Ana ‘Kwanonyela Adani Ŵawo’ Kukusagopolelaga Chichi?
Yajikusajiganya Baibulo
Pa Ulaliki wa Yesu wa Petumbi, jwalakwe jwatite: ‘Mwanonyeleje adani ŵenu.’ (Mateyu 5:44; Luka 6:27, 35) Maloŵega gakusagopolela kuti tukusosekwa kutendaga yindu mwachinonyelo kwa ŵandu ŵakusatuŵenga kapena ŵakusatutendela yindu yangali chilungamo.
Yesu jwalosisye chinonyelo mwakwakululuchila achimmagongo ŵakwe ŵaŵamtendele yindu yangali chilungamo. (Luka 23:33, 34) Yaŵajiganyisye jwalakwe yakwamba kwanonyela achimmagongo ŵetu yikusakamulana ni yagakusasala Malemba Gachihebeli gagakusakolanjidwasoni kuti Malangano Gakala.—Ekisodo 23:4, 5; Misyungu 24:17; 25:21.
“Mpitilisye kwanonyela adani ŵenu soni kwapopelela ŵakumlagasya.”—Mateyu 5:43, 44.
Munganiji chitukambilane mfundo asi
Ana ligongo chichi akusosekwa kwanonyelaga adani ŵawo?
Mlungu ali chisyasyo chetu. Mlungu “akusiŵatendela yambone ŵandu ŵangayamika ni ŵakusakala ŵakwe.” (Luka 6:35) Jwalakwe “akusaŵalisya lyuŵa pa ŵakusakala.”—Mateyu 5:45.
Chinonyelo mpaka chimkamuchisye m’dani jwetu kuchenga ndamo jakwe. Baibulo jikusatusalila kuti patukumtendela yindu yambone mdani jwetu yikusaŵa kuti “tukumwunjichila makala gamoto pa mtwe pakwe.” (Misyungu 25:22) Maloŵe gakuwanichisyaga gakusagopolela yayikusatendekwa pakocha maganga ganegakwe ni chakulinga chakuti apanganye chisyano chambone mnope. Mwakulandanamo, naga tukuŵa ŵaumbone mtima kwa mundu jwatutumbilikasisye, mwakuwanichisya tuchijocha ukali wakwe mwakumkamuchisya kuti aŵe mundu jwambone.
Ana mpaka ŵanonyeleje adani ŵawo mmatala gane gapi?
‘Mtendeje yambone kwa ŵandu ŵakusamŵenga.’ (Luka 6:27) Baibulo jikusati, “Naga mdani jwenu jimkwete sala, mumpe chakulya. Naga jimkwete njota, mumpe mesi gakumwa.” (Aloma 12:20) Mpaka alosye mmatala gane kuti akusiŵanonyela adani ŵawo pakukamulichisya masengo maloŵe gakumanyika mnope gaŵasasile Yesu gakuti: “Yindu yimkusaka kuti ŵandu amtendele, jemanjasoni mwatendeleje yeleyo.”—Luka 6:31.
“Mpitilisye kwasosela yambone ŵandu ŵakusamtembelela.” (Luka 6:28) Tukusitwasosela yambone adani ŵetu patukuŵechetana nawo mwachinonyelo soni mwakwaganichisya atamose yili mkuti atuŵechetele maloŵe gakupweteka. Baibulo jikusati: “Mkawuchisyaga . . . yachipongwe. Mmalomwakwe, mwatendeleje yambone pa yakusakala yamtendeleyo.” (1 Petulo 3:9) Kukamulichisya masengo malangisoga kukusatukamuchisya kuti tuleche kuŵengana.
“Mwapopeleleje ŵandu ŵakusamnyosya.” (Luka 6:28) Naga mundu ŵanyosisye, ngakusosekwa kuwuchisya “yakusakala.” (Aloma 12:17) Mmalomwakwe, tupopeleje kwa Mlungu kuti amkululuchilile mundujo (Luka 23:34; Masengo 7:59, 60) Mmalo mwakuwuchisya, amlechele Mlungu kuti akamulichisye masengo malamusi Gakwe gachilungamo kwa mundujo.—Lefitiko 19:18; Aloma 12:19.
“Mpitilisye kwanonyela adani ŵenu soni kutenda yambone kwa ŵandu ŵakusamŵenga. Mpitilisye kwasosela yambone ŵandu ŵakusamtembelela, soni kwapopelela ŵandu ŵakusamnyosya.”—Luka 6:27, 28.
