Mtima Wawo Wakulipeleka Umlumbeje Yehofa!

1, 2. (a) Ana Elifasi soni Bilidadi ŵasasile yamtuli pakwamba ya mwele Mlungu akusawuwonela undumetume wetu? (b) Nambo ana Yehofa ŵasasile yamtuli?

YAKA yejinji yipiteyo, acalume ŵatatu ŵapite kukuŵecetana ni jwakutumicila jwa Mlungu jwakulupicika lina lyakwe Yobu. Jumo mwa acalumeŵa ŵaliji Elifasi jwa ku Temani. Jwalakwe ŵam’wusisye Yobu yiwusyo yakutesya lung’wanu yakuti, “Ana jwamlume jwamacili mpaka aŵe jwakusosekwa kwa Mlungu? Ana jwalijose jwakumanyilila yindu mpaka aŵe jwakusosekwa kwa jwalakwe? Ana jwamaciligose akusapata cilicose ligongo lyakuti mli jwakulungama?” (Yobu 22:1-3) Elifasi ŵakulupililaga kuti yeleyi nganiyiŵa yakomboleka. Jwinesoni mwa acalumeŵa lina lyakwe Bilidadi jwa ku Shuwa, ŵajonjecesye kuti ngaŵa yakomboleka kwa ŵandu kuŵa ŵakulupicika kwa Mlungu.—Aŵalanje Yobu 25:4.

² Elifasi ni Bilidadi ŵalinjile kumtendekasya Yobu kulipikana kuti akwamba kwasa macili gakwe pakumtumicila Yehofa. Acalumeŵa ŵasakaga kuti Yobu akulupilile kuti tuli ŵangasosekwa kwa Mlungu mpela mwagakusaŵela mapuluputwa, mbisu, soni nyongolosi. (Yobu 4:19; 25:6) Ana jemanjaji ŵaŵecetaga yeleyi ligongo lyakuti ŵaliji ŵakulinandiya? (Yobu 22:29) Yili yisyene kuti Yehofa ali jwamaciligose soni kuti m’wejo tuli ŵamwana pakulandanya ni jwalakwe. Naga ali penani pa litumbi kapena ali mu ndege ni akulola pasi, mpaka alole kuti tuli ŵamwana mnope soni ŵangali mate. Nambo ana ni mwakusatuwonela Yehofa patukumtumicila jwalakwe mwamtawu soni kamula masengo ga Ucimwene? Iyayi. Yehofa ŵamsalile Elifasi, Bilidadi, soni Sofali kuti akuŵeceta yaunami. Kaneko, Mlungu ŵasasile kuti ŵaliji jwakusangalala ni Yobu ni ŵamkolasile kuti “jwakutumicila jwangu.” (Yobu 42:7, 8) M’yoyo, mpaka tuŵe ŵakusimicisya kuti ŵandu ŵangali umlamawe tuli “ŵakusosekwa kwa Mlungu.”

 3. Ana Elihu ŵasasile yamtuli pakwamba yatukusatenda pakumtumicila Yehofa, soni ana jwalakwe ŵagopolelaga cici?

³ Yehofa nganamjamuka Elihu ligongo lyakuwusya kuti, “Naga mli jwakulungama, ana mkusampa cici jwalakwe [Mlungu], ana jwalakwe akusapocela cici kutyocela kwenumwe?” (Yobu 35:7) Ana Elihu ŵagopolelaga kuti yatukusatenda pakumtumicila Mlungu yili yangasosekwa? Iyayi. Jwalakwe ŵagopolelaga kuti Yehofa ngakusajegamila kulambila kwetu, soni jwangasoŵa kandu. Nambosoni nganituŵa tumtendekasisye kuŵa jwakusicila, kapena jwamacili. Mwakulekangana ni jwalakwe, yosope yatukwete cinga umbone, lunda kapena macili tukusapocela kutyocela kwa Mlungu, mwamti akusalola mwatukusayikamulicisya masengo.

