petuloyi yikusatusimichisya kuti, yatukulijiganya pa Lefitiko 19:2, yikusalosya kuti Yehofa ali jwamswela. Yikusatusimichisyasoni kuti ŵakutumichila ŵakwe akusosekwa aŵeje ŵaswela. Myoyo chinga tukwete chembecheyo chakwawula kwinani kapena chakutama pachilambopa wosopewe tukusosekwa kuŵa ŵaswela.—1 Pet. 1:4; 2 Pet. 3:13.

 9. Ana kuganichisya maloŵe ga mu Lefitiko chaputala 19 mpaka kutukamuchisye chamtuli?

⁹ Ligongo lyakuti tukusasaka kumsangalasya Mlungu jwetu jwali jwamswela, tukusasaka kulijiganya yampaka tutende kuti tuŵe ŵaswela. Yehofa akusatukamuchisya mwampaka tutendele yeleyi. Jwalakwe akusatusalila yejinji panganiji kutyochela m’buku ja Lefitiko chaputala 19. Jwamlijiganye ya Baibulo jwine jwa Chihebeli jwalembile kuti, “Chaputalachi chili chakusosekwa mnope m’buku ja Lefitiko soni mabuku gane msano gandanda ga m’Baibulo.” Kwende tulole ndime sine m’chaputalachi syasikwete mfundo syakamuchisya paumi wetu. Nambo tukumbuchile kuti mfundo syelesi sikutanda ni maloŵe gakuti, “Mŵeje ŵaswela.”

10-11. Ana pa Lefitiko 19:3 pakusala kuti tukusosekwa kutenda chichi? Ligongo chichi kutenda yeleyi kuli kwakusosekwa mnope?

¹⁰ Yehofa paŵasalile Aisalaeli kuti aŵeje ŵaswela, jwasasilesoni kuti, “Jwalijose jwa jemanja ŵachimbichisyeje babagwe ni mamagwe . . . Une ndili AMBUJE Mlungu jwenu.”—Lef. 19:2, 3.

¹¹ Kusala yisyene, tukusosekwa kupikanila malangiso ga Mlunguga gakuti twachimbichisyeje achinangolo ŵetu. Akumbuchile yayatendekwe jwamlume jwine ali amwusisye Yesu kuti, “Ana ngwenela kutenda chichi chambone kuti ngapochele umi wangamala?” Yesu paŵamjangaga munduju, ŵasasilesoni yakwamba kwachimbichisya babagwe ni mamagwe. (Mat. 19:16-19) Yesu ŵajamwichesoni Afalisi ni achimlembela ligongo lyakulepela kwachimbichisya achinangolo ŵawo. Myoyo jemanjaji, ‘ŵagachembulwisye maloŵe ga Mlungu.’ (Mat. 15:3-6) “Maloŵe ga Mlungu” gelega gakupwatikapo lilamusi lyamsano pa malamusi 10 nambosoni yatukusaŵalanga pa Lefitiko 19:3. (Eks. 20:12) Tukumbuchilesoni kuti, maloŵe gagali pa Lefitiko 19:3, gakuti twachimbichisyeje achinangolo wetu, gakwika panyuma pa maloŵe gakuti, “Mŵeje ŵaswela pakuŵa Une AMBUJE Mlungu jwenu, ndili jwamswela.”

12. Ana mpaka tukamulichisye masengo chamtuli malangiso ga pa Lefitiko 19:3?

¹² Patukuganichisya lilamusi lyaŵatupele Yehofa lyakuti twachimbichisyeje achinangolo ŵetu, tukusosekwa kuliwusya kuti, ‘Ana ngutenda wuli pambali jeleji?’ Naga akuyiwona kuti ŵasosekwaga kutenda yejinji munyumamu pakulosya kwachimbichisya achinangolo ŵawo, apano mpaka atende yakuti alinganye yeleyo. Nganaŵa achenjile yindu yayatendekwe kala, nambo apano mpaka atende yakomboleka kuti akungulucheje ni achinangolo ŵawo soni kwakamuchisya mwakuchilu, mwausimu soni mmatala gane gejinji. Yeleyi yikusakamulana ni yalikusaŵecheta lilemba lya Lefitiko 19:3.

13. (a) Ana ni malangiso gane gapi gatukusapata pa Lefitiko 19:3? (b) Mwakamulana ni Luka 4:16-18, ana masiku agano mpaka tusyasye chamtuli chisyasyo cha Yesu?