Aŵeje ‘ŵakuwusimana mtima soni ŵaumbone mtima.’ (1 Akolinto 13:4) Ndumetume Paulo jwagalondesisye chenene maloŵe gakuti chinonyelo, paŵakamulichisye masengo maloŵe gakulandana ni gelega nambo ga Chigiliki gakuti (a·gaʹpe) gatukusagasimana pa Mateyu 5:44 soni pa Luka 6:27, 35. Chinonyelo cha Chiklistuchi tukusachilosya kwa adani ŵetu patukutenda nawo yindu mwakuwusimana mtima soni mwaumbone mtima. Ngaŵaga mwakwatendela jelasi, ngasa kapena kwawonaga mpela kuti nganaŵa ŵakusosekwa.
“ Chinonyelo chili chakuwusimana mtima soni chaumbone mtima. Chinonyelo changatenda jelasi. Chinonyelo changalilapilila soni changalikwesya. Chinonyelo changatenda yindu yangaŵajilwa, changatenda yakusaka yakwepe, soni changatumbila. Chinonyelo changasunjila ŵane magongo. Chinonyelo changasangalala ni yindu yangali chilungamo, nambo chikusasangalala ni yindu yayili yakuwona. Chinonyelo changajasa mtima, chikusakulupilila yindu yosope, chikusajembecheya yindu yosope, soni chikusapilila yindu yosope. Chinonyelo changalepela.”—1 Akolinto 13:4-8.
Ana akusosekwa kuputa ngondo pakusaka kulimbana ni adani ŵawo?
Iyayi, pajatu Yesu jwasalile ŵakumkuya ŵakwe kuti ngakusosekwa kuputaga ngondo ni adani ŵawo. Mwachisyasyo, jwalakwe jwasalile ŵakumkuya ŵakweŵa kuti atile pandaŵi jele adani ŵawo ŵawujimuchile msinda wa Yelusalemu. Jwalakwe nganiŵasalila kuti atame nichakulinga chakuti aputane nawo ngondo. (Luka 21:20, 21) Yesu jwamsalilesoni Petulo kuti: “Mwuchisye upangawo m’malo mwakwe, ligongo wosope ŵakusakamula upanga chachawulaga ni upanga.” (Mateyu 26:52) Baibulo soni ŵakulemba mbili akusasala kuti ŵakumkuya ŵa Yesu nganajawulaga kungondo kuti akamenyane ni adani ŵawo.a—2 Timoteyo 2:24.
Nganisyo syakulemwecheka syakwamba kwanonyela adani ŵawo
Nganisyo syakulemwecheka: Chilamusi cha Mlungu chasakaga kuti Aisalaeli ŵaŵenjeje adani ŵawo.
Yisyesyene yakwe: Chilamusi nganichisalaga yeleyi. Mmalomwakwe chasalilaga Aisalaeli kuti ŵanonyeleje achimjawo. (Lefitiko 19:18) Yikuwoneka kuti liloŵe lyakuti “mnasi” likusagopolela kwanonyela ŵandu ŵane. Atamose yili myoyo, Ayuda ŵaligopolelaga liloŵeli mwakulemwecheka mwakusala kuti anonyelaneje achimsyenepe. Mwamti jemanjaji ŵaŵengaga mnope ŵandu ŵanganaŵa Ayuda. (Mateyu 5:43, 44) Nambo Yesu jwakamuchisye jemanjaji ligongo lya nganisyo syawo syakulemwechekasi mwakamuchisya masengo chisyasyo cha Msamaliya jwambone.—Luka 10:29-37.
Nganisyo syakulemwecheka: Kwanonyela adani ŵawo kukusagopolela kusangalalaga ni yitendo yawo yakusakala.
Yisyesyene yakwe: Baibulo jikusalosya kuti mpaka tumnonyeleje mundu nambo ni ngasangalalaga ni yitendo yakwe yakulemwecheka. Mwachisyasyo, pandaŵi jine Yesu jwapopelele ŵandu ŵachiwawa ŵaŵamwuleje jwalakwe. (Luka 23:34) Nambosoni jwalakwe jwawilile ŵandu ŵakulemwa atamose kuti ŵanduŵa nganapikanilaga malamusi ga Mlungu.—Yohane 3:16; Aloma 6:23.
a Buku jine (The Rise of Christianity) jiŵalembile E. W. Barnes jikusati: “Ngani sisyesyene syasyawungunyidwe mwakusamala, sikusalosya kuti kutyochela mu ndaŵi ja Marcus Aurelius [Juŵalamulile ku Roma kutyochela mu 161 mpaka mu 180 C.E.], Mklistu ngakusosekwa kuŵa msilikali; soni mundu jwatandite Chiklistu ali msilikali, ngakusosekwa kukamulaga masengo ga usilikali.”