 4. Ana Yehofa akusapikana wuli mumtima patukwanonyela ŵane?

⁴ Yehofa akusayiwona kuti patukutenda yindu yakulosya kwanonyela ŵakutumicila ŵakwe, tukusaŵa tuli mkumtendela jwalakwejo. Pa Miyambo 19:17 pakusasala kuti, “Jwakumtendela yambone mundu jwakulaga akumjasima Yehofa. Jwalakwe cacim’wucisya pa yosope yakutenda”. Ana lilembali likulosya kuti Yehofa akusalola cilicose catukusatenda pakulosya cinonyelo kwa ŵakutumicila ŵakwe? Ana mpaka tujile kuti Mkupanganya jwa cilambo cosope akusaliwona kuti akwete ngongole ni wosope ŵakusatenda yakulosya canasa kwa ŵakutumicila ŵakwe, mwamti cacisosekwa kwawucisya mwakwapa majali? Elo, soni Mwanace jwakwe ali pacilambopa ŵasimicisye yeleyi.—Aŵalanje Luka 14:13, 14.

 5. Ana citutagulilane yiwusyo yapi?

⁵ Mundaŵi jamunyuma, Yehofa ŵamsalile jwakulocesya Yesaya kuti akamjimile jwalakwe soni kumtumicila mwapajika. (Yes. 36:8-10) Mwakusacilila Yesaya ŵajiticisye yaŵamsalileyi. Masiku agano ŵakutumicila ŵa Yehofa ŵajinji akulosya mtima wakulandana ni wa Yesaya wakuti, “Une apano! Andumisye une!” Akusatenda yeleyi mwakukunda maundumetume gakulekanganalekangana atamose gakusawusya. Nambope, jwine mpaka aliwusye kuti, ‘Ana yangusatenda yili yana mate kusyesyene? Atamose kuti mwacanasa cakwe Yehofa angundile kuti ngamule nawo masengoga, nambo ana jwalakwe nganaŵa atesile cilicose cakusosecela kuti akwanilisye Maloŵe gakwe mwangajigalila yanasagwile kutenda mu undumetume wakwe?’ Kuti tujanje yiwusyo yeleyi, kwende tutagulilane yayatendekwe pa umi wa ŵakutumicila ŵa Mlungu ŵa mundaŵi jakala, ŵali Debola soni Balaki.

 6. Ana papali kulekangana kwamtuli pasikati pa Ayisalayeli ŵaŵatamaga kumisi ni asilikali ŵa Yabini?

⁶ Kwa yaka 20, Ayisalayeli ŵaŵele ali ‘mkutendeledwa yangalwe’ ni mwenye jwa ku Kanani lina lyakwe Yabini. Ayisalayeli ŵaŵatamaga kumisi ŵatendaga woga mnope atamose kwendajenda m’malo gakuwonecela. Acimmagongo ŵawo ŵakwete magaleta gangondo gakwana 900 gakola yisyano yakutema, nambo Ayisalayeli ŵaliji ŵangali yida yakuŵajilwa yakwakamucisya kulimbana ni acimmagongo ŵawoŵa.—Ower. 4:1-3, 13; 5:6-8.a

7, 8. (a) Ana pandanda pene, Yehofa ŵamsalile cici Balaki? (b) Ana Ayisalayeli ŵaligomece camtuli likuga lya asilikali ŵa Yabini? (Alole ciwulili cacili kundanda kwa nganiji.)

⁷ Nambope, Yehofa kupitila mwa jwakulocesya Debola, ŵamsalile Balaki mwakupikanika cenene kuti, “Mjawule mkasyungulile Litumbi lya Taboli, soni mjigale acalume ŵakwana 10,000 kutyocela mu lukosyo lwa Nafutali ni Sebuloni. Ni tinjim’wutila kwa m’mwejo Sisela jwali jwamkulungwa jwa likuga lya ngondo lya Mwenye Yabini pampepe ni yigeleta yakwe ya ngondo ku lusulo lwa Kisoni, ni cinjimpeleka m’miyala mwenu.”—Ower. 4:4-7.