¹³ Pa Lefitiko 19:3 pakusatujiganya chindu chine pangani ja kuŵa ŵaswela. Pakusasalasoni yakwamba kuchimbichisya lisiku lyakupumula. Ligongo lyakuti Aklistuwe nganituŵa pasi pa Chilamusi, myoyo ngatukusakuya lilamusi lyakwamba lisiku lyakupumula. Nambope, mpaka tulijiganye yejinji kutyochela pa yindu yaŵatendaga Aisalaeli pakuchimbichisya lisiku lyakupumula, soni umbone waŵapataga. Lisikuli lyaŵaga ndaŵi jakupumula ku masengo gaŵakamulaga, soni ŵaŵikaga nganisyo syawo pa yindu yakwayana ni kulambila.b Lyeleli ni ligongo lyakwe nombe Yesu jwajawulaga ku nyumba ja Mlungu pa lisikuli ni kuŵalangaga Maloŵe ga Mlungu. (Eks. 31:12-15; aŵalanje Luka 4:16-18.) Lilamusi lya Mlungu lya pa Lefitiko 19:3 lyakwamba ‘kuchimbichisya lisiku lyakwe lyakupumula’ mpaka litukamuchisye kuti tupateje ndaŵi jakutendela yindu yausimu lisiku lililyose. Ana akuyiwona kuti akusosekwa kuchenga yindu yine kuti apikanile lilamusili? Naga akusapata ndaŵi jakutendela yindu yausimu, nikuti chachiŵa paunasi wambone ni Yehofa. Yeleyi yichakamuchisya kuti aŵeje ŵaswela.

14. Ana ni mfundo japi jakusajisala mwakuwilisyawilisya m’buku ja Lefitiko chaputala 19?

¹⁴ Chaputala 19 cha buku ja Lefitiko chikusasala mwakuwilisyawilisya mfundo jampaka jitukamuchisye kuŵa ŵaswela. Ndime 4 jikusamalisya ni maloŵe gakuti, “Une ndili AMBUJE Mlungu jwenu.” Maloŵega gakusasimanikwa maulendo 16 mu chaputalachi. Yeleyi yikusatukumbusya lilamusi lyandanda lyalikusati, “Une ndili AMBUJE Mlungu jwenu . . . Mkakola milungu jine, akaŵe une jika.” (Eks. 20:2, 3) Mklistu jwalijose jwakusaka kuŵa jwamswela akusosekwa kusimichisya kuti pangali champaka chisokonasye unasi wakwe ni Mlungu. Soni ligongo lyakuti tukusamanyika ni lina lyakuti Mboni sya Yehofa, tukusosekwa kuŵambala yitendo yiliyose yampaka yisakasye lina lyakwe lyeswela.—Lef. 19:12; Yes. 57:15.

15. Ana ndime sya mu Lefitiko chaputala 19 syasikusasala ya kupeleka mbopesi mpaka situkamuchisye kutenda chichi?

¹⁵ Ŵandu ŵa ku Isalaeli ŵalosyaga kuti Mlungu jwawo ali Yehofa mwakupikanila malamusi gakwe. Pa Lefitiko 18:4 pakusati, “Mtendeje yingumlamulila, ni kugakuya malamusi gangu ni kugapikanila. Une ndili AMBUJE Mlungu jwenu.” Nombe chaputala 19 chasasilesoni yindu mpela yeleyi kwa Aisalaeli. Mwachisyasyo, ndime 5-8, 21, 22 sikusasala yakwamba mbopesi sya nyama. Aisalaeli ŵasosekwaga kupeleka mbopesi syelesi m’litala lyakuti sikasakasya lina lya Mlungu. Kuŵalanga ndime syelesi mpaka kututendekasye kusachilila kumsangalasya Yehofa soni kumpa mbopesi jambone jakumlumba. Yeleyitu ni yakusatulimbikasya kutenda pa Ahebeli 13:15.

16. Ana pa Lefitiko chaputala 19 pana mfundo japi jampaka jitukamuchisye kulekanganya ŵakutumichila ŵa Mlungu ni ŵandu ŵangakusamtumichila?

¹⁶ Kuti tuŵe ŵaswela, tukusosekwa kutenda yakomboleka kuti ŵandu ŵane atuwoneje kuti tuli ŵakulekangana ni ŵandu ŵangakusamtumichila Mlungu. Kutenda yeleyi mpaka kuŵe kwakusawusya. Ndaŵi sine achimjetu ŵakusukulu, ŵakumasengo, ŵachibale ŵetu ŵangakulupilila, soni ŵandu ŵane mpaka atukanganichisye kutenda yindu yakutindana ni kulambila kwetu. Naga yili yitendekwe yeleyi, tukusasosekwa kusagula chindu chakusosekwa mnope. Ana chichi champaka chitukamuchisye kusagula mwalunda? Aganichisye mfundo jajikusasimanikwa pa Lefitiko 19:19, jajikusati, “Mkawala chakuwala chakupanganyidwa ni nguwo sya mitundu jiŵili.” Lilamusili lyalekanganyaga Aisalaeli ni ŵandu ŵamitundu jine. Masiku agano nganikuŵa kulemwa kuwala chakuwala chakola mitundu jejinji. Nambo tukusosekwa kuŵambala kutenda yindu yakusatenda ŵandu ŵane yayikusatindana ni yajikusajiganya Baibulo. Tukusosekwa kuŵambala yeleyo atamose yili yakuti ŵanduwo ali achimjetu ŵakusukulu, ŵakumasengo, soni ŵachibale ŵetu. Yili yisyene kuti tukusitwanonyela ŵachibale ŵetu soni achimjetu. Nambope yindu yatukusasagula paumi wetu yikusalosya kuti tuchimpikanila Yehofa atamose yeleyo yili yitutendekasisye kuŵa ŵakulekangana ni ŵane. Tukaliŵalila kuti kuŵa kumbali ja Mlungu jili mbali jakuŵa ŵaswela. Yeleyi mpaka yitukamuchisye naga tukulingalinga kuŵa ŵaswela.—2 Akoli. 6:14-16; 1 Pet. 4:3, 4.