⁸ Cimanyisyo cakuti pakusosekwa ŵandu ŵakulipeleka capikanice palipose. Ŵandu ŵakulipelekaŵa ŵasongene pa Litumbi lya Taboli. Mwacitema, Balaki ni ŵanduwo ŵatandite kumenyana ni acim’magongowo ku Taanaki. (Aŵalanje Oweruza 4:14-16.) Ali mkati mwakumenyanako, Yehofa ŵagwisisye ula jejinji, mwamti malogo gacenjile kuŵa matopetopepe. M’yoyo, Balaki ŵatandite kulitoposya likuga lyangondo lya Sisela kwa lutando lwelewu makilomita 24 kwawula ku Haloseti. Ali mkutila m’yoyo, ligeleta lyangondo lya Sisela lyatitimile m’matope, ni jwalakwe ŵatandite kuwutuka wapasi kwawula ku Saananimu, komboleka kuti kwaliji ciŵandika msinda wa Kedesi. Jwalakwe ŵajawile kuja kujuŵa mu tenti ja Yayeli ŵamkwakwe Hebele jwa mtundu wa Akeni. Ligongo lyakuti jwalakwe ŵapesile mnope, ŵagonile lugono lwakuwa nalo. Mwakulimba mtima Yayeli ŵam’wuleje Sisela. (Ower. 4:17-21) Pelepatu Ayisalayeli ŵagomece acimmagongo ŵawo!b

 9. Ana lilemba lya Oweruza 5:20, 21 likusasala yamtuli pakwamba ya ngondo jakulimbana ni Sisela?

⁹ Mpaka tupikanicisye cenene yakutendekwa yayisasile mu mtwe 4 wa buku ja Oweruza patukuŵalanga mtwe 5 wa bukuji. Mwambone, pa Oweruza 5:20, 21 pakusasala kuti, “Ndondwa syaputile ngondo kutyocela kwinani, sili m’malo gakwe syaputene ni Sisela. Mesi ga mu Kisoni gakokolenye wosope.” Ana lilembali likulosya kuti malayika gakamucisye Ayisalayeli pangondojo, kapena likugopoleka kuti kwinani kwagwile yineyakwe? Baibulo jangasala yeleyi. Nambope, mpaka yiŵe yakupikanika kusala kuti Yehofa ŵakulupwisye ŵandu ŵakwe mwakugwisya wula pandaŵiji soni pamaloga kuti magaleta gangondo gakwana 900 galepeleje kwenda cenene. Pa Oweruza 4:14, 15, tukusaŵalangapo katatu kose kuti Yehofa ni juŵatendekasisye kuti Ayisalayeli apunde pangondojo. Pangali atamose mundu jumo pa Ayisalayeli 10,000 ŵaŵalipelece ŵala jwakalilapilile kuti ni jwatendekasisye kuti apunde ngondojo.

10, 11. Ana “Melosi” caliji cici, soni ligongo cici ŵapocele malweso?

¹⁰ Ayisalayeli ali apundile pangondojo Debola ni Balaki ŵajimbile nyimbo jakum’yamicila Yehofa ligongo lyakwakulupusya mwakusimonjesya. Nambo cakusimonjesya cili cakuti mkatikati mwa nyimbo jawo, ŵajimbile kuti, “Lilayika lya Yehofa likuti, ‘Mumlwesye Melosi, ŵalwesye ŵandu ŵakwe, ligongo nganamkamucisya Yehofa, nganayika ni ŵandu ŵamacili kukumkamucisya Yehofa.’”—Ower. 5:23.

¹¹ Ana Melosi caliji cici? Ngatukumanyilila yisyesyene yakwe. Komboleka kuti ligongo lya malweso gaŵapocele gatendekasisye kuti Melosi akamanyika mpaka apanopano. Ana kapena waliji msinda wele ŵandu ŵakwe ŵalepele kupikanila pandanda pene cimanyisyo cakusaka ŵandu ŵakulipeleka kuti akalimbane ni Sisela? Mwine kapena waliji msinda wele Sisela ŵapitile paŵatilaga nambo ŵandu ŵakwe ŵalesile mele ngamkamula? Pakuwa ŵandu 10,000 ŵakuŵandikana nawo ŵapikene cimanyisyoci, komboleka kuti ŵandu ŵa ku Melosi ŵacipikenesoni. Agambe kwaganicisya ŵandu ŵa ku Melosi ali mkum’wona Sisela ali mkuwutuka kupita mumsinda mwawo ali jikape soni akuwoneka kuti asingalilwe. Welewutu ni ukaliji upile wawo wakumkamucisya Yehofa kwanilisya lisosa lyakwe ni kupata majali gakwe. Nambo jemanjaji paŵakwete upile wakumtendela cinecakwe Yehofa, ŵalesile ngatenda. Yaŵatesileyitu yaliji yakulekangana mnope ni yaŵatesile Yayeli juŵaliji jwakulimba mtima.—Ower. 5:24-27.