17-18. Ana mpaka tulijiganye yamtuli kutyochela pa Lefitiko 19:23-25?

¹⁷ Maloŵe gakuti “Une ndili AMBUJE Mlungu jwenu” gakakamuchisye Aisalaeli kuganichisya mnope ya unasi wawo ni Yehofa. Ana yeleyi yikakomboleche chamtuli? Pa Lefitiko 19:23-25 pakusalosya yeleyi. (Aŵalanje.) Maloŵegatu gakagopolele yejinji kwa Aisalaeli paŵajinjilaga m’chilambo chiŵasalile Mlungu kuti chachapa. Naga mundu apandile yitela yayisogosi, nganasosekwaga kulya yisogosi ya m’yitelayo kwa yaka yitatu. Mchaka cha mcheche ŵasosekwaga kuŵika pajika yisogosi yosope ni kuja kuyipeleka mbopesi kwa Mlungu. Nambo chaka cha msano msyene jula jwakombolekaga kulya yisogosiyo. Lilamusili likakamuchisye Aisalaeli kupikanichisya kuti nganasosekwaga kuŵika yakusaka yawo pamalo gandanda. Jemanjaji ŵasosekwaga kumdalila Yehofa kuti chachapa yakusosechela yawo ni kuŵikaga pandanda yindu yakwayana ni kulambila. Jwalakwe akalolechesye kuti jemanjajo akwete yakulya yakwanila. Soni Mlungu ŵalimbikasisye kuti apelecheje yakupeleka ku nyumba ja Mlungu, gagaliji malo gakulambilila.

¹⁸ Lilamusi lyalikusimanikwa pa Lefitiko 19:23-25 likusatukumbusya maloŵe ga Yesu gaŵaŵechete pa Kulalichila Kwakwe kwa Petumbi. Jwalakwe jwatite, “Mkasimdandawulaga . . . kuti timlye chichi, kapena tim’mwe chichi.” Yesu jwasasilesoni kuti, “Atati ŵenu ŵa kwinani akusamanyilila kuti mkuyisoŵa yindu yeleyi.” Mlungu chachitupa yatukusasosechela, mpela mwakusatendelaga ni yijuni. (Mat. 6:25, 26, 32) Tukusamdalila Yehofa kuti chachitupa yakusosechela yetu. Soni tukusaŵa ŵakusachilila “kupeleka ya chanasa” pakwakamuchisya ŵakulaga. Tukusapelekasoni yakupeleka yakamuchisya pa mpingo. Yehofa akusalolaga yeleyi soni chachituwuchisya. (Mat. 6:2-4) Kutenda yeleyi kukusalosya kuti tukusapikanichisya mfundo jajikusasimanikwa pa Lefitiko 19:23-25.

19. Ana alijiganyisye yamtuli kutyochela pambali jeleji ja buku ja Lefitiko?

¹⁹ Tukambilene mbali syamnono kutyochela m’buku ja Lefitiko chaputala 19, soni tulijiganyisye matala gampaka tuŵele ŵaswela mpela Mlungu jwetu. Patukumsyasya jwalakwe, tukusalingalinga kuŵa ‘ŵaswela mu yosope yatukusatenda.’ (1 Pet. 1:15) Ŵandu ŵajinji ŵangakusamtumichila Yehofa akusalola ndamo syambone syatukusatendaga. Yeleyi yatendekasisye ŵane kutanda kumchimbichisya Yehofa. (1 Pet. 2:12) Nambope pana yejinji yampaka tulijiganye kutyochela m’buku ja Lefitiko chaputala 19. Mungani jakuyichisya tuchikambilana ndime sine m’chaputalachi syampaka situkamuchisye kumanyilila mbali sine paumi wetu syatukusosekwa kuŵa “ŵaswela” mpela muŵatuŵendele Petulo.