12. Ana lilemba lya Oweruza 5:9, 10 likulosya kulekangana kwamtuli kwakwapali pasikati pa ŵandu, soni ana yeleyi yikutukwaya camtuli masiku agano?

¹² Pa Oweruza 5:9, 10, tukulola kulekangana kwa ŵandu ŵaŵalipelece kuti caŵe kumbali ja Balaki ni ŵandu ŵanganalipeleka. Debola soni Balaki ŵayamicile “ŵakulongolela ŵa Ayisalayeli ŵaŵajawile mwakulipeleka yalumo ni ŵanduwo.” Jemanjaji ŵaliji ŵakulekangana mnope ni “ŵakwela abulu ŵaswela,” ŵanganasakaga kutenda undumetume wakwamba kulipeleka. Ŵandu ŵeleŵa akwasala kuti ‘atemi pa nguwo syapenani mnope,’ ni kusangalalaga ni umi soni ‘akwenda mumsewu’ pakusaka kuti akalaga. Mwakulekangana ni jemanjaji, ŵandu ŵaŵalipelece ŵala pampepe ni Balaki ŵapite mwakusacilila kukuputa ngondo ku matumbi gamaganga ku Taboli soni ku lusulo lwa Kisoni. Nambo wosope ŵaŵaliwonaga kuŵa ŵakusosekwa mnope ŵasalile kuti “aganicisye”! Elo, jemanjaji ŵasosekwaga kuganicisya mwakusokoka ya mapesa gakumkamucisya Yehofa ganganagakamulicisya masengo. M’wejisoni masiku agano, tukusosekwa kulolecesya kuti tukawujila munyuma pakumtumicila Yehofa.

13. Ana ŵandu ŵa m’lukosyo lwa Lubeni, Dani, soni Aseli ŵalekanganaga camtuli ni ŵa m’lukosyo lwa Sebuloni soni Nafutali?

¹³ Ŵandu ŵaŵalipelece ŵala, ŵaliwonele jika muŵalocesye Yehofa kuti ali Jwakulamulila Jwamaciligose. Jemanjanji ŵakwete yakuti mpaka ŵasalile ŵane pakwamba ya “masengo gakulungama ga Yehofa.” (Ower. 5:11) Mwakulekangana ni yeleyi, pa Oweruza 5:15-17 pakusasala kuti ŵandu ŵa m’lukosyo lwa Lubeni, Dani soni Aseli ŵatanganidwe ni yindu yakucilu mpela yilango, masitima soni yiko, m’malo mwakutenda masengo ga Yehofa. Nambo, ŵandu ŵa m’lukosyo lwa Sebuloni ni Nafutali “ŵaŵisile umi wawo pangosi mwamti ŵasigele panandi kuwulajigwa” pakusaka kumkamucisya Debola soni Balaki. (Ower. 5:18) Mpaka tulijiganye yejinji kutyocela pa nganisyo syakulekangana syaŵakwete ŵanduŵa pakwamba ya undumetume wakwamba kulipeleka.

14. Ana mpaka tukamucisye camtuli pa masengo ga Yehofa?

¹⁴ Masiku agano ngatukusaputa ngondo nambo tukwete upile wakulosya mtawu wetu pakukamula nawo masengo ga kulalicila. Apano pakusosekwa ŵandu ŵakusacilila kulipeleka mu likuga lya Yehofa kupundana ni kalakose. Abale, alongo soni ŵacinyamata ŵajinji akusalipeleka kutenda undumetume wandaŵi syosope wakulekanganalekangana mpela upayiniya, kutumicila pa Beteli, kutaŵa nyumba sya Ucimwene mwakwamba kulipeleka, soni kukamucisya pa msongano wa mkuli soni waupande. Aganicisyesoni ya masengo gamakulungwa gakusakamula acakulungwa ŵa mumpingo ŵali m’Makomiti Gakuŵecetana ni Ŵacipatala soni gakulolela misongano. Amanyilileje kuti Yehofa akusayamicila mtima wawo wakusacilila kutenda yejinji soni ngasaliŵalila.—Ahe. 6:10.

15. Ana mpaka tumanyilile camtuli naga mtawu wetu pakumtumicila Yehofa nganiwutanda kunandipa?

¹⁵ Jwalijose akusosekwa kuliwusya kuti, ‘Ana ngusinalecela ŵandu ŵane kuti atende masengo gejinji? Ana ngusaŵika nganisyo syangu pa yindu yakucilu m’malo mwakumalila ndaŵi jangu pakumtumicila Yehofa? Ana ngusasyasya cikulupi soni kulimba mtima kwa Balaki, Debola, Yayeli soni ŵandu 10,000 ŵaŵalipelece ŵala pakukamulicisya masengo yindu yangwete kuti namtumicile Yehofa? Naga ngusagula yakuti njawule ku msinda wine kapena m’cilambo cine kukukamula masengo ni cakulinga cakuti mbate mbiya syejinji, ana ngusaganicisya mwampaka yikwayile liŵasa lyangu soni mpingo?’c

16. Ana cici catukusosekwa kumpa Yehofa?

¹⁶ Yehofa ŵatulosisye cinonyelo pakutukunda kuti tukamule nawo masengo gakwe. Kutyocela mu ndaŵi ja Adamu ni Hawa, Satana aŵele ali mkwatendekasya ŵandu kuŵa kumbali jakwe ni kuŵenganaga ni ulamusi wa Yehofa. Nambo patukukamucisya ulamusi wa Yehofa tukusalosya kuti tuli ku mbali jakwe. Kulupicika soni mtima wetu wakulipeleka ukusamsangalasya Yehofa. (Miy. 23:15, 16) Jwalakwe akusakamulicisya masengo kulipeleka kwetu pakwanga yakusasisya Satana. (Miy. 27:11) M’yoyo, patukuŵa ŵakupikanila soni ŵakulupicika kwa Yehofa, yikusaŵa mpela kuti tukumpa yindu yambone soni akusasangalala nawe.

17. Ana lilemba lya Oweruza 5:31 likusalosya yamtuli pakwamba ya msogolo?

¹⁷ Pacangakaŵapa cilamboci cicigumbala ni ŵandu ŵakunonyela ulamusi wa Yehofa. Tukwembeceya mwalung’wanu ndaŵi jeleji. Tukusapikana mumtima mpela muŵapikanile Debola ni Balaki ŵaŵajimbile kuti, “Wawo Yehofa, acimmagongo ŵawo awulajidwe, nambo ŵandu ŵakusanonyela wawo aŵe ŵamacili mpela mwalikusaŵela lyuŵa.” (Ower. 5:31) Maloŵe gelega gacikwanilicikwa pele Yehofa cacijonanga cilambo ca Satana cakusakalaci. Ngondo ja Alamagedo pajicitanda ngasipasosekwasoni ŵandu ŵakulipeleka kuti alimbane ni acimmagongo ŵakwe. Pandaŵiji tucisosekwa ‘kwima ni kulola cikulupusyo ca Yehofa.’ (2 Mbiri 20:17) Nambo pandaŵi ajino tukwete upile wakukamucisya ulamusi wa Yehofa mwakulimba mtima soni mwamtawu.

18. Ana mtima wetu wakulipeleka pa undumetume ucakamucisya camtuli ŵane?

¹⁸ Debola soni Balaki ŵatandite kwimba nyimbo jawo mwakumlumba Yehofa Jwakwinani Mnope, ngaŵa ŵandu. Jemanjaji ŵajimbile kuti, “Ligongo lya kulipeleka kwa ŵandu, amlumbe Yehofa!” (Ower. 5:1, 2) Mwakulandanamo, mtima wetu wakulipeleka wucatendekasya ŵane kuti “amlumbe Yehofa!”